Davíð Þór Jónsson er sóknarprestur í Laugarneskirkju en á öðru tímabili í lífi hans var hann grínisti. Við veltum því fyrir okkur hvers vegna grínistar, spjallþátta- og hlaðvarpsþáttastjórnendur eru í auknum mæli farnir að tjá sig á hátt sem svipar til predikana, Hvar heyrir fólk predikanir í dag og hlutverk hvers er það orðið að predika?

Á undanförnum áratugum hefur átt sér stað ákveðin breyting í listheiminum. Æ fleiri listamenn reyna að færa sig út úr hefðbundnum rýmum listarinnar og beita sér með beinum hætti í samfélaginu, þeir nota listina sem hálfgert inngrip í ýmis önnur félagsleg rými, styðja við flóttamenn og undirokaða hópa, reyna að skapa samfélög og samfélagslegar breytingar frekar en bara listhluti. Við gætum kallað þetta þáttökulist, samvinnulist, samfélagslist eða félagslega afstöðulist. Um slíka afstöðulist verður rætt í Háskóla Íslands um helgina á málþingi þar sem erlendir og íslenskir fræði og listamenn koma saman.

Leikritið Ást og upplýsingar var frumsýnt árið 2012 í Royal Court leikhúsinu í London. Í leikritinu eru 100 persónur, leiknar af 15 manna leikhópi í mislöngum senum, sumar aðeins nokkrar sekúndur. Verkið er skrifað af Caryl Churchill sem er meðal helstu núlifandi leikskálda Bretlands. Una Þorleifsdóttir leikstjóri las leikritið þegar það kom út árið 2012. Nú á föstudaginn, 10 árum seinna, fer verkið á svið í Kassanum í Þjóðleikhúsinu. Lóa ræðir við Unu um Caryl.

Við heimsækjum Listasafn Reykjanesbæjar þar sem nú stendur yfir sýningin Minningar morgundagsins sem nemendur í sýningarstjórn við Listaháskóla Íslands standa fyrir. Vefnaður tímans, nostalgískar ljósmyndir og draumar koma meðal annars við sögu.

Gunnar Ragnarsson kíkti svo á tvær ólíkar bíómyndir. Annars vegar er það japanska myndin Drive My Car sem er tilnefnd sem besta myndin á Óskarsverðlaunahátíðinni á sunnudag og ný íslensk grinmynd: Allra síðasta veiðiferðin.

Í fimmtán ár hafði Sveinbjörn Þórðarsson hugbúnaðarsérfræðingur kvartað yfir því að allar ensk-íslenskar orðabækur væru lokaðar á bakvið greiðslugátt. Nú hefur hann loks tekið málin í eigin hendur, skannað inn 90 ára gamla orðabók, uppfært og gert aðgengilega ókeypis á netinu.

Teiknimyndateiknarinn og myndlistarkonan Sara Gunnarsdóttir er ein af þeim sem á mynd á Stockfish kvikmyndahátíðinni. Það er teiknimyndin My Year of Dicks, eða Ár mitt af tittlingum, en hún fjallar um unglingsstúlku sem hefur gert það að markmiði sínu að missa meydóminn.

25 ára afmælistónleikar Gus Gus fóru fram í Hörpu um helgina, tveimur árum of seint. Umgjörðin var vegleg, gamlir hljómsveitarmeðlimir mættu og lög af öllum plötum sveitarinnar voru leikin. Davíð Roach Gunnarsson rýnir í tónleikana og stöðu Gus Gus í íslensku menningarlandslagi.

Þær Salóme Katrín Magnúsdóttir og Rakel Sigurðardóttir gáfu út svokallaða splitt-skífu á dögunum, ásamt dönsku tónlistarkonunni ZAAR. Þær útskýra fyrirbærið plitt-skífa, sem á rætur sínar að rekja til pönktónlistar. Þessa dagana eru Salóme og Rakel að undirbúa útgáfutónleika plötunnar While We Wait, sem verða haldnir í Fríkirkjunni, föstudaginn 25. mars næstkomandi.

Sverrir Norland hefur flutt okkur pistla undanfarnar tvær vikur í pistlaröðinni Brot úr sögu athyglinnar. Að þessu sinni beinir Sverri athyglinni að lyftutónlist, Great British Bakeofff og hnakkanum á sér. Kristlín Dís Ingilínardóttir flytur okkur pistil um að verða fullorðin. Hún varð þrítug á árinu og veltir því fyrir sér hvenær hún og aðrir geta talist fullorðnir.

Við endurflytjum viðtal frá því í mars í fyrra, en þá hitti Kristján Guðjónsson Elías Arnar ljósmyndara og landfræðinema í Hljómskálagarðinum og ræddi við hann landfræðiljósmyndun, klisjuna sem er íslensk náttúra er og verkefnið hans Árstíðir Birkis, þar sem hann skoðar tengsl manns og náttúru í gegnum birkitréð. Þessa dagana sýnir Elías Arnar þessar sömu myndir en sýningin Árstíðir Birkisins stendur yfir í Skotinu í Ljósmyndasafni Reykjavíkur til 27. mars.

Nanna Kristjánsdóttir rýnir í nýjustu plötu tónlistarmannsins Kanye West, Donda 2. Platan hefur vakið umtal, en ekki endilega fyrir gæði heldur frekar fyrir þær sakir að hana er einungis hægt að hlusta á í Stem-spilara, hönnuðum og seldum af rapparanum.

Kanye West hefur þó ekki bara verið milli tannanna á fólki upp á síðkastið vegna tónlistarinnar heldur einnig vegna sífellt óþægilegri hegðunar sem á sér stað á samfélagsmiðlum. Trevor Noah, spjallþáttastjórnandi blandaði sér í málið og talaði um hegðun rapparans í þætti sínum og beindi athyglinni að þeirri staðreynd að konur sem geta ekki yfirgefið menn sína án þess að verða fyrir áreiti fyrirfinnast í öllum stéttum samfélagsins. Við veltum fyrir okkur umræðunni um hegðun Kanye West sem verður oft samtvinnuð umræðu um geðraskanir hans. Héðinn Unnsteinsson formaður Geðhjálpar rýnir í málefnið með okkur og veitir áhugavert sjónarhorn.

Á laugardag opnar sýningin Draugahundur í Gallerí Port. Þar sýnir Bjargey Ólafsdóttir listakona svarthvítar hundaljósmyndir sem eru hálfgert framhald af sýningunni Rófurass sem fór fram í Listasafni Árnesinga í fyrra. Bjargey kíkti um borð í Lestina og sagði frá áhuga sínum á hundum mætti með bókverk sem kom nýlega út hjá grískri útgáfu með Rófurass-verkunum,

Í áratug hefur Frímann Ísleifur Frímannsson verið áberandi fígúra í íslensku jaðarlistalífi, plötusnúður, tónlistarmaður, kasettuútgefandi og maðurinn á bakvið smáritið Skeleton Horse. Nú um helgina kemur fjórtánda tölublað beinagrinda-hestsins út, að venju 20 svarthvítar síður uppfullar af verkum eftir fjölbreyttan hóp listafólks.

Friðgeir Einarsson, sviðslistamaður og rithöfundur, meðlimur í sviðslistahópnum Kriðpleir, er höfundur leikrita á borð við Útlendingurinn og Club Romantica, sem hann hlaut Grímuverðlaun fyrir. Við fengum að heimsækja hann á vinnustofuna hans í Síðumúla og spjalla við hann um vinnuaðferðir sjálfstætt starfandi sviðslistamanns, sannleikan í sviðslistum og hvort hann þurfi að lúta einhverjum sérstökum siðareglum.

Við heyrum um nýja sjónvarpsþætti, Severence í leikstjórn Bens Stiller. Salvör Bergmann rýnir í þættina sem eru vísindaskáldskapur sem veltir fyrir sér stöðu vinnunnar í lífi nútímafólks.

Skáldkonan Ásta Sigurðardóttir vakti athygli og umtal í lifanda lífi, bæði fyrir listaverk sín og útlit. En eftir stutta og harmræna ævi hefur hún haldið áfram að vekja aðdáun. Í Lestinni dag veltum við fyrir okkur stöðu Ástu í íslenskri menningarsögu og hvernig hún heldur áfram að hafa áhrif á nýjar kynslóðir ungra listakvenna. Lóa ræðir við Viktoríu Blöndal og Steinunni Ólínu Hafliðadóttur.

Við heyrum um nýjustu Pixar-teiknimyndina Turning Red, Rauða breytingin, sem er fyrsta mynd fyrirtækisins sem er leikstýrt af konu. Myndin tekst á við upplifun kínverskra innflytjenda í Kanada, yfirþyrmandi pressu frá foreldrum, og breytingarnar sem eiga sér stað á kynþroskaskeiðinu. En líkami aðalpersónunnar fer skyndilega að taka miklum og vandræðalegum breytingum, í hvert sinn sem hún missir stjórn á tilfinningum sínum breytist hún í risastóra rauða pöndu. Snærós Sindradóttir, útvarpskona á Rás 2 spjallar við Kristján um myndina.

Sölvi Halldórsson flytur pistil um það að opna mjöðmina og spenna rassinn. Hann er með hugann við líkamann og þær hreyfingar sem er manninum frumlægar, eftir að hann skellti sér á námskeið í Primal Movement.

Það er um lítið annað talað í tölvuleikjaheimum þessa dagana en Elden Ring. Leikurinn sem kom út í lok febrúar hefur selst í bílförmum og fengið nánast einróma lof gagnrýnenda er nýjasta afurðin frá fyrirtækinu FromSoftware og tövuleikjahönnuðinum Hidetaka Miyasaki sem er þekktur fyrir einstaklega erfiða leiki og þar er Elden Ring engin undantekning. Nú rökræðir fólk hvort tölvuleikir eigi að vera aðgengilegir öllum eða mega þeir vera svo strembnir að aðeins þeir geta notið þeirra sem gefa sér tugi ef ekki hundruði klukkustunda í spilunina. Davíð Kjartan Gestsson segir frá.

Sverrir Norland kemur svo um borð í Lestina og flytur sinn annan pistil af fjórum um athyglisgáfuna og hvernig er stöðugt verið að grafa undan henni. Í dag skoðar hann hvernig tónlistarsjónvarpsstöðin MTV var brautryðjandi í því að selja aðgang að athygli okkar, þegar stöðin hætti að sýna bara tónlistarmyndbönd og hóf að framleiða höfundalausar sápuóperur, það sem hefur seinna fengið nafnið raunveruleikasjónvarp.

Við ræðum við Steinunni María Bragadóttir, 25 ára rappara og vloggara frá Neskaupsstað. Steinunn sem kallar sig Ztonelove gerir plötukoverin sjálf, mamma hennar tekur upp myndböndin hennar, hún kaupir takta á netinu og hún er fullkomlega sjálfsstæð. Lóa spjallar við hana um tónlistina og lífið í Neskaupsstað

Í dag eru tvær vikur frá því að innrás Rússa í Úkraínu hófst. Fréttirnir af stríðinu bárust mörgum fyrst með tik-tok myndböndum frá rússneskum hermönnum, og svo hefur heimsbyggðin nánast haft milliliðalausan aðgang að stríðssvæðinu í gegnum símamyndbönd sem er dreift á hinum ýmsu samfélagsmiðla. Stríðið hefur þannig verið nefnt fyrsta tik-tok stríðið. Í Lestinni í dag ætlum við að tala um hvernig stríðið birtist okkur á samfélagsmiðlum og netinu. Gestir eru Einar Falur Ingólfsson, ljósmyndari, myndlistarmaður og menningarritstjóri Morgunblaðsins. Þóra Tómasdóttir, fjölmiðlakona, og Jóhann Kristófer Stefánsson, tón og sviðslistamaður. Einnig er rætt við Victoriu Bakshina, nema við Háskóla Íslands.

Í byrjun vikunnar ræddi Lóa við þau Jakub Ziemann og Wiolu Ujazdowska sem eru bæði aðstandendur sýningarninnar Tu Jest Za Drogo sem er í sýningu þessa dagana á litla sviði Borgarleikhússins. Sýningin er á pólsku og spjallið fór fram á ensku, sem er þægilegasta leiðin fyrir okkur til að ræða saman.

Gunnar Ragnarsson rýnir í nýjustu kvikmyndina um leðurblökumanninn, Batman eftir Matt Reeves. Robert Pattinson fer með hlutverk Bruce Wayne í fyrsta skipti, og túlkar hann sem mjög þjakaðan emó-batman, með úfið hár og klessta andlitsmálningu að ?gothara?-sið

Við hringjum á Akranes og heyrum um hryllingsmyndahátíðina Frostbiter sem er haldin í sjötta skipti um helgina. Meðal gesta verður leikstjórinn Greg Sestero sem er þó þekktastur sem leikari í myndinni sem er oft sögð versta kvikmynd allra tíma, The Room.

Svo fáum við Sabinu Westerholm forstjóra Norræna hússins og Elham Fakouri verkefnastjóra fjölmenningarverkefnis hússins í heimsókn og þær ræða um fjölbreytileika og rasisma.