Lestin

Strákasveitin Backstreet Boys er væntanleg til landsins í næstu viku eins og mörgum er orðið kunnugt enda verða þeir með tónleika í Nýju Laugardalshöllinni þann 28. apríl. Brian Littrell, meðlimur sveitarinnar ræddi við Lestina símleiðis um uppruna Backstreet Boys, hugtakið 'Boy Band' og fyrstu ár hans í hljómsveitinni. Við heyrum einnig í forföllnum aðdáendum ýmissa strákasveita, m.a. í Binna Glee fyrrum K-Pop ofuraðdáanda og Klöru Elias, sem rekur áhuga sinn á lagasmíð til Backstreet Boys og sænska lagasmiðsins Max Martin.

Við heimsækjum listamanninn Egil Loga Jónasson í Gallerí Portfolio við Hverfisgötu. Sýningin hans 'Við erum vont fólk. Ég er vondur maður' opnaði í dag klukkan fimm. Egill, sem kemur reglulega fram sem hliðarsjálfið Drengurinn Fengurinn, er að þessu sinni ekki að flytja tónlist eða fremja gjörning, heldur sýnir hann einungis olíumálverk, sem mörg hver kallast á við lagatexta Drengsins.

Kolbeinn Rastrick segir frá þremur kvikmyndum sem hann sá á Stockfish-hátíðinni, Medusa Deluxe og Close sem báðar verða sýndar áfram í Bíó Paradís og myndina Will-O'-the-Wisp.

Það var sólríkur vordagur í dag, Kristján Guðjónsson nýtt tækifærið og gekk niður í Fossvogsdal og spurði vegfarendur, gangandi og hjólandi, hvernig vorverkin gengu og hvort þau væru nokkuð komin í vorskap.

Einn athyglisverðasti kvikmyndagerðarmaður Evrópu um þessar mundir er Úkraínumaðurinn Sergei Loznitsa. Hann hefur jafnt vakið athygli fyrir leiknar myndir sínar og heimildarmyndir, sem unnar eru upp úr gömlu myndefni frá Sovétríkjunum - myndefni sem oftar en ekki var hugsað í áróðurstilgangi fær nýtt hlutverk til að varpa ljósi á líf og dauða í landinu. Við heyrum meira um þennan kvikmyndagerðarmann sem nú er staddur á Íslandi og mun koma fram á meistaraspjalli á föstudag. Helga Brekkan segir frá.

Haukur Már Helgason rithöfundur flytur sinn þriðja pistil um tækniþróunina sem hótar núna að gjörbylta samfélaginu, gervigreind og vitvélar, og málverk. Að þessu sinni veltir hann fyrir breyskum vélum.

Af einhverri ástæðu hefur fjöldi fólks tekið upp á því að endurhorfa á þættina Girls frá árinu 2012. Við nýtum tækifærið og rifjum upp þessa þætti sem sýndir voru á HBO á árunum 2012-2017. Höfundur, leikstjóri og aðalleikkona þáttanna Lena Dunham hvarf úr sviðsljósinu um nokkurra ára skeið, en hún var af mörgum talin snillingur og kyndilberi nýrrar bylgju femínisma, af öðrum frekar sjálfhverf forréttindakona. Við veltum fyrir okkur upplifun kvenna af ólíkum kynslóðum af þessum þáttum sem fjalla um vinkonuhóp í stórborginni New York, Sex and the City aldamótakynslóðarinnar. Þó allt öðruvísi þættir, óheflaðri, gróteskari og umdeildari. Una Ragnarsdóttir, nemi í MH og Auður Jónsdóttir, rithöfundur spjalla um Girls.

Síðasta tölublað Fréttablaðsins kom út í lok síðasta mánaðar, þar með er aðeins eitt dagblað prentað hér á landi, Morgunblaðið. Eru þetta endalok íslenskrar dagblaðaútgáfu? Er öllum alveg sama? Eru hlaðvörp með sterkri afstöðu, Tiktok-fréttir og algóryþminn framtíð fjölmiðlunar?

Við ætlum að velta fyrir okkur dauða Fréttablaðsins og framtíð fjölmiðlunar, með þremur gestum, sem öll eru undir þrítugu en hafa engu að síður öll starfað í fjölmiðlum um nokkurra ára skeið. Þetta eru Snorri Másson, blaðamaður á Vísi og Íslandi í dag, Jón Þór Stefánsson, sem er atvinnulaus eftir að Fréttablaðið fór í þrot og Svanhildur Gréta Kristjánsdóttir, sem hefur starfað á Fréttatímanum, 101 útvarpi auk þess sem hún stofnaði veftímaritið Blæ fyrir tæpum áratug.

Síðasti Lestarþáttur fyrir páskafrí og ekki seinna vænna að ákveða hvað á að fara á fóninn um helgina. Kristján og Lóa velta fyrir sér páskatónlist. Mikið er til af klassískri páskatónlist en minna af popptónlist - eða hvað? Kanye West, Guðný María og Johnny Cash koma meðal annars við sögu

Við heyrum líka viðtal frá því í fyrra við Graveslime, sem er að gefa út meistaraverk sitt, Roughness and Toughness, á vínyl - 20 árum eftir að hún kom út. Plata sem hefur öðlast költstatus í íslensku þungarokki.

En við ætlum að byrja á pistli frá Hauki Má Helgasyni, rithöfundi. Í síðustu viku byrjaði hann pistlaröð sína um þá tækniþróun sem nú ryður sér rúms í samfélaginu, gervigreind og vitvélar. Þá fjallaði hann um lögmál Moores og sérstæðuna svokölluðu, singularity, en nú er hann með hugann við bók - sem strangt til tekið er ekki til - bókin um vélarnar, ímynduð bók inni í annarri gamalli bók.

Við heimsækjum HafnarHaus, nýtt skapandi rými í Hafnarhúsinu við Tryggvagötu. Gestgjafinn Arnar Sigurðsson tekur á móti okkur og sýnir okkur þetta rými sem áður hýsti ráðuneyti en er nú undirlagt skrifstofum skapandi fólks.

Hvað gerist þegar óskað er eftir því að hlé verði gert á tækniþróun? Í síðustu viku sendu málsmetandi menn úr tæknigeiranum frá sér opið bréf þar sem þeir vöruðu við þeim hraða sem þróun gervigreindar er á. Er hægt að stöðva tækniþróun? Hefur það verið gert áður. Við ræðum við Stefán Pálsson, sagnfræðing.

Patrekur Björgvinsson er nýfluttur til Hollands. Hann upplifði visst menningarsjokk þegar hann kom að klósettsiðum þar í landi og rifjar við tilefnið upp orð slóvenska heimspekingsins, Slavoj Zizkek.

Sigurhljómsveit Músíktilrauna í ár kemur frá Hornafirði og Selfossi. Hljómsveitin Fókus var stofnuð síðasta haust og er skipuð Hornfirðingunum Amylee Trindade, Alexöndru Hernandez, Önnu Láru Grétarsdóttur, Pia Wrede, skiptinema frá Þýskalandi og Selfyssingnum Arnbjörg Ýr Sigurðardóttir. Til að hljómsveitin geti æft þurfa þær iðulega að taka langar strætóferðir, 6-7 klukkustundalangar, til að komast á milli Selfoss og Hafnar.

Kvikmyndin Tár hefur vakið töluverða athygli, enda viðfangsefni myndarinnar mikið til umræðu í samfélaginu eftir vitundarvakninguna #MeToo. Hljómsveitarstjóri sinfóníuhljómsveitar, Lydia Tár, verður uppvís að kynferðisofbeldi, misnotar valdastöðu sína og brýtur á ungum og efnilegum tónlistarkonum. Höfundur og leikstjóri myndarinnar er Todd Field og aðalleikonan, Cate Blanchett, er sannfærandi Maestra. Við ræðum kvikmyndina og hliðstæður hennar í klassíska tónlistarheiminum við manneskjur sem þekkja til, tónlistarkonurnar Unu Sveinbjarnardóttur og Þórdísi Gerði Jónsdóttur.

Bandaríski dúettinn 100gecs hefur vakið athygli undanfarin ár fyrir brjálæðislega blöndu sína af fjölmörgum ólíkum tónlistarstefnum í yfirgengilegan hyper-pop hrærigraut. Fyrsta platan þeirra hét 1000 gecs og nýja platan bætir við enn öðru núlli, tíu þúsund gecs. Davíð Roach segir frá tíu þúsund gecs.

Lestin í dag er tileinkuð vídjóleigum. Nú um mánaðarmót lokar Aðalvídjóleigan á Klapparstíg og þar með lýkur 45 ára sögu vídjóleigunnar á Íslandi. Við heyrum í fastagestum, eigendum og fyrrum starfsfólki vídjóleiga í tilraun til þess að kortleggja söguna og heiðra minningu vídjóleigunnar, sem var í senn menningarstofnun, félagsmiðstöð og kvikmyndaskóli.

Reykjavíkurskákmótið hófst í Hörpu í dag klukkan þrjú. Við veltum fyrir okkur vinsældum skáks og ræðum við ungan stórmeistara í skák. Vignir Vatnar Stefánsson er 16. stórmeistari Íslands í skák, og er þar með kominn á launaskrá hjá ríkinu, nýorðinn tvítugur.

Eþíópíska nunnan Emahoy Tsegué-Maryam Guèbrou var orðin 99 ára gömul þegar hún lést á dögunum. Hún var menntuð í klassískri tónlist en snerist svo til trúar seinna á ævinni. Við kynnum okkur líf þessarar áhugaverðu konu.

Haukur Már Helgason er nýr pistlahöfundur í Lestinni. Hann mun koma til með að fjalla um tækniþróun, ekki endilega tækniframfarir. Fyrsti pistill Hauks fjallar um sérstæðuna og lögmál Moore's.

Við pælum í ástæðum þess að gervigreindar spjallmenni á borð við ChatGPT skálda nýjar staðreyndir ef þær vita ekki þær réttu. Við ræðum við Stefán Ólafsson, lektor í HR, um bullandi spjallmenni.

Davíð Roach Gunnarsson fjallar um nýjustu plötuna frá sænska tónlistarkvárnum Fever Ray, Radical Romantics.

Í gær var dagur listdansskólanna, og fyrrum og núverandi dansnemendur minntu á mikilvægi þess að á Íslandi væri metnaðarfull danskennsla. Í byrjun mars tilkynnti Listdansskóli Íslands að öllu starfsfólki skólans hefði verið sagt upp og framtíð skólans í óvissu. Við ætlum í tíma í fullorðinsballett og ræða ballett og allt það góða og slæma sem honum fylgir við fyrrum og núverandi dansnemendur.