Lestin

Leikverkið Hliðstætt fólk eftir leikhópinn Huldufugl verður frumsýnt á Loftinu 7. apríl næstkomandi, og verður það í fyrsta sinn sem leikverk innan sýndarveruleika fer fram í Þjóðleikhúsinu.Við hittum þau Nönnu og Owen sem standa að baki sýningunni og ræddum möguleika þessarar tækni.

Við kíkjum á bestu fréttaljósmyndir ársins 2021 með Vilhelm Gunnarssyni ljósmyndara á Vísi sem var um helgina verðlaunaður af félagi blaðaljósmyndara fyrir bestu mynd ársins.Við ræðum drónamyndir, íþróttir í vondu veðri og fótósjopp í fréttaljósmyndum

Sölvi Halldórsson rifjar upp manninn sem stökk út úr brennandi húsi í miðbæ Reykjavíkur, því hann var ekki að fara að láta kveikja í sér í dag. Hann setur atvikið í samhengi við hugmyndir Freud um dauðahvötina.

Forseti Úkraínu, Vólódímír Selenskí, flutti gestum Grammy-verðlaunahátíðarinnar, innblásna ræðu um stríðið í Úkraínu, þögnina og tónlist, og minnti gestina á að ekki allir tónlistarmenn geti klæðst kjólfötum og spilað á tónleikum.Við veltum fyrir okkur stjórnmálum og verðlaunahátíðum.

Á laugardag fór úrslitakvöld hinnar rótgrónu hljómsveitakeppni Músíktilrauna fram. Þetta var í fertugasta skipti sem keppnin fer fram og í fyrsta skipti sem það er ekki hljómsveit sem sigrar heldur einstaklingur, sólólistamaður. Kolbrún Óskarsdóttir er 18 ára Verslingur sem semur, pródúserar og syngur sín eigin lög undir nafninu Kusk. Kolbrún mætir í Lestina í dag.

Við heyrum svo um þriðju plötu spænsku tónlistarkonunnar Rosalia, plötuna Motomami. Nanna Kristjánsdóttir rýnir í tónlistina.

Í fréttum undanfarna daga hefur verið fjallað um uppljóstranir sænska dagblaðsins Dagens Nyheter sem hafa varpað ljósi á tengsl fyrrum yfirmanns hjá Spotify og útgáfufufyrirtækisins Firefly Entertainment. Óþekktir (og uppskáldaðir) tónlistarmenn sem tengjast fyrirtækinu virðast hafa furðulega greiða leið inn á vinsæla og ábatasama spilunarlista á Spotify - með einfalda og endurtekningasama tónlist sína. Við hringjum í Linus Larsson, tækniblaðamann Dagens Nyheter, og fræðumst um málið.

Páll er ungur ekkill sem hefur lokað sig frá samfélaginu. Allt breytist þó þegar ung kona fær hjá honum húsaskjól eftir að hafa flúið úr ofbeldisaðstæðum. Þannig hljómar upplegg nýrrar íslenskrar kvikmyndar Uglur sem verður frumsýnd í næstu viku. Leikstjórinn heitir Teitur Magnússon og vann myndina nánast upp á sitt einsdæmi.

Tónlistar- og myndlistarkonan Hayden Dunham vakti athygli árið 2014 þegar hún kom fram sem sýndarstaðgengillinn QT í frægu lagi eftir tónlistarmennina A.G. Cook og Sophie en nú hefur þessi listamaður tekið sér nýjan ham, Hyd, og hefur hún tónleikaferðalag sitt um heiminn í Reykjavík á Húrra á laugardagskvöld. Þórður Ingi Jónsson hitti Hyd í Echo Park í Los Angeles og ræddi við hana um lífið og listina.

VIð förum og hittum hættulegustu rokkhljómsveit Reykjavíkur, Skratta. Hljómsveit sem hefur verið hampað ítrekað í Lestinni og er tilnefnd til íslensku tónlistarverðlaunanna fyrir besta rokklag ársins og bestu rokkplötuna. Það er nóg að gera hjá þeim um þessar mundir en þeir munu spila á Aldrei fór ég suður um páskana og gítarleikarinn og söngvarinn Karl Torsten Ställborn sýnir myndlist sína í Gallerí Núll komandi helgi.

Gunnar Ragnarsson, kvikmyndagagnrýnandi Lestarinnar rýnir í þrjár myndir sem hann sá á kvikmyndahátíðinni Stockfish. Stockfish kvkimyndahátíðin fer fram um þessar mundir í Bíó Paradís og myndirnar sem Gunnar fjallar um heita Drive My Car, Bacurau og Aquarius. Anna Róshildur Benediktsdóttir Bøving og Magnús Thorlacius eru á sínu þriðja og síðasta ári í Listaháskólanum. Í námi sem gengur út á tilraunir á sviði, Sviðshöfundabraut. Við spjöllum við þau um það hvernig það gekk að gera sviðslist þegar ekki mátti koma saman. Einnig ræðum við útskriftaverkin þeirra, en sýningar á þeim fara fram um helgina.

Saga Garðarsdóttir þekkir það eins margir grínistar að uppistönd ganga ekki alltaf jafn vel, hvort sem það endar í löðrung eða framíkalli, getur verið áhætta að stíga á svið. Saga er með uppistand um helgina og við fengum hana til að rifja upp sín verstu augnablik á sviði.

Við rýnum líka um leikna períóduþætti um uppistandara. Salvör Bergmann segir frá sjónvarpsþáttununum The Marvelous Mrs. Maisel en fjórða þáttaröðin er komin í loftið.

Og við ræðum við færeyska rithöfundinn, tónlistarmanninn og kvikmyndagerðarmanninn Trygva Danielsen (sem einnig gengur undir rappnafninu Silvur Drongur), Hann sýnir sína fyrstu kvikmynd í fullri lengd á Stockfish-kvikmyndahátíðinni í vikunni, 111 góður dagur. Þetta er tilraunakennd mynd um það að fullorðnast í Þórshöfn - mynd sem er aðeins fimmta leikna bíómyndin í fullri lengd í kvikmyndasögu Færeyja.

Óskarverðlaunahátíðin fór fram í Los Angeles í nótt. Dröfn Ösp Snorradóttir er búsett í borginni og sá um að lýsa verðlaununum á Stöð 2 og varð vitni að því þegar leikarinn Will Smith kýldi grínistann Chris Rock, sem hafði gert ósmekklegt grín að Jada Pinkett Smith eiginkonu hans.

Nú á dögunum var tilkynnt um tilnefningar í FÍT keppninni. Þar er keppt um það besta í grafískri hönnun og myndlýsingum á Íslandi. Þar er meðal annars veitt verðlaun fyrir plötuumslög, en af fimm tilnefndum umslögum er þrjú hönnuð af sama manninum, Viktori Weisshappel. Við kíkjum í kaffi til Viktors og ræðum plötuumslög á tímum þegar stór hluti tónlistar kemur út hvorki út á plötum né í umslögum.

Og Sverrir Norland flytur sitt fjórða og síðasta brot úr sögu athyglinnar. Að þessu sinni veltir hann fyrir sér fallegum andlitum og því hvernig andlitsfarðinn öðlaðist pólitískt mikilvægi í fyrstu sjónvörpuðu forsetakappræðunum í Bandaríkjunum árið 1960. Þar sem Richard Nixon gerði þau grundvallarmistök að fúlsa við farðanum.

Davíð Þór Jónsson er sóknarprestur í Laugarneskirkju en á öðru tímabili í lífi hans var hann grínisti. Við veltum því fyrir okkur hvers vegna grínistar, spjallþátta- og hlaðvarpsþáttastjórnendur eru í auknum mæli farnir að tjá sig á hátt sem svipar til predikana, Hvar heyrir fólk predikanir í dag og hlutverk hvers er það orðið að predika?

Á undanförnum áratugum hefur átt sér stað ákveðin breyting í listheiminum. Æ fleiri listamenn reyna að færa sig út úr hefðbundnum rýmum listarinnar og beita sér með beinum hætti í samfélaginu, þeir nota listina sem hálfgert inngrip í ýmis önnur félagsleg rými, styðja við flóttamenn og undirokaða hópa, reyna að skapa samfélög og samfélagslegar breytingar frekar en bara listhluti. Við gætum kallað þetta þáttökulist, samvinnulist, samfélagslist eða félagslega afstöðulist. Um slíka afstöðulist verður rætt í Háskóla Íslands um helgina á málþingi þar sem erlendir og íslenskir fræði og listamenn koma saman.

Leikritið Ást og upplýsingar var frumsýnt árið 2012 í Royal Court leikhúsinu í London. Í leikritinu eru 100 persónur, leiknar af 15 manna leikhópi í mislöngum senum, sumar aðeins nokkrar sekúndur. Verkið er skrifað af Caryl Churchill sem er meðal helstu núlifandi leikskálda Bretlands. Una Þorleifsdóttir leikstjóri las leikritið þegar það kom út árið 2012. Nú á föstudaginn, 10 árum seinna, fer verkið á svið í Kassanum í Þjóðleikhúsinu. Lóa ræðir við Unu um Caryl.

Við heimsækjum Listasafn Reykjanesbæjar þar sem nú stendur yfir sýningin Minningar morgundagsins sem nemendur í sýningarstjórn við Listaháskóla Íslands standa fyrir. Vefnaður tímans, nostalgískar ljósmyndir og draumar koma meðal annars við sögu.

Gunnar Ragnarsson kíkti svo á tvær ólíkar bíómyndir. Annars vegar er það japanska myndin Drive My Car sem er tilnefnd sem besta myndin á Óskarsverðlaunahátíðinni á sunnudag og ný íslensk grinmynd: Allra síðasta veiðiferðin.

Í fimmtán ár hafði Sveinbjörn Þórðarsson hugbúnaðarsérfræðingur kvartað yfir því að allar ensk-íslenskar orðabækur væru lokaðar á bakvið greiðslugátt. Nú hefur hann loks tekið málin í eigin hendur, skannað inn 90 ára gamla orðabók, uppfært og gert aðgengilega ókeypis á netinu.

Teiknimyndateiknarinn og myndlistarkonan Sara Gunnarsdóttir er ein af þeim sem á mynd á Stockfish kvikmyndahátíðinni. Það er teiknimyndin My Year of Dicks, eða Ár mitt af tittlingum, en hún fjallar um unglingsstúlku sem hefur gert það að markmiði sínu að missa meydóminn.

25 ára afmælistónleikar Gus Gus fóru fram í Hörpu um helgina, tveimur árum of seint. Umgjörðin var vegleg, gamlir hljómsveitarmeðlimir mættu og lög af öllum plötum sveitarinnar voru leikin. Davíð Roach Gunnarsson rýnir í tónleikana og stöðu Gus Gus í íslensku menningarlandslagi.

Þær Salóme Katrín Magnúsdóttir og Rakel Sigurðardóttir gáfu út svokallaða splitt-skífu á dögunum, ásamt dönsku tónlistarkonunni ZAAR. Þær útskýra fyrirbærið plitt-skífa, sem á rætur sínar að rekja til pönktónlistar. Þessa dagana eru Salóme og Rakel að undirbúa útgáfutónleika plötunnar While We Wait, sem verða haldnir í Fríkirkjunni, föstudaginn 25. mars næstkomandi.

Sverrir Norland hefur flutt okkur pistla undanfarnar tvær vikur í pistlaröðinni Brot úr sögu athyglinnar. Að þessu sinni beinir Sverri athyglinni að lyftutónlist, Great British Bakeofff og hnakkanum á sér. Kristlín Dís Ingilínardóttir flytur okkur pistil um að verða fullorðin. Hún varð þrítug á árinu og veltir því fyrir sér hvenær hún og aðrir geta talist fullorðnir.

Við endurflytjum viðtal frá því í mars í fyrra, en þá hitti Kristján Guðjónsson Elías Arnar ljósmyndara og landfræðinema í Hljómskálagarðinum og ræddi við hann landfræðiljósmyndun, klisjuna sem er íslensk náttúra er og verkefnið hans Árstíðir Birkis, þar sem hann skoðar tengsl manns og náttúru í gegnum birkitréð. Þessa dagana sýnir Elías Arnar þessar sömu myndir en sýningin Árstíðir Birkisins stendur yfir í Skotinu í Ljósmyndasafni Reykjavíkur til 27. mars.