Lestin

Við hringjum til New York og spjöllum við Konráð Birgisson, eða Kid Krono, 17 ára Íslending sem semur lag fyrir rapparann Kanye West, lagið Louie Bags sem kemur út á Donda 2.

Rósa María Hjörvar flytur sinn þriðja og síðasta pistil um tilfinninguna reiði og hvernig hún birtist í menningu og stjórnmálum samtímans.

Við ræðum svo um starfsumhverfi sviðslistafólks við Karl Ágúst Þorbergsson. í gær var tilkynnt hvaða sviðslistahópar fá listamannalaun og í kjölfarið hafa sprottið upp umræður og gagnrýni um fyrirkomulag starfslaunanna meðal sviðslistafólks.

Undanfarna daga hafa Ingólfur Bjarni Sigfússon fréttamaður og Ingvar Haukur Guðmundsson tökumaður flutt fréttir fyrir ríkisútvarpið frá Úkraínu. Fréttir þeirra hafa vakið mikla athygli, fyrst þegar Ingólfur Bjarni varð klökkur í beinni útsendingu daginn sem innrásin hófst, þegar hann lýsti viðbrögðum venjulegs fólks sem þeir hittu í höfuðborginni. Síðan þá hafa reglulega birst innslög frá þeim félögum, fyrst frá Kænugarði og síðan eftir að ástandið versnaði þar, úr bílalest á þjóðveginum frá borginni, og síðan frá landamærunum þar sem fjöldi Úkraínumanna reynir að komast úr landi. Nokkuð hefur borið á gagnrýni á samfélagsmiðlum að í stað þess að varpa ljósi á ástandið, beina myndavélunum að umhverfinu og hljóðnemanum að heimafólki, hafi bjarmalönds fréttamannanna sjálfra verið helsta umfjöllunarefnið. Við ræðum við Þóru Arnórsdóttur um stríðsfréttaritun og sjálfhverfa fréttamennsku.

Við ræðum við Tönju Björk Ómarsdóttur leikkonu sem leikur íslensku kappaksturskonuna Aðalbjörgu í kvikmyndinni Vélarniður, Les Bruit des Moteurs, sem var lokamynd Franskrar kvikmyndahátíðar í Bíó Paradís. Tanja er tilnefnd til Kanadísku kvikmynda- og sjónvarpsverðlaunanna fyrir leik sinn í myndinni.

Og við heyrum pistil frá Sölva Halldórssyni um þá frómu list að bíða.

Já, ég hef hætt ýmsu í gegnum tíðina. Hætt í samböndum, hætt að borða kjöt, hætt á pillunni og nú er ég að hætta í Lestinni. Ég hef svona eiginlega verið að reyna að hætta í Lestinni í mjög langan tíma, næstum því nákvæmlega tvö ár. Ekki svo að skilja að ég hafi viljað flýja Rás 1 nei, ég var að reyna að búa til barn. En það gekk ekki þrautalaust fyrir sig.

Davíð Roach Gunnarsson fjallar um Shamir, svartan, hýran og kynsegin tónlistarmann sem sendi nýlega frá sér sína áttundu breiðskífu á jafn mörgum árum, plötuna Heterosexuality eða gagnkynhneigð.

Jaðarfréttaritari Lestarinnar, Þórður Ingi Jónsson, fjallar um villt svall-partý í L.A., nánar tiltekið tónverkið Veisla eða Feast sem var frumflutt í Disney tónleikahöllinni í síðustu viku. Þórður smyglaði sér baksviðs og spjallaði við tónskáldið Daníel Bjarnason og Víking Heiðar Ólafsson píanóleikara um þetta nýjan píanókonsert Daníels.

Drum and Bass plötusnúðahópurinn Hausar fagnar 10 ára afmæli í ár, en þeir hafa verið óþreytandi í að standa fyrir reglyulegum danstónlistarviðburðum um alla borg. Danni Croax og Bjarni Ben setjast um borð í Lestina og ræða sögu Drum and Bass tónlistarinnar, dans á tímum covid og aukna fjölbreytni í áheyrendahópnum undanfarinn áratug

Gunnar Ragnarsson rýnir í tvær ólíkar kvikmyndir, hina bosnísku Hvert ferðu, Aida? sem hlaut Evrópsku kvikmyndaverðlaunin sem besta mynd ársins 2021 og íslensku spennumyndina Harmur eftir tvo rétt rúmlega tvítuga kvikmyndagerðarmenn.

Anna Marsibil ferðast ekki með Lestinni í dag en á þessum tímum fannfergis, veðurofsa og rauðra viðvarana er viðeigandi að endurflytja innslag frá 2019 þar sem hún velti fyrir sér ástæðum þess að við elskum að tala um veðrið.

Kvikmyndahátíðin í Berlín, Berlinale er ein stærsta og virtasta kvikmyndahátíð heims, en henni lauk nú um helgina. Nokkrar íslenskar myndir og þættir voru sýndar á hátíðinni og Lestin var með útsendara á svæðinu. Ásgeir H. Ingólfsson sendir okkur berlínarpistil meðal annars um íslensku myndirnar Hreiðrið, Against the Ice og Berdreymi.

Rósa María Hjörvar flytur annan pistil sinn af þremur um tilfinninguna reiði, að þessu sinni veltir hún fyrir sér reiðifantasíum millistéttarinnar og markaðsvæðingu reiðinnar.

Og við heyrum hvað er að frétta í hinum klikkaða heimi Kanye West. Það er ekki bara ný plata sem kemur út í dag og nýir heimildaþættir á Netflix heldur einnig drama í einkalífinu og alvarlega ásakanir um ógnandi hegðun gagnvart fyrrum eiginkonu og kærasta hennar. GIssur Ari Kristinsson er einn af fjölmargra íslenskra aðdáenda sem fylgist með hverri hreyfingu rapparans.

Gestir Lestarinnar mánudaginn 21. febrúar eru Dýrfinna Benita Basalan, Darren Mark og Melanie Ubaldo. Þau hafa vakið athygli í íslensku listalífi bæði sitt í hvoru lagi - í tónlist, myndlist og fatahönnun - en einnig í sameiningu, en saman skipa þau listahópinn Lucky 3. Í verkum sínum hafa þau krufið hugmyndir okkar um þjóðerni og þjóðfélag, efnahagslegt og félagslegt misrétti, fordóma og stéttaskiptingu og vald.

Við kynnum okkur nýsjálensku kvikmyndagerðarkonuna Jane Campion sem skrifaði nafn sitt enn einu sinni í kvikmyndasögubækurnar á dögunum þegar hún varð fyrsta konan til að hljóta tilnefningu í annað sinn sem besti leikstjórinn á óskarsverðlaununum. Helga Rakel Rafnsdóttir kemur og spjallar um verk Jane Campion, m.a. The Piano sem hún elskar og The Power of the Dog sem hún elskar ekki jafn mikið.

Gunnar Ragnarsson rýnir í kvikmyndina Bergman Island, mynd sem gerist á slóðum sænska kvikmyndarisans Ingmar Bergman.

Undir lok þáttar spjöllum við svo upp rússneska dægurmenningu við Victoriu Bakshina, spjöllum um rapp, tik-tok, bíómyndir og emó-Stalín.

Ég efast um að nokkur bassaleikari hafi verið virkari undanfarinn áratug en Ingibjörg Elsa Turchi, hún hefur spilað með ótal hljómsveitum og tekið þátt í fjölbreyttum verkefnum, frá tilraunadjassi til indípopps, frá Bubba Morthens og Stuðmönnum til Sinfóníuhljómsveitar Íslands. En hún hefur einnig vakið mikla athygli og hlotið fjölda verðlauna fyrir sólótónlist sína. Ingibjörg Elsa Turchi sést um borð í Lestina, spjallar um eftirmiðdagstónleika í Mengi og nýja plötu sem hún ætlar að taka upp um helgina.

Það er komið að uppáhaldsárstíma allra íslenskra frankófíla. Frönsk kvikmyndahátíð hefst um helgina í Bíó Paradís og Ása Baldursdóttir segir frá.

Gunnar Ragnarsson sendir okkur pistil og rýnir í kvikmynd sem honum tókst að sjá áður en hann endaði í einangrun. Þrátt fyrir smit finnur Gunnar lyktina af lakkríspítsu, en bíómyndin Licorice Pizza eftir Paul Thomas Anderson lyktar reyndar aðallega af gráum fiðringi.

Eftir að ásakanir um kynferðisofbeldi á hendur Megasi birtust í Stundinni undir lok síðasta árs hefur styr staðið um listamanninn. Rætt hefur um stöðu hans sem heiðurslaunahafa, einhverjir hafa hætt að hlusta á tónlist hans sér til ánægju, en aðrir hafa farið í það að endurlesa textana með nýjum gleraugum. Í Lestinni í dag verður rætt við Þorstein Vilhjálmsson, doktorsnema í sagnfræði, sem nú á fimmtudag flytur fyrirlestur þar sem hann mun rýna í texta á þremur plötum Megasar frá 1987 og 88 og skoða viðbrögðin við þeim hér á landi, texta sem eru innblásnir af ferðum hans til Tælands þar sem hann komst í kynni við kynlífstúrisma, meðal annars með ungum tælenskum drengjum.

Þórður Ingi Jónsson fjallar um dívuna og funk-drottningina Betty Davis sem lést í síðustu viku, 77 ára að aldri.

Og við pælum í reiði, í samtímanum, í stjórnmálum og menningu. Rósa María Hjörvar flytur okkur sinni fyrsta pistil af þremur um þessa kraftmiklu tillfnningu.

Í gærkvöldi fór í loftið áttundi og síðasti þátturinn í Verbúðinni, sjónvarpsþáttum sem hafa sameinað þjóðina í nostalgíu fyrir níunda áratugnum og karpi um áhrif og gildi kvótakerfisins. Í Lestinni í dag rýnir Salvör Bergmann í þættina.

Í dag er Valentínusardagur, dagur helgaður ástinni og kapítalisma en hér í Lestinni kjósum við fremur að fagna ástinni og internetinu, nánar tiltekið Twitter þar sem nú stendur yfir niðurtalning undir myllumerkinu #regnus í fyrsta fund tveggja turtildúfna sem kynntust á forritinu. Magnús hinn færeyski sendir okkur línu og Regn, betur þekkt sem skvísumálaráðherra Twitter segir okkur ástarsöguna.

Við höldum líka upp á Akranes og ræðum við Kristján og Berg hjá nýrri útgáfu Ægisbraut sem gefur út þungt skagarokk á segulbandsspólum og stendur fyrir mis-löglegum tónleikum.