RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche Patrick Michaely, 10/10/2016



    Kennt Dir den Yoshinori Ohsumi ? Nee, also ‘t ass keng Figur aus der Nintendo-Welt. Schonns eng Kéier eppes vum David Thouless, Duncan Haldane a Michael Kosterlitz héieren ? Nee, och net? ‘t si keng Basketspiller aus der NBA! Esou Nimm wéi Jean-Pierre Sauvage, James Fraser Stoddart a Bernard Feringa wäerten Iech heechstwahrscheinlech dann och näischt soen. Also, och wann et sech vläicht esou unhéiert:  nee, ‘t si keng 3-Stäre-Käch aus Top-Restauranten ze Paräis, New York oder Barcelona.

    Ganz éierlech, virun e puer Deeg waren dës Leit och mir komplett onbekannt. An dach gehéiere se zënter Joren zu deene bekanntesten an hirer Zunft. D’lescht Woch si se dann och an den Olymp vun dëser opgeholl ginn. Elo kënnt Dir Iech et bestëmmt denken: Majo natierlech: et sinn d’Medezins, d’Physiks- an d’Chimiesnobelpräisträger vun dësem Joer. Si si fir hir jorelaang Fuerschung an esou Gebidder wéi der Autophagie vun Zellen, der theoretescher Festkierperphysik an der Entwécklung vu molekulare Maschinne belount ginn.

    Wann Der mech awer elo géift zum Beispill no de Präisträger an der Physik vun de leschte Joer froen, misst ech allerdéngs nees passen, vläicht mat Ausnahm vum extrem mediatiséierte Peter Higgs géif mir keen afalen. Ganz aneschters bei de Präisträger an der Literatur! Déi meescht kennt een tatsächlech, a bei enger ganzer Rei kënne souguer Net-Literaturexperten e Wierk mat der Persoun verbannen, a vice-versa. Dat gëllt awer net nëmme fir eng Nobelpräiskategorie wéi d’Literatur, mä och fir aner Konschtdisziplinne wéi d’Musik, d’Molerei, den Danz oder den Art contemporain. Bei der kënschtlecher Leeschtung kënnt also d’Persoun mat, bei der wëssenschaftlecher Leeschtung net. Dat huet net onbedéngt eppes domadder ze dinn, datt Wëssenschaftler vun Natur méi bescheide wieren. Et ginn och hei grouss Egoen. Mä de Kënschtler, dee steet do als Individuum, als eng Perséinlechkeet, déi Gefiller huet, se spiert, se auslieft, ausdréckt. Hie gëtt vun den Emotiounen gedroen a gëllt als kreativ. Leidenschaft pur also.

    Ganz aneschters bei de seriéise Wëssenschaften. Et gëtt allgemeng ugeholl - an do ass d’Wëssenschaftsvermëttlung net onschëlleg drun - datt Wëssenschaft gemaach gëtt vun Akademien, Universitéiten oder soss Institutioune mat groussen Equipen a risege Laboen. A wann eng Aarbecht net vun engem Dokter A gemaach gëtt, da gëtt se halt vun engem Dokter B erleedegt. Ersetzbar Fonctionnairë quasi. Wéineg Leidenschaft also.

    Mä och d’Wëssenschaft lieft vun individuelle kreative Momenter. Well Top-Fuerschung ass méi wéi just d’Entdeckung vun eppes am Mikro- oder Makrokosmos, dat just drop waart, datt een zoufälleg driwwer trëllt. Et baut een net déi klengste Maschinne vun der Welt esou wéi de virdru genannte Fransous Jean-Pierre Sauvage, de Schott James Fraser Stoddart an den Hollänner Bernard Feringa, wann een net kapabel ass déi gewinnten Denkmusteren- a kategorien ze verloossen. Mä och d’Wëssenschaftlsvermëttlung wier gutt beroden, d’wëssenschaftlech Kreativitéit méi un eenzelne Persounen an hiren Emotioune festzeman. Et versteet een nämlech net nëmme mam Kapp, mä och mam Häerz. D’Fantasie ass méi wichteg wéi d’Wëssen, huet schonns den Einstein gesot.

    * De Patrick Michaely ass vu Formatioun Biochemiker an am Naturmusée responsabel fir Ëffentlechkeetsaarbecht a Kommunikatioun.

    3 min
  • Carte Blanche Paul Kremer, 07/10/2016
    Petitoun Letzebuergesch

    Stellt iech fir, am Frankräich géif eng grouss Volleksbewegung fuerderen: Franséisch als Landessprooch, oder an Däitschland: Mir sollen däitsch léieren kënnen, schwätzen a schreiwen. Mir géifen de Kapp  rëselen. A wa mer et d’selwecht bei eis wëllen hunn, wéi si mat Recht bei sech – gehéieren mer dann op de rechten, populistesche Rand vun der Gesellschaft?
    Wuelverstan: Jo. Wuelverstan: also: richteg, a net falsch verstan. A grad sou: de rechte “bord”, also: deen, wou a wéi et sech gehéiert – an da si mer och gären “populistesch”, wat jo heesche soll: eben wéi d’Vollek. – “Wir sind das Volk” hu se mol do iwwer geruff, a mir hunn dat, zu DDR-Zeiten, gebührend bewonnert.
    Am schéinsten awer vun alle Grossherzogtimmer soll dat eng Zoumuddung sinn: och nach juristesch Texter op lëtzebuergesch ze handhaben, an zwar: zerguttst. – “Dat geet jo net”, mengen sécher francophon Affekoten oder schei Magistraten.
    Analog gouf virun 30, 40 Joer och nach zur Philosophie gesot, dass där hier Fachsprooch, sou wéi déi juristesch, ze “sperrech” wier, fir op Cliärwer, Veiner oder Iechternocher iwwersat ze ginn – sou laang, als bis e jonken Denker an en interesséierten Redakter et zesummen dach gemaach hunn. – Sot kengem et: dee Redakter ass well Patron hei am Betrieb. ‘D goung, an d’Leeschtung vun deemools, ass haut, wéi Handy oder Internet: eng Banalitéit, och wa se, ier s’erfont waren, fantastesch science-fiction war.
    Also: Lëtzebuerg, plus Lëtzebuergesch de Lëtzebuerger. Blouss een Zousaz sief erlaabt: dann awer och am Eescht, a w.e.g. e Lëtzebuerger Wuert do, wou eent ass, a net aus Bequemlechkeet – oder fahrlässeger Faulheet, dach e franséischt...


    2 min
  • Carte Blanche Jean Huss, 05/10/2016
    Nach an dësem Mount Oktober soll nom Wëllen vun der EU-Kommissioun a vum Här Juncker den hefteg ëmstriddenen Fräihandelsvertrag Ceta mat Kanada ofgeschloss ginn an esouguer schonns provisoresch Akraafttrieden, an dat
     
    -          Obschonns nach eng ganz Parti inhaltlech a juristesch Froen ongeléist bleiwen
    -          Dat nach ier d’Parlamentarier déi komplett Texter konnten analyséieren an diskutéieren
    -          An dat och obschonns déi gesamt national wéi europäesch Zivilgesellschaft géint dëst skandaléist ontransparent an ondemokratescht Virgoen protestéiert.
     
    Léiw Nolauschterinnen an Nolauschter
    Trotz allen beschwichtegenden Argumenter oder Pseudoargumenter vum Här Asselborn an aneren Politiker ass fir mech 100% kloer, dass déi 2 grouss Fräihandelsverträg Ceta mat Kanada an TTIP mat den USA eenzeg an alleng den Interessen vun deenen gréissten internationalen Industrien a Banken op beide Säiten vum Atlantik entspriechen.
    Duerch nei Bestëmmungen a Regelungen a béiden Fräihandelsverträg riskéieren nämlech vill dringend noutwendeg Verbesserungen um Gebid vun Ëmwelt- a Gesondheetsschutz oder vun Léin a sozialer Sécherheet verhënnert, op Joeren eraus ausgebremst oder verwässert ze ginn.
    Déi ëmstriddenst nei Bestëmmungen sinn dobäi sécherlech d’Klorechter vun groussen auslänneschen Konzerner virun sougenannten Investoren-Schutz-Tribunaler géint Staaten, Regiounen oder Gemengen mee och e neien an total ontransparenten sougenannten „Regulatoreschen Koordinatiounsrot“ tëschent der EU a Kanada oder den USA, den schonn am Virfeld iwwert nei gesetzlech Initiativen a Regelungen soll beroden, an dat, ier déi demokratesch gewielten Volleksvertrieder doriwwer iwwerhaapt informéiert ginn.
    An der Kritik vun der Zivilgesellschaft steet berechtegterweis och de Risk, dass eisen souwisou nach relativ schwaachen europäeschen Virsuergsprinzip tendenziell a Fro gestallt gëtt oder dat eng Rei vun absolut schwammegen juristeschen Begrëffer, gréisser Risiken fir eis ëffentlech „Services public-en“ an eis Liewensqualitéit kennen duerstellen.
    Dat alles wéi gesot, eenzeg an alleng am Profitintérêt vun all deenen groussen Konzerner aus Agrar-, Chimi-, Auto-, Pharma- a Finanzindustrie, déi eis an den vergaangenen Joren bekanntlech ëmmer erëm belunn an bedrunn an een Skandal op den aneren produzéiert hunn.
    Léiw Nolauschterinnen
    Aus laangen politeschen Erfahrungen wësse mer och, dass all déi nei Verspriechen vun Wirtschaftswuestum, vun méi Aarbechtsplazen, vun méi héijen Léin a méi Wuelstand, déi duerch Ceta an TTIP sollen méiglech ginn, net nëmmen op ganz wackelegen Féiss stinn, am Géigendeel duerch nei Fusiounen oder Produktiounsverlagerungen op béiden Säiten vum Atlantik wäerten Konzentratiounen a Rationaliséierung vun der Produktioun zouhuelen an éischter zu Arbeschtsplazverloschter a Präkariséierung vun der Aarbecht feieren.
    Dofir léif Nolauschterer
    Plädéieren ech haut, esou laang all dës Risiken am Raum stinn, fir e kloren NEE zu Ceta an TTIP!
    An dofir wäert ech och dësen Samschden ab 10 Auer, hoffentlech zesummen mat ville vun Iech, géint Ceta an TTIP an der Stad manifestéieren.

    3 min
  • Carte Blanche, Magali Paulus, 03/10/2016
    Gereest sinn ech ëmmer gär zanter dass ech kleng sinn. Mam Fliger, mam Zuch, mam Auto, mam Vëlo, egal wei an egal wouhin, Haaptsaach fort an nei Géigenden, Kulturen a Mënschen entdecken. Ech ka mech nach erënneren wei et Grenzen an Europa goufen, wa mer mam Auto op der Grenz stoen bliwwen sinn fir den Douanieren Pabeieren zeweisen. Dat ass laang hier an vill Leit zu Lëtzebuerg kennen sech vlaischt guer net méi drun erënneren.
    Virun 2 Wochen war ech zu Madrid. Ech sinn um Findel an den Fliger geklommen an hunn do virun der Securitéitskontrol kuerz meng Carte d'Identité gewisen an duerno net méi weder zu Frankfurt nach zu Madrid. Vill Mënschen op der Welt kennen sech dat net virstellen wat dat eng Chance ass déi mir Europäer hunn, well et Visionären gouf déi 1985 op engem Schëff op der Musel bei Schengen Accorden ënnerschriwwen hunn. Des Accorden sinn elo vu populisteschen, konservativen, demokratesch gewielten an esouguer sozialisteschen Politiker a Fro gestalt an deelweis opgehuewen ginn a keen reecht sech op, keen geet an d'Strooss, well mir Europäer eis « schützen » mussen, well mer Joerhonnerten laang all déi aner Populatiounen op der Welt ausgenotzt an ausgeblutt hunn an elo iwwerrascht sinn, dass vill vun hinnen aus purem Desespoir op eis Grenzen kommen an Schutz sichen…
    Mee mir stellen eis keng Froen méi iwwert Gerechtegkeet. Sozial a Steiergerechtegkeet sinn inexistent an den meeschten Rieden. Mir ginn zougeschott vun Neiegkeeten, vun Entertainment, fir dass mer nëmmen net méi nodenken. Den ganzen Summer war den Haaptbegreff den Burkini, mee dass 3100 Leit an 8 Méint am Mëttelmier gestuerwen sinn dat geet jo keen eppes un, mee eis Fräiheeten sinn duerch en Kleedungsstéck bedreeën.
    Mee et ass net alles negativ. Wei ech elo zu Madrid war hunn ech mech mat Leit aus Spuenien, Portugal, Bulgarien, Slowenien, Zypern, Malta, Ungarn, Eistreich, Däitschland a Benelux zesummegesat fir un engem europäeschen Projet zeschaffen fir d'éducation à la citoyenneté an all deenen Länner zestärken. Well et ass andeems Bierger sech responsabiliséieren, sech hirer Plaz an hiren verschidden Gesellschaften bewosst ginn an sech sozial engagéieren, dass mer kennen op eng méi gerëscht an eng méi friddlech Welt hoffen. Et ginn ëmmer méi Leit déi sech beméien Brécken statt Maueren zebauen.
    Et ass nëmmen an deems mer eis Grenzen opmaachen an den Mënschen erlaben an Dignitéit a Sécherheet e gutt Liewen ze sichen, well se an hirer Heemecht keng Perspektiven an mënschewierdeg Méiglechkeeten hunn, dass mer deem Europa, dat mer viru 70 Joer gegrënnt hunn, gerëscht ginn.

    3 min
  • Carte Blanche Robert Goebbels, 28/09/2016


    Eng Petitioun freet d’prioritär Benotzung vu Lëtzebuergesch. D’Gesetzer, d’ Reglementer, d’ Gericht-Urteeler, all offiziell Dokumenter missten op Lëtzebuergesch sinn. Si dierften zwar laut de Reaktionären op Franséisch an Däitsch iwwersat ginn. Awer déi éischt Sproch am Ländchen misst ëmmer an iwwerall „Lëtzebuergesch“ sinn.

    Ugeholl, d’Chamber géif dësem Wonsch entspriechen? Watt géif sech a Wierklechkeet änneren?

    Mir hätten weider e Land mat demnächst 600.000 Awunner, dovunner kaum d’ Halschent Stacklëtzebuerger. Mir hätten weiderhin een Aarbechtsmaart vun iwwer 400.000 Leit, mat enger Majoritéit vun Auslänner, dorënner 170.000 Frontalier.

    Mir missten weiderhin mat all dësem Leit schwätzen, op Däitsch, Franséisch, Englesch. Well ouni d’Auslänner zu Lëtzebuerg näischt méi funktionéier.

    Wann ons Administratioun, wann ons Gerichter nëmmen mat Lëtzebuergesch géifen schaffen, missten awer all offiziell Dokumenter iwwersetzt ginn. Wo ass de Gewënn?

    Mir géifen Joren brauchen, fir de Mémorial, fir d’Jurisprudenz, fir den Acquis Communautaire op Lëtzebuergesch ze iwwersetzen. Fir dann festzestellen,  dass mer am Ëmgang mat eisen Noperen a mat der Europäescher Union alles nees op Däitsch, Franséisch oder Englesch iwwersetzen missten.

    Den Patriotismus an Éieren. Mais d’ Lëtzebuergesch ze verhellegen, féiert eis iergendwou hin.

    D’ Stäerkt vun eisem Land ass d’ Villsproochegkeet. All  kleng Länner mat eegener Sproch, Island, Irland oder Malta, gebrauchen aner Sproochen, meeschtens Englesch, fir sech international ze behaapten. Mir liewen am däitschen an am franséischen Kulturkrees. Mir mussen weiderhin mat eisen Noperen schwätzen. Mat Lëtzebuergesch kommen mer net bis op Tréier oder Metz.

    Et sief dann, verschidden Petitionären wellten sech duerch ons Sproch vun den Auslänner ofschotten, an d’Auslänner vergraulen.  Zeréck zur gudder aller Zäit vum 19. Jorhonnert, wou mir zu 200.000 echt Lëtzebuerger waren. Di sech leider net selwer ernähren konnten an zu Zéngdausenden ausgewandert sinn.

     Lëtzebuergesch ass iwwregens eréischt mat der Integratioun an d’Europäesch Union eng Kultursproch ginn. D’ Lëtzebuerger Kulturszene ass haut räich. Et gouf nach ni esou vill Literatur, Theater, Lidder, Kino an aner Konscht op Lëtzebuergesch, ewéi grad elo. Fir wat also déi Opreegung em eis Sprooch? Si ass net bedrot. A Gefor ass nëmmen dat gutt Zesummeliewen am Ländchen.

    3 min
  • Carte Blanche Laurent Schley, 26/09/2016



    Haut fänken ech mol eng Kéier mat engem Zitat aus de Krëschten hirem hellege Buch un, der sougenannter Bibel, där jo och eis Katholike misste follechen. Do steet am Matthäus-Deel Folgendes: „Ihr könnt nicht Gott dienen und dem Mammon.“ Am Resumé: Gott oder Goss. Mee net di zwee. Méi dozou spéider.

    D’Diskussioun iwwert d’Reform vun de Kierchefabricken ass also voll am gaangen. Den Daachverband vun de Kierchefabricke Syfel schéisst schaarf ronderem séch, d’Kierchefabrick Hollerich schéisst géint de Katholikechef Hollerich, an d’CSV schéisst mat hire chrëschtleche Kanounen op di béis DP-LSAP-déi Gréng-Regierung.

    Wat genau wëllt di Regierung da sou Schlëmmes maachen? Am Resumé geet et drëm, archaesch Kierchestrukturen ofzeschafen, di 1809 geschafe goufen, säithir eng ganz Rei ongerechtfäerdegt Privilegie genoss hunn, de Steierzueler em vill Suen erliichtert hunn, an sech virun allem duerch e Mangel u Kontroll an Transparenz am finanzielle Volet ausgezeechent hunn. D’Regierung wëllt Kloerheet an Transparenz an den Dossier bréngen; d’soll gekläert ginn, wat fir ee Kierchegebei wiem gehéiert. D’Kierch soll an Zukunft am Plaz vum Steierzueler fir déi Kierchen, di hier gehéieren, selwer opkommen. D’Suen an d’Lännereien, di di 285 Kierchefabricken an deenen 200 Joer ugesammelt hunn, sollen an ee Fong kommen, dee wuel vum Bistum geréiert, awer och vum Staat kontrolléiert gëtt.

    A géint déi geplangten Transparenz gëtt sech elo aus Kierchekreesser op eemol hefteg gewiert, virun allem ebe vum Syfel. Wat genau gëtt et dann do ze verstoppen, léiwe Syfel? Gëtt iere gefaart, dass do zweiwelhaft Finanzoperatiounen zum Virschäi komme kéinten? Oder geet et einfach drëm ze verhënneren, dass eng Gesamtzomm vum Räichtum vun deenen 285 Kierchefabricken ëffentlech gëtt an domadder ville Leit hei am Land d’An aus dem Kapp géife falen?

    De Combel vun der Hypokrisie awer dierft sinn, dass vu Säite vum Syfel an d’Welt gesat gëtt, dass deen neien Text géing géint de Prinzip vun der Gemengenautonomie verstoussen. Iwwer 200 Joer laang hunn d’Gemenge missen deenen 285 Kierchefabricken hiren Defizit bezuelen, sech missen em den Ënnerhalt vu gréisstendeels eidele Gebaier këmmeren, di hinnen a verschiddene Fäll mol net gehéiert hunn, missen dem kathoulesche Paschtouer eng Wunneng zur Verfügung stellen. Millioune Steiergelder sinn sou an d'Kierch gefloss. Ob d'Gemenge wollten oder net. Wou, léiwe Syfel, war dann do d’Gemengenautonomie? A ween aus äre Kreesser huet sech dorunner gestéiert, dass ebe grad keng Gemengenautonomie do war?

    Trotz där ganzer Hypokrisie sinn ech perséinlech frou, dass dee Syfel sech gegrënnt huet an oppe seng Meenung seet. Dat am Sënn vun der Demokratie hei am Land, mee virun allem och am Sënn vun der Transparenz betreffend dem kathouleschen Donschtkrees seng Zieler. Well kann een net aus deem ganzen Theater ronderem d‘Kierchefabricke eppes kloer eraushéieren? Weisen d’Kiercheleit net glaskloer, dass si bei der Fro „Gott oder Goss?“ hire Choix gemaach hunn? Ass dee fiktive Gott net eendeiteg just Mëttel zum Zweck, a geet et a Wierklechkeet net exklusiv em dee ganz reale Goss, em Suen, em Mënz, em Fric? Déi Froen ka sech wuel elo jidfereen hei am Land selwer beäntwerten.

    Allianz vun Humanisten, Atheisten an Agnostiker Lëtzebuerg a.s.b.l. (AHA), www.aha.lu

    Member International Humanist and Ethical Union (IHEU)
    Member European Humanist Federation (EHF)
    Member Alliance for a Secular Europe
    Member Cercle de Coopération des Associations laïques (CCAL)

    3 min
  • Carte Blanche Robert Dennewald, 23/09/2016

    All Euro deen mer iwwert den Aussenhandel an’t Keess kréien bedeit méi PIB fir Lëtzebuerg. Dat heescht méi Geld fir auszeginn a méi Salairen, méi Marge fir ons Entreprisen an awer och méi Steieren fir onsen Staatsapparat fir ënnert Anerem  onsen generéisen Sozialmodell an eis Infrastrukturen ze finanzéieren.
    Lëtzebuerg mat sengen 575 000 Awunner ass ze kleng fir dat ze consomméieren wat mer produzéieren. Onsen Konsum stellt kaum 30 Prozent vun onser Wirtschaftsleeschtung duer. An aneren Länner ass dësen Konsum undeeleg oft méi ewéi duebelt esou héich. Anerersäits stellt den Ënnerscheed vun Export an Import 36% vun der Wirtschaftsleeschtung duer, esou dat den Räichtum vun onsem Land méi staark vum Aussenhandel ofhänkt ewéi vum Konsum vun den Lëtzebuerger Stéit.
    Definitiv: Mir sinn an enger ganz anerer Situatioun ewéi déi meescht aner Länner. Mir sinn vill méi staark  vum Aussenhandel ofhängeg wei déi aner Länner, déi sech op hiren internen Maart verloossen kennen. D’Zuelen schwätzen fir sech: 80% vun onser nationaler Produktioun gëtt exportéiert, bei der Industrie sinn et esouguer 90%. Laut der Bréisseler Kommissioun hänkt bei eis 1 Aarbechtsplaz vun 3 direkt vun dem Export an den europäeschen Bannemaart of, an d’Lëtzebuerger Exporter ausserhalb Europa sécheren 100 000 Aarbechtsplazen zu Lëtzebuerg.
    Eng oppen Weltwirtschaft ass esou de Carburant vun eisem Wuelstand. Dofir musse mir eis fir oppe Mäert asetzen. Eben well den Aussenhandel vun esou enger eminenter Wichtegkeet fir eis Wirtschaft ass, huet d’Politik d’Flicht fir duerfir ze suergen, datt d’Rahmebedingungen esou sinn dat den Aussenhandel och an Zukunft den Stellewäert kritt deen en haut huet an deen e verdéngt. Lëtzebuerg hätt an dem Zesummenhang e staarken, jo villäicht den éischten Verfechter vun internationalen Ofkommessen ewéi den TTIP missen sinn, amplaz dach staark dem Drock vun Jänni an Männi nozeginn, besonnesch wou d’USA, no Europa, den éischten Handelspartner vun Lëtzebuerg sinn. D’Politik muss och an dem Zesummenhang duerfir suergen dat de mëttelstännegen Entreprisen den Zougang zu auslänneschen Mäert vereinfacht gëtt, ewell et sinn genau des Betriber déi an der Zuel 99,5% vun allen Lëtzebuerger Betriber duerstellen, an sech oft schwéier dinn am Export aktiv ze sinn. Et sinn si déi, déi mir mussen op den internationale Mäert positionéieren. Déi sougenannten „déck“ si schonn do.
    Mee d’Betriber mussen och hiert Schicksal selwer an’t Hand huelen an aktiv duerfir suergen, dat hiren Exportundeel weider wiisst. Ewéi d’Statistiken et weisen ass dat glécklecherweis den Fall. Et ginn awer och stänneg nei Mäert op der Welt op an do heescht et mat deenen éischten derbäi ze sinn. D’Chamber de Commerce spillt hei eng eminent wichteg Roll, andeems se Joer fir Joer ënnert anerem eng Dosen Wirtschaftsmissiounen organiséiert, wou d’Entreprisen nei Mäert prospekteieren, an nei Kontakter knëppen kennen. Des Wirtschaftsmissiounen sinn fir all Betriber op. Déi nächst fënnt Enn Oktober am Iran statt, en Maart de mat dem rezenten Ophiewen vum Embargo grouss Potentialer  ubidd, an ganz offen fir Lëtzebuerger Betriber an hiren Savoir-faire ass. Den Handel, déi eenzeg Garantie fir de Wuelstand vu Lëtzebuerg., Avis aux Amateurs!

    3 min
  • Carte blanche économique mat PWC 18h20, 21/09/2016
    Carte Blanche Economique – PwC – 2016/2017 – Nummer 1: Ongleichheet zu Lëtzebuerg

    RTL: Zu Lëtzebuerg gëtt et jo den “Luxembourg Income Study”, eng Institutioun, déi vill Leit wéineg kennen, an déi seit 1983 Donnéen sammelt iwwer Besetz an Akommes. Wei kann een d’Entwécklung vun der Ongleichheet zu Lëtzebuerg op Basis vun deenen objektiven Donnéen beschreiwen?
    François Mousel: Mir hunn zu Lëtzebuerg an den ’80 er Joeren eng Situation vun extreemer Glaichheet gehaat, wann een se mat där an aaneren Länner vergläicht. Vill Leit hunn daat intuitiv gespuert: et gouff wéineg extreem “flamboyance” an et gouff relativ wéineg Leit ennert der Aarmutsgrenz. Duerch dei staark Immigratioun hunn mer dunn souzesoen Ongleichheet importéiert, well d’Immigratioun entweder weineg qualifizéiert oder ganz héig qualifizéiert war.
    RTL: Wéi war den Impakt op dei einheimesch Lëtzebuerger Awunner?
    François Mousel: Am Ufank ass et den Lëtzebuerger Awunner am Duerchschnëtt relativ gudd gaangen an hier Ongläichheet war manner grouss wéi déi vun den Immigéierten. Gudd Aarbechtsplaatzen, z.B. bei Staat, Para-Staat oder an den Banken an en héigen Prozentsaatz vun Propriétairen bei der Wunnimmobilie hunn zu engem Gefill vun relativem Wuelstand beigedroen. Waat seit 10-15 Joer ännert ass d’Entkopplung vun Akommes an besonnesch den Hauspräisser, déi Ongleicheet duerch Ierfschaft geschaafen huet, d.h. ouni Ierfschaft (oder soss finanziell Hëllef) gëtt et ëmmer méi schwéier, fir Jonker Wunnraum ze kaafen.
    RTL: Waat huet daat als Konsequenz?
    François Mousel: D’Konsequenz ass en allgemengt Gefill vun senkendem Wuelstand bei den Lëtzebuerger Awunner, waat schnell zu der Beschëllegung vun Auslänner oder dem Finanzsecteur féiert – also e latent Polverfaass. Bezuelbaren Wunnraum ass dofir déi gréissten politesch Erausfuerderung déi eist Land huet. Woubai et nëmmen eng Stratégie kann ginn: d’Offer vun Wunnraum ze erhéigen, durech méi Fläch, déi méi dicht kann bebaut ginn. Deem sinn menger Meenung awer kloer Grenzen gesaat, well mer jo och net wëllen dass d’Bild vum Land rakikal ennert an dofir wärten mer mussen acceptéieren, dass och Lëtzebuerger nach vill méi verstärkt an der Groussregioun wunnen an/oder signifikativ méi Lounen ewei kaafen.

    2 min
  • Carte Blanche Paul Estgen, 21/09/2016


    Generell gesinn maachen mer jo zu Lëtzebuerg ganz vill vir den Accueil vun den Demandeurs de protection international, den offiziellen Term vir all déi Leit déi hei zu Lëtzebuerg eng Demande maache, vir unerkannten Flüchtling ze ginn. Während der Zäit wou hir Demande ënnersicht gëtt , sinn se an Foyer ënnerbruecht, ginn medezinesch versuergt an se hunn och d’Méiglechkeet vir an Sproochecoursen ze goen. Eng Hellewull vun Initiativen hëllefen hinnen och um Wee vir sech sozial an kulturell ze integréieren.
    Den Problem gëtt awer méi komplex wann des Léit bis hiren Statut kruten. Vereinfacht ausgedréckt sinn Si dann, wei all anere net Eu-Auslänner och, ugewisene vir eng Aarbecht an en Logement ze fannen an eleng eens ze ginn.
    Dat ass natierlech net sou einfach, well vill vun hinnen nach net ganz laang zu Lëtzebuerg sinn, an sech dann all Handicappen additionéieren. Déi meescht kennen weder Franséisch nach Lëtzebuergesch, sou dass et extrem schwéier gëtt vir direkt eng Aarbecht ze fannen, wat awer d’Konditioun ass vir och eng Wunneng kennen ze lounen.
     
    An där Situatioun bleift hinnen dann oft keng anere Alternative wei den RMG unzefroen. Dat ass awer net déi richteg Léisung , well d’Leit , sech net bewosst sinn dass se eigentlech vun Sozialsystem gefaangen an kontrolléiert ginn, an et ganz schwiereg ass do erëm eraus ze kommen.
     
    Et feelt definitiv un engem Integratiounskonzept vir all déi Leit déi als Flüchtling elo hei zu Lëtzebuerg unerkannt ginn sinn. Doduerch dass Delaien vun der Prozedur deelweis méi kuerz ginn sinn, sécher eng positiv Entwécklung, muss en awer drun denken, dass déi Flüchtlingen elo nach während enger gewëssener Zäit Ënnerstëtzung brauchen, vir dass dass Si sou schnell wei méiglech kennen op eegenen Féiss stoen.
    D’Politik muss hei en neien Akzent setzen, an deem se sech en aner Outil schaaft wéi den RMG. Dësen Outil muss op der enger Säit d’Sozialhëllef vir Flüchtlingen ofdecken, an op där anerer Säit d’Flüchtlingen fërderen an fuerderen vir innerhalb enger gewëssener Zäit en eegestännegt d’Liewen hei zu Lëtzebuerg opzebauen.
    Dat kennt zum Beispill en RMG d’Intégration sinn, ugebonnen un de aneren System, mee spezifesch vir Flüchtlingen während enger éischter Zäit vun 3 bis 4 Joer. Verbonnen mat der sozial Hëllef wären dann Konditiounen vir d’Sproochen ze leieren, ze kucken vir hier Ausbildung ze vervollstännegen oder opzefrëschen, hinnen eng éischt Beruffserfahrung ze erméiglechen iwwert ons Initiaves-pour-l’emploi’s Gesellschaften, vir sech Wëssen iwwer Lëtzebuerg unzeeegenen, an sech an der Lëtzebuerg Gesellschaft ze integréieren. Dat alles mat enger kompetenter Begleedung duerch déi verschidden sozial Servicer déi mer hei zu Lëtzebuerg hunn. Während der Zäit géifen se dann och eng spezifesch Wunneng gestallt kréien. Dës Wunnengen sollten vun der ëffentlecher Hand gebaut ginn, vir net weider d’Wunnengsnout zu Lëtzebuerg ze verstäerken. Dësen RMG d’Intégration wär dann och op vir déi jonk erwuessen Flüchtlingen, déi nach net 25 Joer all sinn, an vir déi et am Moment iwwerhaapt keng Solutioun gëtt.
    Dat ass sécher eng Investitioun an d’Zukunft déi ons global gesinn manner deier gëtt wei d’Leit vir ëmmer ofhängeg ze maachen vun onsem Sozialsystem. Villäicht fannen sech jo en puer Politiker déi bereet sinn, nei Weeër ze goen, an ons d’Sozialsystem deenen neien Erausfuerderungen unzepassen.

    3 min
  • Carte Blanche Paul Hammelmann, 19/09/2016
    Ufanks September sot den italieneschen Regierungschef Matteo Renzi op enger Konferenz zu Dakar, déi beschten Präventioun géint Barbarei an Terrororismus wir an d’Kultur an an d’Educatioun ze investéieren.
    An d’Emilienne lauschtert den Vico Torriani

    Den “Charlie Hebdo”, de “Bataclan”, blann Gewalt zu Nice, Attentater zu Würzburg, zu München, zu St.Etienne an a Florida;
    Zu Aleppo sin 300000 Zivilisten teschent der Front vun Regierungstruppen an Rebellen agespuart.
    An d’Emilienne lauschtert den Vico Torriani

    D’AFD gewennt virun den CDU an SPD an Mecklenburg an ass elo an 9 Landesparlamenter vertrueden;
    An Frankreich riskéiert d’nächst Joer e rietspopulistescht Mouvement un d’Muecht ze kommen;
    Ungarn mecht esou eng meschenrechtsveruechtend Politik dat et net nemmen aus der EU, me och nach aus dem Europarôt misst ausgeschloss gin ;
    Polen ass net wäit dervun eweg ;
    all Dag brennt e Flüchtlingsheem an Däitschland. Den infekten Gestank vun den faschisteschen Latrinen an Europa get emmer méi pénétrant.
    An d’Emilienne lauschtert den Vico Torriani

    2016 sin am Mettelmier net manner wéi 3000 afrikanesch Flüchtlingen erdronk;
    Amerika kritt am November entweder e beispillôsen Hypocrit oder awer - vill schlemmer - eng Supernova vun Arroganz, Süffisanz an Dommheet als President.
    An d’Emilienne lauschtert den Vico Torriani.

    Déi sozial Ongerechtegkeeten an derWelt huelen emmer méi zou: gemäss dem Wirtschaftsnobelpreis Josef Stiglitz gehéiert 1% vun den Amerikaner méi wéi 1/3 vum Volleksverméigen;
    Déi iewescht 0,1% Amerikaner verdingen all 36 Stonnen esouvill wéi di aner 99,9% an engem Joer;
    Zu Pyonyang reent et radioaktiv……
    An d’Emilienne leisst sech en Tatouage brennen: «Vico» an âl-gothescher Schreft ; en ass net am Schamberäich plazéiert.

    2 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners