RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche Georges Hellinghausen, 31/10/2016
    Zënter enger gewësser Zäit schon gëtt et ëmmer méi Publikatiounen, Foren, Konferenzen a kulturell Manifestatiounen iwwer dat, wat Gleeweg an Netgleeweg matenee verbënnt. E rezent Buch vun Anselm Grün, Tomas Halik a Winfried Nonhoff heescht „Gott los werden? Wenn Glaube und Unglaube sich umarmen“ – e Plädoyer fir eng friddlech Begéignung tëschend Atheisten, Humanisten, Agnostiker a Gleewegen. Woubäi kloer gëtt: Atheiste kënnen och reliéis Erfarunge man a Gleeweg och d’Absence de Dieu erfueren. Glawen an Onglawe komme sech a verschiddene Gestalten no.

    Mä méi wäert wéi all Publikatioun ass gemeinsamt Handelen. Doduerch dokumentéiere béid Lager, dass dat, wat si eent, méi grouss ass wéi dat, wat trennt – oder zumindest dass dat, wat trennt, net noutwendegerweis géigesäitegt Exkommunizéieren bedeit, nom Motto „Jiddereen a sengem Motzeck“, a fir de Rescht komme mer gutt laaschteneen.

    Eng al bewärte Gelegenenheet, wou dëst Gemeinsamt zum Ausdrock kënnt, bitt sech un an dësen éischten Novemberdeeg. Do gi se all op de Kierfecht bei hir Doudeg, egal wat se gleewen oder och net. A si all bezeien: Eis Verstuerwen liewe weider, ob am Häerz vun deenen, déi zréckbliwwe sinn, oder an engem Au-delà, deen d’Reliounen beméit sinn opzeweisen. Iwwert all weltanschaulech Grenzen eraus verbannen eis Doudeg äis mateneen an de Famillen an a Bekanntekreeser bis haut. Jo, si féieren äis op de Griewer nei zesummen. Esou wéi och an eise Griewer selwer Gleeweger an Ongleeweger friddlech niefteneen leien.

    A senger Enzyklika iwwert d’Hoffnung hat de Poopst Benedikt XVI. geschriwwen, andeems en d’Perspektiv vum éiwege Liewen uschneid: Léift geet bis eriwwer an dat anert Liewen, mir kënnen äis iwwer d’Grenz vum Dout géigesäiteg eppes ginn a matenee verbonne bleiwen. A wie vun äis hätt net d’Bedierfnes, deenen, déi äis léif waren a vun äis gaange sinn, en Zeeche vun Dankbarkeet, Guttheet oder och Versöhnung nozeschécken? „Un d’Häerz vun deem aneren ze réieren, ass ni ze spéit an ni ëmsoss.“

    Si net eis Blummen a Stäck, mat deene mer Griewer, Urnen a Streewise fir Allerhellgen rëschten, de Seegen, dee mer iwwert e Graf maachen, de Gedanken oder dat Gebied, dat mer fir eis Verstuerwen opbréngen, e Gest vun dëser häerzlecher Verbonnenheet – mat hinnen, an awer och ënnerteneen mat äis? En Ausdrock vun eisem Häerz, dat weider fir si schléit – an och, an der beschter Hypothes, fir äis géigesäiteg?



    Georges Hellinghausen

    3 min
  • Carte Blanche Robert Urbé, 28/10/2016
    D’lescht Woch, de 17. Oktober war den Internationalen Dag fir d’Besäitigung vun der Aarmut. Pénktlech wéi all Joer huet de Statec e puer Deeg virdru säi Rapport Travail et Cohésion sociale publizéiert. Doranner steet, den Aarmutsrisiko wier tëscht 2014 an 2015 vu 16,4% op 15,3% rofgaangen.
    Heescht dat da lo, et geet eis besser?
    Also, et dréint sech jo hei ëm eng statistesch Zuel, déi opgronn vun enger Stéchprouf vun 3.456 Haushalter gerechent gouf. Dat heescht datt déi Zuel mat enger gewësse Wahrscheinlechkeet zoutrëfft, méi och net. Et sief hei och widderholl, datt an deeër Stéchprouf do nëmme sougenannten “normal” Haushalter dra sinn, also Leit an Altersheimer, Kannerheemer oder Obdachlosenasyler asw. net mat gefrot ginn.
    Da muss een als nächst feststellen, datt den Aarmutsrisiko och mat 15,3% nach ëmmer héich ass: an 13 Länner an Europa ass e méi niddereg, dorënner an zwee vun eisen dräi Nopeschlänner! An datt en zënter 1996 mat Schwankungen bestänneg an d’Luucht goung: eng Zuel, déi fir ee Joer méi niddereg ass, seet do nach näischt aus! Dat hate mer fir d’lescht 2011, wou e vu 14,5 op 13,6% erof gaang war, fir dunn di nächst Joeren op 15,1, 15,9 a 16,4% ze klammen.
    Dann huet sech och näischt dru geännert, datt bestëmmte Kategorië vun der Bevëlkerung méi schlecht do sti wéi anerer. An dat sinn déi selwecht wéi di Joere virdrun: Kanner ënner 18 Joer mat 21,5%, Auslänner mat 22,3%, Leit mat enger niddereger Qualifikatioun mat 19,2%, Aarbechtsloser mat 42,7%, Famillje mat méi wéi 2 Kanner mat 23,7% a besonnesch Monoparentalen mat 44,9%. Do kéint ee jo dann dervun ofleeden, wou eng Regierung politesch aktiv misst ginn. Dat ass mat der Steierreform geschitt, wat d’Monoparentalen ubelaangt, och wann dat hätt kënne méi wäit goen. Dat steet och am Regierungsprogramm, wat d’Kanner an den RMG-Haushalter betrëfft, an dat soll demnächst kommen. Do ass awer och mat der Reform vum Kannergeld de Géigendeel geschitt. An: eis Schoul bréngt et nach ëmmer net fäerdeg, datt déi Jugendlech méi héich Qualifikatiounen hu, wann se d’Schoul verloossen. Bei den Aarbechtslosen dogéint ass ee gewësse Réckgang um Aarbechtsmarché festzestellen, an do goung och den Aarmutsrisiko vun den Aarbechtslosen lo zréck.
    Da gëllt och, datt d’Halschent vun deenen ënner dem Aarmutsrisiko nëmme maximal 83% ënner dem Seuil vun 1.763 EUR leien, dat waren der d’lescht Joer nach ronn 84%. Wann déi Zuele lo genau wieren, da géif dat heeschen, datt et zwar manner Aarmer ginn, mee déi sinn awer liicht méi aarm. Mee mir hu jo uewe gesinn, sou genau sinn déi Zuelen net, si missten da schonn iwwer e puer Joer an déi selwecht Richtung weisen, fir datt een doranner kéint en Trend gesinn. Do musse mer dann also di nächst Joeren ofwaarden.

    Grondsätzlech awer kënne mer festhalen: et bleiwe grouss Inégalitéite bestoen, an d’Politik ka sech nach laang net ausrouen!

    4 min
  • Carte Blanche Jean-Luc Thill, 26/10/2016
    RTL Carte Blanche     “Politesch Hermeneutik“ 26-10-2016     Auteur:J-L Thill

    Hermeneutik – klengt schwéier ass et awer net. De Beweis: zeguer Politiker kennen et. Berühmst Beispill heiheem: E Buergermeeschter deen virun de Walen versprécht an deem Amt ze bleiwen a schonns guer net fir de Posten vum Premier  zur Verfügung ze stoen – fir no de Walen genau dat ze ginn: nämlech Premierminister. Dir braucht nach e Beispill: den Premier bis – also de Vize – wann déi  ultimativ politesch Innovatioun abemol reaktionär muss ginn: sou geschitt dem Spuerpak.  
    An d'Hermeneutik an deem Ganzen? Vun där geet ëmmer riets wann et ëm Interpretatioun an Verstoen vun Texter, Zeechen a Symboler geet – een uraalt Geschäft. Eis national Politik huet doranner deelweis eng laang Traditioun. Änner erëm, a fir d'lescht bei der Wal vun der CSV hirem Spëtzekandidat 2018, kritt de lëtzebuerger Wieler erklärt säi Wëllen, also de Wielerwëllen, géif entscheeden wei d'Regierung ausgesäit. Am Text steet eigentlech dat de Wielerwëllen, wann iwwerhat, entscheed wien an der Chamber sëtzt, oder kinnt sëtzen well et muss en d'Wiel net unhuelen. De Grand-Duc decidéiert wien an der Regierung sëtzt. Dat dëst mat Chamberswahlen eppes ze dinn huet, dat ass bedriwwen Hermeneutik, heiheem och nach gären als gentlemen's agreement bezeechent. Bescht Beispill: de Respekt vum Wielerwëllen an Gambia.  An dës lescht, also verstan als Symbol fir eis aktuell Regierung, ass Weltmeeschter am Ausleeën vun Texter. Rezent Beispill: déi blann Justicia muss feststellen dat Educatioun sech net un déi eegen Gesetzer hält an hermeneutesch gëtt schnell kloer gestallt: et wier just e Problem mat der Form an net mam Fong – nom Motto all Gesetzer sinn equal a verschiddener eben more equal – an iwwerhat géif sech och net dru gehale ginn! Wéi weg soll en dat verstoen? Och bei dem aner Fong  ass d'Form de Problem  – Stéchwuert Kierchefabriken. Déi sinn doriwwer eraus och genervt well bis ewell wär d'Hermeneutik ee vun hire Kärgeschäfter mat Usproch op Exklusivitéit.
    Och op anere Platzen gëtt Regierung et net midd grouss Register ze zéien. Am Projet de Loi vum Congé parental ass op der Säit 5 openeits vun engem Paradigmewiessel riets. Dem Auteur vun dem Konzept, dem Thomas Kuhn, géifen Dronkenellen ausgoen – well säin „paradigm-shift“, wéi et am Original heescht huet domadder näischt ze dinn  - ausser et bedreift en politesch Hermeneutik.     Ironie vum Schicksal: elo schwätzt zeguer déi gréisst Oppositiounspartei vun engem Paradigmewiessel, an zwar vum ugekënnegten Paradigmewiessel vun der Regierung - mä wou si mer dann? Wann iwwerhat da klengt dat éischterseischters wéi eng bëlleg bedriwwen Falsifikationsstrategie à la Popper.
    Toppen kann dat just nach de Finanzminister: deem geet en einfachen  Paradigme-Wiessel net wäit genuch a schwätzt vun enger richteger kopernikaneschen Wende an der Budgetspolitik.  - fir d'éischt gefuerdert 2008 vun der Chambre de Commerce wär se dunn fir se 2015 geplangt, fir elo definitiv 2017 ze geschéien. Fir dat d'Land dann 2018 héchstwahrscheinlech wierklech eng Wend erlieft – awer keng kopernikanesch dofir eng ptolomäesch – wann dee fréieren also ale Modell vläicht erëm virun der Dir steet – et sief dann déi hermeneutësch Rechnung mat de Wahlkadoen geet op. Mam groussen Opklärer Immanuel Kant huet dat obeneits näischt ze dinn – mä wien kann sech an den härden Zäiten vum aktuelle politeschen Geschäft nach akademeschen Respekt an wëssenschaftlëch Rigueur leeschten?




    4 min
  • Carte Blanche Paul Rauchs, 24/10/2016
    Wéi seet é Petitioun eigentlech op lëtzeburgesch ? Hausdéierourdnung, Fuerzlëscht ouder vleicht Kléngtioun ? Dëss zugegeginn e bësse laecherlech Fro beweist wéi absurd et ass, eis letzeburger Mammesprooch zu énger Pappesprooch ze maachen, zu der 1. nationaler Amtssprooch, wéi d’Petitioun 698 et verlaangt fir déi haut iwréins de Schlussdaag ass fir se nach ze ënnerschreiwen. Schon den Text vun dem Lucien Welter sénger Petitioun beleet d’Onméiglechkeet vu sengem Ulées: en enthält nämlech eng hëlle Wull vu franzéischen an deitschen Gaaschtwierder an ass an enger ganz approximativer an dofir och sympathescher Orthographie geschriwwen. Eng Sprooch léisst sech nun emol net vun ouwen erof dekretéieren. Mir herrschen iwer keng Sprooch, ganz einfach wëll d’Sprooch eis beherrscht, wëll si Haer a Meeschter iwer eist Denken an eis Psyche ass. An aanere Wierder : wien d’Sprooch légiféréieren wëll, dé wëllt och, bewosst ouder onbewosst, iwer deen légiféieren dén déi Sprooch schwëtzt. D’Beschaeftegung mat Dialekter a regionale Sprooche ass also ëmmer och e politeschen Akt. De Ruf no hierer Opwertung koum an de 70er Joren aus dem lénks-kulturelle Lager an huet sech dann zënter den 90er Joren an dem rechten jo soguer extremrechten politesche Bord verluer.

    Mir hun eis Mammesprooch mat der Mammemëllech eragesuckelt. Mir schwëtze se, wéi de Mond eis gewuess ass a mir schreiwen se eigentlech ereischt (vun e puer brillante Könschtler a Schrëftsteller ofgesin) zenter mer e-mailen an sms’en verschécken. D’Letzeburgescht huet also aus eegener Kraaft eng grouss a sécher Zukunft virun sech, a brauch net vu gutgemengten Polizisten ënner d’Aerm gegraff ze kréien, déi och geschwënn fourderen dass eis Kanner nët méi Kevin, Steve ouder Jessica heeschen daerfen, mé erëm Pit, Jemp a Maria. D’Letzeburgescht brauch och nët vu populistesche Politiker als eng weider offiziell EU-Sprooch gepuscht ze gin, vu Politiker déi woul méngen dass d’Sprooch neischt aanescht ass, wéi een Dialekt deen et zu eppes bruecht huet, dank politescher Lobbyaarbecht.  

    Also solle mer dach einfach stolz a frou mat eiser dialektescher Sprooch sin, se net als en Instrument vun Ausgrenzung benotzen an se nët an e Prisong vun Gesetzer a Regelen stiechen. Fuere mer dach einfach weider mat hir ze spillen, englesch, franzéisch an deitsch Wierder ze gebrauchen a vergiesse mer nët dat déi flotts a gewitzt letzeburger Wierder aus dem Jénesche kommen, der Sprooch vun de Weimerskircher Lompekremer déi och irgendwéi Famill mam Jiddesche ass. Eis Sprooch huet ëmmer friem Wierder opgeholl wéi eist Land ëmmer friem Aarbechter opgeholl huet a wéi eis Kachdëppen ëmmer friemt Iessen matgekacht hun. D’ass iwréins nët fir neischt dass de Franzous, dé jo anscheinend eppes vu Gastronomie versteht, nëmmen ee Wuert fir Sprooch a vir Zong kennt. An do drop hin gin ech elo mat ménger Moss e Croissant iessen an en Espresso drénken.


    3 min
  • Carte Blanche Marc Schiltz, 21/10/2016
    Wie gouf scho mol operéiert a krut eng Blutttransfusioun? Wee kennt een, dee mat Kriibs geheelt gouf?  Dest si just 2 Beispiller vu villen, wou medezinesch Fortschrëtter mat Hëllef vun Déiereversich erreescht goufen. Op déi meescht Erongenschaften wéilte mer haut wuel kaum méi verzichten.
    Kengem – och kengem Wëssenschaftler – maachen Déiereversich Spaass. Ma wa mer medezinesche Fortschrëtt weiderhi wëllen, si mer an engem moraleschen Dilemma:
    Engersäits hu mir Mënschen a Wëssenschaftler eng moralesch Verpflichtung, fir d’Rechter vun den Déieren ze schützen. Anerersäits wëlle mer nei Therapie eréicht dann um Mënsch ausprobéieren, wann mer  mat beschtem Gewësse kënne soen, se wieren wierksam an onbedenklech.
    Dat ultimativt Ziel ass, fir un Alternativen ze fuerschen, fir dass mer keng Déiereversich méi brauchen.
    An dësem Gebidd ginn et och scho vill Fortschrëtter, och hei zu Lëtzebuerg. Um Luxembourg Centre for Systems Biomedecine hu Fuerscher z.B. eng Art kënschtlechen Daarm entwéckelt. Desen erlaabt et Experimenter  duerchzeféieren, an engem ähnlechen Ëmfeld wéi  an engem liewegen Organismus.
    Ma et ginn awer nach vill Fäll wou d’Alternativen zu den Déiereversich net fiabel genuch sinn. An hei gëllt, dass d’Wëssenschaft sech selwer streng Reegele gëtt. An dat ass och de Fall!
    Déiereversich sinn nëmmen erlaabt, wann et dofir e vertrietbaren Notzen a keng alternativ Methode gëtt. Zanter 2013 ass et z.B. an Europa net méi erlaabt Déiereversich fir Kosmetik duerchzeféieren.
    Ausserdeem gëllt an der Wëssenschaft d’Reegel vun den 3 R: Replace, reduce, refine. Wa méiglech sollen Déiereversich ersat ginn duerch alternativ Methoden. Wann dat net méiglech ass, soll d’Unzuel un Déieren sou wäit wéi méiglech reduzéiert ginn. A schliesslech sollen d’Liewensbedingunge vun den Déiere sou angenehm wéi méiglech gestalt ginn – wat alles duerch eng EU-Direktiv dictéiert gëtt.
    Och zu Lëtzebuerg ginn Déiereversich gemaach, an de Fuerschungsberäicher Kriibs, Nervesystem, Immunsystem an Häerzkreeslafsystem. D’Déieren déi hei agesat gi, sin ausschliesslech Mais, Raten an Zebrafësch. D‘ Fuerscher musse fir all Projet deen Déiereversich involvéiert, eng Erlaabnis vum Ministère de l’Agriculture an dem Ministère de la Santé kréien. D‘Ministère kontrolléieren, ob d’Déiereversich wierklech néideg sinn, an ob d’Virgabe vun der EU Direktiv agehale ginn. Virdrun evaluéiert och schonn en Ethikcomité um Fuerschungsinstitut de Projet a steet de Fuerscher mat Rot zur Säit.
    All des Reegele weisen: Och de Wëssenschaftler läit d’Wuel vun den Déieren um Häerz. A si sinn sech dem moraleschen Dilemma wuel bewosst. Wéi ugangs gesot ass et lo d’Ziel laangfristeg Déiereversich duerch alternativ Methoden ze ersetzen. Ob a wéini dat wäert méiglech sinn, bleift ze gesinn. An der Tëschenzäit gëllt et, oppen iwwer Déiereversich ze kommunizéieren. Dofir och des Carte Blanche.

    4 min
  • Carte Blanche Roland Pinnel, 19/10/2016

    Léif Botschafterinnen,
    Léif Botschafter,

    Oder muss ech soen?
    Léif Ambassadricen a léif Ambassadeuren,

    Egal. Et ass op alle Fall esou, dass mir jo all zënter der leschter Woch Ambassadeure sinn. Wéi huet et nämlech bei där grousser Presentatiounskonferenz vum neien « image » vum Land geheescht ? Déi eenzeg valabel Botschafter fir eist Land an Europa an an der Welt si mir selwer – mir alleguer.

    Jidderee vun eis ass also elo Botschafter.

    A wat ass eis Botschaft oder - fir et am moderne Jargon ze soen – «what’s the message»? Majo, mir sollen déi Valeuren, déi Lëtzebuerg ausmaachen, no baussen droen. An dat wären déi dräi Eegeschaften Oppenheet, Zouverlässegkeet an Dynamik.

    A wéi solle mer dee Message «véhiculéieren» ? Ma iwwert eng nei Typographie vum Numm Lëtzebuerg – pardon -  
    L U X E M B O U R G   mat dem Ënnertitel
    «LET’S MAKE IT HAPPEN».

    Ech ginn einfach d’Gefill vum «déjà vu» net lass. Ersetze mer dach deen ale Logo « .LU » vum Schrëftzuch LUXEMBOURG duerch - wéi een dat nennt - en «accident graphique». An zwar duerch en ëmmodeléierten rout bloen « X ». Dat Ganzt ergänzt duerch déi sougenannten «tagline» «LET’S MAKE IT HAPPEN». Eng Ausso, déi iwwregens - ënner Ëmstänn - méi wéi ambivalent ka sinn.

    Et kann een déi nei visuell Identitéit vum Land elo gutt oder schlecht fannen, originell oder flaach, super oder schwaach.

    Am Däitsche gëtt et e flott Bild, dat nawell eenegermoossen dat erëmgëtt, wat ech bei dëser neier visueller Communicatioun spieren: « Der Berg kreißte und gebar … eine Maus ». Oder,  er gebar einen « X ». Et sief. D’Haaptsaach schéngt ze sinn, «er gebar».

    Datt mir eis net falsch verstinn! Selbstverständlech ass d’Iddi, dem Land en neie « claim » ze ginn, eng gutt Saach. Et ass jo och héich Zäit ginn, datt eppes geschitt ass. Ëmmerhin hu mer fir dee Projet eng Gestatiounszäit gehat vu bal 20 Joer.

    D’Fro bleift allerdéngs, ob deen neie Visuell - oder wéi et richteg heescht - déi nei «signature» dat erëmspigelt , wat Lëtzebuerg wëll sinn. Oder nach besser, wat Lëtzebuerg tatsächlech ass. Mol kucken, wéi si vun de Lëtzebuerger opgeholl an ëmgesat gëtt. Och ënnert anerem vun institutionnelle Partner, wéi Gemengeverwaltungen oder soss ëffentlech Träger.

    Doriwwer eraus geet et awer haaptsächlech ëm d’Perceptioun vun eisem Land aus der Siicht vun de Leit dobaussen am Ausland. Sou wéi   s i    eis gesinn a wat   s i   vun eis denken.

    4 min
  • Carte blanche économique mat PWC 18h20, 19/10/2016
    Déi nächst Indextranche nach an 2016?
    An der leschter Zäit gëtt erëm méi iwwert déi nächst Indextranche geschwat. Wat mengt Dir, kennt et nach an 2016 zu enger Indextranche?
    De Statec ass an enger Publikatioun am September dovun ausgaangen, dat eng Indextranche nach dëst Joer méiglech wier. Dobäi misst en vir allem d’Entwécklung vum Pëtrolspräis am A behalen.
    Ech selwer souz scho virun engem Joer op der selwechter Platz hei – an hunn iwwert eng méiglech Indextranche an 2015 geschwat, déi ech deemools fir onwahrscheinlech gehalen hunn.
    Dëst Joer schéngt et awer esou, dat den Inflatiounstaux un déi 2,5% säit der leschter Indextranche erun kennt, an domadder eng Indextranche nach am Dezember vun dësem Joer kéint kommen.
    Als klenge Rappell, déi lescht Indextranche gouf et virun 3 Joer; am Oktober 2013; do virdru gouf et zwëschen 2000 an 2013 jeeweils 13 Indextranchen. An der Phase war de längsten Intervall zwëschen den Indextranchë vu 16 Méint.
     
    Wat sinn dann déi Kritären, déi zu enger Indextranche feieren ?
    Mat hëllef vun engem statisteschen Wuerekuerf (wou zum Beispill Liewensmëttel, Kleeder, Wunnengspräisser awer och Pëtrol dra sinn) gëtt een Inflatiounstaux berechent. Wann deen Inflatiounstaux iwwert 2,5 % klemmt, da kennt et zur automatescher Upassung vun de Salairen a Pensiounen.
    De Prinzip soll sinn, dat déi méi héich Liewenskäschten kompenséiert ginn, an dat Kafkraaft déi selwecht bleift.
    An deene leschte Joren hunn virun allem déi niddreg Pëtrolspräiser dofir gesuergt, dat et zu kenger Indextranche komm ass. Wann déi Präisser sech awer elo stabiliséieren, an eventuell klammen, da kéint et effektiv nach dëst Joer zu enger Indextranche kommen.

    2 min
  • Carte Blanche: Justin Turpel, 17/10/2016
    Neen, d’Europäesch Unioun ass weder sozial, nach solidaresch.
    Et ass ganz normal, dat d’Bierger sech net mat däer Europäischer Unioun identifizéieren kënnen a sech géint sou een Europa wieren.
    Jo, mir brauchen een anert Europa, e solidarescht, e soziaalt Europa, dat fir seng Bierger do ass, si sozial ofséchert, sech konsequent fir si, hir Rechter, Gesondheet an Ëmwelt asetzt.
    Wat mech dobäi immens stéiert ass, datt jiddereen deen d’Europäesch Unioun kritiséiert, als ‘Euroskeptiker’ dohigestallt gëtt. Sou wéi wa jiddereen deen net mat der Politik vun der EU averstan ass, géint Europa wier.
    D’Europäesch Unioun, hir Institutiounen a Bürokratie – vu Prodi a Santer bis Barroso a Juncker – vertrëtt haaptsächlech déi wirtschaftlech Interesse vun enger räicher Minoritéit, vu Multien a Konzerner. An dat mecht s’op Käschte vun de Mënschen déi an Europa wunnen, liewen a schaffen. An sou engem Europa kann ee sech net wierklech doheem fillen.
    Et gëtt wuel Alternativen zu der EU.
    Esou Alternativen bidde weder d’USA nach Russland, China an aner Uniounen, wou d’sozial Ongläichheeten, d’Ausgrenzung an d’Onmënschlechkeet grad sou schnell  - wa net nach méi schnell – zouhuelen wéi bei äis.
    D’Zréckzéien op national Grenzen ass och keng Alternativ mat däer et de Leit besser kéint goen.
    En anert Europa, en Europa fir d’Bierger kann nëmmen entstoe aus der Mobiliséierung an der Bedeelegung vun de Bierger selwer, de Gewerkschaften an den ONGen – eng Mobiliséierung, déi sech och géint d’Politik vun der EU riicht!
    A wat mech nach stéiert ass, datt all Effort fir lokal, national a regional Eegenaarten ze verdeedegen an ze stäerken – sief et d’Sprooch oder d’kulturellt Schafen – direkt als nationalistesch bzw rassistesch dohi gestallt gëtt. Déi Eegenaarten, an och déi Leit, déi sech derfir asetzen, gi vill ze vill vu Rassisten, Populisten an rietsextreme Bewegungen fir hir mënschefeindlech Politik genotzt. Mir duerfe op kee Fall zouloossen, datt all déi Leit déi sech fir sproochlech a kulturell Eegenaarten asetzen, dëse geféierlechen Bewegungen an d’Äerem gedriwwe ginn, well grad dat zu der aktueller Stäerkung vu Rietspopulismus an Friemefeindlechkeet an Europa a soss an der Welt bäidréit.
    En anert Europa, an deem d’Mënsche solidaresch mateneen ëmginn a mat hire verschiddene Kulturen niefteneen a mateneen liewen, ass glat net am Widdersproch zu lokalen, nationalen a regionalen Eegenaarten – ganz am Géigendeel!

    3 min
  • Carte Blanche Michel Maquil, 14/10/2016

    Wéi den 23. Juni déi englesch Wieler ganz onerwaart fir de Brexit gestëmmt hunn, gouf och déi weltwäit Finanzindustrie um falsche Fouss erwëscht. Et hat keen esou ee Resultat erwaart an et waren och keng Virbereedunge fir esou eng Eventualitéit getraff ginn.
     
    Grouss international Banken an Finanzinstituter hu sech nämlech an der englescher Haaptstad niddergelooss fir vun de villen Avantagen ze profitéieren déi dës Plaz bitt. Hei kënnen si hier Aktivitéiten gutt entfalen a gläichzäiteg vun de Virdeeler vum “marché unique européen”  profitéieren fir Clienten aus aneren europäesche Länner ze bedéngen. Esou konnt London sech ganz erfollegräich iwwer Joerzéngten konsequent als eng Finanzplaz vu Weltformat entwéckelen.

    Duerch de Brexit muss dee “business model” kuerzfristeg iwwerduecht an un déi nei Realitéit ugepasst ginn. Well wéineg Leit weeder mat kuerzen nach mat einfachen Verhandlunge rechnen, fir den Austrëtt vun England aus der EU ze reegelen wäert sech och nach eng relatif laang Zäit vu groussen Onsécherheeten erginn, bis dee neie Kader steet.
     
    Elo muss een nach derbäi soen dass de Brexit besonnesch déi europäesch Finanzwelt op engem ganz schlechte Moment trëfft, well se nach ëmmer un de Konsequenzen vun der Finanzkris vun 2008 leit wat sech an enger schwaacher Rentabilitéit vu ville Banken a Finanzinstituter erëmspigelt. Esou si bei villen europäeschen Häiser déi dringend néideg Restrukturatiounen nach guer net ofgeschloss.
     
    Sécher maache sech eng Rei Finanzplazen aus aneren EU Länner zu Recht Hoffnungen fir elo nei Aktivitéite vu London eriwwer ze kréien, mä dat verlaangt vill Ustrengunge vun deenen Haiser an dat lenkt dann och nach of vun aneren Aktivitéiten.
     
    Derzou mussen déi Finanzinstituter gezwongenerweis hir Aktivitéite relatif kuerzfristeg ëmschichten,wat op manst zäitweileg weesentlech méi Käschten generéiert a weider negatif Konsequenzen op hir Rentabilitéit kritt.
     
    Deem géintiwwer kënnen déi Avantagen, déi op enger anerer Finanzplaz kënnen ëntstoen, well do nei Aktivitéiten ugesidelt ginn, dach kleng erschéngen nieft den héijen Onkäschten, déi duerch de Brexit bei de groussen Haiser entstinn.
     
    An deem Kontext musse sech besonnesch d'Akteuren aus der Mikrofinanz an all hiere Variante Gedanke maachen wéi et mat hinne weider geet. Et muss ee schon unerkennen datt an de läschte Joere vun enger Rei Finanzinstituter d'Mikrofinanz staark ënnerstëtzt ginn ass an och relatif vill an déi Branche investéiert gouf. Elo lauert d'Gefor datt duerch all déi Ustrengungen, déi elo ënnerholl ginn fir de Konsequenzen vum Brexit ze begéinen, d'Mikrofinanz an Hannerdreiwe kënnt oder dann net méi déi Prioritéit behällt déi se elo nach huet.
     
    All Akteure vun der Mikrofinanz mussen sech deem bewosst sinn a sech doropper astellen.  Et gëllt vun alle Säiten déi néideg Ustrengungen ze ënnerhuelen fir datt d'Mikrofinanz och nach weider déi Bedeitung behale kann, déi se an de läschte Joeren opgebaut huet an déi och bluttnéideg ass am Kampf géint d'Aarmut.

    4 min
  • Carte Blanche Marc Müller, 12/10/2016

    Wësse wouhin e well, dat motivéiert! Mee, grad dëst ass an enger Welt déi sech all Dag verännert, wou d’Konkurrenz omnipräsent a Lëtzebuerg keng isoléiert Insel méi ass, net einfach.
    Radikal Verännerunge wéi d’Stolkris an de 70er Joren oder den aktuellen Antrëtt an eng digital Industrie 4.0 (also d’Vernetzung vun der industrieller Produktioun mat der Informatiouns- a Kommunikatiounstechnik) veronsécheren d’Mënschen a blockéieren se. Wéi beim Wieder, Kënnegen sech grouss Verännerungen oft duerch e staarken Wand un. Dësen neien a frësche Wand bitt awer, wann een d’Segele fréi genuch a richteg setzt, Méiglechkeet sech a néi a fruchtbar Gewässer ze bewegen.
    D‘Mensche bei groussen d’Verännerunge mat an d‘Boot ze huelen, heescht couragéiert a mat kloren Entscheedungen d’Weiche fir d’Zukunft richteg ze stellen, hinnen des Verännerungen an de Kurswiessel ze erklären an d‘Chancen opzeweisen. D‘Weiche goufe vum Wirtschaftsministère mam Schafe vu neie Wirtschafts-Clustere wéi ICT, life-ciences an eco-technologies richteg gestallt. Konkret a verständlech mam Bierger kommunizéiert gëtt awer net. Besonnesch dramatesch ass dëst am Enseignement de Fall wou et konsequent verpasst gëtt eiser Jugend déi néi Wirtschaftssecteuren a –aktivitéite mat de néidege Qualifikatiounen a villfältege Beruffer vun der Zukunft virzestellen.
    Wësse wouhin ee well, dat motivéiert! Dat ze wëssen ass also fir vill Lycées-Schüler an dësen Zäiten net liicht, well keen hinnen de radikalen technologeschen a wirtschaftleche Schrëtt an e neit Zäitalter vermëttelt, well keen hinnen hir berufflech Méiglechkeete pädagogesch a lieweg opweist, well kaum Kontakt mat der Wirtschaft besteet an esou keen deene Jonke richteg Loscht op hir villverspriechend berufflech Zukunft mécht! Dëst ass e Verloscht fir d’lëtzebuerger Economie, déi dringend Aarbechtskräfte mat de passende Qualifikatioune brauch an eng Gefor fir vill Jonker déi onmotivéiert déi falsch Formatioune wielen an esou hir berufflech Zukunft riskéieren ze verspillen.
    Konkret: Tëscht der Schoul, besonnesch de Lycées classiques, an der Wirtschaft&Fuerschung, fehlt eng strukturéiert an aktiv Vernetzung a Form vu Stagen, Visites d’entreprises a Presentatiounen. E puer gutt Initiativ bestinn, anerer wéi „hellofuture“ vun der Fedil sinn um Entstoen. Et gëtt awer verpasst des Initiativen, ausserhalb vum Educatiounsministère, onofhängeg a secteuriwergreifend ze koordinéiere fir se wierklech ALLE Schüler an ALLE Lycée’en efficace a qualitéitsgepréift unzebidden an domat niewebäi nach e Beitrag zur Chancëgläichheet ze leeschten.
    Mat dëser Schoulrentrée huet den Edukatiounsministère de Lycée’en méi Autonomie an der Gestaltung vun hirem pädagogeschen a fachleche Profil gin an domatt och d’Verantwortung wiert d’zukünfteg Orientatioun a Qualifikatioun vun eiser Jugend zumindest deelweis aus der Hand gin. Domatt lancéiert den Edukatiounsministère bewosst oder onbewosst e Konkurrenzkampf tëscht de Lycée’en an tëscht den eenzele Fächer an de jeeweilegen d’Lycée’en.
    En Argument méi fir grad de wichtege Kontakt mat der Wirtschaft&Fuerschung am Kader vun der Schülerorientatioun a -motivatioun, net och de Lycée’en individuell ze iwwerloosse, mee enger zielféirender asbl oder Fondatioun mat alle wichtegen Acteuren an hirem Conseil d’administration an enger engagéierter a pragmatescher Equipe um Terrain.


    4 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners