RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche Alain Wagner, 16/09/2016

    De Schüler op d’Zukunft virbereeden – dat ass eng Floskel, déi bei all Rentrée erëm aus dem Hutt gezaubert gëtt. Widderleeë kann ee se schwéier. D’Schoul ass ganz sécher keng Spillwiss fir Nostalgiker. An awer : et mécht een e bësse nodenklech, datt d’Zukunft hei implizit als eppes duergestallt gëtt, dat haut scho feststeet an un deem ee sech               z’orientéieren huet. Dobäi soll jo, grad an enger demokratescher Optik, d’Zukunft nach onbestëmmt sinn an duerch dem Mënsch seng Entscheedungen no an no entwéckelt ginn.   
    Dës Visioun vun der fräier Zukunftsgestaltung schéngt awer mëttlerweil just nach e fromme Wonsch ze sinn. Déi aktuell Entwécklung vun der Mënschheet gläicht éischter engem Prozess, dee sech selwer steiert a beschleunegt. Besonnesch d’Tendenz zur Digitaliséierung an zur Robotiséierung féiert zu Perspektiven, déi engem Angscht maache kënnen.
    Laut rezenten Etudë kéinten innerhalb vun den nächsten zwanzeg Joer theoretesch iwwer 40% vun den haitegen Aarbechtsplaze vun intelligente Maschinne besat ginn. Serviceroboteren an der Krankebetreiung, autonom Computeren am Management, Dronen, déi Wuere liwweren – dat alles ass keng Science-fiction méi. An och wann een d’Rasanz vum technesche Fortschrëtt iergendwéi bewonnere kann, riskéiert de Mënsch dobäi, sech selwer an den Abseits ze stellen. Well ob et genuch nei Beruffer wäerte ginn, fir d’Verschwanne vun deenen alen ze kompenséieren, ass alles anescht ewéi sécher.   
    Och am Enseignement stellt sech d’Fro vun der Digitaliséierung méi ewéi jee.                     A Florida gëtt et zënter e puer Joer vereenzelt Klassesäll ouni Proff. D’Léiere fënnt ausschliisslech iwwer Computer statt, an d’Klasse gi just vun engem Assistent betreit, dee bei technesche Problemer agräife kann.
    An Europa si mir glécklecherweis nach net esou wäit. Mä d’Stoussrichtung ass kloer, an et gëtt fläisseg an dee sougenannten E-Learning investéiert. Dobäi si vill Bildungsfuerscher skeptesch, wat d’Efficacitéit vun dëser Approche ubelaangt. Esouguer déi neoliberal ugehauchte Pisa-Studie kënnt zu engem erstaunleche Resultat : déi Länner, deenen hir Schoulen di nei Technologië méi notze wéi den Duerchschnëtt, hu keng besser, mä däitlech méi schwaach Resultater!
    Dës Conclusioun bestätegt am Fong nëmmen dat, wat eng Rei Hirnforscher schonn zënter laangem soen : eng iwwerdriwwen Notzung vu modernen Technologië schuet der Konzentratioun, lenkt vum Wesentlechen of a féiert zu enger méi iwwerflächlecher Assimilatioun vum Wëssen. Do passt et an d’Bild, datt vill Kadere vu Silicon Valley hir Kanner an eng Privatschoul schécken, wou Computere wéineg bis guer net agesat ginn ! Si wësse wuel firwat…         
    Den Enseignant aus Fleesch a Blutt schéngt also nach eng Zukunft ze hunn. An iwwer all Fro vu renger Efficacitéit eraus, ass et hien, deen an de Léierprozess dat erabrénge kann, wat eng Maschinn ni wäert leeschte kënnen : mënschlech Verbonnenheet, Leidenschaft, Empathie an net zulescht eng Grëtz Humor. An deem Sënn : eng gutt Rentrée!

    4 min
  • Carte Blanche Joaquim Monteiro, 14/09/2016


    Staatschefen hunn nach fir déi offiziell Fotoe gegrinst no deene verschiddenen Evenementer a schonns huet Zivilgesellschaft Kritik ausgeüübt par Rapport zu de Resultater vun de Verhandlungen. Virun allem ass déi verpasste Geleeënheet kritiséiert ginn fir den aktuellen Entwécklungsparadigma a Fro ze stelle, den op eng neoliberal wirtschaftlech Approche an onendlechem Wuesstem berout.
    De Moment war also reif fir déi sozial Bewegungen op eng Plaz ze invitéieren an Alternativen ze diskutéieren. De Choix ass op d'Stad Montreal gefall, wou déi 12. Editioun vum Weltsozialforum stattfonnt huet.
    De Weltsozialforum gesäit sech haaptsächlech als alternativ Reflexiounplatz, fir den Austausch vun Iddien. Zur neoliberaler wirtschaftlecher Globaliséierung, gëtt Globaliséierung vu Solidaritéit, géigesäiteg Hëllef a Kooperatioun entgéint gesat. Sujet’en wéi alternativ Wirtschaftsmodeller, Mënscherechter, Emwëltgerechtegkeet, Demokratie, Migratiounen a Friddenskultur goufen diskutéiert. Zivilgesellschaft war och mat derbai, trotz dem schlecht ausgewielten Datum, Mëtten am Summer, Problemer fir Entrées Visaen ze kréien an de relativ deiere Liewensniveau vu Montréal.
    Wat de Forum nach charakteriséiert ass d'Tatsaach dass keen erlaabt ass a sengem Numm ze schwätze fir all politesch Instrumentalisatioun ze verhënneren a eng Ofschlossdeklaratioun gëtt och nët ugeholl, wéi dat oft de Fall ass bei groussen internationale Ronnen. Jiddereen de sech eng Iddi zu deene verschiddene Presentatiounen oder Diskussioune wëll maachen, soll einfach op d'Forum Websäit goe wou all Dokumentatioun zu Verfügung steet. Trotzdem wäert wuel kaum ee politesche Vertrieder an der noer Zukunft eng Referenz op de Forum maachen, och wann déi selwecht Vertrieder ëmmer erëm behaapten Zivilgesellschaft wier e ganz wichtegen Acteur am Entwécklungsprozess.
    Wat nach gefehlt huet war d’Couverture vu den Medien, zemools déi aus dem Norden. Et huet awer, wéi schonn erwänt, net un interessanten Theme gefehlt a esouguer eng Rei vu "Perséinlechkeeten" waren am Forum mat derbäi wéi zum Beispill d‘Bertita Cáceres, Duechter vum Berta Cáceres, Mënscherechter Aktivistin déi virum kuerzem ermort ginn ass oder déi 2005 Friddensnobelpräiskandidatin, d‘Madame Mama Koité Doumbia. Et wier ongerecht ze soen dass kee iwwert de Forum bericht huet. Et brauch een dofir just d’Websait vum Forum ze besiche fir de Géigendeel festzestellen. Mä, amplaz Iddien déi, am Kader vum Forum diskutéiert goufen, weiderzeleede respektiv ze verdéiwen, krute mer éischter während der Summerpaus déi falsch Debatt zum Burkini op der Plage zerwéiert.

    3 min
  • Carte Blanche Marc Glesener, 12/09/2016
    Wat sinn eis Grondwäerter an Europa? Wat sinn d’Spillregelen vum Zesummeliewen? U wat musse mer eis zesummen halen, wann mer a Fridden zesumme liewen wëllen. Des Froen stoungen iwwer déi Summerméint ganz kloer am Mëttelpunkt vun der Aktualitéit. Quasi an allen europäesche Länner sinn Froen vun Migratioun, Immigratioun, dem Niefteneen vun verschidden Kulturen an domat verbonnen Froen am Kontext vun der Multikulturalitéit thematiséiert ginn.
     
    Et wor bei all deem bal net auszehalen, wat am Nopeschland Frankräich ronderem d’Burkini-Problematik gesot a geschriwwen ginn ass. D'Fro vum Verbuet vun dëser Aart Ganzkierpermaillot ass esouguer een, wann net esouguer den Thema Nummer 1 am Virwalkampf vun de Presidentiellen ginn. Et gëtt deemno näischt, wat et net gëtt.
     
    Nun ass déi Saach mat eise Wäerter, eisem Modell vum Zesummeliewen eiser Aart a Weis ze liewen och am Kontext vum Handelsofkommes mat den USA, deem ominéisen TTIP, ëmmer erëm gären an d’Woschuel gehäit ginn. Besonnesch an der ëffentlech-politescher Debatt. Den Accord, iwwer deen der och vill schwätzen, déi den Inhalt net kennen, gëtt zu enger Saach héichstiliséiert, bei där ee kennt mengen, et géif em d’Zukunft vun Europa goen.
     
    Bei al dem Schreiwen a Schwätzen iwwer eis Wäerter an Europa, sief et am Zesummenhang mat dem Thema Integratioun  oder awer mat dem TTIP, wier ett vläicht net schlecht, der Saach vun deem gemeinsamen Beton, op deem mer esou vill Wäert leeën, nozedenken. Wat sinn eis gemeinsam Wäerter? Wat ass d’Fundament, wat eis verbënnt? Wat ass eise Modell? Hu mer en eenheetlechen europäeschen Modell? An wann et gemeinsam Wäerter ginn,  wou kennt dat alles hier?
     
    Eent virop: Relioun soll jo bei dësen Iwwerleeungen keng Roll spillen. Dat ass net modern. Nëmmen keen Bezuch op eng reliéis Dimensioun, och net an hierem historeschen Kontext. Dëst ass onerwenscht. Dat wëllen déi selwerernannten Modern nët. Iwwerhaapt gëtt een den Androck net lass, dat mer en wichtegen  Deel vun deem, wat eise Kulturkrees ass a wat eis Wuerzelen sinn, ganz einfach net méi als Referenz wëllen. Dont acte!
     
    Dest ass allerdéngs ee fundamentale Problem. Wann een Deeler vun deem ignoréiert, wat eis  Wuerzelen sinn, ass et schwéier, ee gemeinsamt Fundament ze definéieren op deem een opbaut.

    An dach brauche mer esou ee Mindestsockel vun Gemeinsamkeeten an engem historeschem Kontext. D’Amerikaner, op déi mer gären vun uewen erofkucken, hunn dëst. An si zécken net, Referenz dorop ze maachen. Ob Republikaner oder Demokraten, op an den USA gebuer oder net. D’Amerikaner sinn houfreg op dat, wat si verbennt a soen dat och. Jo, mir kennen als Europäer och vun Amerika léieren. An och vun villen aneren op der Welt.   
     

    3 min
  • Carte Blanche Robert Urbé, 15/07/2016
    Viru kuerzem nach, bei der Ofstëmmung fir de Budget fir 2016 an och bei der Budgetsplanung 2015-2019 huet de Finanzminister dervu geschwat, datt den Zukunftspak, dee jo ee Spuerpak 2014 bis 2018 sollt sinn, misst ganz ëmgesat ginn fir wierksam ze sinn. Zënter e puer Wochen erliewe mer awer, datt de Wand aus enger anerer Richtung bléist: mat der Steierreform ginn elo vum nächste Joer u beim Staat manner Einnamen an der Héicht vu ronn enger hallwer Milliard Euro pro Joer ageholl, an déi ginn un d’Leit verdeelt. Zu bestëmmten Zäiten, a Krisenzäiten, wou d’Wirtschaft méi schlecht dréint, méi ausginn, an zu aneren Zäite spueren, heescht an der Budgetspolitik “antizyklesch Haushaltspolitik”.
    D’Joeren 2008 bis 2014 waren alles Krisejoeren, an awer ass do ënnerschiddlech gehandelt ginn.
    Enger Etude no, déi d’Europäesch Kommissioun am Abrëll virgeluecht huet, hunn net alleguer, awer eng Rei vun europäesche Länner, an dorënner Lëtzebuerg, vun 2008 u fir t’éischt méi ausginn an no 2011 gespuert. Bis elo.
    D’Resultat vun esou Politiken ass, datt an deene Länner mat e puer Ausnamen tëscht 2008 an 2011 d’Akommes vun deenen ënneschte Schichten tëscht 5 an 10 Prozent an d’Luucht gaangen ass, dat vun deene Schichte mat méi engem héijen Akommes ass an deeër Zäit éischter liicht gefall. Un deem éischten Effet sinn d’Sozialtransferts am allgemengen, un deem zweeten d’Pensiounen an d’Rente Schold.
    No 2011 dann huet jiddereen manner Akommes gehat an dee Réckgang huet déi mat deene klengen Akommes méi staark getraff, war also besonnesch a-sozial. Do waren eenzel Länner, wéi z.B. Schweden besser dran, mee a Groussbritannien ass déi Ongläichheet awer och nach méi prononcéiert gewiescht.
    Zu Lëtzebuerg ass d’Akommes vun de Privatleit an der Moyenne an de Joeren 2008-2011 ëm 0,2% erop gaangen, an der Period 2011-2014 awer ëm 0,8% erof gaang; ënner dem Stréch ergouf dat iwwer di ganz Period e Minus, deen elo also rëm soll ausgeglach ginn.
    Ech hunn elo keng Donnéeën, fir ze iwwerpréiwen, ob esou e Politikwiessel vun “ausginn” op “spueren” oder vu “spueren” op “ausginn” an deene jeeweilege Länner kann eppes dermat ze dinn hunn, op di nächst Walen méi no oder méi wäit ewech waren oder sinn.
    Fir Lëtzebuerg kéint een awer soen, 2008 war virun de Walen (national an duerno och nach kommunal) an du gouf méi ausginn. Dunn huet no 2011, wou keng Walen an de Féiss waren, d’Austéritéit regéiert. D’Wale vun 2013 sinn da vläicht eng Ausnam, well se ze séier an ze onerwaart koumen, mee duerno goung et rëm viru mat spueren, an ab 2017 gëtt rëm manner gespuert. Schliisslech sinn 2017, 2018 an 2019 Kommunal-, national an Europawalen!
    Oder ass et awer déi antizyklesch a prozyklesch Budgetspolitik? Da misst de Staat, well d’Wirtschaft jo lo rëm gutt dréint eigentlech rëm geschwë mat spueren ufänken. Wetten datt net virun 2020!

    4 min
  • Carte Blanche André Hoffmann, 13/07/2016

    Gefall huet et mer net, d’Resultat vum briteschen Referendum, awer nach manner déi demagogesch an onverantwortlech Verlugenheet virdrun an duerno.

    Ech hu mech awer och gefrot, wat déi britesch Regierungen da bäigedroen hätten zu engem méi sozialen an demokrateschen Europa.

    Vun der Madame Thatcher, déi sech drugin hat, déi britesch Gewerkschaften ze zerschloen, koum bekanntlech déi fatal Formel „There is no alternative“, déi sech iwwert ganz Europa verbreed huet. Fir déi ultraliberal, onsozial Ausriichtung vun der Europäescher Unioun duerchzedrecken. Dat Geschwätz vun der Alternatilosegkeet as matverantwortlech as fir déi falschst an ellenst Alternativ, déi et get: friemefeindlech, ondemokratesch, nationalistesch Stëmmungen a Stréimungen an Europa.

    An elo? Eng forcéiert zentraliséiert Integratioun, vun där ech elo erem héieren, iwwert d’Käpp vun de Leit ewech, géif déi Tendenzen nach bestäerken.

    Awer och de Réckzuch op den Nationalstaat kann net den Auswee sin. Kann een am Nationalstaat de Klimawandel besser stoppen oder de Finanzkapitalismus entmuechten? Get doduerch d’Konkurrenz tëschent de Staaten net nach méi grouss, op Käschten vu soziale Rechter, Steiergerechtegkeet an nohalteger Entwécklung?

    Datt deen neien Nationalismus och net zu méi Demokratie féiert, gesi mer an Ungarn a Polen. D’Beispill Griechenland huet awer och gewisen, wéi schwéier et as, eng nei Politik vun demokrateschen a soziale Rechter duerchzesetzen, wann et net eng staark europäesch Bewegung an déiselwecht Richtung get.

    Dat bräichten mer also: eng breet gesellschaftlech Bewegung fir e soziaalt, demokratescht an oppent Europa, déi vun den europäesche Bierger selwer gedroe get. An dat esouwuel um nationalen wéi um europäesche Niveau.

    Do get et zwar schons Usätz, ma et as net einfach. Awer wann dat net gelengt, kënnt Europa séng Zukunft schon hannert sech hun.

    Därf een optimistesch sin? Den italieneschen Philosoph a Politiker Antonio Gramsci huet eis aus aus vill méi däischteren Zäiten, nämlech aus  dem Mussolini séngem Prisong, eng schéin Iddi mat op de Wee gin: wann de Verstand zum Pessimismus tendéiert, bleiwt nach ëmmer den Optimismus vum Wëllen.

     

    3 min
  • Fir d'Aféieren vun engem Kannerwahlrecht, 11/07/2016
    No deem d'Resultater vum Referendum am Vereenegte Kinnécksräich bekannt gemaach gi sinn, gouf vill iwwer d'Ursaache vun dësem dach erstaunleche Resultat diskutéiert.
    Et huet ganz vill Leit schockéiert dass déi jonk Leit massif géint de Brexit gestëmmt hunn. Esou hunn méi wéi 2/3 vun deenen Wieler, déi manner wéi 35 Joër all sin, fir de Verbleif an der EU gestëmmt.  Si goufen allerdéngs vun deene Wieler déi méi al sinn iwwerstëmmt.
    Elo ass et awer esou dass grad déi jonk Generatioune mat Sécherheet vun de laangfristegen Folgen vun dem Brexit leide werten, wat fir eeler Wieler vill manner de Fall wert sinn. Dat ass eng Konsequenz déi sech logescherweis aus dem Ëmstand ergëtt datt Bevëlkerunge méi al gin.  An effektif läit den Duerchschnëttsalter vun de Wieler an eise Länner weit iwwer 50 Joër an deen Alter steigt regelmässeg weider. Besonnesch déi europäesch Länner déi eng niddreg Gebuertenzuel hunn, leiden staark ënnert dëser Evolutioun.
    Hei zu Lëtzebuerg ass Wuel versicht ginn de Wahlalter op 16 Joër erofzesetzen. Dat wir zwar ee Schrëtt an déi richteg Richtung gewiecht, mä et hätt héichstens eng Drëpps Waasser op ee waarme Steen duergestallt. Fir deen Trend an eiser Gesellschaft ze briechen misst ee scho vill méi radikal Mesuren ergreifen.
    An däer Hisiicht huet déi liberal schwäizer Denkfabrik, Avenir Suisse sech kierzlech agesat dass an eisen Demokratieën ee Kannerstëmmrecht soll agefouert ginn. Dat Stëmmrecht soll awer bis zur Groussjähregkeet ausgeübt ginn vun den Elteren oder vun de Kanner hiere gesetzleche Vertrieder. Avenir Suisse geet dervun aus dass Leit mat Kanner sech spontan a logescherweis méi u laangfristegen Ziiler orientéieren wéi méi al Leit ouni Kanner.
    Gewielte Politiker si bal instinktif drop aus fir d'Interêtën vun der Majoritéit vun hiere Wieler prioritär ze verdeedegen an dat sinn eben an eiser Gesellschaft virun allem kuerzfristeg Ziler  an d'Verdeedegung vun de famosen droits acquis.
    Wa mer wëllen Europa aus der ablécklecher Kris erausbréngen da muss ee couragéiert Mesuren huelen déi weit iwwer grouss Paroulen eraus ginn. D'Stëmmrecht ze änneren an deem een ee Kannerstëmmrecht aféiert wier ouni Zweifel eng ganz radikal Moossnahm déi awer eisen demokratesche Systeem net a Fro géif stellen.
    Et gëtt sécher och nach aner Weeër an hei sinn all Denkfabrike gefuerdert hier Beiträg ze maachen. Eis Politiker, eis Gewerkschaftler an eis Dirigeant'en aus der Wirtschaft si gefuerdert sech mat dësen Denkustéiss auserneen ze setzen an et och ze woen méi radikal Schrëtt ze huelen. D'Problemer vun der europäescher Unioun si keng Fatalitéit mä si si léisbar, et verlaangt awer staark Politiker mat vill Courage a virun allem Wäitsiicht fir se ze iwwerwannen.

    4 min
  • Eis Aarbechtskäschten, en Thema mat engem laange Baart., 08/07/2016
    Debatten an der Chamber iwwert Lag vun der Natioun an den Stabilitéitsprogramm sinn leider ëmmer erëm eng Geleeënheet fir mat Schlagwieder a mat vill Populismus ze operéieren. Esou war et och dëst Joer,  eemol méi. De Rapport vun der zoustänneger Chamber-Kommissioun ass och net vill besser.
    Ech zitéieren just aus enger Ried.
    « Zum Deel kann ee sech do baséieren op de Rapport vun der Kommissioun, deen ouni Ëmweeër e puer Saachen opdeckt, déi einfach net ginn ; nach ëmmer net ginn. Mir soen, mir hätten u Kompetitivitéit gewonnen. Fein ! Eis Produktivitéit ass zanter der Kris vun 2008 net méi an d’Luucht gaangen. D’Salaireskäschten deem géintiwwer awer schonn. D’Käschte vun enger héijer Main-d’œuvre ginn dacks ugesinn als Obstakel vun der ekonomescher Diversifikatioun. «
    All Joers ass sech an der Tripartite mat den Lounkäschten, den Lounniewekäschten, der Produktivitéit avm. beschäftegt ginn . Leider ginn et der Tripartiten net méi, waat déif blécke léist vir den soziale Modell Lëtzebuerg. Do hätt e kennen gemeinsam analyséieren, dass mer an de Joren 2008 bis 2013 eng schlem Finanz-a Wirtschaftskris haten. Am Joer 2008 sinn d’Finanzmäert zesumme- gebrach , am Joer 2009 huet d’Regierung mat den Sozialpartner an der Tripartite e Wirtschaftsprogramm fir di Kleng- a Mëttelbetriber definéiert, de virun allem d’Beschäftegung selt stäipen. En Ennerstëtzungsprogramm ass lancéiert ginn fir di lëtzebuergesch Banken finanziell oprecht ze erhalen. All des Moossnamen hunn eis ëffentlech Finanzen uerg strapazéiert.
    Gottseidank, huet des Politik gewierkt.
    Wann een sech elo erwaart huet, dass an dëser Zéit d’Produktivitéit gewuess wär, da liewt deen um Mount.
    D’Salaireskäschten sinn e wichtegen Indicateur- nieft aneren- fir e Wirtschaftsstanduert . Si variéieren ganz staark vu Land zu Land an och entspriechend den Wirtschaftssecteuren.
    Hei e puer Chiffren aus den Joer 2012 :
    Di duerchschnëttlech Aarbechtskäschten pro Stonn lungen an der EU-15 tëschent 13,30.-Euro (Portugal) an 39,35.-Euro (Dänemark). Eng Moyenne also vun 28,76.-Euro.
    Lëtzebuerg 33,91.-Euro                         Belsch 38.-Euro                 Däitschland 30,48.-Euro
    Frankräich 34,24.-Euro                         Holland 32,47.-Euro
    Lëtzebuerg léit op der 5.Platz an der EU-15.
    De Wirtschaftsminister huet dozou gesot :
    «  Zënter zéng Joer maachen ech Wirtschaftsmissiounen an deenen diverste Funktiounen, ech kann Iech soen, dass a kenger vun all deene Wirtschaftsmissiounen dat jee e Sujet war. »
    Ech mengen dat ass däitlech !
    Eigentlech missten mer houfreg sinn, dass mer an engem Land liewen, wou e gutt Stéck vum Wirtschaftskuch der Gesellschaft an senger Arbeitnehmerschaft zegutt kennt.
    Mir missten et just fäerdeg bréngen et besser ze verdeelen.

    4 min
  • Carte Blanche Patrick Michaely, 06/07/2016
    Een vun de memorabelste Momenter an der Wëssenschaft vun de leschte Jore war mat Sécherheet d’Landung am Joer 2014 vum klenge Lander Philae um Koméit 67P/Tschurjumov-Gerassimenko. Datt iwwerhaapt eng Sonde no iwwer 10 Joer Rees am risege Weltall punktgenee op engem Kierper lande kann, dee grad mol 4 op 4 Kilometer grouss ass, ass tatsächlech eng Prouesse a mécht Science-Fiction definitiv zur Realitéit... déi ons allerdéngs och ze denke sollt ginn: iwwer ons Plaz am Universum an virun allem iwwer d’Plaz, vun där mir kommen, nämlech engem klenge bloe Planéit. Der mënschlecher Entdeckungsloscht an Expansioun schénge keng Grenze méi gesat, a wien Entdeckung seet, denkt à la rigueur och schonns un Exploitatioun. Dat weist ons d’Geschicht mat sëlleche Beispiller, an och d’Aktualitéit zu Lëtzebuerg. Asteroid-Mining ass mëttlerweil net just iergend eng Fueziddi méi, mee tatsächlech eng konkret Kooperatioun tëscht Big Science a Big Business, bei där jidferee wëll matverdéngen.

    Virun e puer Méint ass vermellt ginn, datt d’Sonde Rosetta um selwechte Koméit Spure vun organesche Moleküle fonnt huet. Dës Trouvaille verstäerkt d’Hypothes, datt wichteg Bausteng vum Liewen duerch en ausserierdeschen Apport op d’Äerd komm sinn an hei eventuell zum Entstoe vum Liewe bäigedroe hunn. Wat an der Onendlechkeet vum Weltall op der Äerd méiglech war, war et vläicht och wouaneschters. An och dat sollt ons ze denke ginn.

    Well, kéint ee sech jo elo soen: Dat doten ass alles ganz wäit ewech, wat geet dat mech un? Mä, och hei weist d’Geschicht ons, datt dat, wat fréier wäit ewech war, meeschtens relativ séier, souguer ze séier op een duerkënnt. D’Welt, wat soen ech, de Weltall ass haut just nach en Duerf.

    Déi zwee Beispiller weisen awer, datt Wëssenschafte mëttlerweil méi si wéi just eng Zauberfabrik fir allméiglech nëtzlecht oder iwwerflëssegt Geschir, hëllefräich Medikamenter oder héichexplosiv Waffenarsenaler. Doduerch datt d’Wëssenschafte wichteg Donnéeë liwweren iwwer ons Plaz an der Welt respektiv am Weltall, doduerch dat se ëmmer méi staark an den Alldag vun de Mënschen erawierken - am gudde wéi am schlechten - forgéiere se ons Identitéit natierlech mat. D’Wëssenschaften an hir Duerstellung sinn domadder e Bestanddeel vun der Kultur genee esou wéi Konscht, Literatur, Musik, Danz, Film, Theater a.s.w.

    Dëst z’akzeptéiere fält allerdéngs ville Leit, an och Kulturresponsabelen heiansdo nach ëmmer schwéier. Als Naturwëssenschaftler reagéiert een nämlech e bëssi pickéiert, wann een den TNS-Ilres Sondage duerchbliedert, deen elo am Kader vun den Assises culturelles virgestallt gouf.

    Wann e ganze Panel vun 1022 Leit an engem Sondage net mol gefrot ginn, ob d’Wëssenschaften an hir ëffentlech Duerstellung eppes mat Kultur ze dinn hunn, kënne se natierlech weder mat jo nach mat neen äntwerten. Et wier awer grad an engem Land, datt sech elo mat Recherche an Innovatioun en neit Standbeen well opbauen, tatsächlech intressant gewiecht, genee dat gewuer ze ginn.
    Videospiller stoungen am Sondage als kulturellen Domaine zur Auswiel, firwat also net Wëssenschaften? ‘t ass leschtenends de gewiifte Programméirer, deen d’Spill un d’Lafe bréngt an zum Erliefnes mécht.

    * De Patrick Michaely ass vu Formatioun Biochemiker an am Naturmusée responsabel fir Ëffentlechkeetsaarbecht a Kommunikatioun.

    3 min
  • Carte Blanche Alain Wagner, 04/07/2016
    D’Europäesch Unioun an direkt Demokratie – dat schéngt net esou richteg zesummenzepassen. Bal all Kéiers wa probéiert gëtt, dem Integratiounsprozess iwwert e Referendum eng basisdemokratesch Legitimatioun ze ginn, ass d’Erniichterung grouss. Zum Beispill ass schonn 2005 de Verfassungsvertrag esouwuel a Frankräich wéi och an Holland duerchgefall. Aner Beispiller ginn et der vill. De Brexit ass deemno just de virleefegen Héichpunkt vun enger laanger Panneserie.   
    D’Ursaache vun dësem Negativtrend si schonn oft kommentéiert ginn. Gewënscht gëtt sech virun allem e manner bürokratescht a méi soziaalt Europa. En Europa, dat op weltpolitescher Bühn mat enger Stëmm schwätzt, ouni awer zu engem faden Eenheetsbräi ze verkommen. En Europa, wou de Mënsch am Mëttelpunkt steet, an net iergendwelch Lobbyen.
    Méi allgemeng stellt sech awer och d’Fro, wéini e Referendum e wierklech sënnvollt Instrument duerstellt. Eng gewëssen Dosis un direkter Demokratie ass ouni Zweifel wënschenswäert, well se all Mënsch erlaabt, u konkreten Entscheedungsprozesser                         deelzehuelen an doduerch Politik méi gräifbar gëtt. Wichteg ass dobäi net nëmmen d’Ofstëmmung selwer, mä och d’Tatsaach, datt am Virfeld an der ganzer Bevëlkerung diskutéiert an argumentéiert gëtt.
    Anerersäits ginn et och Situatiounen, wou e Politiker de Courage muss hunn, seng Verantwortung ze iwwerhuelen a méi wäit wéi den Zäitgeescht ze kucken. Sou huet zum Beispill de François Mitterrand d’Doudesstrof ofgeschaaft, obwuel deemools eng Majoritéit vu Fransousen géint eng Abolitioun war.
    Weider mécht e Referendum och nëmmen da Sënn, wann d’Leit ëmfaassend informéiert sinn an hir Decisioun en connaissance de cause kënnen huelen. Dat ass méiglech, wann et ëm e punktuellen, kloer ofgegrenzte Sujet geet, wéi zum Beispill hei zu Lëtzebuerg bei der Debatt iwwer d’Wahlrecht.
    Ganz anescht ass et awer, wann de Sujet sech esou komplex duerstellt, datt e fir den eenzelne Bierger net ze iwwerkucken ass. A grad dat ass de Problem bei deene groussen europapolitesche Referenden. Sou gouf 2005 iwwer en immens techneschen Text vu ronn 400 Säiten ofgestëmmt, vun deem déi meescht kaum eng Zeil gelies haten. An esou Konditiounen ass e Referendum just eng Alibiveranstaltung – an dat ganz onofhängeg vum Resultat.
    Och beim Brexit kann ee kaum dovun ausgoen, datt déi meescht Wieler d’Konsequenzen vun hirem Choix wierklech iwwerbléckt hunn. D’Resultat entspréngt manner engem rationellen Ofweien vu pro a contra wéi engem instinktive Bedürfnis, de Waasserkapp vu Bréissel eemol sou richteg ze rëselen. E Bedürfnis, dat ee wuel zum Deel noempfanne kann. Allerdéngs riskéiert de Präis fir dëse kuerze Moment vu Jubilatioun relativ héich auszefalen.             
    Sécher : Direkt Demokratie huet ëmmer eppes Erfrëschendes. Mä wann dat Ganzt sech um Terrain vun emotional gefierftem Hallefwëssen ofspillt, schmaacht d’Erfrëschung iergendwéi no Demagogie.  

    4 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners