Október er mánuður myndlistar og Katrín Helena Jónsdóttir er verkefnastjóri þessa verkefnis sem Samtök íslenskra myndlistarmanna standa fyrir. Katrín Helena segir okkur frá og og myndlistarkonan Margrét Blöndal flytur hlustendum fyrsta hugskeytið af fjórum sem hlustendur Víðsjár fá að heyra í tilefni af mánuði myndlistar.

Guðbjörg Jóhannesdóttir umhverfisheimspekingur kveður sér hljóðs og flytur sinn fyrsta pistil hér í Víðsjá um fagurfræði náttúrunnar.

Og við lítum við í Listasafni Íslands þar sem starfsmenn eru í óðaönn að ljúka við uppsetningu á nýrri sýningu á verkum Karls Einarssonar Dunganon. Rætt verður við Hörpu Björnsdóttir sýningarstjóra.

Á dögunum kom út bókin Skiptidagar - Nesti handa nýrri kynslóð. Höfundur hennar er Guðrún Nordal, forstöðukona Stofnunar Árna Magnússonar í íslenskum fræðum. Við heimsóttum Guðrúnu Nordal og spurðum fyrst um hvernig hugmyndin kom til, en ræturnar liggja áratug aftur í tímann, aftur í lætin sem þá voru að byrja í íslensku samfélagi.

Umsjón: Guðni Tómasson og Halla Harðardóttir.

Við ræðum við Önnu Agnarsdóttur, prófessor emeritus í sagnfræði við Háskóla Íslands, um ferðabækur Englendinga fyrr á öldum og þá sýn sem þar birtist á hefðum og venjum Íslendinga. Anna heldur fyrirlestur um efnið á málþingi Félags um átjándu aldar fræði sem nefnist Kveðjur og kurteisi á átjándu og nítjándu öld. Málþingið verður í Þjóðarbókhlöðu næstkomandi laugardag.

Bertel Ólafsson, forritari og tónlistarmaður, verður einnig gestur þáttarins en hann ætlar að segja hlustendum frá sínu uppáhalds listaverki. Við heyrum sígildri plötu sem tengist miðjarðarhafseyjunni Ibiza.

Og Ragnar Ísleifur Bragason flytur pistil dagsins, sem að þessu sinni fjallar um mann sem ferðast í strætisvagni og konu með mikinn varalit. En þátturinn hefst á spjalli við Gunnar Kvaran sellóleikara,sem verður með tónleika í Hannesarholti í kvöld.

Umsjón: Guðni Tómasson og Halla Harðardóttir.

Við ræðum við Andra Snæ Magnason um nýja bók sem hann er með í smíðum, og fyrirlestur tengdan henni sem Andri mun flytja í Hannesarholti í kvöld. Fyrirlesturinn er hluti af fyrirlestrarröð sem Andri kallar Tímann og vatnið, og verða gestir Andra í kvöld þeir Helgi Björnsson prófessor í jarðvísindum og tónlistarmaðurinn Snorri Helgason. María Kristjánsdóttir fjallar um leikverkið Svartlyng eftir Guðmund Brynjólfsson sem sýnt er um þessar mundir í Tjarnarbíói. Einnig verður rætt við myndlistarkonuna Katrínu Sigurðardóttur um verk hennar á alþjóðlegum myndlistarsýningum í Brasilíu og Bandaríkjunum. Halla Sverrisdóttir þýðandi segir okkur frá bók vikunnar sem að þessu sinni er Fjallið í Kaupmannahöfn, eftir Kaspar Colling Nielsen. En við ætlum að byrja þáttinn á að heyra splunkunýtt Manifesto. Þetta er stefnuyfirlýsing Mótþróaskáldanna og Fríða Ísberg kom í hljóðstofu Víðsjár með skilaboðin.

Umsjón: Guðni Tómasson og Halla Harðardóttir.

Alþjóðleg kvikmyndahátíð Reykjavíkur, RIFF, hefst í dag. Kvikmyndagerðamaðurinn og ljóðskáldið Jonas Mekas er heiðursgestur hátíðarinnar í ár og mun Víðsjá gera listamanninum skil í þætti dagsins. Rætt er við Benedikt Hjartarson, prófessor í bókmenntafræði og menningarfræði við Háskóla Íslands um Jonas Mekas, sem hefur verið kallaður guðfaðir amerísku framúrstefnunnar.

Harbinger sýningarrými við Freyjugötu verður heimsótt en þar sýnir Ragnheiður Káradóttir verk sín þessa dagana og kallar sýninguna Utan svæðis. Þar koma moppur, drullusokkar og víddaflakk við sögu.

Í dag hefst Bókamessan í Gautaborg og er bókasafnið alltaf stór hluti af þeim viðburði. Halla Þórlaug Óskarsdóttir fékk sér sæti á einu slíku þar í borg og lét hugann reika um bókasöfn, heimili, einsemdina og hversdagsleikann.

Einnig verður tónlistakonan Tinna Þorsteinsdóttir gestur þáttarins en hún og myndlistakonan Æsa Björk unnu nýverið fyrstu verðlaun á Alþjóðlegri glerlistasýningu í Japan.

Dalrún Eygerðardóttir, doktorsnemi í sagnfræði, verður gestur Víðsjár í dag og segir frá rannsóknum sínum á lífi flökkukvenna, en hún hefur undanfarin ár rannsakað sögu íslenskra flökkukvenna á 20.öld. Skapti Runólfsson, myndlistarkennari á Dalvík, verður einnig gestur þáttarins, en hann mun segja hlustendum frá sínu uppáhaldslistaverki, sem hefur eitthvað með djöfulinn að gera. Einnig munum við slá á þráðinn í listagalleríið OPEN og fá að heyra af gjörninga og taco kvöldi sem verður haldið þar í kvöld. Gauti Kristmannson verður með fyrstu bókarýni vetrarins, að þessu sinni tekur hann fyrir skáldsöguna Drottningin á Júpíter, absúrdleikhús Lilla Löve, eftir Júlíu Margréti Einarsdóttur. En við byrjum á því að huga að tveimur svörtum fánum.

Umsjón: Guðni Tómasson og Halla Harðardóttir

Við förum í safnaðarheimili Neskirkju við Hagatorg og heyrum af nýrri myndlistarsýningu Siggu Bjargar Sigurðardóttur. Sýninguna kallar Sigga Björg Blett.

Bók vikunnar að þessu sinni er ævisaga skáldsins Vilborgar Dagbjartsdóttur, Úr þagnarhyl, skráð af Þorleifi Haukssyni. Við ræðum við Þorleif um bókina og samstarf þeirra Vilborgar, auk þess sem hann les brot úr bókinni. Einnig verður Sigurður Skúlason leikari gestur þáttarins en hann segir frá grein sinni Að leika Shakespeare - hugleiðing um form sem kom út í nýjasta hefti Tímarits Máls og menningar. Dúkkuheimilið, annar hluti, var frumsýnt í Borgarleikhúsinu síðastliðinn föstudag. Verkið er eftir Lucas Hnath en það er Una Þorleifsdóttir sem leikstýrir. María Kristjánsdóttir fór á sýninguna.

Umsjón: Guðni Tómasson og Halla Harðardóttir.

Víðsjá í dag er helguð Atla Heimi Sveinssyni tónskáldi en á morgun (föstudag) verður Atli áttræður. Atli Heimir er meðal virtustu tónskálda landsins en hann stóð áratugum saman í stafni tónlistarlífsins, ekki síst þegar kom að framúrstefnu í tónlist. Atli fékk til dæmis fyrstur Íslendinga Tónskáldaverðlaun Norðurlanda. Hann hefur samið fjölda tónverka, s.s. einleikskonserta, hljómsveitarverk, kammerverk og einleiksverk. Þá hefur hann samið tónlist fyrir leikhús og hafa þar fæðst margar perlur sem lifa góðu lífi með þjóðinni. Í þættinum er notast við gömul viðtöl við Atla Heimi og dagskrárgerð sem hann vann á árum áður fyrir Ríkisútvarpið, auk þess sem tónlist hans hljómar í þættinum og lesið er úr grein hans Listamannslíf sem birtist í Tímariti Máls og menningar árið 1997.

Umsjón: Guðni Tómasson og Halla Harðardóttir.

Í Víðsjá í dag verður Gyrðir Elíasson rithöfundur heimsóttur og rætt við hann um tengslin milli einangrunar og listsköpunar í tilefni af útkomu nýrrar skáldsögu sem heitir Sorgarmarsinn og Gyrðir sendi frá sér á dögunum. Víðsjá kíkir líka á sýninguna Dauði hlutarins í Marshallhúsinu þar sem Páll Haukur Björnsson veltir fyrir sér fyrirframgefnum hugmyndum okkar um merkingu hluta. Kjartan Óskarsson klarinettuleikari verður tekinn tali um tónverkið Sagan af dátanum (L' Historie du soldat) eftir Igor Stravinsky en verkið verður flutt á fyrstu tónleikum nýs starfsárs hjá Kammersveit Reykjavíkur á sunnudag, en nú eru 100 ár liðin frá frumflutningi verksins. Ennfremur flytur Ragnar Ísleifur Bragason pistil í Víðsjá dagsins sem að fjallar að þessu sinni um mann á opnun.

Umsjón: Guðni Tómasson og Halla Harðardóttir.

Halldóra Thoroddsen gaf nýlega út skáldsöguna Katrínarsögu. Bókin segir af Katrínu, vinum hennar og kunningjum sem berast með straumi tímans um hippadóm og upphaf auðhyggjuskeiðs. Víðsjá sækir Halldóru heim í dag og heyrir af Katrínu.

María Kristjánsdóttir fjallar um leikverkið Allt sem er frábært, eftir Duncan Mcmillan, sem frumsýnt var í Borgarelikhúsinu um liðna helgi.

Við ræðum við Steinunni Sigurðardóttur um bók hennar Ástin fiskanna frá árinu 1993 en hún er bók vikunnar á Rás1.

Frosti Runólfsson segir frá sínu uppáhaldslistaverki og við gluggum í nýja Ikea-bæklinginn.

Umsjón: Guðni Tómasson og Halla Harðardóttir.

Við kíkjum í Gallery Port við Laugaveg og heyrum af nýju samstarfsverkefni þeirra við Mál og menningu, sem miðar meðal annars að því að gera myndlist aðgengilegri almenningi. Árni Már Erlingsson segir okkur af verkefninu sem kallast Upplagt og hefur göngu sína á laugardag með opnun á verkum Ragnars Fjalars Lárussonar.

Annað kvöld verður verkið Allt sem er frábært eftir Duncan Macmillan frumsýnt í Borgarleikhúsinu. Við kíkjum í heimsókn til leikstjórans, Ólafs Egilssonar, og fáum að heyra af þessum einleik sem hefur farið sigurför um heiminn frá því hann var frumsýndur í Edinborg árið 2015.

Þráinn Hjálmarsson tónskáld kemur í þáttinn til okkar og segir frá verkum sínum sem nýlega komu út á nýrri plötu sem hann kallar Influence of Buildings on Musical Tone.

Og okkur mun berast pistill frá Svíþjóð en í dag ætlar Halla Þórlaug Óskarsdóttir að segja okkur frá Ameliu Earhart og samviskubiti í samtímanum.

Umsjón: Guðni Tómasson og Halla Harðardóttir