Við ræðum við Sigríði Soffíu Nielsdóttur dansara og Helga Má Kristinsson myndlistarmann um myndlist sem reynir að fanga eðli heyfingar sem dansarinn skilur eftir sig. Slegið verður á þráðinn austur á Seyðisfjörð og forvitnast um skólasöngleik nemenda sem snýr að fornleifafundi þar í nágrenninu fyrir nokkrum árum. Við ræðum við Jón Ásgeir Kalmansson heimspeking um náttúrupælingar Páls Skúlasonar, en hann er einn þeirra sem flytja erindi á Pálsvöku, málþingi um heimspeki Páls Skúlasonar í Hannesarholti á laugardag.

Magnea J. Matthíasdóttir þýðandi segir frá bók vikunnar, en það er skáldsagan Það sem að baki býr, eftir dönsku skáldkonuna Merete Pryds Helle, og Guja Dögg Hauksdóttir flytur pistil um tvö menningarrhús í Reykjavík.

Umsjón: Guðni Tómasson og Halla Harðardóttir

Við hittum Þórunni Jörlu Valdimarsdóttur og heyrum af nýútkominni ljóðabók hennar, Villimaður í París.

María Kristjánsdóttir rýnir í leikverkið Fólk, staðir og hlutir sem frumsýnt var um liðna helgi í Borgarleikhúsinu.

Lesið er brot úr bók vikunnar á Rás1, Það sem að baki býr eftir dönsku skáldkonuna Merete Pryds Helle í þýðingu Magneu J. Matthíasdóttur. Auk þess heyra hlustendur þáttarins af útgáfuverkefninu Veðurskeyti frá Ásgarði sem Atli Ingófsson tónskáld er að vinna að núna í samstarfi við hóp fræðimanna og listamanna.

Umsjón: Guðni Tómasson og Halla Harðardóttir.

Rætt er við Arngerði Maríu Árnadóttur og Lilju Dögg Gunnarsdóttur úr tónlistarhópnum Umbru um nýútkomna plötu þeirra, Úr myrkrinu.

Skáldsagan Norma eftir Sofi Oksanen kom út árið 2016 og er bók vikunnar á Rás 1. Við ræðum við þýðandann, Sigurð Karlsson.

Gestur okkar í síðari hluta Víðsjár verður myndlistarkonan Gabríela Friðriksdóttir sem nú á verk á sýningu í Hverfisgalleríi. Við heimsækjum Gabríelu og ræðum við hana um um lífið og listagyðjuna.

Umsjón: Guðni Tómasson og Halla Harðardóttir.

Við förum í heimsókn til Karls Sigurbjörnssonar fyrrverandi biskups Íslands, og ræðum við hann um skáldsöguna Gilead eftir Marylinne Robinson, en hún kom nýverið út í þýðingu Karls.

Við kynnum okkur hið svokallaða Apu-vandamál Simpsons þáttanna og Arndís Björk Ásgeirsdóttir flytur pistil um tónlist þar sem varpað verður ljósi á óvænt samband Önnu Magdalenu Bach og Diönu Ross.

Við grípum niður í viðtal við bandaríska trompetleikarann Wadada Leo Smith sem tekið var við hann í fyrra en hann er nú aftur kominn til Íslands og heldur tónleika í Mengi á föstudaginn.

Umsjón: Guðni Tómasson og Halla Harðardóttir.

Við heimsækjum Tjarnarbíó og ræðum við Auði Övu Ólafsdóttur, Dóra DNA og Ásgeir Helga Magnússon um poppóperuna Vakúm eftir Melkorku Sigríði Magnúsdóttur, en verkið verður frumsýnt þar á fimmtudagskvöld.

Markús Þór Andrésson sýningarstjóri segir hlustendum frá sýningunni Tak i lige måde, sem nú er uppi í Hafnarhúsi Listasafns Reykjavíkur. Sýningin er sett upp í tilefni af 100 ára afmæli fullveldis Íslands og hefur að geyma samtímalist frá Danmörku.

Sigurður Karlsson les úr þýðingu sinni á Normu eftir Sofi Oksanen sem er bók vikunnar á Rás 1. Persóna bókarinnar Norma er með heldur betur dularfullt hár.

En fyrst hugum við að nýju minnismerki í Bandaríkjunum sem opnað verður með viðhöfn undir lok mánaðar, en þar er minnst þeirra svörtu Bandaríkjamanna sem teknir voru af lífi án dóms og laga í suðurríkjunum af æstum múg þegar kynþáttaaðskilnaðurinn stóð þar sem hæst.

Umsjón: Guðni Tómasson og Halla Harðardóttir.

Við förum á Stjörnutorg í Kringlunni og hittum þar fyrir Baldur Jóhannesson, en hann heldur utan um heimspekikaffi sem hittist hálfsmánaðarlega. Næsta sunnudag mun heimspekikaffið hittast við Dominos á Stjörnutorgi til að ræða kosti og galla gróðadrifinna stórfyrirtækja.

Svala Arnardóttir menningarfræðingur og pistlahöfundur okkar í Berín ætlar í dag að segja okkur frá Stasi-safninu þar í borg.

Við heyrum í Guðmundi Andra Thorsyni, sem er mikill aðdáandi Stefans Zweig og sjálfsævisögu hans, Veröld sem var, en hún er bók vikunnar á Rás1.

Og við sláum á þráðinn til Parísar og heyrum af samsýningu í hjarta Parísar. Sigurður Árni Sigurðsson er að setja upp verk sín í flugubúð úti í eyjunni Ile St. Louis

Við ræðum við Írisi Ellenberger doktor í sagnfræði, um nýlega rannsókn hennar á menningarblöndun í Reykjavík í upphafi 20.aldar. Íris hefur rannsakað sérstaklega hvernig fólk undirstrikaði stéttarstöðu sína með dönskum hlutum, mat og orðum og hvað fólkið sem tilheyrði ekki ráðandi stétt gerði með þessa framandi dönsku menningu sem var aðeins á færi fárra.

Við kíkjum inn á æfingu í Söngskóla Reykjavíkur þar sem þær Hallveig Rúnarsdóttir, sópran, Sigríður Ósk Kristjánsdóttir, mezzósópran, og Hrönn Þráinsdóttir, píanóleikari undirbúa flutning á nýjum sönglögum og þjóðlagaútsetningum Jónasar Ingimundarsonar. Tónleikarnir eru hluti af tónleikaröðinni Tíbrá, og verða haldnir í Salnum í Kópavogi næstkomandi sunnudag.

Guja Dögg Hauksdóttir arkitekt flytur pistil um fagurfræði borgarinnar í aðdraganda borgarstjórnarkosninga, að þessu sinni fjallar pistill hennar um staðsetningu Landsspítalans.

Umsjón: Guðni Tómasson og Halla Harðardóttir.

Við ræðum við Svein Dúa Hjörleifsson, en hann er fastráðinn við óperuna í Leipzig í Þýskalandi og syngur þar í hverri sýningunni á fætur annarri.

Við heimsækjum Þórey Eyþórsdóttur í Gallerí Vest við Hagamel í Vesturbæ Reykjavíkur og við hugum að útkomu Lespúsla, fjögurra kvera sem gefa innsýn í höfundarverk Þórarins Eldjárn með nýstárlegum hætti.

Þættinum berast skilaboð frá Nýló á 40 ára afmælisári Nýlistasafnsins eins og við stefnum að einu sinni í mánuði á þessu afmælisári. Skilaboðin sem okkur berast eru frá Báru Bjarnadóttur en það er Kristín Helga Ríkharðsdóttir sem ber okkur þau.

Og lesið er úr bók vikunnar sem að þessu sinni er Veröld sem var eftir Stefan Zweig.

Umsjón: Guðni Tómasson og Halla Harðardóttir.

Við förum út á Granda þar sem myndlistarkonan Hulda Hákon býr og er með vinnustofu. Hulda setur Lou Reed á fóninnn og segir frá áhrifavöldunum í sínu lífi.

Við hugum að Biblíunni í dymbilvikunni. Gauti Kristmannsson flytur okkur pistil þar sem hann veltir fyrir sér þessari áhrifamestu bók íslenskra bókmennta.

María Kristjánsdóttir segir frá sinni upplifun af tveimur sýningum í Borgarleikhúsi: Sýningunni sem klikkar og Rocky horror.

Rauða skáldahúsið nefnist ljóðakvöld sem verður haldið á Skírdag í Iðnó. Það er þýðandinn og skáldkonan Meg Matitz sem stendur fyrir kvöldinu ásamt Nönnu Gunnarsdóttur sem einnig hefur skipulagt ýmsa listtengda viðburði, í Englandi og í Reykjavík. Við ræðum við Meg og Nönnu.

Umsjón: Guðni Tómasson og Halla Harðardóttir.

Brynhildur Guðjónsdóttir flytur ávarp á alþjóðlegum degi leiklistar.

Við heimsækjum Hafnarborg, menningarmiðstöð Hafnarfjarðar, en þar voru á dögunum opnaðar tvær sýningar með verkum Jóns Axels Björnssonar og Jóhönnu Kristbjargar Sigurðardóttur. Jón Axel sýnir málverk á sýingunni Afstæði en Jóhanna bíður upp á margslungna innsetningu sem hún kallar Margoft við sjáum og margoft við sjáum aftur.

Starkaður Sigurðarson fjallar um sýninguna Bæklingar í gallerí OPEN.

Bærinn Múlakot í Fljótshlíð tengist íslenskri listasögu sterkari böndum en hingað til var vitað. Í Múlakot lögðu margir af okkar fremstu listamönnum leið sína og dvöldu um lengri eða skemmri tíma. Ásta Friðriksdóttur listfræðingur segir frá meistararitgerð sinni sem fjallar um Múlakot og listamenninga sem tengdust bænum.

Umsjón: Guðni Tómasson og Halla Harðardóttir.