Víðsjá

Í Víðsjá í dag er rætt við Hannes Lárusson myndlistarmann um Laxabakka, hús Ósvaldar Knudsen á bökkum Sognsins, en Hannes fer fyrir hópi fólks sem stefnir á að endurbyggja húsið og finna því nýtt hlutverk. Listasafn Íslands verður heimsótt og rætt við Hörpu Þórsdóttur um sýninguna Gjöfin frá Amy Engilberts en þar má sjá verk sem keypt voru í safnið með fjármunum hennar, en 13 íslenskir listamenn eiga verk á sýningunni. Bók vikunnar á Rás 1 að þessu sinni er Veröld ný og góð eftir Aldous Huxley en Árni Bergmann segir hlustendum frá bókinni og lesið verður úr henni. Hjörleifur Stefansson arkitekt verður einnig tekinn tali um byggingarsögu Heggningarhússins við Skólavörðustíg, en hann hélt erindi um það efni í dag í hádegisfundi Sagnfræðingafélagsins.

Umsjón: Guðni Tómasson og Kristján Guðjónsson

Í Víðsjá í dag verður rætt við Leif Ými Eyjólfsson myndlistarmann sem á dögunum hlaut Hvatningarverðlaun Íslensku myndlistarverðlaunanna árið 2019 fyrir sýninguna Handrit í Hafnarhúsi Listasafn Reykjavíkur. Leifur verður heimsóttur í safnið þar sem hann er að taka niður sýninguna og rætt við hann um listsköpun hans almennt í tilefni verðlaunanna. Þorvaldur Sigurbjörn Helgason leiklistarrýnir Víðsjár segir frá upplifun sinni á leikverkinu Club Romantica í Borgarleikhúsinu og Ragnhildur Hólmgeirsdóttir sagnfræðingur flytur pistil um ferðamennsku á Íslandi fyrr á öldum. Loks verður fjallað um einn myrkasta afkima alþjóðlegs myndlistarmarkaðar en þar er verslað með myndlist Adolfs Hitlers.

Umsjón: Guðni Tómasson og Kristján Guðjónsson.

Undir lok þáttar í dag verður rætt við Höllu Mjöll Hallgrímsdóttur um endurminningar föður hennar úr spænska borgarastríðinu, en Hallgrímur Hallgrímsson var einn nokkurra Íslendinga sem barðist með spænska lýðveldishernum gegnum fasistum í stríðinu. Endurminningabók hans, Undir fána lýðveldisins, hefur nú verið endurútgefin í fyrsta skipti eftir tæp 80 ár.

 

Við heimsækjum líka Norræna húsið og kynnum hlustendur fyrir nýjum forstjóra þar á bæ, Sabinu Westerholm, sem tók við starfi sínu í upphafi árs.

 

Ríkarharður H. Friðriksson tónskáld og raftónlistarmaður velur uppáhalds listaverk sitt fyrir hlustendur og María Kristjánsdóttir segir skoðun sína á uppsetningu Þjóðleikhússins á Jónsmessunæturdraumi eftir William Shakespeare í leikstjórn Hilmars Jónssonar.

Hlustendur fá líka að heyra hér á eftir hver fær Hagþenkis, félags höfunda fræðirita og kennslugagna, að þessu sinni

Í Víðsjá er rætt við Önnu Guðjónsdóttur um sýningu hennar í A-sal Hafnarhússins sem heitir Hluti í stað heildar - Pars pro toto. Þar brýtur Anna upp rýmið á forvitnilegan hátt, eiginlega með hreinum sjónhverfingum og býr til merkilega mikla þrívídd á einfaldan hátt. Inn í sýninguna blandast síðan minningar úr íslensku landslagi.

Fjallað verður um heimildarmyndina Free solo sem fjallar um fjallaklifur en Sigtryggur Ari Jóhannsson ljósmyndari verður tekinn tali um hana. Myndin hlaut Óskarsverðlaun á dögunum.

Bergsveinn Birgisson rithöfundur segir frá bók sinni Lifandi lífslækur sem er bók vikunnar á Rás 1 þessa vikuna. Bókin gerist á tímum Skaftáreldanna þegar andi upplýsingarinnar blæs um Evrópu og segir frá Magnúsi Árelíusi sem er innblásinn af anda tímans, vill mæla en áttar sig kannski á því að mælitækin ná ekki utan um allt. Leifur Hauksson les brot úr bókinni.

Starkaður Sigurðarson flytur myndlistarpistil um heimsókn sína í Listasafn Árnesinga þar sem sýningin Huglæg rými eftir Ólaf Svein Gíslason stendur yfir til enda mánaðarins.

Umsjón: Guðni og Kristján Guðjónsson.

Í síðustu viku voru Íslensku myndlistaverðlaunin afhentí annað skipti. Tvenn verðlaun voru veitt. Leifur Ýmir Eyjólfsson fékk hvatningarverðlaunin, en aðalverðlaunin, útnefninguna myndlistarmaður ársins 2019, hlaut Eygló Harðardóttir fyrir sýningu sína Annað rými sem sett var upp í Nýlistasafninu síðasta haust. Undir lok þáttar ætlum við að heimsækja Eygló Harðardóttur í vinnstofu hennar að Seljavegi.

Í pistli sínum í dag fjallar Halla Þórlaug Óskarsdóttir um Rösska-hönnunarsafnið í Gautaborg sem hefur opnað á ný eftir að hafa verið lokað undanfarin tvö ár.

 

Og í tilefni þess að á sunnudag verður fyrsti þátturinn í þýsku sjónvarpsþáttaröðinni Babylon Berlín frumsýndur á RÚV mun Gauti Kristmannsson sökkva sér ofan í metsölubækurnar sem þættirnir byggja á, röð reyfara eftir Volker Kutscher, um rannsóknarlögreglumanninn Geroeo Rath sem starfar í Berlín á þriðja og fjórða áratug síðustu aldar.

Í Víðsjá í dag verður rætt við Friðgeir Einarsson um leikverkið Club Romantica sem frumsýnt verður í Borgarleikhúsinu annað kvöld.

Þóranna Dögg Björnsdóttir segir frá sínu uppáhalds listaverki og Inga Björk Bjarnadóttir segir frá upplifun sinni á myndlistarsýningunni Hringur, ferhyrningur, lína á Kjarvalsstöðum þar sem verk Eyborgar Guðmundsdóttur listmálara eru í öndvegi.

Einnig flytur Ragnheiður Gyða Jónsdóttir hlustendum sinn síðasta pistil um töfra tungumálanna.

Í Víðsjá í dag verður rætt við hönnunarteymið Stúdíó Flétta en þær eru sanka að sér gömlum verðlaunagripum um þessar mundir og ætla að endurnýta í nýja hönnun. Stúdíó Flétta eru með opna vinnustofu í Gryfjunni í Ásmundarsal núna og fram að Hönnunarmars, í lok næsta mánaðar.

Við skoðum deilur um Stonehenge í Suður-Englandi. Í pistli sínum í þessari viku fjallar Ragnhildur Hólmgeirsdóttir um bréf Íslendinga í þrældómi í Norður Afríku á 17. öldinni.

Bók vikunnar á Rás 1 er Með köldu blóði eftir Truman Capote. Að því tilefni verður rætt við Björn Þór Vilhjálmsson, bókmenntafræðing, um bókina.

Þorvaldur Sigurbjörn Helgason rýnir í sviðslistahátíðina Ég býð mig fram sem Unnur Elísabet Gunnarsdóttir heldur utan um.

Umsjón: Guðni Tómasson og Kristján Guðjónsson.

Tilnefningar til Bókmenntaverðlauna Norðurlandaráðs 2019 verða kynntar í dag. Eins og áður eru tveir rithöfundar eru tilnefndir til verðlaunanna fyrir Íslands hönd. Við fáum að heyra hvaða höfundar eru tilnefndir til verðlaunanna í ár.

Við kíkjum einnig við á nýrri sýningu sem nefnist Andsetning og fer fram í Listasafni Einars Jónssonar. Þar sýna Anna Hallin og Olga Bergmann rýmistengd vídeóverk sem eiga í samspili við höggmyndir Einars og bygginguna sjálfa.

Við skoðum hvað listasöfn í Hollandi og víðar ætla að gera í tilefni af 350 ára ártíð málarans Rembrandts, og Gauti Kristmannsson rýnir í Vammfirringu eftir Þórarin Eldjárn, bók sem kom út fyrir síðustu jól.

Við höldum svo áfram að velta fyrir okkur kynningu á íslenskum listum erlendis. Nú verður rætt við Birnu Hafstein, forseta Sviðslistasambands Íslands, um erindi íslenskra sviðslista við umheiminn.

Umsjón: Guðni Tómasson og Kristján Guðjónsson.

Í Víðsjá í dag verður rætt við meðlimi Gjörningaklúbbsins um Nýjasta testamentið, sem er sýning þeirra í Hverfisgalleríi. Sýningin er hápólitísk, feminísk og guðfræðileg.

Atli Ingólfsson tónskáld og þýðandi segir frá belgíska söngvaskáldinu Jacques Brel en plata með nýjum þýðingum Atla á lögum belgans kom út á dögunum, þar kveður nýr söngvari sér hljóðs, Balvin Orwes sér hljóðs og syngur lög Brel á íslensku.

Ragnheiður Gyða Jónsdóttir flytur pisil um töfraheim tungumálanna og loks segir myndlistarmaðurinn Logi Leó Gunnarsson frá sínu uppáhalds listaverki.

Umsjón: Guðni Tómasson og Kristján Guðjónsson

Nú stendur yfir á Kjarvalsstöðum fyrsta yfirlitssýning á verkum Eyborgar Guðmundsdóttur, sérstæðrar listakonu sem hingað til hefur verið lítið þekkt í íslenskum listheimi. Í þættinum í dag fræðumst við um Eyborgu og ræðum við sýningarstjórana Hebu Helgadóttur og Ingibjörgu Sigurjónsdóttur.

Um helgina hlutu Ingibjörg Haraldsdóttir og Gunnar Þorri Pétursson Íslensku þýðingaverðlaunin 2019 fyrir þýðingu sína á Hinum smánuðu og svívirtu eftir Fjodor Dostojevskí. Við endurtökum því ýtarlegt spjalls sem við áttum við Gunnar Þorra um bókina.

Og bók vikunnar er Sænsk gúmmístígvel eftir Henning Mankell. Við heyrum frá þýðanda bókarinnar, en það er Hilmar Hilmarsson.

Við heimsækjum líkja Listasafn Reykjanesbæjar og skoðum nýja sýningu Guðjóns Ketilssonar, sem nefnist Teikn.