Víðsjá

Sindri Leifsson og Vala Sigþrúðar Jónsdóttir notast við óvenjulegan efnivið, meðal annars þvottavélakusk og sítrónur, í verkum á sýningu sinni Re-fresh í Harbinger-galleríinu. Í Víðsjá í dag verður rætt við Sindra og Völu um kusk, sítrónur og ferskleika.

Bók vikunnar er Náðarstund (e. Burial Rites) eftir Hönnuh Kent. Þessi vinsæla skáldsaga er byggð á sannsögulegum atburðum, sögu Agnesar Magnúsdóttur og Friðriks Sigurðssonar, sem voru tekin af lífi árið 1830 fyrir tvö morð. Í Víðsjá í dag heyrum í höfundinum, hinni áströlsku Hönnuh Kent, og lesum brot úr bókinni.

Sagt verður frá ný útkominni "týndri plötu" bandaríska tónlistarmannsins Marvins Gaye en í dag er þess minnst að 80 ár eru liðin frá fæðingu hans.

Loks verður farið í heimsókn í Hverfisgallerí þar sem myndlistarmaðurinn Steingrímur Eyfjörð verður tekinn tali um nýjustu sýningu hans Megi þá helvítis byltingin lifa sem var opnuð þar um síðustu helgi.

Í Víðsjá í dag fögnum við opnunardegi hönnunarhátíðarinnar Hönnunarmars með umfjöllun um íslenska textílhönnun. Rætt verður við Rögnu Fróða, formann textílfélagsins, en sýning félagsins Líf eftir líf stendur ný yfir í Veröld - húsi Vigdísar.

Gauti Kristmannsson rýnir í ljóðabók rússnesk-bandaríska ljóðskáldsins Ilya Kaminsky, Dansað í Odessa, en þýðing bókarinnar er síðasta verkið sem Sigurður Pálsson vann að áður en hann lést.

Sýningin Allt fínt eftir Örnu Óttarsdóttir opnaði fyrr í mánuðinum í Nýlistasafninu. Starkaður Sigurðarson, myndlistargagnrýnandi Víðsjár, fjallar um sýninguna í þætti dagsins.

Og við fáum pistil frá Gautaborg. Halla Þórlaug Óskarsdóttir fjallar í dag um börn og foreldra, nýju fötin keisarans og hina ungu sænsku baráttukonu gegn loftslagsbreytingum, Gretu Thunberg.

Umsjón: Guðni Tómasson og Kristján Guðjónsson

Í Víðsjá í dag veltum við fyrir okkur eldfimu sambandi auðmagns og menningarstofnana, en að undanförnu hafa listasöfn verið gagnrýnd fyrir að þiggja háar fjárhæðir frá eigendum eins umdeildasta lyfjafyrirtækis heims, Sackler-fjölskyldunni. Sigurjón Baldur Hafsteinsson, prófessor í safnafræði, heimsækir þáttinn og ræðir tengsl peninga og listar.

Tyrfingur Tyrfingsson, leikskáld, flytur ávarp í tilefni að alþjóðlega leiklistardeginum sem er haldinn hátíðlegur í dag.

Birgir Sigurðsson, rafvirki og myndlistarmaður, segir frá uppáhaldslistaverkinu sínu.

Og rætt verður við Sigurð Gylfa Magnússon og Önnu Heiðu Baldursdóttur, um öndvegisverkefnið Heimsins hnoss, þar sem efnismenning fyrri alda er rannsökuð.

Umsjón: Guðni Tómasson og Kristján Guðjónsson

Í Víðsjá í dag verður rætt við Braga Þór Jósefsson, ljósmyndara,i um ljósmyndasýninguna Krummaskuð sem nú stendur yfir í ljósmyndagalleríinu Ramskram.

Rætt verður við Vilhelm Vilhelmsson, sagnfræðing, um rannsóknir hans á sáttanefndum og lausnum deilmála á 19. öld. En í dag flytur hann fyrirlestur á vegum Sagnfræðingafélags Íslands um efnið.

Þá segir Árni Óskarsson, þýðandi, frá skáldsögunni Hnotskurn eftir Ian McEwan, en hún er bók vikunnar á Rás 1 þessa vikuna.

Þorvaldur Sigurbjörn Helgason, leiklistargagnrýnandi Víðsjár, rýnir í nýtt íslenskt leikrit í Þjóðleikhúsinu, Súper eftir Jón Gnarr.

Sigríður Valdimarsdóttir verður tekin tali um meistaraverkefni sitt sem snéri að vinnuaðstöðu íslenskra myndlistarkvenna en hún er ein þeirra fræðimanna sem taka til máls um stöðu listkvenna í íslenskri listasögu á Kjarvalsstöðum á laugardag.

 

Víðsjá fer líka í huganum aftur til ársins 1990 þegar leikin verður upptaka af ljóðakvöldi Smekkleysu í Norðurkjallara Menntaskólans við Hamrahlíð en í dag er dagur ljóðsins haldinn hátíðlegur með ýmsum hætti.

 

Ragnhildur Hólmgeirsdóttir, sagnfræðingur, flytur pistil um Ódysseifskviðu.

 

Að lokum verðurrætt við Svanlaugu Jóhannsdóttur, söngkonu og markþjálfa, sem hefur að undanförnu sankað að sér skóm kvenna sem hún lítur sérstaklega upp til. Í nýrri sýningu Í hennar sporum sem frumsýnd verður í Tjarnarbíói á morgun mun hún rekja sögur þessara kvenna í skóm og söng.

Í Víðsjá i dag verður rætt við Arndísi S. Árnadóttur um verk Sveins Kjarvals sem með sönnu telst frumkvöðull í húsgagna- og innanhússhönnun á Íslandi, en Arndís flytur fyrirlestur um verk Sveins í kvöld í kirkju Óháða safnaðarins við Háteigsveg, í boði Hönnunarsafns Íslands.

 

Karl Ómarsson segir frá uppáhalds listaverkinu sínu, Silungsveiði í Ameríku eftir Richard Brautigan, og myndlistarkonan Katrín Inga Jónsdóttir Hjördísardóttir verður tekin tali um sýninguna List er okkar eina von sem nú er uppi í sýningarrýminu Midpunkt í Kópavogi.

 

Ennfremur verður ljósmyndarinn Guðmundur Ingólfsson tekin tali en hann blandar saman nýjum ljósmyndum og eldri klassík úr eigin ranni á ljósmyndasýningu í Safnaðarheimili Neskirkju.

Við byrjum í Hafnarborg i Hafnarfirði á opinni vinnustofu hönnunarteymisins Brynjars Sigurðarsonar og Veroniku Seidlmair þar sem þau eru að undirbúa og setja upp sýninguna Fyrirvari.

Við rekjum reyfarakennda atburðarás sem hófst í litlu tilraunaleikhúsi í Osló í nóvember og endaði með afsögn dómsmálaráðherra Noregs í síðustu viku. Íkveikja, hótanir, hvítt duft og deilur um mörk tjáningarfrelsisins koma meðal annars við sögu.

Í síðustu viku bárust þær fréttir að Brandarar handa byssumönnum, bók íslensk-palestínska rithöfundarins Mazen Maarouf væri tilnefnd til alþjóðlegu Man Booker bókmenntaverðlaunanna fyrir árið 2018, einna virtustu bókmenntaverðlauna Bretlands. Brandarar handa byssumönnum er bók vikunnar á Rás 1 þessa vikuna og að því tilefni verður rætt við Mazen.

Við veltum líka fyrir okkur arkitektúr og alzheimer-sjúkdóminum þegar Kristín valsdóttir leildarstjóri listkennsludeildar LHÍ verður gestur okkar.

Ásta, prófessor í heimspeki við háskólann í San Francisco heimsækir Víðsjá í dag og segir frá bók sinni, Categories we live by, sem kom nýlega út hjá Oxford háskólaútgáfunni. Bókin fjallar um þær félagslegu flokkanir sem við notum dags daglega til að skilgreina fólk og draga það í dilka.

 

Við kíkjum líka á sýningu á verkum Guðrúnar Sigríðar Haraldsdóttur í andyri Hallgrímskirkju í fylgd Guðrúnar Erlu Geirsdóttur.

 

Ólöf Helga Helgadóttir myndlistarkona segir frá uppáhaldslistaverkinu sínu, og Gauti Kristmannsson veltir fyrir sér muninum á há- og lágmenningu í bókmenntapistli sínum í dag.

Umsjón: Guðni Tómasson og Kristján Guðjónsson