Víðsjá

Í þætti dagsins verður Birgitta Spur, ekkja Sigurjóns Ólafssonar myndhöggvara, sótt heim i Listasafn Sigurjóns. Birgitta bauð upp á kaffi á notalegu heimili sínu sem stendur við hlið safnsins sem hún stofnaði fyirr 30 árum síðan. Við ræddum sýninguna Tengingar sem nú stendur yfir í tilefni afmælis safnsins en einnig lífið í Laugarnesi og sambýlið með verkunum.

Víðsjá forvitnast einnig um óvenjulega sýningu sem opnuð var í Listasafninu á Akureyri um síðustu helgi, en það er yfirlitssýning á verkum Arnar Inga Gíslason sem er í raun þriggja mánaða gjörningur um hvernig bók verður til. Halldóra Arnardóttir sýningarstjóri og dóttir myndlistarmannsins verður fyrir svörum um verkefnið sem ber yfirskriftina Lífið er leik-fimi.

Hlustendur heyra einnig hvað Gauti Kristmannson hefur að segja um nýja þýðingu Einars Thoroddsen á Víti úr Gleðileiknum guðdómlega eftir Dante.

Umsjón: Guðni Tómasson og Halla Harðardóttir.

Í þætti dagsins er rætt við myndlistarmanninn Ingólf Arnarsson sem sýnir nú ný verk á einkasýningu í Listasafni Reykjavíkur. Einnig verður rætt við Ástráð Eysteinsson prófessor í bókmenntafræði um Jakobínu Sigurðardóttur og hennar síðasta verk, minningarbókina Í barndómi frá árinu 1994, sem er bók vikunnar á Rás1. Guðbjörg R. Jóhannesdóttir, umhverfisheimspekingur, fjallar um fegurð, landslag og líkama í pistli dagsins, en við byrjum á því að forvitnast um sýningu sem nú stendur yfir í New-York þar sem ein stærsta safnaeign Bandaríkjanna er skoðuð í feminísku ljósi.

Umsjón: Guðni Tómasson og Halla Harðardóttir

Halla Helgadóttir, framkvæmdastjóri Hönnunarmiðstövar, og Hrólfur Karl Cela, arkitekt, verða gestir þáttarins í dag. Halla og Hrólfur eru meðal þeirra sem taka til máls í Veröld, húsi Vigdísar, á morgun á málþingi um hönnun í kvikum heimi, þar sem litið verður til baka á hönnun í íslensku samhengi árin eftir Hrun, en Hönnunarmiðstöð, líkt og hrunið, á 10 ára afmæli á árinu.

Við heyrum í Yrsu Roca Fannberg, kvikmyndagerðakonu, en hún er ein þeirra sem halda utan um mánaðarlegar kvikmyndasýningar í Kling og Bang. Sýningarnar, sem kallast í myrkri, standa yfir um háveturinn og hefjast að nýju í kvöld.

Steinunn Inga Óttarsdóttir, bókmenntarýnir Víðsjár, fjallar um Sálumessu í dag, nýjustu ljóðabók Gerðar Kristnýjar.

Og við veltum fyrir okkur söguskoðun og goðsögnum, ræðum við Axel Kristinsson sagnfræðing sem nýlega sendi frá sér bókina Hnignun, hvaða hnignun? sem fjallar um goðsögnina um niðurlægingartímabilið í sögu Íslands á tímabilinu 1400-1800. Hversu slæmt höfðum við það eiginlega á þessu tímabili?

Umsjón: Guðni Tómasson og Halla Harðardóttir

Í gærkvöldi bárust okkur Íslendingum þau gleðitíðindi að tveir Íslendingar hlutu í ár verðlaun Norðurlandaráðs, þau Auður Ava Ólafsdóttir í flokki bókmennta fyrir skáldsögu sína Ör og Benedikt Erlingsson í flokki kvikmynda fyrir kvikkmyndina Kona fer í stríð.

Af því tilefni ætlum við að helga þáttinn í dag þessum listamönnum en við byrjum á því að heyra leikhúsgagnrýni, María Kristjánsdóttir fór að sjá leikverkið Samþykki eftir Ninu Raine í leikstjórn Kristínar Jóhannesdóttur sem var frumsýnt síðastliðinn föstudag.

Umsjón: Guðni Tómasson og Halla Harðardóttir.

Mál og menning hefur nú gefið út ritsafn Dags Sigurðarsonar, verk frá árunum 1957 til 1994, og af því tilefni munum við grípa niður í viðtal við Dag frá árinu 1990 í þætti dagsins. Í viðtalinu segir Dagur meðal annars frá sambandi sínu við föður sinn, uppvexti sínum í Reykjavík, ferðalögum til útlanda og viðbrögðum Reykvíkinga við skáldverkum sem þóttu klámfengin og sjokkarandi.

Inga Björk Bjarnadóttir, sem nú hefur bæst í hóp myndlistarrýna Víðsjár, mun segja frá segja frá sinni upplifun af listahátíðinni Cycle, sem haldin var víðsvegar um Kópavog og Reykjavík um liðna helgi.

Við ræðum við Magneu Matthíasdóttir, rithöfund og þýðanda, um hennar fyrstu skáldsögu, Hægara pælt en kýlt frá árinu 1978, en hún er bók vikunnar á Rás1.

En Víðsjá dagsins byrjum við á að huga að Skandinavisma, hugmyndum um sameinuð Norðurlönd og skoðunum Gunnars Gunnarssonar rithföundar í þeim efnum á þriðja áratug 20. Aldar. Málþing um Skandinavisma og fullveldi verður haldið í Norræna húsinu á fimmtudaginn næsta kl. 14. Það er Gunnarstofnun sem stendur fyrir málþinginu þar sem æltuni er að ræða um sameingu norðurlanda og fullveldi Íslands í fortíð og framtíð. Á málþinginu mun bókmenntafræðingurinn Jón Yngvi Jóhannsson taka til máls, sem jafnframt er ævisagna ritari Gunnars Gunnarssonar. Við hittum Jón Yngva og spurðum hann út í þetta hugtak Skandinavisma, sem maður heyrir vissulega ekki af á hverjum degi.

Umsjón: Guðni Tómasson og Halla Harðardóttir.

Cycle listahátíðin er sett í dag og stendur og fram á sunnudag. Guðný Guðmundsdóttir stjórnandi hátíðarinnar og sýningarstjórinn Jonathan Habib Enquist líta við og segja okkur frá hátíðinni.

Selma Guðmundsdóttir píanóleikari verður tekin tali um útgáfuna Quo Vadis? sem innheldur upptökur með leik hennar allt aftur til ársins 1972.

Sagt verður frá tveimur athyglisverðum sýningum í New York og London þar sem myndlist Hilmu af Klint og Anni Albers fær að njóta sín. Verk Hilmu í Guggenheim safninu í stóra eplinu en verk Anni gefur að líta í Tate Modern við Thames á.

Hildur Björnsdóttir borgarfulltrúi flytur pistil í tilefni af mánuði myndlistar og frá Gautaborg berst hlustendum sending frá Höllu Þórlaugu Óskarsdóttur um Fucking Åmål.

Umsjón: Guðni Tómasson og Halla Harðardóttir.

Víðsjá 24.10.2018

Umsjón Guðni Tómasson

Víðsjá fer í heimsókn í Neskirkju þar sem æfingar standa yfir vegna flutnings á gamanóperunni Þrymskviðu eftir Jón Ásgeirsson en verkið er fyrsta íslenska óperan, frumsýnd árið 1974. Þrymskviða verður sýnd í Norðurljósasal Hörpu á föstudag og laugardag en í þættinum verða leikstjórinn, Bjarni Thor Kristinsson, og hljómsveitarstjórinn, Gunnsteinn Ólafsson, teknir tali.

Skaftfell, myndlistarmiðstöð austurlands, fagnar í ár 20 ára starfsafmæli. Skaftfell hefur af því tilefni efnt til sýninga og viðburða undanfarna mánuði. Tinna Guðmundsdóttir, forstöðukona Skaftfells, verður á línunni í þætti dagsins.

Ragnar Ísleifur Bragason flytur pistil um Konu sem fer.

Ingibjörg Magnadóttir myndlistarkona verður einnig gestur þáttarins í dag, en hún ætlar að segja hlustendum Víðsjár frá sínu uppáhalds listaverki. Verki sem tengist fjölskyldu hennar og Eyrarbakka.

Í Víðsjá í dag verður litið í vinnustofuheimsókn til Huldu Vilhjálmsdóttur myndlistarkonu, en Hulda er ein þeirra fjögurra myndlistarmanna sem tilnefndir voru til Íslensku myndlistarverðlaunanna í ár.

Steinunn Inga Óttarsdóttir rýnir í nýjustu skáldsögu Halldóru Thoroddsen, Katrínarsögu.

Við ræðum við Maríu Rán Guðjónsdóttur,þýðanda og bókaútgefanda, um skáldsöguna Sæluvímu eftir Lily King sem er bók vikunnar á Rás1.

En við byrjum á íslenskri leikritun, lifandi flutningi á útvarpsleikriti frammi fyrir áhorfendum. "Með gat á hjartanu í laginu eins og Guð" heitir verk eftir Jón Atla Jónasson sem Útvarpsleikhúsið tekur upp í Borgarleikhúsinu í kvöld fyrir framan áhorfendur, í leikstjórn Egils Heiðars Antons Pálssonar.

Umsjón: Guðni Tómasson og Halla Harðardóttir.

Fyrir um klukkustund voru afhent við hátíðlega athöfn í Höfða Bókmenntaverðlaun Tómasar Guðmundssonar en 60 óbirt handrit að ljóðabók bárust í samkeppnina að þessu sinni. Verðlaunin hlýtur að þessu sinni rithöfundurinn Haukur Ingvarsson.

Sjálfvirk / Automatic heitir sýning sem opnuð verður á laugardag í Kling og Bang úti á granda. Þar er á ferð einkasýning Söru Riel sem við ræðum við í þætti dagsins.

Ingi Þór Jónsson, markaðs- og þjónustustjóri Listasafns Íslands, flytur hlustendum pistil í tilefni af mánuði myndlistarinnar sem nú stendur yfir.

Myndlistarmaðurinn Ólafur Elíasson er í þessum töluðum orðum að byrja að segja frá samstarfi sínu við við Einar Þorstein Ásgeirsson arkitekt og stærðfræðing í fyrirlestri í Hönnunarsafni Íslands. Einar var fæddur árið 1942 en lést árið 2015 en þeir Ólafur og hann unnu náið saman að ýmsum verkum víða um heim, en líklegast er þekktasta verkið hér á landi glerhjúpur tónlistarhússins Hörpu.

Við gríum niður í 10 ára gamlan þátt þar sem Einar Þorsteinn sagði frá samstarf þeirra félaga: Þetta er úr öðrum af tveimur þáttum sem hétu Í átt að regnboga og Guðni hafði umsjón með þegar hann hélt til Berlínar og ræddi við Ólaf um verk hans, en hitti líka Einar Þorstein í vinnustofunni.

Umsjón: Guðni Tómasson og Halla Harðardóttir

Út er komið þriðja bindi af ritsafninu Smásögur heimsins, bindið hefur að geyma sögur frá Asíu og Eyjaálfu. Það eru þau Jón Karl Helgason, Kristín Guðrún Jónsdóttir og Rúnar Helgi Vignisson sem hafa umsjón með útgáfunni en við ræðum við Rúnar Helga í þætti dagsins.

Við heimsækjum Berg Contemporary galleríið við Klapparstíg þar sem bandaríski listmálarinn John Zurier verður tekinn tali en sýning með verkum hans var opnuð í galleríinu um síðustu helgi. Zurier dvelur nokkra mánuði á ári hér á landi og kallar sýningun sína Stundum (yfir mig fjallið).

Ragnheiður Gestsdóttir myndlistarkona tekur áskorun vikunnar og velur sitt uppáhalds listaverk og Guðbjörg Jóhannesdóttir umhverfisheimspekingur flytur hlustendum sinn annan pistil.

Umsjón: Guðni Tómasson og Halla Harðardóttir