Á föstudag opnar sýningin Ýmissa kvikinda líki - Íslensk grafík í Listasafni Íslands þar sem 27 listamenn sýna yfir 100 grafíkverk. Við hittum Ingibjörgu Jóhannsdóttur á safninu en hún er sýningarstjóri sýningarinnar ásamt bandaríska listfræðingnum Pari Stave.

Gauti Kristmannsson rýnir í eitt af höfuðritum afrískra bókmennta, Allt sundrast eftir Chinua Achebe, sem Angústúra forlag gaf út á dögunum.

Dagur Hjartarson rithöfundur kemur í þáttinn og segir okkur frá Síðustu ástarjátningunni, sem er bók vikunnar á Rás1.

Við ræðum við Gunnar Þorra Pétursson þýðanda um Hina smánuðu og svívirtu eftir Dostojevskí. Ingibjörg Haraldsdóttir hóf þýðingu á verkinu en varð að hverfa frá sökum veikinda og tók Gunnar Þorri við verki hennar og lauk þýðingunni sem Forlagið gefur nú út.

Umsjón: Halla Harðardóttir og Guðni Tómasson.

Í Víðsjá dagsins lítum við inn í Hallgrímskirkju þar sem Kristín Reynisdóttir sýnir verkið Synjun/Refusal. Við ræðum við Kristínu um tilurð innsetningarinnar en hluti hennar eru form sem minna á kristinn kross, nú eða krossa sem haka þarf við á umsóknum um hæli en krossarnir eru jafnmargir þeim sem synjað hefur verið um hæli hér á landi. Í fyrrasumar fundust sex kuml á Dysnesi við Eyjafjörð og hefur rannsókn á þeim varpað nýju ljósi á greftrunarsiði í heiðni. Á Þjóðminjasafni Íslands er verið að undirbúa sýninguna Heiðnar grafir í nýju ljósi þar sem úrval gripa úr uppgreftrinum á Dysnesi verða til sýnis. VIð hittum Hildi Gestsdóttur fornleifafræðing á safninu.

Guja Dögg Hauksdóttir fjallar um elsta hús Reykjavíkur og Borgartúnið í pistli sínum um borgarskipulag og Dagur Hjartarson les úr bók sinni, Síðustu ástarjátningunni, sem er bók vikunnar á Rás1. En við byrjum á nokkrum orðum um skoðanir.

Umsjón: Guðni Tómasson og Halla Harðardóttir

Listahátíðin List án landamæra hefst í dag og verður einn af þátttakendum hátíðarinnar heimsóttur af því tilefni, listamaðurinn Ingi Hrafn Stefánsson. Einnig kemur Ragnheiður Maísól Sturludóttir, framkvæmdastjóri Listar án landamæra, í þáttinn.

Við förum í elsta timburhús Reykjavíkur, sem stendur við Aðalstræti 10, en húsinu hefur verið breytt í safn. Þar er verið að setja upp nýja sýningu sem Guðbrandur Benediktsson ætlar að segja okkur betur frá.

María Kristjánsdóttir rýnir í leikverkið Svartalogn sem frumsýnt var um liðna helgi í Þjóðleikhúsinu.

Harmaminning Leónóru Kristínar í Bláturni er rit sem danska prinsessan Leónóra Kristín ritað á 17.öld þegar hún var fangi í Bláturni. Ritið er ein af gersemum danskrar bókmenntasögu og það er jafnframt bók vikunnar hér á Rás1. Páll Valsson kemur í þáttinn og segir okkur sína skoðun á bókinni.

Umsjón: Guðni Tómasson og Halla Harðardóttir.

Í þættinum er rætt við Sverri Guðjónsson tónlistarmann um sigurför hljóðverksins Harpa Ófeliu.

Litið verður í Gallerí EkkiSens við Bergstaðarstræti þar sem Nína Óskarsdóttir sýnir steinþrykk.

Starkaður Sigurðarson segir frá þeim listamönnum sem nýlega voru tilnefndir til Turner-verðlaunanna og frá heimsókn sinni á útskriftarsýningu meistaranema Listaháskólans sem nú er hægt að nálgast í Gerðasafni.

Þættinum berast skilaboð frá Nýlistasafninu í tilefni af fjörtíu ára afmæli safnsins, það er Bjarki Bragason sem les en auk þess er hringt í fjórar konur að nafni Anna sem allar tengjast starfsemi safnsins.

Auk þess er lesið úr bók vikunnar sem að þessu sinni er danskt rit frá 17.öld, Harmaminning Leónóru Kristínar í Bláturni eftir Leónóru Kristínu Ulfeldt í þýðingu BJörns Th. Björnssonar. Jórunn Sigurðardóttir les.

Umsjón: GT og HH

Við lítum inn á æfingu hjá Íslenska dansflokknum en hann fagnar þessa dagana 45 ára afmæli og frumsýnir af því tilefni sýninguna Hin lánsömu eftir Anton Lachky á morgun. Við ræðum við Ernu Ómarsdóttur listdansstjóra og Ingu Maren Rúnarsdóttur dansara.

Í Listasafninu á Akureyri verður opnuð á laugardag samsýning 10 listamanna sem ber heitir Fullveldið endurskoðað. Hlynur Hallsson safnstjóri og annar tveggja sýningarstjóra sýningarinnar segir okkur frá henni.

Við ræðum við Ingibjörgu Eyþórsdóttur þýðanda bókarinnar Hin órólegu eftir Linn Ullmann en hún er bók vikunnar á Rás 1 að þessu sinni.

Við lítum við í Gerðasafni í Kópavogi, þar sem nemendur og kennarar úr Listaháskólanum eru að undirbúa útskriftarsýningu meistaranema í myndlist og hönnun, og ræðum við Bryndísi Snæbjörnsdóttur fagstjóra meistaranáms og Einar Örn Benediktsson og Arnar Ómarsson sem eiga verk á sýningunni.

Umsjón: Guðni Tómasson og Halla Harðardóttir.

Við kynnum okkur hugarheim Eddu Mac, ungrar listakonu sem nýlega sýndi verk sín í Norræna húsinu í tengslum við Barnamenningarhátíð. Sýningin kallaðist Félag áhugamanna um árshátíðir og samanstóð af portrettmyndum unnum í veggteppi.

Við heyrum af fyrstu tónleikum í fyrirhugaðri tónleikaröð Kítón sem helguð er klassískri tónlist og hefst á verkum Jórunnar Viðar og einnig heyrum við af nýju listaverki á Trafalgartorgi í London. Og að lokum mun Gauti Kristmannsson huga að stöðu íslenskunnar frá öðrum sjónarhóli en venja er.

Umsjón: Guðni Tómasson og Halla Harðardóttir.

Í Víðsjá í dag verður kannað hvað leikritahöfudurinn Peter Shaffer hafði fyrir sér þegar hann samdi leikritið Amadeus sem kvikmyndaleikstjórinn Milos Forman breytti síðar í kvikmynd. Árni Heimir Ingólfsson listrænn ráðgjafi Sinfóníuhljómsveitar Íslands verður tekin tali en hljómsveitin leikur tónlist Mozarts tvívegis í vikunni við kvikmynd Formans.

Starkaður Sigurðarson flytur myndlistarpistil og Ingibjörg Eyþórsdóttir les úr nýrri þýðingu sinni á skáldsögunni Hin órólegu sem er bók vikunnar að þessu sinni.

Að auki heldur Víðsjá áfram umræðu sem pistlahöfundur Víðsjár hóf í síðustu viku um Hús íslenskra fræða þegar rætt verður við Véstein Ólason fyrrverandi forstöðumann Stofnunar Árna Magnússonar í íslenskum fræðum og Ögmund Skarphéðinsson arkitekt hjá arkitektastofunni Hornsteinum en stofan sér um hönnun hússins.

Umsjón: Guðni Tómasson og Halla Harðardóttir

Við ræðum við Sigríði Soffíu Nielsdóttur dansara og Helga Má Kristinsson myndlistarmann um myndlist sem reynir að fanga eðli heyfingar sem dansarinn skilur eftir sig. Slegið verður á þráðinn austur á Seyðisfjörð og forvitnast um skólasöngleik nemenda sem snýr að fornleifafundi þar í nágrenninu fyrir nokkrum árum. Við ræðum við Jón Ásgeir Kalmansson heimspeking um náttúrupælingar Páls Skúlasonar, en hann er einn þeirra sem flytja erindi á Pálsvöku, málþingi um heimspeki Páls Skúlasonar í Hannesarholti á laugardag.

Magnea J. Matthíasdóttir þýðandi segir frá bók vikunnar, en það er skáldsagan Það sem að baki býr, eftir dönsku skáldkonuna Merete Pryds Helle, og Guja Dögg Hauksdóttir flytur pistil um tvö menningarrhús í Reykjavík.

Umsjón: Guðni Tómasson og Halla Harðardóttir

Við hittum Þórunni Jörlu Valdimarsdóttur og heyrum af nýútkominni ljóðabók hennar, Villimaður í París.

María Kristjánsdóttir rýnir í leikverkið Fólk, staðir og hlutir sem frumsýnt var um liðna helgi í Borgarleikhúsinu.

Lesið er brot úr bók vikunnar á Rás1, Það sem að baki býr eftir dönsku skáldkonuna Merete Pryds Helle í þýðingu Magneu J. Matthíasdóttur. Auk þess heyra hlustendur þáttarins af útgáfuverkefninu Veðurskeyti frá Ásgarði sem Atli Ingófsson tónskáld er að vinna að núna í samstarfi við hóp fræðimanna og listamanna.

Umsjón: Guðni Tómasson og Halla Harðardóttir.

Rætt er við Arngerði Maríu Árnadóttur og Lilju Dögg Gunnarsdóttur úr tónlistarhópnum Umbru um nýútkomna plötu þeirra, Úr myrkrinu.

Skáldsagan Norma eftir Sofi Oksanen kom út árið 2016 og er bók vikunnar á Rás 1. Við ræðum við þýðandann, Sigurð Karlsson.

Gestur okkar í síðari hluta Víðsjár verður myndlistarkonan Gabríela Friðriksdóttir sem nú á verk á sýningu í Hverfisgalleríi. Við heimsækjum Gabríelu og ræðum við hana um um lífið og listagyðjuna.

Umsjón: Guðni Tómasson og Halla Harðardóttir.