Víðsjá

Ljóðrænt samspil hversdagsleika og landslags er útgangspunktur ljósmyndasýningarinnar North of Normal sem

nú stendur yfir í Norræna húsinu, en flestar myndanna teknar umhverfis þorpið Oqaatsut við Diskóflóa. Rætt er við Sögu Sigurðardóttur, einn af höfundum verkanna, í þætti dagsins.

Myndlistarmennirnir Starkaður Sigurðarson og Auður Lóa Guðnadóttir flytja fréttir af dýrum og mönnum í pistli frá Langanesi, þar sem þau dvelja yfir sumartímann og starfa sem safnverðir í Byggðasafninu Sauðanesi.

Þráinn Hjálmarsson tónskáld er gestur þáttarins en hann mun segja frá sínu uppáhalds listaverki.

Og loks verður sagt frá heimildarmyndinni I called him Morgan sem segir frá stormasömu lífi og list djasstrompetleikarans Lee Morgan.

Umsjón: Guðni tómasson og Halla Harðardóttir

Í Listasal Mosfellsbæjar stendur nú yfir sýning að verkum mæðgnanna Jóníar Jónsdóttur og Sigurlínu Jóhannsdóttur, sem kallast Frá móður til dóttur - frá dóttur til móður. Við hittum mæðgurnar við listaverkin sem öll voru unnin sérstaklega fyrir sýninguna, og fáum að heyra af áhrifum þeirra á hvor aðra.

Við gluggum einnig í bók vikunnar sem að þessu sinni er skáldsagan Okkar á milli eftir írsku skáldkonuna Sally Rooney í þýðingu Bjarna Jónssonar.

Og í tilefni dagsins ætlum við að senda Landsbókasafninu kveðju en það fagnar í dag 200 ára afmæli. Við heyrum brot úr tveimur eldri viðtölum, við Ingibjörgu Steinunni Sverrisdóttur, landsbókavörð, og Finnboga Guðmundsson fyrrverandi landsbókavörð.

En við byrjum á að velta fyrir okkur huggulegri heimsókn á Gljúfrastein.

Umsjón: Guðni Tómasson og Halla Harðardóttir.

Í Víðsjá í dag segir Sigríður K. Þorgrímsdóttir frá Jakobínuvöku 2018 sem haldin verður í Iðnó á laugardag og helguð er rithöfundinum Jakobínu Sigurðardóttur, en nú er þess minnst að hundrað ár eru liðin frá því að hún fæddist vestur á Hornströndum.

Rætt verður við Guju Dögg Hauksdóttur arkitekt um Alvar Aalto og Norræna húsið sem heldur upp á fimmtíu ára afmæli sitt um þessar mundir og Gunnar Ben meðlimur í rokkhljómsveitinni Skálmöld kemur með fyrsta lagið af nýrri plötu sveitarinnar í heimsókn, en Skálmöld er sérstök vinahljómsveit Víðsjár.

Ennfremur verður rætt við Sigurð Árna Sigurðsson myndlistarmann um sýninguna Hreyfðir fletir sem er ein þeirra sýninga sem opnuð verður á laugardag í nýju og endurbættu Listasafni á Akureyri.

Umsjón: Guðni Tómasson.

Í Víðsjá í dag verður litið inn í Listasafnið á Akureyri sem opnað verður á ný á laugardag eftir miklar endurbætur og stækkun. Þar verður rætt við myndlistarmennina Aðalheiði Eysteinsdóttur og Magnús Helgason og Hlyn Hallsson safnstjóra.

Saxófónleikarinn Sölvi Kolbeinsson kemur í heimsókn og segir frá tónlist sinni og tónleikahaldi í Reykjavík þessa dagana.

Arngunnur Árnadóttir klarinettuleikari í Sinfóníuhljómsveit Íslands segir frá listaverki sem hefur haft mikil áhrif á hana og loks verður gripið niður í tuttugu ára gamalt viðtal við Stefán Karl Stefánsson leikara sem lést í gær eftir langvinn veikindi.

Umsjón: Guðni Tómasson og Halla Harðardóttir.

Víðsjá, 28. júní 2018

Fuglalíf, grænlenskar lesbíur og Bókasafn föður míns

Ragnar Helgi Ólafsson er gestur okkar í dag, en í kvöld, á fullu tungli, kemur út Bókasafn föður míns.

Jóhannes Ólafsson heldur áfram fuglaskoðun sinni og beinir í dag sjónaukanum að fuglum í skáldskap.

Steinunn Inga Óttarsdóttir fjallar um grænlensku skáldsöguna Hómó Sapína sem nýverið kom út í íslenskri þýðingu.

Og við heyrum brot úr viðtali Helga Snæs Sigurðssonar frá árinu 2016 við Braga Ólafsson um bók vikunnar, Dulnefnin

Umsjón: Halla Þórlaug Óskarsdóttir

Víðsjá 27. júní 2018

Rætt við Kolbein Bjarnason um Helguleika, sögu Helgu Ingólfsdóttur og sumartónleika í Skálholtskirkju, nýja bók sem hann var að gefa út hjá bókaútgáfunni Sæmundi

Jóhannes Ólafsson ræðir við Ragnar Helga Ólafsson og þeir velta fyrir sér fuglum í bókmenntum og listum

og við heimsækjum Sigrúnu Eldjárn, barnabóka- og myndhöfund á vinnustofu hennar.

Umsjón: Halla Þórlaug Óskarsdóttir

Rætt við Gísla Sigurðsson, rannsóknarprófessor við Árnastofnun, um nýja heildarútgáfu Íslendingasagnanna, sem var gefin út í tilefni 100 ára afmæli fullveldisins.

Jóhannes Ólafsson spáir í fugla, en National Geographic tilkynnti í ársbyrjun að 2018 væri ár fuglsins.

Við heyrum brot úr bók vikunnar, Dulnefnunum, eftir Braga Ólafsson, en í sögu dagsins skoðar sögumaður fasteign til sölu.

Og við erum einmitt að velta fyrir okkur fasteignum í þætti dagsins, eða öllu heldur ljósmyndum fasteignaauglýsinga. Þær eru eins misjafnar og þær eru margar en sérstaklega eru þær oft frumlegar á Íslandi. Við sláum á þráðinn til Hallgerðar Hallgrímsdóttur, sem stundar nám í ljósmyndun sem myndlistarmiðli við Valand háskólann í Gautaborg, og ræðum við hana um fasteignaauglýsingar

Umsjónarmaður: Halla Þórlaug Óskarsdóttir

María Kristjánsdóttir fjallar um Eddu eftir Robert Wilson, í uppsetningu Det Norske Teatret sem flutt var í Borgarleikhúsinu á Listahátíð.

Sigrún Harðardóttir, myndlistarkona, lemur striga í Listasafni Árnesinga og slær þannig tvær flugur í einu höggi, þar sem hún býr bæði til takt undir kontrabassaleik Alexöndru Kjeld og úr verður myndverk á striga. Hún segir frá sýningunni og gjörningnum.

Við hlýðum á 40 ára gamalt viðtal Steinunnar Sigurðardóttur við Málfríði Einarsdóttur, um bók vikunnar Samastað í tilverunni.

Hörður Áskelsson er iðinn við kolann í Hallgrímskirkju, kórarnir hans eru margverðlaunaðir og gestum fer fjölgandi á hádegistónleikum í kirkjunni. Við heimsækjum hann á Skólavörðuholtið og spjöllum um kórstjórn, ferðamennsku og hljómburð kirkjunnar.

Umsjón: Halla Þórlaug Óskarsdóttir.