ព្រឹត្តិការណ៍​កម្ពុជា​ប្រចាំថ្ងៃ by RFI ខេមរភាសា / Khmer

May 08, 2021 ព្រឹត្តិការណ៍កម្ពុជាប្រចាំថ្ងៃ - តើវ៉ាក់សាំងកូវីដ-១៩ ជាឧបសគ្គ ឬជាកាតព្វកិច្ចសុខភាព ពេលចូលបំរើការងាររដ្ឋ?

ក្រសួងមុខងារសាធារណៈ កាលពីថ្ងៃទី០៤ ខែឧសភា បានប្រកាសថា បេក្ខជនដែលចង់ប្រឡងចូលក្រសួងទំនាក់ទំនង រដ្ឋសភា-ព្រឹទ្ធសភា និងអធិការកិច្ច ក្រសួងកសិកម្ម ក្រសួងពាណិជ្ជកម្ម ក្រសួងធនធានទឹក និងរដ្ឋលេខាធិការដ្ឋានអាកាសចរណ៍ស៊ីវិល លុះត្រាតែត្រូវមានការធានាថា បានចាក់វ៉ាក់សាំងបង្ការជំងឺកូវីដ១៩រួចរាល់ទាំង២លើក។ ចំពោះការដាក់លក្ខខណ្ឌនេះ អ្នកតាមដានបញ្ហាសង្គមនៅកម្ពុជា មើលឃើញថា វាជាវិធានការមួយល្អដែរ ប៉ុន្តែធ្វើឡើងហាក់ដូចជាលឿនពេក។ ពួកគេថា នៅក្នុងកាលៈទេសៈពេលនេះ គួរពុំទាន់មានលក្ខខណ្ឌបែបនេះឡើយ បើពុំដូច្នោះទេ វាអាចនឹងផ្តល់ភាពអយុត្តិធម៌ដល់ពួកគេ។

12 min

May 07, 2021 ព្រឹត្តិការណ៍កម្ពុជាប្រចាំថ្ងៃ - លោក ហ៊ុន សែន៖ បើគ្រប់ខេត្តនីមួយៗ ត្រូវធ្វើចត្តាឡីស័ក១៤ថ្ងៃ មិនខុសពីការចែកកម្ពុជាជា២៥ប្រទេសនោះទេ

មិនបាន២៤ម៉ោងផង ក្រោយការបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្តាល ដោយភូមិសាស្ត្រទាំងពីរ ត្រូវបានបង្រួមតំបន់ហានិភ័យខ្ពស់នៃការឆ្លងជំងឺកូវីដ-១៩ ឲ្យមកនៅតិចបំផុត ប្រជាពលរដ្ឋបានសម្រុកចាកចេញពីរាជធានីភ្នំពេញយ៉ាងព្រោងព្រាធ។ ជាមួយគ្នានេះ អាជ្ញាធរខេត្តមួយចំនួនបានចេញប្រកាសទប់ស្កាត់ជាមុន ដោយតម្រូវឲ្យបុគ្គលដែលចេញពីភ្នំពេញទៅកាន់បណ្តាខេត្ត ត្រូវធ្វើចត្តាឡីស័ក១៤ថ្ងៃ និងធ្វើតេស្តរកមេរោគ ប្រសិនបើពួកគេចេញមកពីតំបន់ហានិភ័យខ្ពស់។ ភ្លាមៗ លោកនាយករដ្ឋមន្ត្រី ហ៊ុន សែន បានចេញមកស្តីបន្ទោសចំពោះចៅហ្វាយខេត្ត ដែលចេញបំរាមផ្តេសផ្តាស់ ដោយលោកចាត់ទុកថាស្ថានភាពបែបនេះ មិនខុសពីការបង្កើតរដ្ឋនៅក្នុងរដ្ឋនោះទេ។

13 min

May 06, 2021 ព្រឹត្តិការណ៍កម្ពុជាប្រចាំថ្ងៃ - តើអាចទេកម្ពុជានឹងលែងអនុញ្ញាតឱ្យមានការផ្សព្វផ្សាយពាណិជ្ជកម្មគ្រឿងស្រវឹងគ្រប់រូបភាពជាអចិន្ត្រៃយ៍?

សមាគម អង្គការសង្គមស៊ីវិលចំនួន៣៨នាក់បានរួមគ្នាទាមទារឱ្យរដ្ឋាភិបាលកម្ពុជាបិទការផ្សព្វផ្សាយពាណិជ្ជកម្មគ្រឿងស្រវឹងគ្រប់រូបភាពជាអចិន្ត្រៃយ៍។ ក្រុមអង្គការ សមាគមទាំងនេះ បានលើកហេតុផលថា ការបិទពាណិជ្ជកម្មផ្សព្វផ្សាយគ្រឿងស្រវឹង គឺដើម្បីលើកស្ទួយសុខភាព និងសុខុមាលភាពសង្គម ព្រមទាំងជីវភាពរស់នៅរបស់ប្រជាពលរដ្ឋ។ ជាមួយគ្នានេះ ក្រុមអង្គការ សមាគមទាំង៣៨ក៏បានជំរុញឱ្យរដ្ឋាភិបាលកម្ពុជាបន្តរឹតត្បិតទៅលើការលក់ដូរ និងប្រើប្រាស់គ្រឿងស្រវឹងដែលជាកត្តាបង្កហានិភ័យនៃដល់ការឆ្លងជំងឺកូវីដ១៩។ ដូច្នេះ ចំពោះបញ្ហានេះ តើអាចទេដែលរដ្ឋាភិបាលកម្ពុជានឹងយកទៅពិចារណា ហើយឈានទៅអនុវត្តនោះ?

11 min

May 05, 2021 ព្រឹត្តិការណ៍កម្ពុជាប្រចាំថ្ងៃ - ហេតុអ្វីរដ្ឋាភិបាលសម្រេចចិត្តបង្រួញការបិទខ្ទប់តំបន់ហានិភ័យខ្ពស់ នៅពេលជំងឺកូវីដ-១៩ ឆ្លងកាន់តែច្រើន?

រដ្ឋាភិបាលកម្ពុជាកាលពីថ្ងៃទី០៣ ខែឧសភា កន្លងទៅនេះ បានសម្រេចបិទបញ្ចប់ការបិទខ្ទប់ ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល ដោយចាប់អនុវត្តពីថ្ងៃទី០៦ ខែឧសភា ប៉ុន្តែតំបន់ប្រឈមខ្លាំងមួយចំនួនអាចនៅបន្តបិទខ្ទប់។ ប្រជាពលរដ្ឋទូទៅ អាចចេញ ចូល ឆ្លងកាត់រាជធានីភ្នំពេញ និងក្រុងតាខ្មៅបាន ប៉ុន្តែរាជរដ្ឋាភិបាលប្រាប់ឱ្យអាជ្ញាធរអនុវត្តវិធានការដដែល ចំពោះតំបន់ទាំង៣ រួមមានតំបន់លឿង លឿងទុំ និងតំបន់ក្រហម។ ជុំវិញចំណាត់ការរបស់រដ្ឋាភិបាល ដើម្បីគ្រប់គ្រងការឆ្លងរាលដាលកូវីដ-១៩ ឲ្យមានប្រសិទ្ធភាពដូច្នេះ ត្រូវគេមើលឃើញថាជាយុទ្ធសាស្ត្រថ្មី ក្នុងន័យថ្លឹងថ្លែងរវាងសេដ្ឋកិច្ច សង្គម និងសុខមាលភាព។

13 min

May 04, 2021 ព្រឹត្តិការណ៍កម្ពុជាប្រចាំថ្ងៃ - តើសេរីភាពសារព័ត៌មាននៅកម្ពុជាក្នុងសម័យរាតត្បាតនៃជំងឺកូវីដ១៩ ធ្លាក់ចុះ កើនឡើង ឬនៅថេរ?

ម្សិលមិញ គឺជាទិវាសេរីភាពសារព័ត៌មានពិភពលោក ៣ឧសភា។ សម្រាប់ថ្នាក់ពិភពលោក អគ្គលេខាធិការអង្គការសហប្រជាជាតិបានចូលរួមអបអរសាទរទិវានេះដោយបានលើកឡើងពីសារសំខាន់នៃប្រព័ន្ធផ្សព្វផ្សាយ និងអ្នកសារព័ត៌មានចំពោះការរាយការណ៍ព័ត៌មាននៅក្នុងពេលរាតត្បាតនៃជំងឺកូវីដ១៩។ ប៉ុន្តែ លោកក៏បានបង្ហាញពីបញ្ហាប្រឈមដែលកើតមានដដែលៗទៅលើអ្នកសារព័ត៌មានក្នុងពេលអនុវត្តការងាររបស់ខ្លួនផងដែរ។ ដោយឡែក នៅកម្ពុជាឯណោះវិញ ក៏ដូចជារៀងរាល់ឆ្នាំដែរ នៅឆ្នាំនេះ ប្រមុខរដ្ឋាភិបាលកម្ពុជាបានចេញសារលិខិតអបអរសាទរទិវាសេរីភាពសារព័ត៌មានពិភពលោកនេះ។ បន្ថែមពីនេះ ក៏មានអង្គការ សមាគមការពារអ្នកសារព័ត៌មាន និងសង្គមស៊ីវិលមួយចំនួនចេញសេចក្តីថ្លែងការណ៍រៀងៗខ្លួនចូលរួមអបអរសាទរទិវាសេរីភាពសារព័ត៌មានពិភពលោក ៣ឧសភា។ ក៏ប៉ុន្តែចំពោះសេរីភាពសារព័ត៌មាននៅកម្ពុជាវិញ អង្គការ និងសមាគមទាំងនោះមើលឃើញមិនដូចគ្នានោះឡើយ។

14 min

May 02, 2021 ព្រឹត្តិការណ៍កម្ពុជាប្រចាំថ្ងៃ - កូវីដ១៩៖ តើគួរមានដំណោះស្រាយចំពោះមុខបែបណា ដល់អ្នកធ្វើការសេដ្ឋកិច្ចក្រៅប្រព័ន្ធដែលកំពុងជួបការលំបាក?

ក្នុងពេលបិទខ្ទប់តំបន់ អ្នកធ្វើការក្នុងសេដ្ឋកិច្ចក្រៅប្រព័ន្ធមួយចំនួន បានលើកឡើងពីផលលំបាកដែលត្រូវបាត់បង់ការងារ គ្មានប្រាក់ចំណូល បើទោះបីជាមានការអំពាវនាវពីរដ្ឋាភិបាលដល់ អាជ្ញាធរមូលដ្ឋាន សហគ្រិន រោងចក្រសហគ្រាស ម្ចាស់ផ្ទះជួល ឲ្យមានការយោគយល់និងជួយសម្រួលការលំបាកដល់អ្នកធ្វើការងារក្រៅប្រព័ន្ធក៏ដោយ។ តើអ្វីទៅជាដំណោះស្រាយចំពោះមុខសម្រាប់បញ្ហាប្រឈមរបស់ធ្វើការក្រៅប្រព័ន្ធក្នុងស្ថានភាពនេះ?

11 min

May 01, 2021 ព្រឹត្តិការណ៍កម្ពុជាប្រចាំថ្ងៃ - តើរដ្ឋាភិបាលអាចនឹងបិទការធ្វើដំណើរឆ្លងខេត្តឡើងវិញទេ បើសិនជាការឆ្លងកូវីដ១៩នៅតាមខេត្តនៅតែបន្តកើនឡើង?

រដ្ឋាភិបាលកម្ពុជាបានសម្រេចបើកការធ្វើដំណើរឆ្លងខេត្តឡើងវិញកាលពីសប្តាហ៍មុន បន្ទាប់ពីបិទអស់រយៈពេល២សប្តាហ៍ក្នុងអំឡុងពេលពិធីបុណ្យចូលឆ្នាំខ្មែរ។ ប៉ុន្តែ អ្វីជាការកត់សម្គាល់ បន្ទាប់ពីរដ្ឋាភិបាលកម្ពុជាបានសម្រេចបើកការធ្វើដំណើរឆ្លងខេត្តឡើងវិញនេះ គឺការសាយភាយនៃជំងឺកូវីដ១៩ទៅចម្លងនៅតាមខេត្តបានបន្តកើតមាន ហើយការឆ្លងមានការកើនឡើងគួរឱ្យព្រួយបារម្ភផងដែរ។ ដូច្នេះ ប្រឈមមុខនឹងបញ្ហានេះ តើរដ្ឋាភិបាលកម្ពុជាអាចនឹងបិទការធ្វើដំណើរឡើងវិញឬទេ? ឬក៏អាចនឹងមានវិធានការណាផ្សេង?

13 min

April 30, 2021 ព្រឹត្តិការណ៍កម្ពុជាប្រចាំថ្ងៃ - តើការរាលដាលនៃជំងឺកូវីដ-១៩នៅកម្ពុជា នឹងជះឥទ្ធិពលជាអវិជ្ជមានដល់ការបោះឆ្នោតនៅឆ្នាំក្រោយទេ?

ការឆ្លងរាលដាលនៃជំងឺកូវីដ-១៩ក្នុងសហគមន៍ នៅប្រទេសកម្ពុជា ជាពិសេសនៅរាជធានីភ្នំពេញ ពីមួយថ្ងៃទៅមួយថ្ងៃកាន់តែអាក្រក់ទៅៗ។ បើទោះណាជារដ្ឋាភិបាល បានប្រឹងប្រែងរិះរកមធ្យោបាយទប់ស្កាត់ និងកាត់បន្ថយយ៉ាងណាក៏ដោយ ក៏ស្ថានភាពនេះធ្វើឲ្យមានការព្រួយបារម្ភដល់ប្រជាពលរដ្ឋទូទៅផងដែរ។ ជុំវិញបញ្ហានេះ អ្នកនយោបាយនៃគណបក្សនានា និងអង្គការសង្គមស៊ីវិលមើលឃើញខុសៗគ្នា ពីផលប៉ះពាល់ជាអវិជ្ជមានដល់ការបោះឆ្នោតធំៗនៅឆ្នាំ២០២២ និងឆ្នាំ២០២៣ ខាងមុខ។ ទោះយ៉ាងណា មិនមានការអះអាងណាមួយបង្ហាញថា ការឆ្លងរាលដាលនៃជំងឺកូវីដ-១៩ ជះឥទ្ធិពលកំរិតណាដល់ការរៀបចំការបោះឆ្នោតខាងមុខ។

12 min

April 25, 2021 ព្រឹត្តិការណ៍កម្ពុជាប្រចាំថ្ងៃ - ការបិទផ្សារទូទាំងរាជធានីភ្នំពេញ ធ្វើឲ្យពលរដ្ឋបារម្ភពីតម្លៃទំនិញឡើងថ្លៃ

អាជ្ញាធររាជធានីភ្នំពេញ បានសម្រេចបិទផ្សាររដ្ឋនិងផ្សារមិនរៀបរយទាំងអស់ រយៈពេល២សប្តាហ៍ ចាប់ពីថ្ងៃទី២៤មេសាតទៅ ដើម្បីបង្ការការឆ្លងកូវីដ១៩។ តាមរយៈការបិទផ្សារនេះ ពលរដ្ឋខ្លះមានការបារម្ភពីការខ្វះខាតនិងតម្លៃទំនិញឡើងថ្លៃ រីឯអាជីវករវិញក៏ប្រឈមនឹងការខ្វះខាតទីផ្សារផ្គត់ផ្គង់ទំនិញខ្លួនផងដែរ។ អ្នកតាមដានបញ្ហាសង្គមយល់ថា នៅក្នុងកាលៈទេសៈនេះ រដ្ឋាភិបាលគួរផ្តោតលើការរៀបចំទីតាំងសមស្របដែលអាចផ្គត់ផ្គង់ទីផ្សារទៅតាមវិធានរបស់ក្រសួងសុខាភិបាល ជាជាងបិទទាំងស្រុង។ ចំណែកក្រសួងពាណិជ្ជកម្មឯណោះវិញ លើកឡើងថា ខ្លួនបាននិងកំពុងព្យាយាមធ្វើការជាមួយដៃគូ ដើម្បីបង្កើតផ្សារណាត់ដោយធានាបាននូវគុណភាពនិងតម្លៃទំនិញ។

11 min

April 24, 2021 ព្រឹត្តិការណ៍កម្ពុជាប្រចាំថ្ងៃ - អ្នកឃ្លាំមើល៖ ការដណ្តើមគ្នាចាក់វ៉ាក់សាំងដូសទី២ អាចជាហានិភ័យនៃការឆ្លងកូវីដ១៩

កាលពីម្សិលមិញ រូបភាពនៃការប្រជ្រៀតគ្នាតម្រង់ជួរដើម្បីចាក់វ៉ាក់សាំងដូសទី២របស់ប្រជាពលរដ្ឋនៅតាមកន្លែងទទួលចាក់វ៉ាក់សាំងមួយចំនួននៅក្នុងរាជធានីភ្នំពេញត្រូវបានគេបង្ហោះ និងចែកចាយបន្តគ្នានៅតាមបណ្តាញសង្គមហ្វេសប៊ុក។ រូបភាពនេះ បង្កឱ្យមានការព្រួយបារម្ភពីហានិភ័យនៃការចម្លងជំងឺកូវីដ១៩នៅតាមកន្លែងវ៉ាក់សាំងទាំងនោះ ព្រោះមិនមានការរក្សាគម្លាតពីគ្នាឱ្យបានត្រឹមត្រូវ តាមការណែនាំរបស់ក្រសួងសុខាភិបាលនោះឡើយ។ អ្នកតាមដានសង្គមមួយចំនួនបានលើកឡើងថា បើនៅតែបែបនេះ ការទៅទទួលវ៉ាក់សាំង អាចត្រឡប់ទៅជាការទទួលជំងឺកូវីដ១៩មិនខានឡើយ។ ដូច្នេះហើយ ពួកគេបានអំពាវនាវដល់ប្រជាពលរដ្ឋឱ្យអនុវត្តគម្លាតសុវត្ថិភាពដោយខ្លួនឯងឱ្យបានត្រឹមត្រូវ និងបានស្នើឱ្យអាជ្ញាធរពាក់ព័ន្ធត្រូវចាត់វិធានការឱ្យបានតឹងរ៉ឹងចំពោះបញ្ហានេះ។

11 min