Kultur

Vu politeschen Analyse vun eiser Welt bis zu engem minimalistische Familljen-Triptychon: De Marc Trappendreher ass weider fir eis zu Venedeg a verréit, wéi sech déi nei Filmer vum Olivier Assayas, der Kathryn Bigelow a vum Jim Jarmusch an der Competitioun schloen. Am Jarmusch sengem "Father Mother Sister Brother" spillt ënner anerem och d'Vicky Krieps mat.

An eiser Summerserie vun de renomméierte Rencontres de la photo d’Arles hu mir Iech e puermol mat an de Palais de Luppé geholl. Do haten nämlech eng Partie Lëtzebuerger Fotokënschtler:innen Geleeënheet, hir Aarbechten invitéierte Konschtexperten a Konschtexpertinne bei labbere Portfolio-Reviews ze presentéieren. Firwat an engem Palais aus dem 18. Joerhonnert, dee géint 1900 vum franséische Vicomte Gaston de Luppé opkaf an op neo-florentinesch renovéiert gi war? Well et do e Bezuch zu Lëtzebuerg gëtt. Dat ass d’Kerstin Thalau am Gespréich mam Enkel a Palais-Ierwe Loup-Sanche de Luppé gewuer ginn.

Fir Historiker ass Kënschtlech Intelligenz dacks eng Gefor, well se et relativ liicht erlaabt, d’Wouerecht ze deforméieren. Mee an enger ganzer Rei Beräicher ka KI och eng Hëllef sinn - ënnert der Bedéngung, datt den Historiker duerno kontrolléiert, wat d’KI als Virlag ginn huet. D’Marie Billon huet sech ëmfrot, wou Kënschtlech Intelligenz kann an der Recherche-Aarbecht vun Historiker nëtzlech agesat ginn resp. Zäit ka spueren - a wéi ee se am beschte benotzt.

Kee Summer ouni Kolla? Den alternative Musek- a Konschtfestival war 10 Joer laang, als Openair, am Stengeforter Bësch, dunn am Park zu Miersch ... 2025 war laang net gewosst, op de Kolla-Kollektiv eng adaptéiert Plaz fir d'Evenement fannen an accordéiert kréie géif. Mee dach: dëse Weekend, also vum 5. bis de 7. September, ass de Kolla am Hollerecher Schluechthaus! Dir kennt eisen 100,7-Soundatlas? An dëser Rubrik presentéiere mir Iech eenzel Geräischer, huele se ausenaner, hannerfroen se. Wat dat mam Kolla ze dinn huet? Dat héiert Dir vum Kerstin Thalau a vum Joé Birchen.

De Prix Goncourt ass dee wichtegste Literaturpräis a Frankräich, haut huet d’Académie Goncourt déi 15 Bicher annoncéiert, déi dëst Joer an d’Course ginn. De Gewënner wäert de 4. November feststoen. Wien ass nominéiert a ginn et Iwwerraschungen? Dozou eise Korrespondent vu Paräis, de Max Tholl

Ëmmer méi Leit wëlle klimabewosst reesen, mee bei groussen Distanzen ass dat net onbedéngt einfach. Den Nuetszuch ass do eng flott Léisung: Et reest ee wärend ee schléift an d’Emissioune bleiwen niddereg. Mee wéi komfortabel ass esou eng Rees a wat sinn d’Kaschten? D’Claire Barthelemy war fir eis op de Fringe Festival a Schottland an ass mat engem Nuetszuch a Groussbritannie gefuer.

Spoken Word mat engem Jazzpianist an zwee Orchestermuseker: der Rapperin Nicool hiren neie Projet léisst de Beat ewech! Also si, d'Museker:innen, loossen en ewech, a ginn domat op eng Rees, déi dem Hiphop seng al Wuerzelen am Jazz zeréck siche ginn, a wou dem Pianist säi Kënnen an d’Spill kënnt. Mir lauschteren eemol kuerz an Nicool a Luca Sales hir nei Single "Ech wëll" eran, a schwätzen duerno mat béide Museker:innen.

D'Summerlach schéngt bal iwwerstanen ze sinn, an esou lues kommen d'Filmer, déi zu Cannes am Wettbewerb gelaf sinn, och an eis Kinoen: Nieft der Julia Ducournau hirem "Alpha" leeft awer och nach "Eden" vum Ron Howard, "La voie du serpent" vum Kiyoshi Kurosawa an "22 Bahnen" vun der Mia Maariel Meyer un. De Jeff Schinker féiert eis duerch déi nei Sortien.

Wéi fatal et ka sinn, op dem Noper seng Kaz opzepassen, wéi brutal ee Bandekrich zu New York ka sinn: all dat gëtt een a "Caught Stealing" gewuer. Deen entspaantste Film am Darren Aronofsky senger Filmographie ass dobäi nawell zimmlech brutal - mee et geléngt him esou eppes wéi e Guy-Ritchie-Film mat méi Déift an Donkelheet ze sinn. D'Vesna Andonovic an de Jeff Schinker waren op alle Fall iwwerzeegt.