Lestin

Kona, móðir, bumba. Mæðratips, facebook hópur þar sem þú getur spurt íslenskar mæður að hverju sem er. Innleggin eru fjölbreytt og þar skapast líflegar umræður. Í hópnum eru tæplega 25 þúsund meðlimir og þar eru öll hugsanleg vandamál mæðra borin á borð.

Síðbúna framhaldsmyndin Top Gun Maverick virðist ætla að verða einhver helsti bíósmellur sumarsins. Tom Cruise aftur á orrustuþotu í háloftunum eftir 35 ára hlé. Gunnar Ragnarsson rýnir í Top Gun 2 í þætti dagsins, og dregur saman hinar ýmsu túlkanir á fyrri myndinni, sem hefur ekki bara verið túlkuð sem áróðurstæki bandaríska hersins.

Við sökkvum okkur svo ofan í heim crypto-víkinga og ræðum við stofnendur Valhalla Vacation Club sem var eitt fyrsta íslenska NFT verkefnið þar sem reynt var að búa til samfélag utan um hálfgerðar stafrænar skiptimyndir.

Hópur af milljarðamæringum, olígörkum og ofurfyrirsætum fer saman út á lúxussnekkju. Þau eru yfirborðsleg, ógeðfelld og aumkunarverð og svo æla allir á alla. Þannig væri kannski hægt að lýsa bíómyndinni Triangle of Sadness, sem hlaut aðalverðlaunin á kvikmyndahátíðinni í Cannes um helgina. Við ræðum við Ara Gunnar Þorsteinsson um sænska leikstjórann Ruben Östlund og Þríhyrning sorgar.

Næstu tvö kvöld mun bandaríska leikhússtjarnan Taylor Mac koma fram ásamt hljómsveit og vel völdum íslenskum listamönnum og framkvæma einhverskonar fórnarathöfn feðraveldisins á stóra sviði Þjóðleikhússins. Verkið er hluti af Listahátíð í Reykjavík sem hefst þann 1. júní. Gréta Kristín Ómarsdóttir, leikstjóri, hefur fylgst með ferlinu og ræddi við okkur um Taylor Mac og listformið drag.

Top Gun 2 er vinsælasta kvikmynd heims um þessar mundir. Mynd sem fjallar um orrustuflugmenn í flottum einkennisbúningum, með sólgleraugu, hvítar tennur og breiða kjálka. Mynd sem varpar jákvæðu ljósi á bandaríkjaher og herþjónustu. Enda kemur herinn að gerð Top Gun eins og svo mörgum öðrum kvikmyndum í Hollywood. Við kynnum okkur söguna af samkrulli hernaðar og skemmtanaiðnaðar með Sveini Mána Jóhannessyni sagnfræðingi.

Útskriftarsýning nemenda í myndlist, arkitektúr og hönnun úr Listahaskóla Íslands ber yfirskriftina Verandi Vera, við kíkjum á Kjarvalsstaði og kynnum okkur það sem framtíð íslensku listasenunnar er að velta fyrir sér.

1986 voru erlendir fréttamenn staddir á Íslandi til þess að flytja fréttir af leiðtogafundinum í Höfða, fundi Gorbachev og Reagan. Steinunn Sigþrúðar Jónsdóttir skoðar hvernig íslenskur matur var framreiddur fyrir blaðamennina, sem hafði verið komið fyrir í Hagaskóla.

Í dag opnar sýning á Listasafni ASÍ ?Það er gaman að lifa ? en það eru komin 61 ári síðan safnið var opnað og er sýningin haldin í tilefni þess. Á sýningunni munu 9 ungir listamenn sýna veggspjöld sem fjalla um helstu baráttumál samtímans. Við förum í heimsókn á verkstæði Grafíkfélagsins þar sem listamenn voru í óða önn að undirbúa sýningu á Listasafni ASÍ. Við ræðum við þær Elísabetu Gunnarsdóttur, safnstjóra og Megan Auði, myndlistarmann sem er ein þeirra sem taka þátt í sýningunni,

Steindór Grétar Jónsson er staddur á kvikmyndahátíðinni Cannes, hann mælti sér mót við leikstjórann Hlyn Pálmason, sem frumsýnir þar myndina sína Volaða land, mynd sem fjallar um ungan danskan prest sem ferðast til Íslands undir lok 19. aldar með það að markmiði að reisa kirkju og ljósmynda íbúa eyjunnar. Titill myndarinnar er fenginn úr ljóði eftir Matthías Jochumson

Ný plata frá Kendrick Lamar kom út á dögunum, Mr. Morale & the Big Steppers. Plötunnar, sem er fimmta plata bandaríska rapparans, hefur verið beðið eftir af mikilli eftirvæntingu. Davíð Roach, tónlistargagnrýnandi Lestarinnar hlustaði á Mr. Morale og rýndi.

Tveir af skipuleggjendum Skjaldborgarhátíðarinnar, Karna Sigurðardóttir og Kristín Andrea Þórðardóttir fara yfir dagskrá hátíðarinnar sem hefst í næstu viku á Patreksfirði.

Steindór Grétar Jónsson er flytur pistil frá Cannes-kvikmyndahátíðinni þetta árið. Kvikmyndahátíðin hófst þann 17. maí og stendur yfir til 28. maí. Steindór hitti unga leikarann Magnús Maríuson sem fer með hlutverk í kvikmyndinni The Vagabonds eftir Doroteyu Dromevu, sem er frumsýnd á hátíðinni,

Hin 75 ára gamla Margrét Sigfúsdóttir á aðeins örfáa daga eftir í starfi sínu sem skólameistari Hússtjórnarskólans í Reykjavík. Því hlutverki hefur hún gegnt í 24 ár. Það hefur margt breyst síðan Margrét fór sjálf í sitt nám, þegar hússtjórnarskólar voru starfræktir víðast hvar á landinu og konur skikkaðar af fjölskyldum sínum í slíka skóla. Með breyttum tímum og viðhorfum í samfélaginu hafa nánast allir slíkir skólar lokað dyrum sínum, fyrir utan þá tvo sem eru eftir, í Reykjavík og á Hallormsstað. Við ákváðum að setjast niður með Margréti og ræða við hana á þessum tímamótum, um skólann, kennsluna og lífshlaup hennar

Margir kannast við svokallaða bjórsala, bílstjóra sem skutla bjór og áfengi til kaupenda eftir að ríkið lokar. Launsala á áfengi hefur verið stunduð hér á landi lengi og þeir sem stunda slíka iðju tilheyra í raun afar gamalli starfsstétt. Steinunn Sigþrúðar Jónsdóttir fjallar um þessa bjórsala fyrri alda.

Skæð sýking í hálsi tónlistarkonunnar Doja Cat kemur í veg fyrir að hún geti haldið tónleika í sumar, en hún er með vinsælustu tónlistarkonum heims um þessar mundir. Sýkingin á sér nokkuð óheppilega skýringu, svo virðist sem söngkonan hafi veipað of mikið. Við skoðum stöðu veipsins í dag, en hún er nokkuð breytt frá því veipið náði fyrst vinsældum.

Harry Styles gaf á dögunum út nýja plötu, Harry?s house. Þetta er önnur sólóplata fyrrum One Direction meðlimsins en sú fyrsta kom út árið 2017. Strákahljómsveitin One Direction á sér gríðarlega marga aðdáendur, aðallega í ungum konum og stelpum. Karitas M. Bjarkadóttir er ein þeirra, hún rýnir í nýútkomna plötu Styles.

Gestur þáttarins í dag er aðeins einn, píanóleikarinn Magnús Jóhann Ragnarsson, sem er einhver virkasti tónlistarmaður íslenskrar popptónlistar í dag, bæði sem sólólistamður og sem þátttakandi í verkum annarra, sem hljóðfæraleikari, pródúser og lagasmiður. Ef þú ert að hlusta íslenskt popp- eða rapplag og heyrir fallegan píanóundirleik, þá eru einhverjar líkur á því að það sé Magnús Jóhann. En hann hefur unnið fjölbreyttum hópi listafólks á borð við GDRN, Moses Hightower, Skúla Sverrisson, Bríet, Ingibjörgu Turchi, Friðrik Dór, Bjarna Frímann Bjarnason, Flóna, Birni, Hipsumhaps, svo einhverjir séu nefndir. Hann hefur samið, komið að, leikið inn á 400 útgefin lög og kemur fram á aragrúa tónleika á ári hverju.

Vinkonur hittast í íbúð í vesturbæ, sitja í hring og ræða bækur af fúlustu alvöru, en það var bókin Vanessa mín myrka eftir Kate Elizabeth Russel sem kallaði á að klúbburinn yrði stofnaður. Bók sem fjallar um ástar og ofbeldissamband unglingsstúlku við fullorðinn kennara sinn.

Við Kópavogsbraut, við hliðina á leikskóla og sundlaugina, var starfrækt kvennafangelsi í rúm 25 ár. Í Lest dagsins heyrum við um nýtt tónverk sem byggir á frásögnum nokkurra þeirra sem afplánuðu í fangelsinu. Brotabrot - minningar úr kvennafangelsinu verður frumflutt í Salnum í Kópavogi á fimmtudagskvöld, en það verða einnig fjögur önnur hljóðverk sem spretta úr hljóðheimi Kópavogs.

Í síðustu viku byrjaði Gunnar Ragnarsson að dýfa litlu tánni ofan í feril kvikmyndaleikarans Nicolas Cage, í tilefni nýrrar myndar hans, The Unbearable Weight of

Massive Talent. Nú sekkur hann dýpra og dýpra og dýpra.

Á morgun, miðvikudaginn 18. Maí munu liðin Valur og Tindastóll keppa til úrslita í körfubolta karla. MIkil spenna hefur skapast fyrir leiknum. Fólk sem áður fylgdist ekki með körfu hefur valið sér lið til að halda með og uppselt er á leikinn. Nýlega fékk Tindastóll nýtt stuðningsmannalag, við ræðum við einn höfund lagsins, Helga Sæmund Guðmundsson, um listina á bak við það að blása fólki byr í brjóst

Við lítum suður á bóginn og heyrum hvað er að frétta í dægurmenningunni í Venesúela. Þessi 30 milljón manna þjóð nyrst í suður-Ameríku hefur ratað sorglega oft í fréttirnar undanfarin ár vegna pólitískrar spillingar, ólýðræðislegra stjórnarhátta og mótmæla. Helen Cova, rithöfundur sem er búsett hér á landi, ætlar hins vegar að segja okkur hvað venesúelabúar eru að hlusta á, lesa og horfa á.

Smáserían Moon Knight er nýjasta afurðin sem kemur af ofurhetjufæribandinu frá Marvel. Salvör Bergmann rýnir í þættina.

Brauðhleifur beint frá miðjarðarhafi. Þannig var maturinn sem borinn var á borð meðal annars auglýstur þegar veitingastaðurinn Pítan, var opnuð á vetrarmánuðum 1982. Steinunn Sigþrúðar-Jónsdóttir rekur sögu Pítunnar, sem er í seinni tíð kennd við skipholt.

Í upphafi Úkraínustríðsins kallaði Volodimyr Zelensky forseti Úkraínu eftir því að erlendir sjálfboðaliður kæmu og berðust gegn innrás Rússa. Þúsundir evrópubúa hafa svarað kallinu, enda margir sem sjá stríðið í Úkraínu sem klassíska baráttu Davíðs og Golíats, góðs og ills. Þetta er langt því frá fyrsta skipti sem ungir hugsjónarmenn hafa ferðast yfir álfuna til að berjast fyrir hugsjónir sínar. Nokkrir Íslendingar fóru þannig og börðust í spænsku borgarastyrjöldinni í aðdraganda seinni heimsstyrjaldarinnar. Við ræðum við Ara Guðna Hauksson, sagnfræðing, um Íslendingana sem börðust á Spáni. En Ari flytur erindi um efnið á íslenska söguþinginu sem fer fram síðar í vikunni.

Í síðustu viku hrundu rafmyntir í virði, sumir hafa gengið svo langt að segja að nú sé þetta búið, aðrir trúa enn heitt á þessa nýju peninga internetsins. Kristján Ingi Mikaelsson er einn helsti sérfræðingur í rafmyntum á Íslandi og ætlar að fara yfir það með okkur hvað gerðist sem olli þessu hruni og hvaða áhrif megi ætla að það hafi. Það eru eflaust ekki stór hópur íslendinga sem fann fyrir þessu hruni en þeir sem gerðu það fundu all hressilega fyrir því.