RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche Robert Garcia, 24/05/2017
    Medienmonopolisten a Fake News?  Oh Lala! Op dëser Antenn géint privat Medienmonopolisten ze wiéderen, kéim e bëssi surrealistesch eriwwer. Besonnech wou mat enger grousszügescher Finanzsprëtz aus dem Staatsbudget d’Grenz tëschent privat-kommerzieller an öffentlech-rechtlecher Press ëmmer méi verschwëmmt.

    Fréier, iir vun “fake news” geschwat gouf, obwuel et se och schons gouf, war alles méi einfach: déi konservativ Leit hun eng konservativ Zeitung abonnéiert, déi progressiv eng progressiv, asw,.. A jidderen konnt dat liésen oder héieren, wat him oder hir an de Krom gepasst huet an all aner Idiën lénks oder riéts leie gelooss.

    Haut huet sech de Spektrum un Meenungsäusserungen dank Facebook, Twitter, etc radikal demokratiséiert. Jiddereen därf op den soziale Netzwiérker suwuel spannend Detailer aus sengem Liéwen mat oder ouni Honn oder Kaazen zum beschte gin wéi och dee gréisste Kabes iwwert d’Weltpolitik verbreeden. An suguer mat den décksten politesche Ligen kann een getrouscht opTrumpen, ouni datt een en Droit de réponse muss zouloossen oder dofir op d’Geriicht geholl gët.

    Allerdéngs kann een sech och säin Grupp vun Friends aussichen, déi engem déi “true and fake news” zervéieren, déi een am léifste liést. Also genau wéi virdrun: eng selektiv Wahrnehmung vun der komplexer Realitéit, je nodem wat een liken oder haten wëll.

    Eng Gemeinsamkeet hun d’ “pensée unique” vun de Medienmonopoler an de fake news Tsunami op de Netzwiérker awer: do versicht ëmmer een vill anerer ze manipuléieren.

    Säit ech selwer onofhängesche Radio bedreiwen, geeschtert dat Wuert “Medienpädagogik” duerch de politesche Raum. Heimat sollen onverduerwen Mënschen, virun allem Jonker, awer nët nëmmen, geléiert gin, wéi wäit een de Medien soll trauen a wat een nët fir boor Mënz soll huelen. Geschitt ass säit 30 Joër nët ganz vill, vun enzelnen Initiativen, wéi dem Graffiti op Radio ARA, ofgesin.

    Elo op bemol, wou et kloër gët, datt een mat fake news kann US-Präsident gin, geroden d’Politiker a Panik. Déi Politiker, déi och op Facebook an Twitter kräfteg matzwitscheren. Séier gët en Zentrum fir politesch Bildung gegrënnt, deen sech vun Ufroën schons nët méi rette kann. An och déi lokal a regional Medien gin e bemol erem entdeckt. Majo, flott, firwaat nët?

    Et bleift awer ze hoffen, datt irgendwann d’öffentlech Hand nët nëmmen Online-Plattformen wëll ënnerstëtzen, déi et Wutbürger erlaben, gratis an ouni Recherche iwwert d’“Lügenpresse” a “korrupt Politiker” hiirzezéien. Mee och denen Initiativen, ob öffentlech oder privat, déi konsequent géint fake news an pensée unique viirgin, adaequat Moyenën gin. E.a. fir mat der aktiver Partizipatioun vun de Biérgerinnen a Bierger, d’Demokrati e bëssi méi interaktiv, pluralistesch an kontrovers ze gestalten.

    Dozou brauch d’Regiirung keng Finanzstränzen mat ënnerschidlechem Gabarit, mee en duerchduechtent Konzept vun Mediepluralismus an Demokratipädagogik.  



    3 min
  • Carte blanche économique mat PWC 18h20, 24/05/2017
    De Staat finanzéiert een Drëttel vun den Dépensen iwwer indirekt Steieren, ënner anerem e groussen Deel iwwert TVA. Kënnt Dir eis erklären wie déi Steier funktionéiert ?

    D'TVA as eng indirekt Steier, well sie vun den Endkonsumenten bezuelt git. Am Géigesaatz zu den direkte Steieren, wie zum Beispill der Akommes Steier, ass et net de Staat, den d'Steier abehält, mä den Verkeefer. Wat de Konsum méi héich ass an engem Land, wat och d'Recette vun der TVA méi héich sinn. D'TVA erlaabt dem Staat och Afloss ze huelen iwwer de Konsum von de Leit. Iwwert TVA kann de Staat zum Beispill de Konsum vu verschiddenen Servicer an Wueren, die hien als positiv betruecht, méi attraktiv maachen, an den Konsum vun aneren, die hien als schlecht betruecht, limitéieren, wie den Tubak zum Beispill. D'TVA huet also en réellen Afloss op d'Gesellschaft.

    Wéi ass et mat Lëtzebuerg am Vergleich zu den europäischen Nopeschlänner ?

    Den Taux vun der TVA zu Lëtzebuerg as am Moment 17%. Och wann den Taux vir un zwee Joer vu 15% op 17% erop gesaat gouf, wéinst dem Verloscht an den Recetten fir d'TVA um commerce électronique, ass den Taux zu Lëtzebuerg ëmmer nach den niddrigsten an der EU. Dës Stabilitéit ass e richtigen Tromp fir éis Kompetitivitéit an och fir éis Attraktivitéit. Aner EU-Länner denke méi daks doriwwer no, d'TVA erop zu setzen. D'EU Land mat dem héchsten Taux as Ungarn mat engem Taux vun 27%.

    Wéi funktiounéiert TVA am Rest vun der Welt ?

    Et gett keen allgemengt Steiersystem. Et sin Länner, die entweder TVA hun oder eng aner Konsumsteier. Verschidden Länner hu keng TVA. Bis haut gouf et an den arabischen Emiraten keng TVA. Den 1. Januar 2018 gett d'TVA normalerweis zu engem Taux vun 5% agefouert. An Indien denkt de Staat anscheinend och doriwwer no esou eng Steier anzeféieren.

    2 min
  • Carte Blanche, Astrid Lulling, 22/05/2017
    An deene leschte Woche gouf et e puer Geleeënheeten, an Europa ze feieren.
    1. Enn Abrëll de 60. Gebuertsdag vum Vertrag vu Roum, deen no der  éischter europäescher Kommunautéit fir Kuelen  a Stol 1952 déi Europäesch Wirtschaftsgemeinschaft an d'Euratom 1957 geschaf huet.
    2. Den 9. Mee, de Joresdag vun der berühmter Declaratioun vum Robert Schuman, den 9. Mee 1950, deen de Grondsteen fir d'Schafung vun eiser heiteger Europäescher Unioun vun 28 Länner geluecht hat.
    Trotz oder grad wéint deene Feiere musse mer eis Suerge maachen  ëm d'Zukunft vun deem Europa an deem mer haut liewen,  dës  E.U. déi nach emmer déi éischt Puissance an der Welt ass mat deenen ambitiéiste wirtschaftlechen, sozialen  an ëmweltpoliteschen Standarden.
    Millioune Leit verloossen hir Heemechtslänner a maache sech, ënner liewensgeféierleche Conditiounen op de Wee, meeschtens illegal, fir bei eis méi sécher a besser liewen ze kënnen, a mir hunn domat vill Problemer.
    An deenen   28 E.U.-Länner gëtt et awer emmer méi Leit, déi Europa fir hir Problemer verantwortlech maachen a vun der E.U. kee positiven Image méi hunn.
    47% vun de Leit, déi hei am Land wunnen, sollen no deem leschten  Eurobarometer, deen an Optrag vun der Europäescher Kommissioun  erstellt gouf, net méi positiv zur E.U. stoen.
    65% sollen awer nach Vertrauen an d'Zukunft vun der E.U. hunn. An der ganzer E.U. sinn dat  nach nëmme  50%.
    Wéi ass esou eppes méiglech?
    Schold un deem Euroskeptizismus si virun allem riets- a lénksradikal Populisten, déi mat Ligen d'Leit géint  déi europäesch Institutiounen opstëppelen.
    Si hunn ëmsou méi Erfolleg, jee besser si et fäerdegbréngen, de Leit hir Roserei  vis-à-vis vun der E.U. ze vergréisseren.
    Et gëtt héich Zäit, dass Politiker, aner Responsabelen,  d'Zivilgesellschaft  géint dëse geféierleche Populismus op d'Barrikade ginn, dass se de Leit d'Wourecht soen, nämlech dass déi meescht Problemer mat deene si sech erëmklappe mussen,  hausgemaacht sinn, wéi z.B. a Frankräich.

    Mir mussen informéieren, dass déi grouss Erausfuerderungen  ewéi Immigratioun, bessere Wuesstum fir méi Aarbechtsplazen, Sécherheet nëmmen zesumme geléist kënne ginn, dass mer nëmmen nach als Europa Gewiicht an der Welt hunn, wa mer eis Unioun méi zolidd maachen.


    De Mouvement Européen huet eng Campagne gestart, fir eis europäesch Wäerter
    ze verdeedegen an  enger méi solidarescher, an enger méi effikasser E.U.
    Amplaz dass déi lëtzebuerger Gewerkschafte mat anere Mouvementer wéi de Konsumenteschutz géint europäesch Handelsverträg mat  Kanada, Singapur oder den USA opstëppelen, wier et fir d'Aarbechts- an d'Liewensbedingunge vun hire Memberen, déi héich Beitraeg bezuelen, besser  wa se endlech begräife géifen, dass Handels- an Investitiounsverträg de Regulator vun der Globaliséierung sinn.
    Amplaz méi Dépensë fir eis Sécherheet a  Verdeedegung ofzeleenen, solle se begräifen, dass d'Promotioun vun eiser strategescher Autonomie haut fir d'E.U. liewenswichteg ass.
    Ech hoffen, dass mer wéinstens hei am Land dat verstinn an dass der iech mat der Europäescher Beweegung dofir asetzt, dass mer d'E.U. net nëmme retten, mä verbesseren a méi staark maachen. An eisem Intérêt. Maacht mat!


    3 min
  • Carte Blanche Fernand Fehlen, 19/05/2017

    Vun 1815 bis 1866 war de Groussherzogtum ee vun deenen ca. 40 däitsche Staaten, déi an enger lockerer Confederatioun, dem Däitsche Bond, associéiert waren. Nodeems dëse Staatebond 1866 un interne Streidereien zerbrach ass, houng d'Schicksal vum Grand-Duché fir e puer Méint an der Loft. An där Zäit ass an der däitscher Ëffentlechkeet hefteg iwwer déi sougenannt Luxemburger Frage debattéiert ginn, ier de Statut vun onsem Land am Londoner Vertrag als eegestännegen an éiweg neutralen Staat confirméiert ginn ass.
    An der deemoleger Zäit ass allgemeng ugeholl ginn, datt d'Nationalitéit sech iwwer d'Sprooch definéiere géif. Fir déi däitsch Nationaliste war Lëtzebuerg en däitsch Land, well seng Awunner däitsch geschwat hunn, an si hu sech doriwwer opgereegt, datt d‘Lëtzebuerger Regierung hinnen déi franséisch Sprooch antriichtere géif, fir se vun hiren däitsche Bridder ze entfriemen.
    Lëtzebuerger, déi sech zu Wuert gemellt hunn, woussten net esou richteg, wat se dësem Doudschlag-Argument entgéint setze sollten, well se selwer iwwerzeegt waren en däitschen Dialekt ze schwätzen. Dofir hunn se alt probéiert deem seng Eenzegaartegt an Eegestännegkeet ënnert deenen anere germaneschen Dialekter ze betounen. En Argument, dat wéinst der Ähnlechkeet mat den Eifeler Dialekter kaum iwwerzeegt huet.

    Lëtzebuerg war deemools op Grond vu senger eegener Geschicht en zweesproochegt Land. Trotz der verfassungsrechtlecher Gläichberechtegung vum Däitschen a Franséischen, war Franséisch déi dominant Sprooch. Déi däitsch Nationalisten hunn probéiert Protester géint dës Situatioun, zum Beispill géint de Franséisch-Unterrecht an der Primärschoul, déi et am Ländche wierklech gi sinn, fir hiren Zweck ze instrumentaliséieren. Si hu vun enger "Erhebung des Volksbewusstseins gegen die Herrschaft des Französichen", vun engem Opstand géint frankophil Eliten, déi hiert Vollek vun uewen erof als "dumme Deutsche" behandele géifen, gedreemt. Mä domat hunn se d'politesch Situatioun total falsch ageschat. Do wou et esou Protester gi sinn, waren se sozial motivéiert, an et ass zu där Zäit keng politesch Kraaft ginn, déi hinnen, wéi z.B. a Flanderen, eng nationalistesch Stoussrichtung gi wollt.  
    Der Argumentatioun vun den däitschen Professeren haten d’Lëtzebuerger nëmmen onbehollef Argumenter entgéint ze setzen. Zum Beispill datt se zwou Mammesproochen hätten. Mä wéi schonn 1815 war et net d’Meenung vum Vollek, mä déi international Muechtkonstellatioun, déi iwwer d’Schicksal vum Land entscheet hunn.
    Iwwregens. Vun deenen ursprénglech 38 Staaten vum däitsche Bond aus dem Joer 1815 hunn nëmmen zwee bis haut iwwerlieft: Lëtzebuerg a Liechtenstein.


    3 min
  • Carte Blanche, Marc Müller, 17/05/2017
    Carte blanche 16: Orientation am Zäitalter vun der 3. industrieller Revolutioun
    Engersäits geet aus Etuden ervir, datt eis Schüler grouss Orientatiounsproblemer hun, wa sie, op 9e, resp. 4e hir Fachrichtung oder Sektioun am Lycée wielen sollen an och, wann et op 13e, resp. 1re, heescht sech fir e Studium op enger Héichschoul ze entscheeden. Anerersäits ass d’Schaafen vun der neier Informatik-Sektioun-I am Enseignement Secondaire endlech och zu Lëtzebuerg de schoulpoliteschen Ausdrock dovun, datt eng digitaliséiert a robotiséiert Welt eist d’Zesummenliewen a besonneg d’Berufswelt dramatesch veränneren wäerten.
    Vun desen wirtschaftlechen Verännerungen kreien déi Jonk awer kaum eppes mat, well hinnen dat néidegt economescht Wëssen iwwert de Wirtschaftskreesslaf an d’Wirtschaftsakteuren fehlt. Kréichen d‘Schüler economesch Basiskenntnissser vermëttelt, da wier hiren Interessie un Wirtschaftsnorichten méi grouss, sie wieren besser informéiert a kéinten hir Chancen an der zukünfteger Beruffswelt besser notzen. Dest och zum Virdeel vun den lëtzebuerger Entreprisen, denen et emmer méi schwéier fällt dat passend qualifizéiert Personal heiheem ze fannen.
    Mee dir, als Elteren, wesst dir weien Beruffsbilder riskéieren ze verschwannen a kennt dir d‘Wirtschaftsclusteren mat deenen d’lëtzebuerger Regierung de Wuesstem an d‘Arbechtsplatzen vu muer schafen well? A wéi beurteelt dir, als Wieler, d’Budgetspolitik vun der Regierung? Hutt dir, als Konsument, op ärem Hypothéikenkredit e variabelen oder e fixen Zënssätz a wat bedeit dat?
    Wann dir op derart Froen keng kloer Äntwert wësst, da sid dir net alleng: Déi grouss Majoritéit vun Erwuessenen wënscht sech, sie hätten méi wirtschaftlecht Allgemengwessen, kruten dest awer an der Schoul net vermëttelt. Datt och haut nach déi allermeeschten Schüler de Lycée ouni des, fir hiren Alldag noutwendeg, economesch Kenntnisser verloossen ass ëmsou méi bedauerlech.
    Fir hir schoulesch, universitär a berufflech Orientatioun brauchen déi Jonk awer Basiswessen iwert déi economesch Aspekter vun hirer Liewenswelt an zB Kenntnis vun den Wirtschaftssecteuren mat Zukunft, wéi Informatik, Logistik, life-sciences oder Emwelttechnologien, oder och den verschiddenen berufflechen Statuter wéi Fonctionnaire, Salarié an Indépendant.
    Och fir hir finanziell a politesch Entscheedungen an hirem Privatliewen responsabel treffen ze können, brauchen déi Erwuessen a Wieler vu muer, e Minimum u “culture générale” an Economie a Finanzen. Wat virun 20 oder 30 Joer net noutwendeg war ass et haut, gëtt duerfir vun der OECD gefuerdert an gouf, z.B., 2011 vun eisem Noper Frankräich duerch d’Aféierung vun engem obligatoreschen Economie-Cours fir all Lycées-Schüler ëmgesat.
    An eisen Demokratien dominéieren d’Wirtschafts- an d’Finanzpolitik d’ Noriichten an d’Wirtschafts- a Finanzministeren decidéieren zesummen mat Lobbyisten a Multinationalen iwert de Laf vun der Welt  ... Mee, eng Wirtschafts- a Finanzbildung fir d’Matbierger geet et net.    
    Héich Zeit also fir der berufflecher Orientatioun am Secondaire an dem generellen Wirtschafts- an Finanzwessen vun eisen zukünftegen Generatiounen en noutwendeg an zolitt Fundament ze géissen andeems obligatoresch Economiescoursen fir all Schüler agefouert gin: informativ, aktuell, interessant an no um Alldag vun de Léit.


    3 min
  • Carte Blanche,Paul Kremer, 15/05/2017
    Wéi ass et elo? “Alles neu macht der Mai” oder Beethoven viru Mozart bzw. “D’Ode an die Freude” aplaz “d’Marseillaise”?
    Also: weider wéi gehabt – oder awer: e neien Ufank? – Wa mer mol eng Kéier optimistesch wëlle sinn, gi mer dem neie Präsident seng Chance a soen: “Allez, en marche!”
    An zwar: Richtung Berlin. Well do, a Groussdäitschland, mat Kanzlerin a Schäublerich, läit Macht a Mënz. A Frankräich, wou mol Gott doheem war, brauch a bréicht ee béides. Oder mol e Schubs an déi richteg Richtung.
     Well Kadoën mache weder eng eise Kanzlerin nach e steenharde Schäuble. An däitsch Steierzueler berappe weder lo nach muer fir hallef mediterran Schëlden. Also: egal wéi: eddi fir luesseg Euro-Bongen, wou déi Fläisseg fir déi Midd bezuelen – sou unisono a Bayern an uleiende Gebidder.
    A Frankräich gi lo schon d’Stroosse gekiirt fir prett ze sinn, wann éischt Protestmärsch géint de Senkrecht-Starter sech waarm laafen.
    Domatt wiere mer da schon um Enn vun enger séier verflunnen Euforie. A Pech fir Latino-en, a siev et grouss-gallescher...
    Et siev dann d’Preisen hätten de Le Pen Duerchzuch gespiirt. Wëll soen: a 5 Joer – eng Präsidentin? – Oder wiir et net dach méi zolidd, wa scho net: méi “zolidaresch”, wa Berlin Paräis ënnert d’Ärm gräife géif, fir e Kär-Europa dach nach op d’Been ze sètzen. De Macron ass schliesslech vun alle 5. Republik Präsidenten bei weitem dee Gewëtzten.
    Sou wéinstens gesi mir et, mat eisem Premier, dee sech do, kann ee soen, net iirt. Lëtzebuerg tëscht besoten zwee Noper gequëtscht, kéint nees, wéi soss sou dax, den éierbare Makler spillen.
    A wann een, op der Seine oder hannert Rhein an Elbe “par impossible” net wéisst, wouhinn mam ville Geld, da kënnte mir deem eng Hand dobäi mat upaken.
    Paul Kremer
    3 min
  • Carte blanche économique mat PWC 18h20, 10/05/2017
    Carte Blanche Economique – PwC – 2016/2017 – Medienpolitik zu Lëtzebuerg

    RTL: Et gouf a läschter Zäit vill zu Lëtzebuerg iwwer Medienpolitik geschwat a gëschter war doriwwer eng Débatt an der Chambre – em waat geet et?

    François Mousel: Bei den Medien muss een grondsätzlech ennerscheeden tëschent privaat finanzéierten Medien an öffentlech-rechtlech Medien. Bei deenen privaaten Medien ass et kloer dass déi éditorial Linn ëmmer a Verbindung bruecht gëtt mat deem deen finanzéiert. Bei den öffentlech-rechtlechen Medien geet et drëmm e Programm ze entwëckelen deen dem Intérêt général déngt, wéi och ëmmer deen ze définéieren ass. Bei der Debatt geet et drëmm ze définéieren wéi d’Medien sech entwéckelt hunn an ob eis Medienpolitik misst iwwerduecht ginn.

    RTL: Virwaat sinn öffentlech-rechtlech Medien dann iwwerhaapt wichteg?

    François Mousel: Menger Meenung läit d’Bedeitung net haaptsächlech bei der Bereetstellung vun faktuellen Informatiounen, daat kann eng Presseagentur maachen. Mee eischter beim Beidroen zu enger ausgeglachener Meenungsbildung, duerch eng réel journalistesch Aarbecht, déi kann a soll kritësch sinn (och géigeniwwer dem Staat), mee duerch Argumenter, an nët Skandaalberichterstattung. Dofir muss en öffentlech-rechtlechen Medium onoofhängeg sinn a) vun kommerziellem Akommes an b) vum Staat am Sënn vun der Regierung.

    RTL: Wéi steet Lëtzebuerg do? Hunn mir iwwerhaapt öffentlech-rechtlech Medien?

    François Mousel: D’Situation ass net optimal. Mir hunn en hybriden System. Et gëtt nëmmen een puren öffentlech-rechtlechen Medium, an daat ass den Radio 100,7 an och deen gëtt iwwert eng Konventioun mam Staatsministère finanzéiert wou e politëschen Interessenkonflikt onausweichlech ass. Dann gëtt et eng Konventioun “de son propre genre” mat CLT-UFA an, schlussendlech, verschidden Pressehëllefen. En besseren Modell wier, öffentlech-rechtlech Medien (z.B. een Radio (mat Onlinepräsenz) an een Televisiounskanal, virwaat net och eng Wochenzeitung) iwwert eng Offgab (Taxe), ewéi an Däischland, ze finanzéieren an Iwwerwaachungsorganen ze schaafen déi dem Interessi vun den Contribuablen, d.h. deenen, déi d’Oofgab bezuelen, réell Rechnung droen. Gudd konzipéiert misst esou e Modell och dem Wonsch vun pluralistechen Meenungen Rechnung droen. Alles aanescht sollen dann privaat Suen integraal finanzéiren, oder guer net. Daat wier a mengen Aan eng kloer Entscheedung am Interessi vun den Bierger am Land an kinnt och hëllefen déi berühmten “fake news” ze bekämpfen.


    3 min
  • Carte Blanche Gilles Hempel, 10/05/2017

    Laut enger Etude vum Logementsministère ginn et hei am Land bal 1000 Hektar
    Baulücken, also 1000 Hektar Land matten am Bauperimeter wou direkt kéint drop
    gebaut ginn. 95 Prozent dovun sinn awer an der Hand vu private Spekulanten. An déi
    hunn keen Interêt dorun, dat Land ze verkafen, fir dass do kenne Wunnengen drop
    gebaut ginn. Op der Bank kritt een am Moment nämlech keng Zënsen.
    Déi räich Leit wëssen dofir och insgesamt net méi wouhi mat hirem ville Geld. A well
    Geld sech jo scheinbar muss vermehren, zu ëmmer an ëmmer méi. Dofir gëtt elo och
    ëmmer méi an den Immobiliëmarché investéiert.
    A priori kéint een sech jo doriwwer freeën. Et gi jo dausende Wunnenge gebraucht.
    Mee wann privat Kapital an Immobilien investéiert gëtt, dann entsteet dobäi awer net
    zwangsleefeg ëmmer neie Wunnraum. Wéi ass dat ze verstoen? Ma ëmmer méi Leit, déi
    Geld zevill hunn, investéieren dat quarément an de Leerstand.
    Si kafen z.B. Wunnenge fir se ganz bewosst während 10 Joer eidel stoen ze loossen an se
    duerno mat Gewënn als première occupation rem zeverkafen. Bei de steigende Präisser
    hei zu Lëtzebuerg ee séchert a profitabelt Geschäft.
    Ëmmer méi populär gëtt och de sougenannte Landbanking. Dat ass ee Businessmodell,
    wou Bauland als laangfristeg Kapitalanlag genotzt. Hei keeft een Investisseur ee
    Grondstéck am Bauperimeter -mam Virsaz- fir et ganz bewosst net ze bebauen. Mee fir
    et während Joren oder Joerzéngte brooch leien ze loossen. An et dann iergendwann mat
    vill Benefice erëm ze verkafen. Doduerch, dass dat Bauland dem Wunnengsbau
    virenthale gëtt, kennt et zu enger zousätzlecher Verknappung um Immobilienmarché,
    wat d’Präisser nach méi a Luucht dreift.
    Mir mussen eis als Gesellschaft froe ob mir sou Praktiken wëllen toleréieren. Ob mir et
    kënnen zouloossen, dass eng kleng Finanz- an Immobilienoligarchie sech op Käschte vun
    enger ganzer Bevölkerung beräichert.
    Wou huet d’Fräiheet vum Proprietaire seng Grenzen?
    Et gouf Zäiten do huet de Staat als sougenannten Nachwächter missen den Eegentum vu
    senge Bierger beschützen. Haut muss de Staat seng Bierger virun der Gier vu sengen
    Eliten beschützen? An dat ganz besonnesch am Logement.
    Daat war eng Carte Blanche vum Gilles Hempel, Soziolog an Direkter vun der Agence
    Immobilière Sociale.
    3 min
  • Carte Blanche, Alain Wagner, 08/05/2017

    Vum karthagesche Feldhär Hannibal gëtt erzielt, e wier a sengem Exil zu Ephesus eemol invitéiert ginn, sech e Virtrag vun engem eminente lokale Philosoph unzehéieren. Wéi den Zoufall et wollt, huet dëse Philosoph, e gewësse Phormio, grad deen Dag stonnelaang iwwer d’Aufgabe vun engem Generol dozéiert. Dësen Optrëtt huet den Hannibal folgendermoosse kommentéiert : « Ech hunn, sot en, a mengem Liewe scho vill Unikume begéint, mee deen do iwwertrëfft alles. »
         D’Moral vun der Geschicht läit op der Hand. De Phormio ass de Prototyp vum naiven Theoretiker, deen héichtrabend Rieden iwwert e Beräich hält, an deem e glat a guer keng  praktesch Erfahrung huet. An den Hannibal, deem seng taktesch Finessen anscheinend haut nach a verschiddene Militärakademië studéiert ginn, huet et zimlech bosseg fonnt, datt grad hie vun esou engem Braddeler sollt beléiert ginn.   
          « Phormioen » gesäit een hautdesdaags a ville Beräicher. En éischter harmlost Beispill ass nach de Sport. Do ginn et op der Tribün oder virun der Tëlee onzieleg Experten, déi ganz genau mengen ze wëssen, wéi de Spiller flanken, den Trainer auswiesselen oder den Arbitter päife soll. Mat engem Glas Béier am Grapp wierkt eben alles e bësse méi liicht.  
        Och d’Schoul ass eng regelrecht Spillwiss fir esou Leit. Am Enseignement ass am Laf vun de Joren en theoretesche Waasserkapp erugezillt ginn, deen ëmmer weider wiisst.            Do gëtt permanent expertiséiert, pilotéiert, evaluéiert a konzeptualiséiert – an dat alles a sécherer Distanz zum Klassesall. Natierlech ass et wouer, datt d’Schoulhalen sech net op e puer Kicherezepter beschränke soll an dowéinst e reflexive Kader brauch. Allerdéngs muss een oppassen, datt um Enn de Kader net méi grouss ass wéi d’Bild, dat soll encadréiert ginn.      
         Regelrecht geféierlech gëtt de Phormio-Phänomen awer an der Politik, wou en oft e Symptom vu bëllegem Populismus ass. E krasst Beispill ass de briteschen Euroskeptiker Nigel Farage, dee virum Referendum iwwert de Brexit de Leit dat Blot vum Himmel versprach huet, duerno et awer virgezunn huet, den Challenge vun der Praxis ze vermeiden. Kritiséieren an Téinen ass eben ëmmer méi bequem, wéi reell Responsabilitéiten z’iwwerhuelen.
    Dës Erfahrung huet mëttlerweil och den Donald Trump gemaach, dee kierzlech zouginn huet, et wier awer alles net esou einfach. Vum Meeschter vun de « fake news » ass esou eng offen Ausso erstaunlech – mä net rassurant. Grad an dësen Zäite bräicht Amerika alles anescht wéi e schwaache President, dee wéi e schlecht virbereete Schüler wierkt, vu politescher Praxis wéineg Ahnung huet an e Spillball vu senge Beroder ass.  Zum Hannibal senger Zäit war de Phormio just e schrullege Philosoph, deem ganz sécher keen eng Arméi uvertraut hätt. Haut wunnt de Phormio am Wäissen Haus, befënnt iwwer Syrien oder Nordkorea an huet d’Hand um Atomknäppchen.    

    4 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners