RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche Justin Turpel, 05/05/2017
    Nee, ech schwätzen haut net iwwert franséisch Walen – dat maachen ech an enger Stellungnahm op mengem Blog. Ech wëll dës Carte Blanche notzen, fir op eppes opmierksam ze maachen, wat mech scho laang stéiert, a wou et mech wonnert, datt dat bis elo nach net a Fro gestallt ginn ass – an zwar d’Bedeelegung vun der SES, der Europäescher Satellittegesellschaft vu Betzder, beim Doutmaachen vu Mënschen duerch Dronen.
    Am sou genannten „Kampf géint den Terror“ setzt d’amerikanesch Arméi Dronen an, déi iwwert d’Satellitten vun der SES gesteiert ginn, fir sou Terroristen, déi op der amerikanescher „Kill-list“ stinn, ofzeschéissen. Dat geschitt net nëmmen ouni Geriichtsuerteel, mee dobäi kommen dausenden vun Zivilsten, dorënner ganz vill Kanner, mat ëm d'Liewen. Deen Drone-Krich ass net nëmme kontraproduktiv, mee e verstéisst an allen Hisiichten géint d‘Genfer Konventioun, déi nom 2. Weltkrich gemaach gouf, fir ënner anerem d’zivil Bevëlkerung während Kricher ze beschützen.
    Dat mer ons richteg verstinn: et geet mir iwwerhaapt net drëms all Aktivitéiten vun der SES ze verdäiwelen. Villes wat mat Satellitten gemaach gëtt, ass eng gutt Saach, a souguer ganz hëllefräich fir vill Mënschen op der Welt. D’Iwwerdroe vun Telefonsgespréicher an anere Kommunikatiounen, grad sou wéi vum Internet a Fernsehsbiller, bis hin zur Kommunikatioun an Noutstandsgebitter: alles dat sinn Aktivitéiten vun der SES, déi séier nëtzlech sinn.
    Mee awer och Dronen, déi Mënschen ëmbréngen, ginn iwwer d’SES-Satelliten gesteiert.
    An déi SES gehéiert – zesummen mat der Spuerkeess an der nationaler Investitiounsgesellschaft – dem Lëtzebuerger Staat.
    A bis elo huet kee Vertrieder vum Staat am Verwaltungsrot sech dergéint gewiert, datt iwwert SES-Satellitten Dronen gesteiert ginn déi Mënschen ëmbréngen. Schliisslech ass dat ee gutt Geschäft, mat deem vill Suen verdéngt ginn …
    Leider ass dat net déi eenzeg Aktivitéit vun ëffentleche Betriber oder Betriber un deenen de Staat bedeelegt ass, mat der géint Mënscherechter oder gülteg international Konventiounen verstouss gëtt: den ëffentlechen Lëtzebuerger Pensiounsfong investéiert nach ëmmer a Firmaen, déi d‘Klimaschutzofkommes vu Paräis net respektéieren; an den Zukunftsfong ënnerstëtzt souguer Betriber, déi hier Geschäfter mat Streebomme maachen!
    Dobäi froen ech mech, wéi laang nach gutt bezuelten Fonktionnären als Vertrieder vum Staat an sou Verwaltungsréit sëtzen, ouni datt si drop halen, datt déi Betriber Mënscherechter an international Konventiounen, déi Lëtzebuerg ënnerschriwwe huet, respektéieren?! Hunn si iwwerhaapt Zäit fir sou een wichtegen d’Job, quasi niewelaanscht, nieft hirer eigentlecher Aarbecht, ze maachen? Oder dinn déi héich Indemnitéiten si vergiessen, datt si do eng Opsiichtspflicht hunn?
    Et gëtt Zäit, datt de Staat, d’Chamber grad sou wéi d'Regierung an hier Vertrieder an de Verwaltungsréit, net méi zouloossen, datt ëffentlech Betriber oder Betriber mat staatlecher Bedeelegung géint gültegt Recht, Konventiounen a Mënscherechter verstouss

    3 min
  • Carte Blanche - Paul Hammelmann, 28/04/2017
    Jo, den Emmanuel Macron huet manner Programm wéi meng Wäschmaschinn an trotzdeem musse mer hien am 2. Tour ënnerstëtzen fir eng Le Pen ze eliminéieren, do sinn mer eis eens.
    Mee wat hate mer dann fir e Choix beim 1. Tour?
    Mélenchon, Macron, Fillon, Hamon, … Bidon, Melon … do feelt eigentlech just nach de „grand con“.
    Ah nee, deen ass jo do, ënnert dem sigle “Front (national)”, bei eisem esou bescheidenen Noper, der “Grande Nation“.
    Am Verglach zu dësen Kandidaturen luewen ech mer den Ferdinand Lop, deen 1939 mat an d’Walen gung mat Fuederungen wéi en Tapis roulant fir Trottoirsmeedercher, eng Rent fir d’Wittfra vum onbekannten Zaldot, d’Ofschaafen vum läschte Waggon am Metro an d’Erofsetzen vun der Schwangerschaft vun 9 op 7 Méint.
    Mee loosse mer Satire op der Säit, well Zäiten sinn net fir ze laachen.
    Bal all Kandidaten am 1. Tour hunn sech em déiselwecht Doktrin beméit déi een am Treffensten mam Qualifikatif „National Liberalismus“ beschreift, d.h. Liberalismus fir déi Räich, Nationalismus fir déi Aarm.
    Dës ekelhaft Ideologie kenne mer jo ewell ausgiebeg vun Leit wéi Erdogan an der Türkei, Kaczyήski a Polen, Orban an Ungarn an natirlech Trump an Amerika, de Bonux Cadeau vum Kapitalismus schlechthin.
    Frankräich huet jo laang schonn déi ongesond Tendenz den Auslänner Schold un hirem Misère ze ginn.
    Esou gouf 1983 e Gesetz gestëmmt wat Net-Fransousen obligéiert sech all Moment musse kënne auszeweisen.
    Wéi dat Gesetz applizéiert muss ginn, huet den Tribunal de Grande Instance vun Versailles preziséiert.
    Zitat: « un contrôle est légitime face à un individu susceptible de par son aspect, son comportement, sa tenue vestimentaire, voire sa diction (sa diction !), de ressortir d’une nationalité étrangère ».
    Dat war ënnert dem sozialisteschen President François Mitterrand!
    Mir ginn also rosegen Zäiten entgéint.

    3 min
  • Carte Blanche, Tom Bellion, 26/04/2017
     
    Dir sidd dach bestëmmt och schonns am Ausland mat Leit an d'Gespréich komm. Da sidd dir bestëmmt gefrot ginn, wat Lëtzebuerg ass. Ech wetten, dass déi meescht vun iech ugefaangen hu mam Saz : "Lëtzebuerg ass ee ganzt klengt Land, matzen an Europa, an et läit tëscht Däitschland, Frankräich an der Belsch."
     
    Mat der Initiative Nation Branding hu mir eis op de Wee gemaach, fir eis anescht dobaussen duerzestellen. An dat ass och gutt esou!
     
    Dat gëtt eis nämlech Geleeënheet, fir eis Kommunikatiounsmusteren  ze iwwerdenken, eis Stäerkte vill méi an de Virdergrond ze stellen an déi eng oder aner Success Story ze bréngen.
     
    Ee puer interessant Donnée'en dozou kann een am leschte Rapport iwwert d'Kompetitivitéit vum Tourismus fannen, deen de World Economic Forum regelméisseg erausgëtt.
     
    Déi Etude ënnersicht knapp 100 Critèren déi dozou bäidroe, fir d'Performance am Tourismus vun engem Land ze evaluéiere. An do spillen och aner Facteur'en eng Roll, déi éischter allgemenger Natur sinn an net direkt mat der touristescher Branche ze dinn hunn, mee awer de Kader ginn. Natierlech muss esou eng Analyse  ëmmer kritesch gekuckt gi. Déi international Vergläicher a Resultater sollen ëmmer "toutes proportions gardées" betruecht gi.
     
    An iewer brauche mir eis an dësem Fall wierklech net ze verstoppen. Bei 22 Critère si mir an den Top Ten an insgesamt leie mir op der Plaz 28 vun 136.
     
    Duerch Zesummesetzung vun dem Index gëtt een sech nees bewosst, dass mir gutt dru géifen doen, net ëmmer isoléiert eis Wirkungsfelder, pro Secteur oder Industrie, ze kucken, mee ze versichen, dat ganzt a globaalt Bild vu Lëtzebuerg am A ze halen.
      
    Ech denken et géif eis gutt doen, wa mir z.B. nach weider Visiounen, wéi déi fréier vun der SES, oder elo vum Space Mining géifen entwéckelen.
     
    Musse mir net endlech ophalen, eis konsequent, an eiser onendlecher Bescheidenheet, an enger Kultur vum Understatement ze bewegen? Mir sinn eng ganz houfreg, oppen an inklusiv Gesellschaft an Economie déi muenches opzeweisen huet!
     
    Ass Zäit net komm fir eis Gréisste verstäerkt ze weisen an iwwert eis Zieler erauszewuessen ?
     
    Solle mer eis net an 10 Joer Rendez-vous ginn an dësem Ranking, awer dann ënnert den Top 15 ?

    3 min
  • Carte blanche économique mat PWC 18h20, 26/04/2017
    D’Stëmmung vun de Patronen hei zu Lëtzebuerg

    Viru kuerzem huet PwC d’Resultater vun enger Ëmfro bei de Patronen hei am Land publizéiert. Dobäi ass eraus komm, dat iwwert 50% vu de Patrone dest Joer plangen neit Personal anzestellen. Deemno schéngt Vertrauen an d'Zukunft ze bestoen?

    PwC huet déi Ëmfro bei Patronen international gemaach – awer och spezifesch fir Lëtzebuerg. Dobäi schéngt et effektiv, dat Patronen hei am Land un de Wuesstem gleewen: 51% vun de Lëtzebuerger Patrone gleewen un ee Wuesstem vun hire Betriber an deenen nächsten 12 Méint – géint nëmme 35% um globalen Niveau.
    Patrone gleewen awer och un d'Ekonomie vum Land. Esou rechnen 53% vun de gefrote Patronen un en Wuesstem vun der Lëtzebuergeschen Ekonomie. Des Tendenz gëtt duerch verschidde Facteure confirméiert:
    •    do ass zum engen de confirméierten Triple A Rating vu verschiddene Rating Agencen;
    •    divers Previsioune rechnen mat engem Wuesstem vum Bruttoinlandprodukt vu 4% fir 2017. An dat par Rapport zu 1,8% fir ganz Europa.
    •    awer och de Réckgang vum Chômage -den ass am Verglach zum leschte Joer em 706 Persoune gefall – dat entsprécht 3,9% - as positiv fir d‘Ekonomie.
     
    Och Thema „Brexit“ war bei der Ëmfro aktuell. Hei ass den erwaarten Impakt allerdéngs fir Betriber déi net direkt am Finanzsecteur aktiv sinn éischter limitéiert – bei den Acteuren aus dem Finanzsecteur schéngt de Brexit awer ee ganz akut Thema ze si – sie erwaarden sech an deenen nächste 5 Joer reell Opportunitéiten.

    Wat sinn da - laut der Ëmfro - déi grouss Erausfuerderunge fir eis Patronen?

    Och wann d’Patronen un d’Ekonomie vum Land gleewen, esou goufe verschidde kritesch Punkten ugeschwat. Top 3 waren hei:
    •    als Éischt den „Iwwermooss un Reglementatiounen“ mat 95%;
    •    als Zweet, déi „geopolitesch Onsécherheet“ mat 91%;
    •    an als Drëtt, „Gefore vun der Cyberkriminalitéit“ mat 76%.
    Als grouss Erausfuerderung fir d’Zukunft gouf awer och technologesche Fortschrëtt genannt. Aktuell benotze 56% vun de gefrote Patrone verschidden Technologië fir Demande vun hire Clienten ze erfëllen. Hei wäerten an den nächste Joren nei Kompetenzen néideg sinn, an 24% vun de Patrone ginn dovun aus, dat sie déi Kompetenzen am Moment net zu Lëtzebuerg fannen.
    2 min
  • Carte Blanche, Robert Urbé, 24/04/2017
    De 7. November bei enger Presentatioun um Belval iwwer di territorial Entwécklung vu Lëtzebuerg huet den Nohaltegkeetsminister d’Diskussioun ëm den 1,1-Mio Awunnerstaat als eng “Phantomdiskussioun” bezeechent, mat deeër een nëmme géif Angscht maachen. Et ass natierlech hei sou, wéi bei sou villem: et kann een et sou oder sou gebrauchen. Mat der Angscht, an dermat datt keen eng verlässlech Virausso op méi wéi 40 Joer maache kann, huet de Minister sécher Recht. Mee: et ass awer kee Phantom, et ass ganz real! An d’Diskussioun dodriwwer huet keen hier opgedrängt, mee déi huet d’Regierung, an zwar souwuel déi viregt wéi déi heiten, selwer ze veräntwerten.
    Bei der Rentereform 2012 huet d’Regierung (déi deemoleg) hier Zuelen op engem Szenario vun  engem Wuesstem vun 3% bis 2060 opgebaut: dat huet awer als Resultat 1 Millioun Awunner a méi.
    A genau sou huet d’Regierung am Abrëll 2016 fir de Budget 2017 dat mëttelfristegt budgetäert Objektiv vun engem strukturelle Budgetiwwerschoss vu +0,5% beim Gesamtstaat op een Defizit vu -0,5% erofgesat, wat de Spillraum bruecht huet fir d’Steierreform, ouni dat budgetäert Ziel ze verletzen. An och déi Verännerung vum budgetären Objektiv berout op den Zuele vun der demografescher Entwécklung.
    D’Regierung huet sech also mindestens zwee mol op dat sou genannte “Phantom” vum 1,1 Mio Awunnerstaat gestäipt, fir hier Politik ze begrënnen. Da soll se lo net soen, dat wier eng Phantomdiskussioun!
    A béide Fäll mécht d’Regierung, wéi wann si net dofir kéint, datt et zu sou enger Bevëlkerungsentwécklung kënnt, datt si dat als virausgesat ze akzeptéieren huet an hier Politik kann dorop opbauen. Ofgesinn dervun, datt sech dann zumindest Gedanken ze maache wieren, wat dat heescht a mat sech bréngt, a wat fir Mesuren een da misst ergräife fir dat Schlëmmst u Konsequenzen ze verhënneren, stellt sech méi eng fundamental Fro.
    Wëlle mir iwwerhaapt an esou engem Staat liewen? Oder: Kann eist Land dat verkraaften? Déi Fro misst mol breet gestallt an debattéiert ginn, an da sollt et zu enger Décisioun kommen. An da misst des Décisioun derzou féieren, datt an alle Beräicher lo schonn op dat Zil hi geschafft géif.
    Wann z.B. Experten eis soen, datt mer guer net genuch Waasser hei am Land hunn, fir sou vill Leit, sollte mer da soen, bon da gi mer dat och nach bei eis Nopere sichen, oder sollt dat net éischter derzou féieren, datt mer eis Grenze fir de Wuesstem setzen? A misste mer dann net all eis Politiken, vun der Verkéiersplanung iwwer d’Reform vun de Sozialsystemer, de Schoulausbau bis zu de Promotiounsreese vum Wirtschaftsminister alleguer - an zwar elo schonn - sou ausriichten, datt se deene Wuesstemsgrenze Rechnung droen?
    Statt zukünfteg Entwécklunge passiv zur Kenntnis huelen, a se beschtefalls nach fir di eegen Zwecker notzen, léiwer d’Zukunft gestalten, an un der Definitioun, wéi di Zukunft ausgesi soll, d’Bevëlkerung bedeelegen: dat wier eng nohalteg Politik! Loosse mer hoffen, datt déi vum Nohaltegkeetsminister, allerdéngs réischt fir 2018, also mat Verspéidung, geplangten Aarbechtsgruppen e Wee an déi Richtung brénge wäerten.

    4 min
  • Carte Blanche Robert Weber, 21/04/2017
    Zanter dem Ufank vun der internationaler Finanzkris am Joer 2008 ass Muenches a Bewegung geroden. Di weltwäit Kris ass géigegesteiert ginn mat staatlechen Ennerstëtzungsprogrammen. Milliarden vun Gelder sinn aus der ëffentlecher Hand an Banken gefloss. Awer och fir di Realwirtschaft sinn Milliarden schwéier Investitiounsprogrammer lancéiert ginn. Fir dass all dat vill Geld net d’Inflatioun unheizt huet d’Europäesch Zentralbank - EZB – eng ganz Partie Moossnamen ergraff , dorënner och eng Niddreg-Zens Politik.
    Domat stellt virun allem di Realwirtschaft kräfteg incitéiert ginn fir real Investitiounen ze lancéieren an domat och Aarbechtsplazen ze schaffen. Esou guer de neien EU-Kommissiounspresident Jean-Claude Juncker ass mat engem Milliarden schwéieren Investitiounsprogramm gestart.
    Nach haut sinn d’Folgen vun der internationaler Finanzkris net ganz iwwerwonnen. Et sinn awer och am Laf vun den Joren Noriichten opgetaucht,déi méi transparent gemaach hunn wat an der internationaler Finanzwelt esou alles gedriwwe gouf. Banken hunn illegal Ofsproochen praktizéiert, illegal Geschäfter gemaacht, Verspekuléiert, Clienten bedruch, Steierhannerzéiung am grousse Stil praktizéiert, avm. Esou huet zB. Di Däitsch Bank wéinst Hypothekenbedruch an den USA méi wéi 7 Milliarden Dollar Strof missten bezuelen. Des Bank wär och matschëlleg un dem Ausléiser vun der internationaler Finanzkris. Awer si steet net eleng do.
    Hutt dir héieren op dowéinst jeemools een an de Prisong komm ass?
    Nach haut erweisen sech d’Kontrollen an der Finanzwelt als inefficace. Dat Ganzt ass aus dem Rudder geroden an keen traut sech hei d’Fangeren ze verbrennen.
    D’Politik huet opginn. Och verstinn d’Politiker dat ganzt Gebären an der Finanzwelt net méi, an déi di et verstinn, dat sinn d’Lobbyisten vun den Finanzjongleuren.
    Virun 2 Joren hunn d’Bankieen ugefaangen ze kräischen.
    Et gouf du Zéit vir eng nei Strategie ze lancéieren. Nodeems an deenen Joren zanter 2009 lues awer regelméisseg un den Kommisiounsgeschäfter gefréckelt gouf, ass d’Zéit elo komm fir en neien Zäitalter anzelauden.
    Salop a kuerz ausgedréckt: Zéit vun den Servicer an der Kontoféierung di näischt kaschten ass eriwwer!
    Geldophiewen kascht, alles wat net online gemaach gëtt kascht, esouguer Geldplazéieren kascht an um Spuerbuch gëtt et souwisou näischt.
    Di kostenlos Mentalitéit ass eriwwer, verkënnegen d’Bankieren!
    Dobäi gouf et des kostenlos Mentalitéit an de Banken souwisou ni!
    Ech liesen, dass de Wettbewerb ënnert de Banken ganz haart ass. Ech liesen awer och, dass wann et em Käschtenerhéigung fir de Client geet, dann sangen d’Bankieren aus engem Mond di schéinsten Arien.
    D’Politik vun der EZB gëtt also vun den Banken géigegesteiert op Käschten vum Bierger. Der EZB hir Politik ass vun hinnen ni richteg akzeptéiert ginn. A wat si net wëllen dat muss ewech!
    Si leen sech awer elo méi clever un: D’Gebüren fir de Client ginn drasteg erop gesat, di Null-Käschten Mentalitéit ass eriwwer, an d’Zënsen ginn deemnächst souwisou erop.
    Di Niddreg-Zens Politik geet hirem Enn zou !
    An wat seet d’Politik, wat soen d’Ministeren, den zoustännegen Finanzminister, den zoustännegen Konsumentenminister …………. Näischt!
    Ech fannen dem Konsumenteschutz seng Campagne géint dësen Unfug richteg.
    Ech hoffen, dass dir des Campagne all ënnerstëtzt!

    4 min
  • Carte Blanche, Jean Huss, 19/04/2017
    Léif Nolauschterinnen an Nolauschterer,
    E puer Deeg virun de franséische Présidentiellen an dono de franséische Legislativwahlen, a ronn 4 Méint virun den däitsche Bundestagswahle stécht d’Europäesch Unioun an enger déiwer, jo existenzieller Kris.
    Dës Wahle wäerten ouni Zweiwel mat decisiv dofir sinn, ob d’EU ëmmer méi zerfält oder ob et endlech zu engem positiven Neiufank ka kommen.
    D’Risiken an d’Menacë si bekannt:
    Mä et sinn net eleng nationalistesch a rietsextrem Bewegungen a populistesch an autoritär Politiker wéi Erogan oder Trump vu baussen, oder Orban, Kaszynski, Petry an Le Pen an der EU selwer. Grad esou negativ sinn och all déi Konservativ a liberal politesch Elitten zu Bréissel an an esou munchen nationale Regierungen.
    Trotz hirer total gescheiterter neoliberaler Politik wëllen des europäesch Elitten aus EU-Kommissioun, EZB, Troika an Eurogrupp weidermaache wéi bis elo, ouni Récksiicht op all déi demokratesch, sozial an ekologesch Schied, déi hir Politik bis haut schonn ugeriicht huet an déi Europa ganz geschwënn scho widdert d’Mauer wäerte fueren.
    Léif Nolauschterinnen a Nolauschterer
    Et ass kloer, dat weder e Réckfall an Nationalissem an national Grenzen nach en elitären Wieder-esou eng Léisung vun de Problemer kennen bidden.
    Déi néi proeuropäesch Geigebewegung „Pulse for Europe“, déi zanter kuerzem a villen europäesche Stied géint Nationalissem a fir Europa manifestéieren, ass dofir vun hirem Usaz hir ze begréissen.
    Fir d’EU awer wierklech efficace géint Rietsextremismus a Populismus kennen ze verteidegen, misst et dofir awer endlech zu déifgräifenden Ännerungen a Verbesserunge vun der bishereger Politik a vun de bestoenden europäeschen Traiteen kommen: éischtens ewech vum eesäiteg ultraliberalem Dogma vun onageschränkter Konkurrenz tëschent de Staaten, wou vun haaptsächlech dem Här Schäuble seng Politik an déi grouss däitsch Exportindustrië profitéieren. D’EU muss zweetens endlech och ewechkomme vun der onsozialer an
    onsolidarëscher Austeritéit a vu falscher Dereguléierungs- a Privatiséierungspolitik. An drëttens brauche mer dringend vill couragéiert Mesuren, fir am Interêt vun eise Kanner a Kandskanner eise Klima an Ëmwelt a Gesondheet kenne méi wierksam ze schützen.
    Léif Nolauschterinnen a Nolauschterer,
    Dës noutwendeg Verännerunge wäerten a Frankräich net vu Fillon, Le Pen oder Macron ausgoen an an Däitschland net vum Schäuble, Merkel an hire bayreschen Accolyten déi bei dëse Wahlen endlech all an d’PEnsioun geschéckt sollte ginn.
    En wierklechen Neiufank, eng besser europäesch Zukunft brauch dogéint dringend eng breet gesellschaftlech Bewegung an nei sozial an ökologesch orientéiert Politiker, déi wierklech fir den Dram vun engem demokratesch vereenten Europa astinn.
    ---------------------------------------------------------------------------------------
    Et huet geschwat de Jean Huss, Ex-Deputéiert vun déi gréng
    3 min
  • Carte Blanche Georges Hellinghausen, 14/04/2017

    Ouschtersymboler an Ouschterbräich – dozou eng Carte blanche vum Georges Hellinghausen.



    „Ouschtersymboler an Ouschterbräich“ heescht eng Rubrik an engem Stater Parblad, déi mech inspiréiert. Rieds geet ë. a. vun de Klacken a vum Klibberen. D’Klacke sinn zënter gëscht, Gréngendonneschdeg owend, verstommt an dat bis moar, Karsamschdeg owend. Well si eng festlech Stëmmung verbreeden, ass d’Gelauts an der Zäit vum Stierwen a vun der Grawesrou vu Christus – dat gëtt jo dëser Deegen kommemoréiert – net ubruecht. Ersat ginn d’Klacken duerch d’Klibbere vun de Klibberkanner.

    Schwätze misst ee vun den Ouschtereeër, Fruchtbarkeetssymbol, wat op déi reliéis Fruchtbarkeet hiweist, déi mat der Operstehung vu Christus an d’Liewe vum Mënsch antrëtt an him nei Perspektiven iwwert den Dout eraus opmécht. Well Ouschteren – iwwermuer – ass jo d’Fest vun der Operstehung, de Kär vum chrëschtleche Message.

    Dat Fest gëtt agelaut an der Ouschternuecht, Karsamschdeg Owend. Et geet un mat engem Feier, dat virun der Kierch geseent gëtt. Un dësem Feier gëtt d’Ouschterkäerz ugefaangen an an d’Kierch gedroen, begleed vum Ruff „Lumen Christi“. Feier, d’Liicht, dat d’Däischtert hell mécht, ass säit jehir e Symbol fir d’Liewen an domat de Mënschen helleg. D’chrëschtlech Traditioun bezitt et op de Jesus, dee vu sech seet: „Ech sinn d’Liicht vun der Welt.“ Déi Ouschterkäerz steet vun Ouschtere bis Päischten am Chouerraum vun all Kierch an erënnert déi Gleeweg un den Iwwergank vum Dout an d’éiwegt Liewen. Dono gëtt se an der Dafkapell opgestallt; d’Dafkäerz, déi en Neigedeeften no der Daf mat heem kritt, gëtt un der Ouschterkäerz ugefaang an dréckt dat gëttlecht Liewen aus, dat him an der Daf geschenkt gëtt. Déiselwecht Ouschterkäerz brennt bei Begriefnësmassen als Hoffnungszeeche fir d’Operstehung.

    Schéin a spriechend Riten a Symboler, déi an dësen Deegen gebraucht ginn! Innerweltleches geet iwwer dës Welt eraus, transzendéiert dës Welt a weist hin op Dimensiounen, déi net a Wierder oder a Biller ze faasse sinn. Oder méi poetesch, mam Goethe gesot: „Alles Vergängliche ist nur ein Gleichnis.“




    3 min
  • Carte Blanche, Patrick Michaely, 12/04/2017
    Ufangs Mee maachen déi nei Dauerausstellungen am ëmgedeefte Lëtzebuerg City Museum dem Public erëm hir Dieren op, e bëssi méi spéit – no bal zwee Joer Fermeture - dann och déi am ‘natur musée’. D’lescht Woch goufen d’Pläng fir de längst iwwerfällegen Ëmbau vum Resistenzmusée zu Esch der Ëffentlechkeet presentéiert. D’Institutioun Musée als wichtegen Acteur vun der Kultur ass erëm am Gespréich an dat ass och wichteg an dësen Zäite vun alternative facts, d’autant plus, datt an dësem Joer d’Thema vum Internationale Muséesdag den 18. Mä “Musées et histoires douloureuses : dire l’indicible dans les musées” heescht an domat déi wichteg Roll vun de Muséeë beliichte soll ginn, duerch d’Mediatioun an déi duergestallte Pluralitéit vu Points de vuën och traumatesch Erliefnësser aus der Mënschheetsgeschicht ze verschaffen.

    Mediatioun an Duerstellung fënnt hautdësdaags an de Muséeën an de meeschte Fäll am Kader vu publikumswierksamen Ausstellungen statt. Dobäi gëtt awer oft vergiess, datt dat eigentlech Réckgrad vun de Muséeën hir Sammlunge sinn. Ouni si géif et am Prinzip och keng Ausstellunge ginn, vu Fuerschung net mol ze schwätzen. Wëssenschaftlech curatéiert Sammlunge ginn allerdéngs net ëmmer esou wäertgeschätzt, wéi se dëst eigentlech verdéngt hätten. Grad naturhistoresch Kollektioune gerode sou an dëser Zäit vun enger profitorientéierter Technoscience, déi séier Resultater brauch, ëmmer méi ënner groussen Drock.

    Lescht trauregt Beispill an dëser Serie vun engem liichtfankegem Ëmgaang mat wäertvollem Patrimoine ass d’Sammlung vum naturhistoresche Musée vun der University of Louisiana an den USA, där hir Conservateure viru kuerzem vun der Universtéitsféierung nogeluecht kruten, a Rekordtempo – d’Ried war vun 48 Stonnen – eng nei Plaz fir hir Sammlung ze fannen, fir esou endlech Plaz fir nei Traininsméiglechkeete fir d’Liichtathletiksequipe vun der Uni ze fannen. Ëmmerhin handelt et sech ëm 6 Millioune Specimenen, virun allem eng impressionant an eenzegaarteg Sammlung vu Fësch a Planzen.

    Fësch, wat ass dann dorunner eenzegaarteg?, denkt Dir Iech elo vläicht. Verdréchent Planzen? Dat bréngt jo jidweree fäerdeg. Wäit gefeelt!

    Naturfuerscher liewen, schaffen an denken an der Géigewaart. Si identifizéiere Problemer a bedreiwe Feldfuerschung, fir Léisunge fir d’Zukunft ze fannen. Problemer ginn doduerch geléist, datt gewëss repetitiv Musteren iwwer e puer Saisonen um Terrain detektéiert konnte ginn, e Schnappschoss an der Zäit souzesoen.

    Mä heiansdo mussen och Vergläicher tëscht heitegen Ëmweltbedingungen an deene kënne gemaach ginn, déi viru Jorzéngten, Jorhonnerten, oder souguer Jormilliounen existéiert hunn. Dat wat am Raum doduerch méiglech ass, datt ee sech vun enger Plaz op déi aner beweegt, geet an dësem Fall ouni eng Zäitmaschinn nëmme ganz schlecht.

    Glécklecherweis hu mir esou Zäitmaschinnen: Muséessammlungen nämlech. Zënter eng Rei vu Jorhonnerten hunn Naturfuerscher d’Kontinenter duerchlaf, Fauna, Flora, Steng a Fossilien beschriwwen a gesammelt. Dës Specimene sinn duerno katalogiséiert ginn a ginn zënterhir an enger Onzuel vun naturhistoresche Sammlunge ueschter d’Welt conservéiert. Si si souzesoen onst Gediechtnes vun der Natur an eng onendlech Informatiounsquell iwwer d’Biodiversitéit am Laf vun der Zäit. Vun där sollen och nach déi zukünfteg Generatioune profitéieren däerfen, fir d’Geschicht vun der Natur an domadder och hir eege besser verstoen ze kënnen.



    4 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners