Spegillinn 7.febrúar 2022

Umsjón: Kristján Sigurjónsson

Tæknimaður: Magnús Þorsteinn Magnússon

Vetrarfærð er um land allt eftir óveður næturinnar og morgunsins. Spáð er leiðindaveðri næsta sólarhringinn. Rafmagnsleysi var víða á Suðurlandi í dag,

Fjármálaráðherra segir að stilla verði stjórntækin vel svo vaxandi verðbólga verði skammtímavandamál en fylgi þjóðinni ekki inní lengri framtíð.

Icelandair sagði í dag upp lánalínu hjá Íslandsbanka og Landsbanka sem gaf fyrirtækinu færi á að taka allt að 120 milljón dollara lán þar sem ríkið ábyrgðist 90%.

Undirbúningur við að ná upp líkum mannanna fjögurra sem fórust í flugslysinu í Þingvallavatni er langt kominn.

Forseti Rússlands fagnar viðleitni Frakka til að leysa Úkraínudeiluna með friðsömum hætti. Þjóðarleiðtogar hafa hist víða um heim í dag til að ræða stöðuna í landinu.

Lengri umfjöllun:

Áform borgaryfirvalda um landfyllingu í Grófavík í Skerjafirði, í öðrum áfanga nýrrar byggðar þar, hafa fallið í grýttan jarðveg hjá mörgum sem sent hafa inn umsagnir í skipulagsferli málsins. Til stendur að byggja í svokallaðri Gróf, svæði á milli suðurenda Reykjavíkurflugvallar og eystri enda núverandi byggðar í Skerjafirði, allt að 1300 íbúðir. Í frummatsskýrslu sem verkfræðistofan Efla gerði fyrir Reykjavíkurborg kemur fram að framkvæmdin hefði talsverð neikvæð áhrif á fuglalíf og verndarsvæði og verulega neikvæð áhrif á gróður, strand- og sjávarlífríki. Til mótvægis þessu er ætlunin að móta strandlengju landfyllingarinnar þannig að hún líki eftir náttúrlegri strönd til að auka líkur á að þar myndist leirur á ný. Ólafur K. Níelssen, formaður Fuglaverndar og Jóhann Óli Hilmarsson, fyrrverandi formaður félagsins gagnrýna þessar hugmyndir harðlega í grein sem þeir skrifuðu í Kjarnann um helgina. Kristján Sigurjónsson ræðir nánar við Ólaf um gagnrýni þeirra félaga.

Nú eru 15 ár liðin frá að upp komst um illa meðferð á drengjum í Breiðavík á síðari hluta seinustu aldar. Drengirnir urðu fyrir andlegu, líkamlegu og kynferðislegu ofbeldi, bæði frá eldri drengjum sem dvöldu þar og starfsmönnum heimilisins. Í Breiðavík voru um 130 drengir sendir í vist fyrir slæma hegðun og árið 2007 stigu nokkrir þeirra fram og sögðu frá meðferðinni sem þeir máttu sæta mörgum árum fyrr. Þeirra á meðal var Bárður R. Jónsson sem sagði sögu sögu sína í viðtali við Margréti Marteinsdóttur í Kastljósi árið 2007. Bjarni Rúnarsson ræðir að nýju við Bárð um hvernig tekið hefur verið á þessum málum síðan.

Spegillinn 4. febrúar 2022

Umsjón: Bjarni Rúnarsson og Bogi Ágústsson

Tæknimaður: Magnús Þorsteinn Magnússon

Enn hefur ekkert spurst til flugvélar sem saknað hefur verið frá því um hádegi í gær. Fjöldi fólks kemur að leitinni, frá Landhelgisgæslu, lögreglu og björgunarsveitum.

Einangrun verður stytt úr sjö dögum í fimm, frá og með mánudegi. Heilbrigðisráðherra er bjartsýnn á að slakað verði töluvert á sóttvarnaraðgerðum í næstu viku.

Hluti sýna sem tekin eru í skimunum fyrir leghálskrabbameini verða áfram send til Danmerkur til greiningar. Landspítali hóf greiningar í byrjun mánaðarins og gerir þær allar frá næstu áramótum.

Danska stjórnin hefur markað nýja fjölmiðlastefnu og rætt verður um hana við við Elfu Ýr Gylfadóttur, framkvæmdastjóra Fjölmiðlanefndar, og Sigríði Dögg Auðunsdóttur, formann Blaðamannafélags Íslands.

Rúmlega helmingur ungmenna á framhaldsskólaaldri hefur verið beðinn um að senda af sér nektarmyndir. Stærstum hluta ungmenna sem fá slíkar beiðnir finnst það ekki mikið tiltökumál. Yfirleitt koma óskir um nektarmyndir af ungmennum frá ókunnugum.

Lengri umfjöllun:

Ane Halsboe-Jørgensen, menningarmálaráðherra, sagði í gær að það væri löng hefð í Danmörku fyrir öflugum fjölmiðlum sem gegndu þýðingarmiklu lýðræðishlutverki. Þeir veittu valdhöfum aðhald og gerðu borgurunum kleift að taka þátt í lýðræðislegri umræðu.Bogi Ágústsson ræddi við Elfu Ýr Gylfadóttur, framkvæmdastjóra Fjölmiðlanefndar, og Sigríði Dögg Auðunsdóttur, formann Blaðamannafélags Íslands.

Rúmlega helmingur ungmenna á framhaldsskólaaldri hefur verið beðinn um að senda af sér nektarmyndir og 40 prósent barna í 8.-10. bekk. Algengast er að slíkar beiðnir komi frá ókunnugum einstaklingum á netinu. Líklegra er að stúlkur fái beiðnir um slíkar myndsendingar en drengir. Tæplega 7 af hverjum 10 stelpum sem hafa fengið beiðni um nektarmynd sögðu hana hafa komið frá ókunnugum á netinu, samanborið við 3 af hverjum 10 strákanna. Þetta er meðal þess sem kemur fram í nýrri könnun sem Menntavísindastofnun gerði fyrir Fjölmiðlanefnd. Bjarni Rúnarsson ræddi við Skúla Braga Geirdal, verkefnastjóra Fjölmiðlanefndar.

Spegillinn 3. febrúar 2022

Umsjónarmaður: Bjarni Rúnarsson

Tæknimaður: Magnús Þorsteinn Magnússon

Umfangsmikil leit hefur staðið í allan dag á Suðurlandi að flugvél sem ekkert hefur spurst til frá því um hádegisbil. Tvær þyrlur Landhelgisgæslunnar, flugvél frá danska hernum og rúmlega 300 manns á jörðu niðri taka þátt í leitinni. Leitinni er beint að svæðinu sunnan við Þingvallavatn.

Stjórnmál á Norður-Írlandi eru í upplausn. Eftir afsögn fyrsta ráðherra er stjórn landshlutans lömuð.

Fjöldi starfsmanna Eflingar greindi frá einelti og kynbundinni áreitni af hálfu stjórnenda í vinnustaðagreiningu. Fyrrverandi stjórnendur Eflingar segja ásaknirnar með öllu ósannar.

Þóra Kristín Ásgeirsdóttir hefur dregið framboð sitt til formanns SÁÁ og setu í framkvæmdastjórn til baka.

Útgerðir loðnuskipa hafa gert hlé á veiðum, en nýjustu mælingar Hafrannsóknastofnunar gætu leitt til verulegrar lækkunar á útgefnum loðnukvóta.

Lengri umfjöllun

Ýmislegt bendir til þess að útbreiðsla kórónuveirunnar sé mun meiri hér á landi en áður var talið. Fyrstu niðurstöður rannsóknar Íslenskrar erfðagreiningar og sóttvarnalæknis benda til að um tuttugu prósent landsmanna, yngri en 50 ára, hafi sýkst af kórónuveirunni. Þetta var staðan um áramótin. Þetta eru rúmlega helmingi fleiri en hafa greinst með kórónuveiruna á PCR-prófi og er opinber smittala. Mótefni var mælt hjá tæplega 1.900 manns um allt land á aldrinum 20-90 ára. Mótefni mældist frekar hjá yngra fólki en eldra. Með sömu útreikningum, og að því gefnu að um 1.500 smitist á hverjum degi, má ætla að um 80% landsmanna verði komin með gott ónæmi gegn COVID-19 síðari hluta marsmánaðar. Arnar Björnsson fréttamaður ræddi í dag við Kára Stefánsson, forstjóra Íslenskrar erfðagreiningar.

Óvissa er enn á ný um framtíð Brexit-samnings Breta og Evrópusambandsins vegna deilna um framkvæmd ákvæða um Norður-Írland. Óvæntar yfirlýsingar ráðherra sambandssinna í stjórninni í Belfast í gærkvöld ollu uppnámi og síðdegis sagði Paul Given, fyrsti ráðherra Norður-Írlands af sér. Bogi Ágústsson fjallaði um málið.

Spegillinn 2. febrúar 2022

Umsjónarmaður: Bjarni Rúnarsson

Tæknimaður Magnús Þorsteinn Magnússon

Heilbrigðisráðherra hefur ákveðið í samráði við sóttvarnalækni að afnema eins metra regluna á sitjandi viðburðum eins og í leikhúsum og á tónleikum

Maður sem sakaður er um að hafa banað Daníel Eiríkssyni af gáleysi við Vindakór í Kópavogi í fyrra, hélt fram sakleysi sínu í Héraðsdómi Reykjaness í dag. Þetta hafi verið slys. Hann segir andlátið hafa verið slys.

Miklu fleiri skiptu um raforkusala í janúar en í nokkrum öðrum mánuði í fyrra. Skiptin koma í kjölfar umfjöllunar um að N1 hafi selt þrautavararafmagn mun dýrara en auglýst var.

Yfirlögregluþjónn hjá lögreglunni á höfuðborgarsvæðinu segir að vinna hafi verið lögð í að þjálfa starfsmenn til að taka skýrslur af þolendum kynferðisbrota og þekkingar í þeim efnum hafi verið leitað víða. Embættið sé ágætlega í stakk búið til rannsókna þessara mála, en fjölga megi starfsmönnum og bæta tækjabúnað.

Lengri umfjöllun:

Grímur Grímsson yfirlögregluþjónn hjá lögreglunni á höfuðborgarsvæðinu telur embættið ágætlega í stakk búið til að rannsaka kynferðisbrotamál þó fjölga megi þar fólki sem og tækjum og búnaði. Hann gerir sér vonir um að úr því verði bætt. Þá hafi mikil þjálfun farið fram í skýrslutöku yfir þolendum. Haukur Holm ræddi við Grím.

Boris Johnson forsætisráðherra Bretlands er kominn aftur heim til Lundúna af fundi sínum með Volodymyr Zelensky forsætisráðherra Úkraínu um Úkraínudeiluna. Johnson fékk ekki sérlega blíðar viðtökur við heimkomuna. Í dag var enn á ný herjað á hann í fyrirspurnatíma í þinginu vegna veisluhalda í Downingstræti 10. Partygate-málið, sem svo er kallað, heldur áfram að gera forsætisráðherranum lífið leitt. Bjarni Rúnarsson fjallar um fyrirspurnatímann.

Gleraugu eru góð fyrir þá sem sjá illa. En eru þau líka smitvörn? Í Noregi er nú hafin tilraun með þátttöku almennings til að skera úr um hvort veiran alræmda, sem veldur öllu kófinu, forðist gleraugu. Gísli Kristjánsson fjallar um málið

Spegillinn 1.febrúar 2022

Umsjón: Kristján Sigurjónsson

Tæknimaður: Jón Þór Helgason

Ekki er hægt að treysta því að fá niðurstöður úr PCR-prófi samdægurs vegna mikils álags á sýkla- og veirufræðideild Landspítalans.

Runólfur Pálsson, varaforseti læknadeildar Háskóla Íslands og einn af yfirlæknum COVID-göngudeildarinnar, hefur verið skipaður forstjóri Landspítalans

Umboðsmaður Alþingis hefur sent tveimur ráðherrum erindi þar sem óskað er eftir útskýringum á skipun og setningu tveggja ráðuneytisstjóra í lok janúar

Tíu rússneskum fjölmiðlum, hið minnsta, hefur verið gert að fjarlægja allt efni um spillingu ráðamanna í Rússlandi sem skrifað er af stjórnarandstæðingnum Alexei Navalny og samherjum hans

Það er ekki sjálfgefið að íslenskan lifi, segir Eiríkur Rögnvaldsson, prófessor emeritus í íslenskri málfræði. Ný rannsókn sýnir að stór hluti af málumhverfi barna á Íslandi er enskt.

Bæjarráð Ísafjarðar segir ekki ásættanlegt að Vestfirðingar þurfi nú að kynda húsnæði sitt með orku sem fæst með brennslu dísilolíu. Bæjarstjórinn vill skoða virkjun í Vatnsfirði til lausnar vandanum.

Lengri umfjöllun:

Verðbólgudraugurinn er kominn á stjá eftir að hafa haldið sig til hlés um nokkuð langt skeið. Verðbólgan hefur ekki verið meiri hér á landi í tíu ár. Heimsmarkaðsverð á hrávöru hefur hækkað umtalsvert á tímum heimsfaraldurs og það smitast inn í kerfið hér á landi. . Peningastefnunefnd Seðlabankans kemur saman í næstu viku og ákveður hvort stýrivöxtum bankans verður breytt. Vísitala neysluverðs hefur hækkað um 5,7 prósent frá því í janúar í fyrra. Verðhækkanir á fasteignamarkaði vega þungt í verðbólgunni, en líka hækkanir á bensíni, rafmagni og matvöru. Bjarni Rúnarsson ræðir við þau Guðrúnu Hafsteinsdóttur, þingmaður Sjálfstæðisflokksins og formaður efnahags og viðskiptanefndar Alþingis, og Breka Karlsson, formann Neytendasamtakanna.

Eitt ár er í dag liðið frá því að herinn rændi völdum í Mjanmar. Þingkosningar voru haldnar í landinu rúmlega tveimur mánuðum fyrr í nóvember 2020 þar sem flokkur Aung San Suu Kyi vann yfirburðasigur. Nýkjörið þing átti að koma fyrst saman 1. febrúar fyrir ári, en nokkrum klukkustundum áður tók herinn í taumana og rændi völdum. Þingfundur var aldrei settur og herstjórnin situr sem fastast. Kristján Sigurjónsson segir frá ástandinu í Mjanmar.

Spegillinn 31.janúar 2022

Umsjón: Kristján Sigurjónsson

Tæknimaður: Mark Eldred

Fjármálaráðherra segist hafa áhyggjur af vaxandi verðbólgu, en ekki sé auðséð til hvaða ráða sé hægt að grípa. Staðan kalli hins vegar á viðbrögð.

Bólusetning 5 til 11 ára gamalla barna nýtur stuðnings mikils meirihluta landsmanna.

Herforingjastjórnin í Mjanmar ákærði í dag Aung San Suu Kyi, fyrrverandi leiðtoga landsins, fyrir kosningasvik.

Búnaður í nýrri skólphreinsistöð á Akureyri kom í veg fyrir að tæplega 20 tonn af rusli sem sturtað var niður í klósettum á Akureyri endaði í Eyjafirði.

Yfir 30 eftirlegukindur, sem leitað hefur verið að á Norður- og Austurlandi síðan í haust, skiluðu sér af fjalli í síðustu viku og um helgina.

Helmingur ráðherra ríkisstjórnarinnar ber annað starfsheiti í lok dags heldur en þegar þeir vöknuðu í morgun. Ný nöfn ráðuneyta eftir uppskiptingu stjórnarráðsins voru staðfest með forsetaúrskurði í dag.

Lengri umfjöllun:

Skipulags- og húsnæðismál eru meðal stóru verkefna sveitarfélaganna og þar eru líka stórir snertifletir við ríkið. Sigurður Ingi Jóhannsson innviðaráðherra segir gott að þessi mál séu nú í einu og sama ráðuneytinu. Hann telur að sé ágreiningur milli sveitarfélaga um framkvæmdir á borð við byggðalínur eða veglagningu væri heppilegra að til væri svæðisskipulag sem þau yrðu þá að laga sig að. Anna Kristín Jónsdóttir ræðir við Sigurð Inga.

Þess var minnst á Norður Írlandi í gær að 50 ár voru liðin frá Blóðuga sunnudeginum í borginni Derry eða Londonderry. Fjallað var ítarlega um blóðuga sunnudaginn í tveimur útvarpsþáttum Gunnars Hanssonar og Sólveigar Jónsdóttur á Rás 1 um helgina . Þau fóru til Derry fyrr í þessum mánuði og ræddu meðal annars við fólk sem tók þátt í göngunni og varð vitni að drápunum. Sólveig er stjórnmálafræðingur frá Edinborgarháskóla í Skotlandi og kynnti sér vel málefni Norður Írlands í námi sínu. Kristján Sigurjónsson talar við Sólveigu um ástandið á N-Írlandi í dag og framtíðarhorfur.

Mark úr vítakasti eftir að venjulegur leiktími var liðinn tryggði Svíum eins marks sigur á Spánverjum, 27-26, í úrslitaleik Evrópumótsins í gær. En handbolti er langt frá því að vera einn um hituna þegar íþróttir eru annars vegar í Svíþjóð. Kári Gylfason segir frá.

Spegillinn 28. janúar 2022

Umsjónarmaður: Bjarni Rúnarsson

Tæknimaður: Mark Eldred

Aðgerðapakki ríkisstjórnarinnar dugar skammt, segir veitingamaður sem horfir fram á þriðju mánaðamótin í röð án greiðslu frá ríkinu. Hann segir að janúarmánuður sé sá versti í manna minnum.

Ísland hafnar í sjötta sæti á EM í handbolta eftir grátlegt tap gegn Norðmönnum í dag.

Vladimír Pútín, forseti Rússlands, sakar vesturveldin um að hafa að engu áhyggjur Rússa af útþenslu Atlantshafsbandalagsins í Evrópu og stöðu Úkraínu.

Hvassviðri gengur yfir stóran hluta landsins í kvöld og nótt. Gul viðvörun tekur gildi þegar líður á kvöldið.

Lengri umfjöllun:

Afléttingaáætlun stjórnvalda var kynnt í dag. Hún er þríþrepa og verður fyrsta skrefið stigið á miðnætti. Þá mega 50 manns koma saman í stað 10, tveggja metra reglan verður að metersreglu og áhorfendur verða til að mynda leyfðir á íþróttaviðburðum. Opnunartími veitingastaða rýmkar til klukkan ellefu. Eftir þrjár vikur er svo stefnt að því að rýmka almennar samkomutakmarkanir í 200 manns og aflétta öllum takmörkunum um miðjan mars.

Líneik Anna Sævarsdóttir formaður velferðarnefndar og þingmaður Framsóknarflokksins og Oddný G. Harðardóttir fyrsti varaformaður velferðarnefndar og þingmaður Samfylkingarinnar ræddu við Bjarna Rúnarsson um afléttingaáætlunina.

Íþróttahatur er bakhliðin á hverjum verðlaunapeningi. Stundum vilja menn láta þetta hatur ganga út yfir bæði fortíðina og allar minjar um hana. Þannig er Christian den tiende Danakonungur nú hataðasti maður á Íslandi. En hvernig fer svona íþróttahatur í sálina á frændum okkar Norðmönnum? Þeir sitja uppi með sænskan kóng á hesti fyrir framan konungshöllina sína og kenna frægustu götu lands síns við þennan sama útlenda kóng. Er ekki mál að linni? Gísli Kristjánsson fjallar um málið.

Á sunnudag eru 50 ár liðin frá því að breski herinn skaut 13 kaþólikka til bana og særða aðra 13 skotsárum í mótmælagöngu í borginni Derry á Norður Írlandi. Þessi atburður markaði þáttaskil í ófriðnum a Norður Írlandi - The Troubles - Átökin hörðnuðu og ofbeldið jóxt um allan helming allt þar til friðarsamkomulag var undirritað í apríl 1998, 26 árum síðar. Gunnar Hansson dagskrárgerðarmaður á RÚV og Sólveig Jónsdóttir rithöfundur og stjórnmálafræðingur heimsóttu Derry fyrr í mánuðinum og ræddu við fólk sem varð vitni að þessum atburði - blóðuga sunnudeginum. Afrakstur þessarar ferðar má heyra í tveimur klukkustundar löngum útvarpsþáttum á rás eitt. Kristján Sigurjónsson ræddi við Gunnar Hansson.

Umsjón: Anna Kristín Jónsdóttir. Tæknimaður: Mark Eldred.

Sigríður Dóra Magnúsdóttir, umdæmislæknir sóttvarna á höfuðborgarsvæðinu býst við holskeflu kórónuveirusmita á næstunni en ekki holskeflu alvarlegra veikinda.

Aðalmeðferð hefst á morgun í máli tveggja barna Sævars Marínós Ciecielski þar sem þau krefjast þess að ríkið verði dæmt til að greiða þeim milljarð í bætur. Þau segja að ekki fyrirfinnist jafn alvarleg brot opinbers valds á réttindum sakborninga og í máli föður þeirra.Freyr Gígja Gunnarsson sagði frá.

Lundúnalögreglan hefur enn ekki yfirheyrt Boris Johnson forsætisráðherra vegna rannsóknar á ýmsum veislum í Downingstræti 10 meðan strangar samkomutakmarkanir voru í gildi á Englandi. Ásgeir Tómasson tók saman.

Theódóra S. Þorsteinsdóttir, bæjarfulltrúi Viðreisnar í Kópavogi leggur til að undirbúningur deiliskipulags á nýrri íbúabyggð í Vatnsendahlíð verði hafinn þegar í stað, meðal annars til að mæta skorti á húsnæðismarkaði. Þórgnýr Einar Albertsson talaði við hana.

Sveitarstjórn Norðurþings hefur samþykkt að hefja formlegar viðræður við fyrirtækið Green fuel ehf um lóð á Bakka undir vetnis- og ammóníaksframleiðsluver á Bakka. Kristján Þór Magnússon sveitarstjóri er bjartsýnn á frekari uppbyggingu, Óðinn Svan Óðinsson ræddi við hann.

Ásmundur Friðriksson þingmaður Sjálfstæðisflokksins í Suðurkjördæmi hefur fengið fjölmargar áskoranir um að gefa kost á sér til að leiða lista Sjálfstæðisflokksins í Rangárþingi ytra í sveitarstjórnarkosningum í vor. Jóhanna Vigdís Hjaltadóttir sagði frá.

----------

Orkuskortur hér á landi er yfirvofandi og grípa þarf til olíubrennslu til að framleiða rafmagn. Landsnet telur að eftirspurn haldi áfram að vaxa umfram framboð á næstu árum. Þetta kemur fram í nýrri skýrslu Landsnets um horfur í raforkumálum á næstu fimm árum. Bjarni Rúnarsson ræddi við Gný Guðmundsson, yfirmann greiningar og áætlana hjá Landsneti.

Stækkun og þar með fækkun sveitarfélaga er nokkuð sem unnið hefur verið að og vilji til af ríkisins hálfu um árabil undir merkjum þess að efla sveitarstjórnarstigið. Sveitarfélögin eru nú rétt tæplega 70 og á næstunni verður kosið um sameiningu víða um land. Málefni sveitarfélaganna eru á borði Sigurðar Inga Jóhannssonar innviðaráðherra. Anna Kristín Jónsdóttir ræddi við hann.

Spegillinn 26. janúar 2022

Umsjón: Bjarni Rúnarsson

Tæknimaður: Mark Eldred

Stjórn útsendingar frétta: Valgerður Þorsteinsdóttir.

Sóttvarnalæknir segir hægt að sleppa veirunni lausri því afleiðingar smita séu miklu minni en áður. Forstjóri Íslenskrar erfðagreiningar segir áhættu tekna, en ávinningurinn verði þess virði.

Hingað og ekki lengra, meirihluti og minnihluti verða að taka höndum saman og tryggja 350 þúsund króna laun skatta- og skerðingarlaus. Þetta sagði Tómas A. Tómasson á Alþingi síðdegis í umræðu um tillögu Flokks fólksins .

Handboltalandsliðið vann stórsigur á Svartfellingum í dag og liggur nú á bæn um að Danir vinni Frakka í kvöld svo liðið komist í undanúrslit.

Þingmenn á ítalska þinginu hafa enn ekki komið sér saman um hver verði næsti forseti landsins. Þriðja atkvæðagreiðslan fór fram í dag. Fjórir af hverjum tíu skiluðu auðu.

Lengri umfjöllun:

Á miðnætti tóku gildi nýjar reglur um sóttkví. Nú þurfa eingöngu þeir sem eru útsettir á heimili sínu að fara í sóttkví. Sem fyrr varir sóttkví í fimm daga og PCR-próf þarf til að losna. Þríbólusettir fara hins vegar eingöngu í smitgát sem lýkur með PCR-prófi á fimmta degi.

Hins vegar þurfa þeir sem eru útsettir fyrir smiti utan heimilis ekki að fara sóttkví heldur að viðhafa smitgát. Ekki er þörf á sýnatöku lengur til að losna úr smitgát og börn á leik- og grunnskólaaldri eru undanþegin smitgát nema smit sé inni á heimili. Bjarni Rúnarsson ræddi við Magnús Gottfreðsson, lækni og prófessor í smitsjúkdómum.

Um fjórðungur þeirra sem hefja nám í íslenskum framhaldsskólum hefur ekki lokið því fjórum árum síðar. Brotthvarf hér er nokkuð mikið í alþjóðlegu samhengi segir Helgi Eiríkur Eyjólfsson, annar höfunda nýrrar skýrslu þar sem efnahagslegur og félagslegur bakgrunnur þeirra sem hverfa frá námi er kannaður og brotthvarfið talið sýna ójöfn tækifæri fólks. Nú er það svo að nærri allir skrá sig í framhaldsskóla eftir grunnskólann. Anna Kristín Jónsdóttir ræddi við Helga og Kolbein Stefánsson

Mjög er umdeilt hvort Norðmenn hafi gert rétt í að bjóða fulltrúum Talibana frá Afganistan viðræðna í Osló. Er þetta viðurkenning á stjórn ofbeldismanna? Er þessum mönnum treystandi? Núna eru þeir farnir heim tómhentir en á kostnað norska ríkisins ? en reikna má með framhaldi á viðræðum. Gísli Kristjánsson fjallar um heimsókn Talibana.