Spegillinn 15.4 2021

Umsjónarmaður: Bergljót Baldursdóttir

Stjórnvöld í Noregi ætla að bíða með að taka ákvörðun um notkun á bóluefni Astrazeneca. Norska lýðheilsustofnunin vill að bóluefnið verði tekið úr umferð.

Embætti ríkissaksóknara hefur ákveðið að hækka ekki sektir fyrir brot á sóttkví. Ríkissaksóknari telur að sú heimild sóttvarnalæknis að skikka fólk sem rýfur sóttkví til að ljúka henni í sóttvarnarhúsi hafi mun meiri fælingarmátt en hækkun sekta.

Sjúkratryggingar Íslands hafa samið við Heilsuvernd um yfirtöku á rekstri Öldrunarheimila Akureyrar. Bæjarstjórinn fagnar samningnum en reksturinn kostaði Akureyrarbæ 400 miljónir króna á síðasta ári. Rætt við Ásthildi Sturludóttur, bæjarstjóra á Akureyri

Fjármálaeftirlitið hefur óskað eftir gögnum frá fyrirtækinu sem sendi innheimtukröfur á fólk vegna smálána. Neytendastofa hefur málið einnig til skoðunar. Fyrirtækið ætlar að breyta kröfunum þannig að þær endurspegli einungis höfuðstól lánanna.

Skoða þarf hvort vistun kvenna og karla saman í opnum fangelsum taki nægjanlegt mið af öryggi og þörfum kvenna. Þetta kemur fram í skýrslu setts umboðsmanns Alþingis.

Lengra efni:

Stefnt að því að leggja rafmagn upp að gosinu í Geldingadölum og í dag var byrjað að bera möl í stíginn að gosstöðvunum. Þá verða ráðnir landverðir eða starfsmenn til að taka við af björgunarsveitarmönnum. Arnar Páll Hauksson ræddi við Fannar Jónasson, bæjarstjora í Grindavík og Ólaf Jónsson, sviðssstjóra hjá Umhverfisstofnun

Aukin eftirspurn eftir vörum og þjónustu og hagstætt vaxtaumhverfi ætti að auka svigrúm fyrirtækja til að lækka verð segir, Auður Alfa Ólafsdóttir, verkefnisstjóri verðlagseftirlits ASÍ. Róbert Farestveit, sviðstjóri og hagfræðingur ASÍ telur að vaxtahækkanir séu ekki heppilegar til að halda aftur af verðbólgu. Bergljót Baldursdóttir ræddi við Auði og Róbert um verðhækkanir og verðbólgu.

Í janúar 2018 heimsótti Emmanuel Macron Frakklandsforseti Theresu May þáverandi forsætisráðherra til að ræða erfitt mál, flóttamannamálin. En Macron kom einnig færandi hendi: boð um að árið 2022 myndu Frakkar lána Bretum Bayeux-refilinn, eina mestu þjóðargersemi Frakka. Nú er tvísýnt hvort úr því verði og aðstæður reyndar aðrar en þegar boðið kom. Sigrún Davíðsdóttir sagði frá

Spegillinn 14.4.2021

Umsjónarmaður: Bergljót Baldursdóttir

Heilbrigðisyfirvöld í Danmörku segja að góð staða á faraldrinum innanlands sé ein ástæða þess að ákveðið var að hætta að nota bóluefni Astrazeneca. Sú staðreynd að önnur bóluefni séu í boði hafi einnig áhrif.

Þórólfur Guðnason, sóttvarnalæknir telur líklegt að þeir sem fengið hafi fyrri bólusetningu með Astra Zeneca og eru í áhættuhópi fái seinni skammtinn með öðru efni. Hann gerir sér vonir um að búið verði að bólusetja vel yfir 200 þúsund manns í júní eða júlí.

Stefnt er að því að flugfélagið Play hefji áætlunarflug í lok júní. Stjórnendur munu kynna fyrirætlanir sínar á næstu dögum en félagið hefur tryggt sér ríflega fimm milljarða króna.

Lengra efni:

Rúna Hauksdóttir Hvannnberg, forstjóri Lyfjastofnunar segir að ákvörðun Dana um að hætta að nota AstraZeneca byggi á því að önnur bóluefni séu í boði. Danir hafi þegar notað nokkuð mikið af AstraZeneca og þjóðir horfi einnig til þess hve langt þær eru komnar í að bólusetja vissa aldurshópa. Bergljót Baldursdóttir ræddi við Rúnu

Vonir standa til að Ísland taki þátt í tilraunaverkefni í næsta mánuði með að nota samræmt covid-bólusetningarvottorð á Evrópska efnahagssvæðinu. Ingi Steinar Ingason, sviðsstjóri hjá Landlækni segir að ekki séu dæmi um að framvísað hafi verið fölsuðum vottorðum á landamærunum. Stefnt er að því að samræmdu vottorðin verði komin í almenna notkun í seinni hluta júní. Arnar Páll Hauksson ræddi við Inga Steinar

Alþjóðagjaldeyrissjóðurinn telur að horfurnar í efnahagsmálum heimsins séu nú betri en þegar hann sendi frá sér álit í október. Bólusetning og opinber stuðningur við fólk og fyrirtæki hefur breytt skoðunum sjóðsins. Sigrún Davíðsdóttir sagði frá

Spegillinn 13 apríl 2021

Umsjón: Kristján Sigurjónsson

Tæknimaður: Mark Eldred

Ekki verður byrjað að nota bóluefnið frá lyfjaframleiðandanum Janssen fyrr en niðurstaða liggur fyrir hjá Lyfjastofnun Evrópu um hvort einhver tengsl séu milli bóluefnisins og blóðtappa

Bandaríkjaforseti, hvatti Rússa í dag til að minnka spennu við landamæri Rússlands að Úkraínu. Biden ræddi við Vladimír Pútín, Rússlandsforseta og lagði til að þeir myndu hittast á fundi á næstunni.

Hægt er að minnka svifryksmengun um allt að 40% með því að draga úr hraða bifreiða. Þetta er niðurstaða nýrrar íslenskrar rannsóknar.

Vegagerðin heggur nú leið í gegnum birkið í Teigsskógi í Gufudalssveit, þar sem nýr Vestfjarðavegur á að liggja. Það er gert til þess að leita af sér allan grun um þar leynist fornleifar.

Kvennalandslið Íslands og Ítalíu í fótbolta skildu jöfn í vináttulandsleik ytra í dag.

Lengri umfjöllun:

Joe Biden hefur nú setið 83 daga í embætti forseta Bandaríkjanna. Hvernig hefur honum farnast í embætti það sem af er? Hvernig hefur honum tekist að kljást við Covid faraldurinn, flóttamannastraum frá Mexíkó og ekki síst óróa á milli kynþátta í miðjum réttarhöldum í Minneapolis vegna drápsins á George Floyd. Kristján Sigurjónsson talar við Silju Báru Ómarsdóttur prófessor í stjórnmálafræði við HÍ.

Í fyrra fluttu ríflega 2.000 fleiri til Íslands en frá landinu; 540 fleiri íslenskir ríkisborgarar fluttu heim en að heiman og 1.540 fleiri erlendir ríkisborgarar settust hér að en fóru frá landinu. Rétt er að taka fram að Hagstofan hefur ekki tekið saman heildarfjölda flutninga til og frá landinu í fyrra, það verður gert eftir mánuð eða svo. Þessir útreikningar eru byggðir á ársfjórðungstölum Hagstofunnar og ættu að gefa nokkuð góða mynd. Ólöf Garðarsdóttir, prófessor í sagnfræði og forseti hugvísindasviðs Háskóla Íslands, hefur lengi skoðað fólksflutninga. Ólöf skoðaði að beiðni Spegilsins fólksflutninga á hinu óvenjulega ári 2020 og bar saman þrjá ársfjórðunga af fjórum við sömu ársfjórðunga önnur ár. Ólöf bendir á að Íslendingar séu gjarnari á að flytja á milli landa en margar grannþjóðir og nánast enginn munur sé á konum og körlum. Ragnhildur Thorlacius ræðir við Ólöfu.

Þorvaldur Þórðarson, prófessor í eldfjallafræði, segir að framleiðslan í gígunum á Reykjanesskaga sé að nálgast 15 rúmmetra á sekúndu. Hann telur að hraunið frá gosinu muni ekki renna langar leiðir. Nýju gígarnir sem spretta upp virðast vera viðbót. Kvikugangurinn, aðfærsluæð gossins, sé samfellt heild. Arnar Páll Hauksson talar við Þorvald.

Spegillinn 12 apríl 2021

Umsjón: Kristján Sigurjónsson

Tæknimaður: Mark Eldred

8.200 verða bólusettir með efni Pfizer í þessari viku. Búið er að fullbólusetja 1 af hverjum 10 sem bólusetja á. Von er á fyrstu skömmtunum frá lyfja-framleiðand-anum Janssen á miðvikudag.

Katrín Jakobsdóttir, forsætisráðherra, segir að þegar skýrist frekar um afhendingu bóluefna hingað til lands verði hægt að búa til skýrari ramma um hvenær hægt verði að slaka á takmörkunum til lengri tíma litið.

Framkvæmdastjóri samtaka ferðaþjónustunnar vonast til þess að stjórnvöld komi fram með svipað úrræði og ferðagjöfin var í fyrra. Ólíklegt er þó að ferðaþjónustufyrirtæki geti boðið landsmönnum jafn góð tilboð og síðasta sumar.

Dómari við Héraðsdóm Reykjavíkur hafnaði í síðustu viku kröfu Eimskips um að úrskurður skattsins um endurálagningu vegna dótturfélaga í lágskattaríki yrði felldur niður. Dómari sagði af ef fallist yrði á túlkun fyrirtækisins fælist í því misnotkun á reglum til að ná fram skattahagræði.

Gert verður við varðskipið Tý til bráðabirgða, svo tvö varðskip verði til taks þangað til nýtt varðskip kemur til landsins. Áætlaður kostnaður við viðgerðina er 60 milljónir króna.

Embætti héraðssaksóknara hefur fellt niður mál Kristjáns Gunnars Valdimarssonar, lektors við Háskóla Íslands. Brotaþolar í málinu voru fjórir. Þeir geta kært niðurstöðuna til embættis ríkissaksóknara.

Vaxandi gagnrýni er á dönsk stjórnvöld fyrir ákvörðun sem tekin var í fyrra um að ógilda dvalarleyfi flóttafólks frá Sýrlandi, á þeim forsendum að í næsta nágrenni við borgina Damaskus væri öruggt að búa. Ekki er útlit fyrir að ákvörðuninni verði breytt.

Lengri umfjöllun:

Hagkerfið í heiminum virðist ætla að jafna sig fyrr á Covid-faraldrinum en útlit var fyrir samkvæmt nýrri spá Alþjóða gjaldeyrissjóðsins. Sjóðurinn gerir ráð fyrir að heimsframleiðslan verði þegar á þessu ári, 2021, orðin meiri en árið 2019. Samdrátturinn á Evrusvæðinu var 6,6 prósent á síðasta ári, en nú er gert ráð fyrir að hagvöxturinn verði á þessu ári verði 4,4 prósent á Evrusvæðinu og sex prósent í heiminum öllum. Spár Alþjóðagjaldeyrissjóðsins fyrir Ísland gera ráð fyrir 3,7% hagvexti á þessu ári og ögn lægri vexti á næsta ári. Landframleiðslan hér á landi í ár verður minni en hún var árið 2019, en á næsta ári 2022 , verður hún orðin ögn meiri en árið 2019, eða sem nemur 0,2%. Spegillinn fékk Gústav Steingrímsson hagfræðing hjá hjá Hagfræðideild Landsbankans til að rýna aðeins í spá Alþjóða gjaldeyrissjóðsins. Kristján Sigurjónsson talaði við hann.

Ráða þarf um 75 nýja lögreglu

Fjármálaráðherra segist ánægður með þær úrbætur á reglugerð sem heilbrigðisráðherra hefur lagt fram um sóttkvíarhús. Ljóst var að nýja reglugerð þurfti til þegar Héraðsdómur Reykjavíkur úrskurðaði að það stæðist ekki lög að senda fólk í sóttkví sem ætti í önnur hús að venda og þegar Landsréttur vísaði áfrýjun sóttvarnalæknis frá. Bjarni segir það alvarlegt mál þegar ríkið brýtur á rétti fólks með þessum hætti og því sé mikilvægt að hlusta á varnaðarorð

Dómarafélag Íslands segir óvarlegar fullyrðingar á borð við að dómstólar gangist fyrir aðför að sóttvörnum á óvissu- og hættutímum til þess fallnar að grafa undan stoðum réttarríkisins.

Móðir fjölfatlaðs manns furðar sig á hversu illa gekk að fá svör um hvaða forgangshópi hann tilheyrði, margir í svipaðri stöðu hafi þegar verið bólusettir.

Aðstoðaryfirlögregluþjónn segir að ekki sé hægt að stóla á sjálfboðaliða til framtíðar til að sinna gæslu og vöktun við gosstöðvarnar. Atvinnutækifæri gætu skapast eftir að björgunarsveitir hverfa á brott til annarra starfa.

Vísindamenn hafa ekki komist að niðurstöðu um hvernig flokka beri gosið í Geldingadölum. Við upphaf gossins voru nefnd líkindi við Kröfluelda og svo hafa gjarna verið nefnd dyngjugos og bent á dyngjuna Þráinsskjöld sem er rétt hjá gosstöðvunum. Dæmigerð gos á Reykjanesskaga eru hins vegar mjög lítil, segir Magnús Tumi Guðmundsson, prófessor í jarðeðlisfræði.

Sagt frá fundi Almannavarna í dag um hættur sem geta skapast við eldstöðvarnar á Reykjanesi. Heyrist í Elínu Björk Jónasdóttur, Magnúis Tuma Guðmundssyni, Þorsteini Jóhannssyni og Gunnari Guðmundssyni

Filippus prins og hertogi af Edinborg er látinn, 99 ára að aldri. Sigrún Davíðsdóttir í London sagði frá lífshlaupi prinsins.

Áhugi almennings á fjárfestingum og hlutabréfaviðskiptum hefur sjaldan verið meiri en nú. Mikið líf hefur verið á íslenskum hlutabréfamarkaði undanfarið ár, verðhækkanir hafa verið óvenjumiklar og fjöldi almennra hluthafa í kauphöllinni hefur tvöfaldast milli ára. En fjárfestingaheimurinn er einsleitur og það er mikilvægt að fá fjölbreyttari hóp að borðinu þegar áhugi fólks á fjárfestingum er að vakna á ný, að mati ungra kvenna sem hafa stofnað umræðuvettvang um fjárfestingar á samfélagsmiðlinum Instagram. Þar leitast þær við að hvetja ungt fólk, sér í lagi konur, til að taka ábyrgð á eigin fé og fjárfesta. Þórhildur Þorkelsdóttir tók saman og ræddi við Anítu Rut Hilmarsdóttur.

Spegillinn 8.apríl 2021

Umsjón: Kristján Sigurjónsson

Tæknimaður: Jón Þór Helgason

Hærri sektir fyrir sóttkvíarbrot og aukið eftirlit er meðal þess sem sóttvarnalæknir leggur til í aðgerðum á landamærunum. Frá og með miðnætti verða allir sem koma til landsins að fara í fimm daga sóttkví og tvisvar í sýnatöku. Heimasóttkví er heimil að uppfylltum skilyrðum.

Aðeins einn af hverjum nokkur hundruð þúsund fær aukaverkanir af AstraZeneca bóluefninu segir sóttvarnalæknir. Fólk sem ekki telst í áhættuhóp verður áfram bólusett með efninu hér á landi.

Yfirvöldum í Tékklandi er heimilt að skylda ung börn í bólusetningu við ýmsum sjúkdómum, samkvæmt úrskurði Mannréttindadómstóls Evrópu í dag. Málið hófst áður en COVID-faraldurinn skall á.

Almannavarnir og Veðurstofan ætla að taka saman upplýsingar um hættur sem kunna að leynast göngufólki á gosstöðvunum á Reykjanesskaga. Litlar breytingar hafa orðið á gasmyndun gossins síðustu daga.

Heilbrigðisyfirvöld Evrópuríkja fylgja hvert sinni stefnu um notkun á bóluefni AstraZeneca. Mörg einskorða notkunina við eldra fólk, en allur gangur er á hvar mörkin liggja.

Snjóflóð féll á skíðasvæðinu í Skálafelli rétt fyrir klukkan tvö í dag. Einn maður lenti í flóðinu en fannst fljótt, heill á húfi.

Norðsnjáldri af ætt svínhvala fannst rekinn dauður í síðustu viku í svokallaðri Bót við bæinn Höfða II, skammt sunnan við Grenivík í Eyjafirði.

Andrésar Andar leikunum sem hefjast áttu á sumardaginn fyrsta á Akureyri hefur verið frestað um þrjár vikur

Lengri umfjöllun:

Jóhanna Jakobsdóttir lektor í líftölfræði við Háskóla Íslands segir að þrátt fyrir að mörg lönd í Evrópu hafi gripið til harðra sóttvarnaraðgerða í Covidfaraldrinum, og náð góðum tökum á honum, þá hafi stjórnvöld gert þau mistök að slaka of fljótt á. Þess vegna sé staðan eins og hún er í álfunni. Jóhanna er í hópi vísindamanna sem gert hafa spálíkan um þróun faraldurisns nánast frá upphafi hans. Kristján Sigurjónsson talar við Jóhönnu.

Óeirðir á Norður-Írlandi eru aftur orðnar fréttaefni, fleiri en 50 lögreglumenn eru slasaðir eftir átök undanfarna daga og í gær voru átök þar sem hverfi sambandssinna og lýðveldissinna mætast. Við aldalanga óeirðasögu bætist Covid við, eða öllu heldur umdeild jarðarför byltingarsinna úr Sinn Fein í fyrrasumar. Og svo ekki síst Brexit, eða sú lausn sem Boris Johnson forsætisráðherra kaus varðandi Norður-Írland. Sigrún Davíðsdóttir segir frá.

Vinnuvikan styttist um næstu mánaðamót hjá allt að 9 þúsund opinberum starfsmönnum sem starfa hjá ríki og sveitarfélögum. Í sumum tilfellum get

Spegillinn 7.apríl 2021

Umsjón: Kristján Sigurjónsson

Tæknimaður: Gísli Kjaran Kristjánsson

Landsréttur hefur vísað frá kæru sóttvarnalæknis og niðurstaða héraðsdóms stendur, um að það að skikka þá í farsóttarhús sem hér eiga heimili og geta verið í heimasóttkví hafi gengið lengra en lög heimila. Sóttvarnalæknir vinnur að nýju minnisblaði um aðgerðir á landmærum.

Niðurstaða Evrópsku lyfjastofnunarinnar, um að blóðtappar séu afar sjaldgæf aukaverkun bólusetningar með bóluefni AstraZeneca, hefur tæplega áhrif á notkun bóluefnisins hér á landi, segir forstjóri Lyfjastofnunar.

Fimm kórónuveirusmit sem greindust utan sóttkvíar í gær má rekja til hópsmits í Mýrdalshreppi. Þar eru nú sex í einangrun.

Stjórnvöld ríkja heims ættu að hækka skatta á efnafólk til þess að greiða þann kostnað sem fylgir COVID-19 faraldrinum, að mati Alþjóðagjaldeyrissjóðsins. Þau ættu jafnframt að aðstoða fátækari ríki við kaup á bóluefni.

Fiskistofa fær auknar heimildir til að afla upplýsinga um aflahlutdeild og eignarhald útgerða í nýju frumvarpi. Þar er brugðist við svartri skýrslu Ríkisendurskoðunar um eftirlit stofnunarinnar.

Ótti landsmanna við að smitast af COVID-19 hefur aukist að undanförnu, samkvæmt nýjum Þjóðarpúlsi Gallup. Þeim fjölgar sem versla frekar inn á netinu og kaupa umframbirgðir.

Lengri umfjöllun:

Héraðsdómur Reykjavíkur úrskurðaði í fyrradag að ríkið getur ekki skikkað fólk sem a lögheimili hér á landi til að fara í sóttkví í sóttvarnarhúsi, ef það getur tekið hana út heima hjá sér. Héraðsdómur mat það sem svo að um ólöglega frelsisviptingu væri að ræða. Mat sóttvarnarlæknis og heilbrigðisraðherra var að aðgerðin væri lögleg og gengi ekki lengra en nauðsynlegt er til að vernda lýðheilsu. Ríkið áfrýjaði úrskuðinum til Landsréttar og rétt fyrir fréttir kom fram að Landsréttur hefði vísað málinu frá á þeim grundvelli að fólkið sem kærði sóttkvína væri nú laust úr henni. Helga Vala Helgadóttir þingmaður Samfylkingar og formaður Velferðarnefndar Alþingis og Vilhjálmur Árnason þingmaður Sjálftæðisflokks og nefndarmaður í Velferðarnefnd ræddu þessa niðurstöðu og fleira sem tengist Covid faraldrinum, sóttvörnum og hversu langt skuli ganga í þeim efnum í beinni útsendingu við Kristján Sigurjónsson.

Nýlega kom út ritið ritið Twenty-Four Conservative-Liberal Thinkers, 24 frjálslyndir íhaldshugsuðir, eftir Hannes H. Gissurarson prófessor í stjórnmálafræði við Háskóla Íslands. Hugveitan New Direction í Brüssel gefur ritið út. Bogi Ágústsson ræðir við Hannes um bókina.

Heilbrigðisráðherra segir að reglugerð um að skylda farþega frá áhættusvæðum í sóttkví á sóttkvíarhótel hafi verið sett í góðri trú. Staðfesti landsréttur niðurstöðu hérðasdóms um að lagastoð skorti verði brugðist við því.

Sárafáir þeirra sem komu til landsins með flugi í dag fóru á sóttkvíarhótel, segir yfirlögregluþjónn á Keflavíkurflugvelli. Karlmaður sem ákvað að fara heim til sín og kona sem ákvað að fara á sóttkvíarhótel gefa sömu skýringuna, það hafi verið þægilegast.

Lögfræðinga greinir á um hvort úrskurður Héraðsdóms Reykjavíkur sýni brotalamir í sóttvarnarlögum. Reglugerð heilbrigðisráðherra hafi hins vegar skort lagastoð.

Eldfjallafræðingur segir líklegt að nýtt gosskeið sé hafið á Reykjanesskaga. Gosið nú muni að líkindum standa í langan tíma en ekki sé þó líklegt að hraun renni yfir Suðurstrandarveg fyrr en í fyrsta lagi á næsta ári.

Nemendur í Fossvogsskóla geta snúið aftur til náms í Korpuskóla á morgun. Viðgerðir hafa staðið yfir í Korpuskóla um páskana eftir að rakaskemmdir komu þar í ljós.

Magnús Gottfreðsson, prófessor í smitsjúkdómum segir að sýkingarmáttur breska veiruafbrigðisins sem gangi hér nú sé meiri en eldri afbrigða og því þurfi hertar aðgerðir til að sporna við ástandinu. Ef það sé ekki gert aukist líkur á hópsmiti hér á landi. Hann vonar að stjórnmálamenn byggi traustari lagastoð undir aðgerðirnar. Bergljót Baldursdóttir talaði við Magnús.

Þorvaldur Þórðarson, eldfjallafræðingur, segir að ef hraun nái að flæða yfir Suðurstrandarveg verði það ekki fyrr en í fyrsla lagi á næsta ári. Hann segir líklegt að hafið sé nýtt gosskeið á Reykjanesskaga. Horfur sé á að gosið nú mun standa yfir í langan tíma. Hann segir að nýja gosið sé meira og minna hrein viðbót við gosið í Geldinadölum. Því megi segja að það sé verið að tvöfalda framleiðnina. Arnar Páll Hauksson talaði við Þorvald Þórðarson.

Boris Johnson forsætisráðherra Breta kynnti í gær 2. stig í afléttingu Covid-19 takmarkana, sem verður 12. apríl. Ferðamöguleikar Breta utanlands í sumar eru þó enn óljósir og stærsta spurningin er, eftir sem áður, hvort og þá hvernig bólusetningarvottorð verði gerð að skyldu. Sigrún Davíðsdóttir sagi frá.

Spegillinn 31. mars 2021

Umsjónarmaður: Bergljót Baldursdóttir

Sjö hafa verið kærðir fyrir utanvegaakstur við gosstöðvarnar síðan gos hófst fyrir tæpum tveimur vikum. Teymisstjóri hjá Umhverfisstofnun segir að svæðið sé mjög viðkvæmt en brotaviljinn sé einbeittur hjá sumum. Hólmfríður Dagný Friðjónsdóttir ræðir við Hákon Ásgeirsson, teymisstjóra hjá Umhverfisstofnun

Búið er að rekja ferðir þeirra fimm sem greindust utan sóttkvíar innanlands í gær

Bóluefni þýska líftæknifyrirtækisins BioNTech veitir börnum á aldrinum tólf til fimmtán ára hundrað prósent vörn gegn COVID-19. Þetta kemur fram í yfirlýsingu sem fyrirtækið og bandaríski lyfjarisinn Pfizer sendu frá sér í dag.

Lyfjastofnun Evrópu hefur enn ekki fundið tengsl blóðtappa og bóluefnis AstraZeneca, þrátt fyrir ítarlegar rannsóknir

Félag framhaldsskólakennara og Félag stjórnenda í framhaldsskólum skrifuðu í dag undir samkomulag um breytingar og framlengingu á kjarasamningi við ríkið.

Lengri umfjöllun:

Mikill meirihluti íslenskra foreldra vill láta bólusetja börn sín við COVID-19. Þetta sýna fyrstu niðurstöður úr nýrri könnun. Lyfjafyrirtækin eru byrjuð að prófa nýju covid-bóluefnin fyrir börn og má búast við niðurstöðum á næstu mánuðum. Bergljót Baldursdóttir ræðir við Ásgeir Haraldsson, prófessor á barnaspítala Hringsins.

Rannsókn sem Hákon Hákonarson, íslenskur barnalæknir, stendur fyrir hefur leitt í ljós að lyf hægir á framgangi banvæns genasjúkdóms. Hingað til hefur engin meðferð verið til. Sjúkdómurinn er séríslenskur og vitað er um 25 einstaklinga í fimm fjölskyldum sem bera genið sem veldur honum. Vísindatímarit birti í síðustu viku niðurstöður rannsóknarinnar. Hákon vinnur nú að þróun nýs lyfs sem hann vonast til að sýni jafnvel betri árangur og stefnir á að nota það við fleiri sjúkdómum, svo sem Alzheimer. Þórhildur Þorkelsdóttir, ræðir við Hákon Hákonarson

Fastur liður í alþjóðlegum skýrslum um spillingu í sjávarútvegi er að beina athyglinni að mútum fyrir veiðileyfi og kvóta. Ekki er hægt að fullyrða að ekkert sé hægt við því að gera því um sé að ræða landlægan vanda í sumum löndum, eins og til dæmis í Afríku, því lög eru gegn því að fyrirtæki greiði mútur erlendis. Og það á einnig við um Ísland. Sigrún Davíðsdóttir segir frá

Spegillinn 30.mars 2021

Umsjón: Kristján Sigurjónsson

Tæknimaður: Ragnar Gunnarsson

Framkvæmdastjóri Samtaka ferðaþjónustunnar segir forsendur fyrir því að taka upp litakóðunarkerfi á landamærunum ekki hafa breyst. Hann telur sóttvarnayfirvöld reyna að grafa undan ákvörðun ríkisstjórnarinnar.

Ríkið þarf að hlaupa undir bagga með Strandabyggð svo að það geti haldið úti rekstri og staðið við skuldbindingar sínar. Oddviti sveitarstjórnar Strandabyggðar segir það koma til vegna skerta framlaga úr Jöfnunarsjóði.

Stuðningur við ríkisstjórnina hefur sjaldan mælst meiri samkvæmt nýrri Gallupkönnun, fylgi Samfylkingarinnar minnkar en stuðningur við Miðflokkinn eykst.

Lengri umfjöllun:

Í vinsælustu fjölskylduhverfum Reykjavíkur eru mörg dæmi um að börn fái ekki pláss á leikskóla fyrr en rúmlega tveggja ára. Staðan á biðlistum eftir leikskólaplássum í borginni er slæm í ár og Ingibjörg Brynjarsdóttir leikskólastjóri í Fossvogi minnist þess ekki að hafa þurft að neita jafn gömlum börnum um pláss. Heiða Aðalsteinsdóttir, sem býr í vesturbænum sér fram á að þurfa að keyra borgina þvera og endilanga á hverjum degi til að fara með son sinn til dagmömmu. Miðað við stöðuna nú, og svörin sem hún fær, býst hún ekki við að drengurinn komist inn á leikskóla fyrr en hann verður tveggja og hálfs árs. Þórhildur Þorkelsdóttir segir frá og talar við Ingibjörgu og Brynju.

Páll Einarsson jarðeðlisfræðingur segir að eldgosið í Geldingadölum sé ákaflega lærdómsríkt til þess að skilja eðli og umfang jarðhræringanna sem hófust með jarðskjálftunum í desember 2019. Þeirri atburðarrás sé alls ekki lokið. Við undirleik fuglasöngs, sírenuvæls og flugvélagnýs settist Spegillinn í dag niður með Páli í veðurblíðunni í Vatnsmýrinni í Reykjavík og ræddi við hann um jarðeldana og jarðhræringarnar á Reykjanesskaga á ellefta degi goss. Kristján Sigurjónsson ræðir við Pál.

Undanfarinn áratug eða svo hafa alþjóðastofnanir og samtök beint sjónum sínum að spillingu tengdri sjávarútvegi. Skýrslur og umfjöllun þeirra um þessi efni gefur Samherjamálinu samhengi. Tölurnar, sem oftast er vitnað í um nýtingu, öllu heldur ofnýtingu, komu fram 2018 í skýrslu FAO, Sjávarútvegs- og landbúnaðarstofnunar Sameinuðu þjóðanna. Samkvæmt skýrslunni var staðan sú 2015 að tæplega 60 prósent nytjastofna voru veiddir í topp og 33 prósent ofveiddir. Sigrún Davíðsdóttir segir frá.