Tveir voru handteknir í dag vegna rannsóknarinnar á morðinu í Rauðagerði í Reykjavík. Þeir sem sitja í gæsluvarðhaldi eru frá Íslandi, Spáni, Albaníu og Litháen.

Það er nýr veruleiki hér á landi, að menn séu myrtir með köldu blóði fyrir utan heimili sitt. Þetta segir Helgi Gunnlaugsson, afbrotafræðingur.

Saksóknari krafðist þess í Landsrétti í dag að æðstu stjórnendur Kaupþings fyrir hrun yrðu dæmdir vegna lánveitinga til vildarviðskiptavina bankans. Hann vill að refsiramminn verði fullnýttur en viðurkenndi að vegna þess hversu langt er liðið frá upphafi málsins verði refsingin skilorðsbundin.

Aldrei hefur verið leitað til foreldra um lausnir eða samráð við framkvæmdir, segir Björn Steinbekk, faðir drengs sem veiktist illa við að stunda nám í Fossvogsskóla.

Flugvirkjar eru mjög ósáttir við úrskurð gerðardóms um kjaramál þeirra. Þeir segja að niðurstaðan sé verri en sú versta hugsanlega. Gerðardómur fellst ekki á kröfu flugvirkja hjá Landhelgisgæslunni um að kjarasamningur þeirra við ríkið verði tengdur aðalsamningi þeirra við Icelandair. Það hafi í raun verið bannað samkvæmt lögum frá 2006. Arnar Páll Hauksson talar við Sverri Jónsson og Guðmund Úlfar Jónsson.

Lögreglan verður að komast að því hvað gerðist þegar maður var skotinn til bana fyrir utan heimili sitt við Rauðagerði í Reykjavík um helgina. Þetta segir Helgi Gunnlaugsson, afbrotafræðingur og prófessor í félagsfræði við Háskóla Íslands. Hann segir að það sé nýr veruleiki hér á landi, að menn séu myrtir með köldu blóði fyrir utan heimili sitt. Leiðin til þess að koma í veg fyrir að svona endurtaki sig, sé að draga úr eftirspurn eftir fíkniefnum. Það auki hins vegar ekki öryggi borgaranna að vopnavæða almenna lögreglumenn. Jóhann Bjarni Kolbeinsson ræddi við Helga um morðið í Rauðagerði.

Næst á eftir Ísrael hefur hvergi verið bólusett hærra hlutfall af landsmönnum en í Bretlandi. Í ágúst er þess vænst að búið verði að bólusetja alla Breta tvisvar sinnum. Hægt og bítandi er því að verða til bæði þekking á og reynsla af þeim bóluefnum, sem eru notuð, en mörgum Bretum finnst ganga hægt að upplýsa um hvað verði svo.

Sigrún Davíðsdóttir segir frá.

Átta hafa verið handteknir í tengslum við morðið í Rauðagerði um síðustu helgi. Fjórir voru handteknir í dag. Lögregla kannar hvort mögulega hafi fleiri en einn verið að verki.

Rekstrarstjóri Brims á Vopnafirði segir óviðunandi að þurfa að keyra vinnsluna þar á varaafli dögum saman. Raflínan til Vopnafjarðar bilaði rétt fyrir helgi.

Auka á fjárstuðning við bændur, auðvelda þeim heimavinnslu og endurskoða tollafyrirkomulag. Þetta kemur fram í aðgerðaáætlun landbúnaðarráðuneytisins.

Vefverslun jókst um 152% í fyrra og áfengissala í ÁTVR um 40 af hundraði. Þetta er meðal þess sem kemur fram í nýrri skýrslu Rannsóknaseturs verslunarinnar.

Sameinuðu þjóðirnar leggja til að tuttugu auðugustu ríki heims komi á laggirnar vinnuhópi sem sjái til þess að allar þjóðir verði bólusettar gegn COVID-19.

Erfið fjárhagsstaða fjölmargra hjúkrunarheimila bitnar á fólkinu sem þar býr, segir Gísli Páll Pálsson, formaður Samtaka fyrirtækja í velferðarþjónustu. Hann segir að hækka þurfi daggjöld til heimilanna um um það bil tíu prósent til þess að laga ástandið, eða um þrjá til fjóra milljarða króna á ári. Sjúkratryggingar Íslands hafa greitt hjúkrunarheimilum aukakostnað í tengslum við faraldurinn, en deilt hefur verið um þann kostnað að undanförnu. Jóhann Bjarni Kolbeinsson ræddi við Gísla Pál Pálsson.

Vefverslun jókst um 152% á síðasta ári og nam um 7% af innlendri verslun. Erlend kortavelta dróst saman um 60 af hundraði. Áfengissala í ÁTVR jókst um 40% eða um 10 milljarða króna. Arnar Páll Hauksson sagði frá og talaði við Eddu Blummenstein.

Spegillinn 16.2.2021

Umsjónarmaður: Bergljót Baldurdsóttir

Rýming tæplega 50 húsa í jaðri byggðarinnar í sunnanverðum Seyðisfirði tekur gildi klukkan 19 í kvöld. Hættustig almannavarna hefur aftur verið lýst yfir í bænum vegna skriðuhættu. Kristján Sigurjónsson ræðir við Aðalheiði Borgþórsdóttur í Múla á Seyðisfirði

Þórólfur Guðnason sóttvarnalæknir sendir minnisblað til heilbrigðisráðherra á næstu dögum um frekari afléttingar innanlands í framhaldi af boðuðum hertum aðgerðum á landamærum sem kynntar voru í dag. Svandís Svavarsdóttir heilbrigðisráðherra segir Ísland vera opnasta land í Evrópu núna, hér séu minnstar hömlur á atvinnulífi og daglegu lífi í álfunni.

Vilhjálmur Árnason, þingmaður Sjálfstæðisflokks í Suðurkjördæmi, spurði heilbrigðisráðherra í óundirbúnum fyrirspurnum á Alþingi í dag hvort til greina kæmi að sjálfstætt starfandi heilsugæslustöð fengi að starfa á Suðurnesjum. Ráðherrann telur að það þurfi að stíga mjög varlega til jarðar í þessum málum en full ástæða sé til að ræða þessar hugmyndir.

Dómstóll í Hollandi ógilti í dag útgöngubann stjórnvalda, sem hefur sætt eindreginni andstöðu landsmanna. Þau ætla að áfrýja dóminum.

Skjólstæðingum Frú Ragnheiðar, hjálparúrræðis Rauða krossins fyrir sprautufíkla og/eða heimilislausa á höfuðborgarsvæðinu hefur fjölgað um 50 prósent á síðustu fjórum árum. 600 manns leituðu til Frú Ragnheiðar í fyrra. Kristján Sigurjónsson ræðir við Elísabetu Brynjarsdóttur

Kostnaður við uppbyggingu hjúkrunarheimila hljómar eins og gjaldþrota stefna segir Pálmi V Jónsson, yfirlæknir á öldrunardeild Landspítalans. Hann leggur til ýmsar breytingar á heilbrigðisþjónustu við eldra fólk meðal annars öldrunargeðdeild verði stofnuð og að heilsugæslan verði gerð að vöggu öldrunarþjónustunnar. Bergljót Baldursdóttir ræddi við Pálma

Norðmenn búa sig undir átakakosningar til þings í haust. Ríkisstjórn Ernu Solberg frá Hægri flokknum hefur tapað miklu fylgi á kjörtímabilinu og á engan möguleika á að lifa af ef skoðanakannanir standast. En það er ekki þar með sagt að ný vinstristjórn bíði þess að taka við. Þar þurfa fimm ólíkir flokkar að ná samstöðu. Kjósa á 13. september. Gísli Krisjánsson í Noregi sagði frá

Spegillinn 15.02.2021

Umsjónarmaður: Bergljót Baldursdóttir

Rannsóknardeild lögreglunnar á höfuðborgarsvæðinu gefur ekki upp hvort morðvopnið sem notað var við manndráp í Rauðagerði í Reykjavík á laugardagskvöld sé fundið.

Hundrað og níutíu þúsund manns verða bólusett hér á landi fyrir lok júní, gangi áætlanir heilbrigðisráðuneytisins eftir. Um sex þúsund Íslendingar verða bólusettir í þessari viku.

Íbúum á Hofi í Öræfum, sem fengu krapaflóð í bakgarð sinn í gær var verulega brugðið. Mjög óvenjulegt er að svona flóð séu svo stór að þau fari yfir varnargarða.

Dómari í Suður-Afríku vill láta fangelsa fyrrverandi forseta landsins fyrir að vanvirða réttinn.

Aðeins hafa fengist niðurstöður úr 10 prósentum þeirra leghálssýna sem send hafa verið til Danmerkur síðan Heilsugæsla höfuðborgarsvæðisins tók við skimun af Krabbameinsfélaginu. Forstjóri heilsugæslunnar hefur áhyggjur af þessum seinagangi og fer fram á skýringar hjá Dönum á fundi á morgun.

Meirihluti þingmanna á grænlenska landsþinginu vill að efnt verði til kosninga, meira en ári áður en kjörtímabilinu lýkur.

Vinnumálastofnun ásamt Samtökum atvinnulífsins ætla að gera átak í að skapa ný störf í landinu. Þau fyrirtæki sem taka þátt geta fengið ráðningarstyrk með þeim sem þeir ráða til starfa. Sviðsstjóri hjá Vinnumálastofnun hvetur fyrirtæki, atvinnurekendur og sveitarfélög að leggja verkefninu lið. Bergljót Baldursdóttir ræddi við Hrafnhildi Tómasdóttur, sviðstjóra hjá Vinnumálastofnun

Formaður Félags íslenskra atvinnuflugmanna segir að það sé hvorki siðferðislega rétt né lögum samkvæmt að segja upp fastráðnum flugmönnum í kjaradeilu til þess að þvinga þá til að gefa eftir lungan af sínum kjörum. Verkfall 11 flugmanna hjá flugfélaginu Bláfugli hefur staðið yfir í hálfan mánuð. Arnar Páll Hauksson talaði við Jón Þór Þorvaldsson formann Félags íslenskra atvinnuflugmanna

Sveitarfélög fengu óvart greitt þremur milljörðum of mikið í staðgreiðslu frá ríki nú um mánaðamótin. Í desember fengu þau líka þrjá milljarða, sem þau áttu að fá en vissu ekki af. Elsa María Guðlaugs. Drífudóttir talaði við Björgu Ágústsdóttur sveitarsstjóra Grundarfjarðarbæjar

Spegillinn 12.febrúar 2021

Umsjón: Kristján Sigurjónsson

Tæknimaður: Ragnar Gunnarsson

Pfizer og Evrópusambandið hafa samið um kaup á 200 milljónum skammta umfram það sem áður hafði verið ákveðið. Útlit er fyrir að Íslendingar fái fleiri bóluefnaskammta á næstunni en gert hafði verið ráð fyrir

Draga verður lærdóm af dómnum sem Hæstiréttur kvað upp í gær í máli Landsréttardómaranna tveggja, segir dómsmálaráðherra.

Rússar segjast tilbúnir að slíta tengslin við Evrópusambandið verði þeir beittir refsiaðgerðum vegna Navalny-málsins.

Kennslustofur í Háskóla Íslands komast ekki í stand fyrr en matsmenn hafa lokið við að meta umfang vatnstjónsins sem varð þar fyrir þremur vikum. Forsvarsmenn skólans hafa áhyggjur af myglu.

Heimsendingarþjónustan Aha.is hefur þróað innkaupaapp sem skilur íslensku. Markmiðið er að fólk geti gert stórinnkaup heima hjá sér á örfáum mínútum.

Lengri umfjöllun:

Danska ríkisstjórnin tilkynnti í gær að samkomulag hefði náðst á þingi um að auka verulega eftirlit á norðurslóðum. Útgjöld til eftirlitsins verða aukin um sem svarar rúmlega 30 milljörðum íslenskra króna. Trine Bramsen, varnarmálaráðherra Danmerkur segir nauðsynlegt að auka viðbúnað hersins til að fylgjast betur með siglingum og flugi á norðurslóðum. Málið snýst um öryggi ríkissambandsins og að við stöndum við skuldbindingar okkar segir Bramsen. Bogi Ágústsson segir frá.

Saga og aðbúnaður ráðskvenna í sveit á síðari hluta tuttugustu aldar er viðfangsefni Dalrúnar J. Eygerðardóttur sagnfræðings í doktorsverkefni hennar. Dalrún hefur talað við tugi eldri kvenna sem gegndu ráðskonustarfi á síðustu öld og í þessum viðtölum hefur ýmislegt komið fram sem þagnarmúr hefur umlukið hingað til. Dalrún fjallaði um viðfangsefni sitt hjá RIKK - Rannsóknastofnun í jafnréttisfræðum við Háskóla Íslands í gær - þegar rætt var um áhrif #metoo-byltingarinnar á líf og frásagnir kvenna. Kristján Sigurjónsson ræðir við Dalrúnu.

Málið, sem hefur verið í bresku fréttaveltunni þessa vikuna er frí eða ekki frí. Munu Bretar komast í sumarfrí eða ekki? Eftir miklar væntingar í ársbyrjun um sumarleyfi, af því bólusetning gengur vel í Bretlandi, eru horfur á ferðasumri þó þungar, samkvæmt Boris Johnson forsætisráðherra. Nú hljómar eins og þorrinn og góan gæti teygst fram á haustið. Sem gæti þá haft áhrif á Íslandi sem hefur notið góðs af ferðavilja Breta á árunum fyrir Covid-19 faraldurinn. Sigrún Davíðsdóttir segir frá.

Spegillinn 11.febrúar 2021

Umsjón: Kristján Sigurjónsson

Tæknimaður: Ragnar Gunnarsson

Meiri veikinda varð vart hjá starfsfólki slökkviliðs höfuðborgarsvæðisins en reiknað var með eftir seinni bóluefnissprautuna. Þriðjungur starfsliðsins er veikur og þurfti að kalla út aukafólk.

Talsverð óvissa er enn um hvernig muni ganga að fylgja afhendingaráætlun bóluefna á öðrum ársfjórðungi þessa árs segir forsætisráðherra.

Hæstiréttur dæmdi í dag íslenska ríkið til að greiða Jóni Höskuldssyni 9,5 milljónir í skaðabætur vegna Landsréttarmálsins

Sveitarstjórn Þingeyjarsveitar hefur samþykkt að vísa tillögum að deiliskipulagi Einbúavirkjunar í Skjálfandafljóti til endurskoðunar aðalskipulags sem nú stendur yfir

Hátt í einn af hverjum þremur Bandaríkjamönnum ætlar eindregið eða líklega að afþakka bólusetningu gegn kórónuveirunni. Þetta kemur fram í nýrri skoðanakönnun AP fréttastofunnar.

Þrjátíu ár eru í dag síðan Íslendingar, fyrstir þjóða, viðurkenndu sjálfstæði Litáens.

Lengri umfjöllun:

Innlend matvælaframleiðsla fullnægir að töluverðum hluta fæðuframboði á Íslandi. Framboð af fiski er langt umfram eftirspurn, yfir 90 prósent í kjöti, eggjum og mjólkurvörum, en grænmetið og kornið eiga langt í land. Þetta kemur fram í nýrri skýrslu Landbúnaðarháskólans fyrir atvinnu- og nýsköpunarráðuneytið, sem kynnt var í morgun. Þar er fjallað um fæðuöryggi þjóðarinnar. Aðeins eitt prósent af korni til manneldis er framleitt hér á landi og 43 prósent af grænmeti. Staðan er hins vegar allt önnur og betri í kjöti, eggjum og mjólkurvörum, að ekki sé talað um fisk. Innlend matvælaframleiðsla er mjög háð erlendum aðföngum, segir í skýrslunni, sérstaklega eldsneyti og áburði. Skýrslan verður til umfjöllunar hjá Þjóðaröryggisráði. Spegillinn settist í dag niður með þeim Kristjáni Þór Júlíussyni landbúnaðar- og sjávarútvegsráðherra og Jóhannesi Sveinbjörnssyni dósent við landbúnaðarháskólann, sem er einn skýrsluhöfunda. Kristján Sigurjónsson talar við þá

Reykjavíkurborg hefur ákveðið að hrinda af stað vinnumarkaðsaðgerðum sem eiga meðal annars að skapa 200 störf fyrir þá sem eru atvinnulausir eða fá fjárhagsaðstoð frá borginn. Verkefnið verður unnið í samvinnu við Vinnumálastofnun.Rösklega 40% landsmanna sem eru atvinnulausir búa í höfuðborginni. Í janúar voru 8.606 Reykvíkingar á atvinnuleysisskrá sem þýðir að almennt atvinnuleysi er yfir 11 af hundraði. Miðað við janúar í fyrra hefur fjöldi atvinnulausra rúmlega tvöfaldast. Þórdís Lóa Þórhallsdóttir, formaður borgarráðs segir að staðan sé grafalvarleg. Arnar Páll Hauksson talar

Almennt atvinnuleysi var 11,6% í síðasta mánuði og jókst um tæpt prósentustig. Forstjóri Vinnumálastofnunar telur líkur á að botninum í atvinnuleysi sé náð.

Andrés Ingi Jónsson þingmaður, sem sagði sig úr Vinstri grænum haustið 2019, er genginn til liðs við Pírata.

Rússneska veðurstofan hefur gefið út viðvörun vegna stórhríðar sem útlit er fyrir að vari í einn og hálfan sólarhring.

Sóttvarnalæknir Svíþjóðar varaði í dag við að þriðja bylgja kórónuveirufaraldursins í Svíþjóð gæti verið að hefjast.

Aldrei hafa fleiri blindir og sjónskertir hér á landi beðið eftir að fá leiðsöguhund. Hátt í 20 eru á biðlista.

Heilbrigðisráðherra segist bjartsýn á að bólusetningar muni ganga vel á öðrum og þriðja ársfjórðungi og að bóluefni komi frá fleiri lyfjafyrirtækjum. Samningar hafa verið undirritaðir um kaup á bóluefni sem dugir fyrir 629 einstaklinga. Arnar Páll Hauksson segir frá og talar við Ragnheiði Ósk Erlendsdóttur.

Reykjavíkurborg ætlar að bæta verulegu fjármagni í íslenskukennslu fyrir börn sem hafa annað móðurmál en íslensku. Sérstöku íslenskuveri verður komið á laggirnar. Formaður Skóla- og frístundaráðs segir þetta mjög mikilvægt enda þörfin mikil. Haukur Holm tlara við Skúla Helgason.

Atvinnuleysi í kjölfar Covid-19 faraldursins er, miðað við nágrannalöndin, óvíða meira en á Íslandi. Veirufaraldurinn afhjúpar ljóslega hættuna sem fylgir því að Íslandi eigi svo mikið undir í einni grein, ferðaþjónustunni. Sigrún Davíðsdóttir segir frá

Ekkert verður af rannsóknarverkefni bandaríska lyfjaframleiðandans Pfizer á virkni kórónuveirubóluefnis, sem rædd var á fundi sóttvarnalæknis, yfirlæknis smitsjúkdómadeildar Landspítala, forstjóra Íslenskrar erfðagreiningar og fulltrúa Pfizer í dag. Þetta sagði Kári Stefánsson, forstjóri Íslenskrar erfðagreiningar eftir fundinn.

Katrín Jakobsdóttir forsætisráðherra segir að það hafi vissulega verið vonbrigði að ekkert yrði af rannsókn Pfizer hér á landi. Niðurstaðan hafi þó ekki komið á óvart.

Verulega hefur verið dregið úr leitinni að John Snorra Sigurjónssyni og tveimur göngufélögum hans sem saknað hefur verið frá því á föstudagsmorgun. Veðurspá er slæm næstu sjö daga.

Útgerðir landsins eiga að greiða 4,8 milljarða króna í veiðigjald vegna síðasta árs.

Kennarasamband Íslands fær vikulega símtöl frá kennurum sem telja sig verða fyrir ofbeldi af hálfu nemenda. Sambandið hvetur skólastjórnendur til þess að gera viðbragðsáætlun vegna ofbeldis.

Utanríkismálastjóri Evrópusambandsins hyggst leggja til að refsiaðgerðir gagnvart Rússlandi verði hertar.

Um fjórðungur launafólks á erfitt með að ná endum saman. Staða atvinnulausra er verri en launafólks og staða innflytjenda er talsvert verri en innfæddra. Yfir 40 af hundraði atvinnulausra mælast með slæma andlega heilsu miðað við um fimmtung launafólks. Þetta er meðal þess sem kemur fram í nýrri könnun Vörðu á stöðu launafólks. Varða er ný rannsóknastofnun vinnumarkaðarins sem ASÍ og BSRB komu á laggirnar. Fjallað var um niðurstöðurnar í Speglinum í gær en í dag var könnunin formlega kynnt. Arnar Páll Talaði við Drífu Snædal og Sonju Ýr Þorbergsdóttur.

Ólga er í stjórnmálum á Grænlandi, í síðustu viku fækkaði stjórnarflokkunum úr þremur í tvo er Demakratiit hætti stjórnarþátttöku. Kim Kielsen, formaður Landsstjórnarinnar, er því nú í forystu minnihlutastjórnar. Aðeins 11 af 31 þingmönnum styðja nú stjórnina. Bogi Ágústsson ræddi við Össur Skarphéðinsson.

Um 20 tilkynningar berast Vinnueftirlitinu árlega um ofbeldi nemenda gagnvart kennurum. Formaður Félags grunnskólakennara telur að tilvikin séu talsvert fleiri.

Ríkissaksóknari Namibíu segir að þótt ekki sé í gildi framsalssamningur milli Íslands og Namibíu sé verið að skoða hvort aðrar leiðir séu færar. Þrír Samherjamenn eru ákærðir í Namibíu.

Vinnsla á loðnu úr norskum skipum er nú hafin á Austfjörðum eftir tvö loðnulaus ár.

Um fjórðungur launafólks á erfitt eða frekar erfitt með að að ná endum saman. Þetta kemur fram í nýrri vinnumarkaðskönnun sem kynnt verður á morgun.

-------------------------------------------------------------------------------

Þórólfur Guðnason sóttvarnalæknir segir að ef samkomulag næst við lyfjaframleiðandann Pfizer um rannsóknarverkefni á virkni bóluefnis fyrirtækisins þurfi aðgerðin að fara í gegnum allt ferli sem um það gilda, eins og fyrir Vísindasiðanefnd og Persónunefnd. Hann segir innviði hér sterka pg vel undir bólusetningaaðgerðir búna.

Um fjórðungur launafólks á erfitt eða frekar erfitt með að að ná endum saman. Þetta kemur fram í nýrri vinnumarkaðskönnun sem kynnt verður á morgun. Þar kemur líka fram að um fjórðungur kvennna á vinnumarkaði býr við slæma andlega heilsu. Þetta hlutfall meða ungs fóks er nærri 42%.

Tónlistarbransinn í Bretlandi er í vanda, ekki bara vegna COVID, því það er alls staðar, heldur vegna Brexit, en svo virðist sem hreinlega hafi gleymst að gera ráð fyrir ferðafrelsi tónlistarfólks um Evrópu. Eldri og ráðsettari stórstjörnur hafa brugðist ókvæða við og segja nauðsynlegt að auðvelda yngra fólki að koma sér á framfæri, því án ungra tónlistarmanna sé enginn bransi.