Spegillinn 9.september 2020

Umsjón: Kristján Sigurjónsson

Tæknimaður: Magnús Þorsteinn Magnússon

Landlæknir metur það svo að engar upplýsingar séu í níu blaðsíðna skjali sem unnið var fyrir tæpum þremur árum af greiningardeild Sjúkratrygginga um Krabbameinsfélagið sem kalli á viðbrögð heilbrigðisyfirvalda umfram þá skoðun sem þegar er hafin hjá Embætti landlæknis.

Rúmlega fimmtugur karlmaður hefur verið ákærður fyrir morð í í Úlfarsárdal í Reykjavík í desember.

Ráðherra í bresku ríkisstjórninni viðurkenndi í dag í þinginu að boðað lagafrumvarp stjórnarinnar vegna útgöngu úr Evrópusambandinu fæli í sér brot á alþjóðalögum.

11% fleiri tilkynningar hafa borist Barnavernd Reykjavíkur það sem af er ári en á sama tímabili í fyrra og áætlað er að kostnaður borgarinnar við málaflokkinn aukist um 14% á næsta ári. Færri tilkynningar berast frá skólum og fleiri frá nágrönnum barna.

Lengri umfjallanir:

Málefni hjúkrunarheimila. Í Speglinum í gær kom fram í umræðum Eybjargar Hauksdóttur framkvæmdstjóra Samtaka fyrirtækja í velferðarþjónustu og Ásgerðar Gylfadóttur formanns bæjarráðs Hornafjarðar um stöðu hjúkrunarheimila að þau standa flest fjárhagslega illa. Daggjöld sjúkratrygginga til hjúkrunarheimila sem sjálfseignarstofnanir eða sveitarfélög reka duga í langflestum ekki til og nú er svo komið að stór sveitarfélög eins og Akureyri og Hornafjörður hafa sagt upp þjónustusamningi við Sjúkratryggingar og hjúkrunarheimili þar í sveit verða rekin af stofnunum á vegum ríkisins. Til að halda þessari umræðu áfram í Speglinum eru þeir mættir Ólafur Þór Gunnarssson öldrunarlæknir, þingmaður Vinstri grænna og 1. varaformaður velferðarnefndar Alþingis hér í stúdíó og Björn Bjarki Þorsteinsson, forstöðumaður hjúkrunarheimilsins Brákarhlíðar í Borgarnesi í síma. Kristján Sigurjonsson talar við þá

Málið kostaði dómsmálaráðherra Noregs embættið. Sambýliskona hans kemur núna fyrir dóm í Osló sökuð um að hafa setta á svið aðför að ráðherranum og staðið að baki alvarlegum hótunum í hans garð - og þó búa þau enn saman. Hún neitar og ráðherrann fyrverandi styður konu sína. Næstu tíu vikur á að reifa þetta sérkennilega mál í dómhúsinu í Osló. Gísli Kristjánsson segir frá.

Spegillinn mánudaginn 7. september 2020

Umsjón: Kristján Sigurjónsson

Tæknimaður: Magnús Þorsteinn Magnússon

Þremur af hverjum fjórum áætlunarferðum Icelandair hefur verið frestað það sem af er þessum mánuði. Erlend flugfélög hafa flogið 96 prósent sinna ferða.

Icelandair ehf. fékk rúmlega þriðjung heildarstuðnings stjórnvalda til fyrirtækja vegna hluta launakostnaðar í uppsagnarfresti í maí, júní og júlí.

Þýsk stjórnvöld hafa gefið í skyn að mögulega verði hætt við gasleiðsluna Nord Stream 2 (tvö) til að refsa Rússum fyrir að Alexei Navalny var byrlað eitur. Navalny er kominn til meðvitundar eftir að hafa verið haldið sofandi á sjúkrahúsi í Berlín.

Það er aðgerðum innanlands og á landamærum að þakka að stjórnvöld hafa náð tökum á kórónuveirufaraldrinum, segir sóttvarnalæknir

Áhersla var lögð á atvinnumál, félagsmál og námsúrræði á fundi sveitarstjórnarmanna í Reykjanesbæ með félags- og barnamálaráðherra í dag.

Lengri umfjallanir:

Ítrekað hefur komið fram á þessu ári að mörg hjúkrunarheimili sem rekin eru af sjálfseignarstofnunum og sveitarfélögum eigi í miklum rekstrarerfiðleikum og að dagjöld Sjúkratrygginga ríkisins dugi hvergi til að ná endum saman. Akueyrarbær hefur þegar sagt upp samningi sínum við ríkið um rekstur hjúkrunarheimila í bænum. Heilbrigðisstofnun Norðurlands, sem er ríkisstofnun, tekur við rekstrinum um áramót. Nokkur önnur sveitarfélög íhuga að gera slíkt hið sama verði ekki breyting á rekstrarforsendum. Til að ræða stöðu hjúkrunarheimilanna er hingað komin Eybjörg Hauksdóttir framkvæmdastjóri Samtaka fyrirtækja í velferðarþjónustu og í síma er Ásgerður Gylfadóttir formaður bæjarráðs Hornafjarðar. Hún situr í stjórn Sambands ísl. Sveitarfélaga og er fyrsti varaþingmaður Framsóknar á Suðurlandi. Þá vinnur Ásgerður sem hjúkrunarfræðingur á Skjólgarði sem er hjúkrunarheimili í Hornafirði. Kristján Sigurjónsson ræðir viið þær.

Kjarasamningar eru lausir hjá starfsmönnum álveranna þriggja sem rekin eru hér á landi. Öll verkalýðsfélög álvers Norðuráls á Grundartanga hafa boðað verkföll frá 1. desember. Vilhjálmur Birgisson Formaður Verkalýðsfélags Akraness segir að deilan á Grundartanga sé stál í stál. Arnar Páll Hauksson talaði við hann

Konur eru áhyggjufullar hvort sýni úr leghálsskoðun hafi verið rétt greind og hvort ástæða sé til að taka ný sýni. Þetta segir formaður Félags fæðingar- og kvensjúkdómalækna. Heilbrigðisráðherra harmar þau alvarlegu og afdrifaríku mistök sem urðu hjá leitarstöð Krabbameinsfélagsins.

Alþjóðaheilbrigðisstofnunin gerir ekki ráð fyrir að bólusetningar gegn COVID-19 hefjist að einhverju ráði fyrr en um mitt næsta ár.

Tilslökun tveggja metra reglu og fjölgun úr 100 manns í 200 er skref í rétta átt að mati leikhússtjóra stóru leikhúsanna. Þær duga þó ekki til þess að sýningar hefjist af fullum þunga. Þjóðleikhússtjóri vonast eftir frekari tilslökunum á næstu vikum.

Mörg stéttarfélög hafa sett reglur um að bannað sé að dvelja í sóttkví eða einangrun í orlofshúsum.

Breyttar sóttvarnarreglur sem taka gildi á mánudag breyta litlu um skólahaldi í framhaldsskólum og háskólum. Þær hafa heldur ekki mikil áhrif í stóru leikhúsunum. Leikhússtjóri Borgarleikhússins segir þær að sjálfsögðu jákvæðar en þær bjargi ekki lífi leikhúsanna. Hún segir að fólk þyrsti í andlega næringu, nánd og samveru í leikhúsinu. Arnar Páll Hauksson ræddi við Brynhildi Guðjónsdóttur.

Hrun þýsku greiðslumiðunarinnar Wirecard afhjúpaði stærsta fjármálasvindli Þýskalands. Í viðbót við svindlið er einn kaflinn í þeirri sögu hvernig Wirecard hundelti blaðamenn Financial Times, sem voru fyrstir til að impra á að ekki væri allt í lagi. Wirecard sakaði þá um að ganga erinda vogunarsjóða sem græddu á verðfalli hlutabréfa Wirecard, braust inn í tölvur þeirra og herjaði á þá á samfélagsmiðlum. Útspekúleruð herferð, sem lauk þegar svindl Wirecard varð lýðum ljóst. Sigrún Davíðsdóttir sagði frá.

Kondórinn er allra ránfugla stærstur og jafnframt heitið á sameiginlegri leyniþjónustu átta einræðisríkja í Suður-Ameríku. Þau sameinuðust um mannrán, pyntingar, nauðganir og morð á mörg hundruð pólitískum andsæðingum þeirra á áttunda og níunda áratugnum. Pálmi Jónasson sagði frá.

Sóttvarnalæknir leggur til við heilbrigðisráðherra að miðað verði við eins metra nálægðarreglu í stað tveggja metra. Þá leggur hann til að samkomur verði takmarkaðar við tvö hundruð manns í stað hundrað.

Lögmaður konu sem hyggur á skaðabótamál við Krabbameinsfélagið vegna rangrar niðurstöðu úr leghálssýnatöku hefur fengið sjö fyrirspurnir vegna sambærilegra mála.

Norðurlöndin hafa komið betur út úr efnahagskreppunni vegna COVID-19 og en önnur Evrópuríki, samkvæmt samantekt frönsku AFP-fréttastofunnar í dag. Landsframleiðsla hafi dregist minna saman en á evrusvæðinu.

Bið er eftir því að að komast í endurhæfingu á Reykjalundi vegna eftirkasta Covid-19. Um 20 manns eru á biðlista.

Gullæði virðist hafa gripið um sig meðal viðskiptavina Costco því allar gullstangirnar sem verslunin var með á tilboði seldust upp á einum degi.

Samkvæmt nýrri skýrslu heilbrigðisráðherra hefur stuðningur við dánaraðstoð aukist meðal heilbrigðisstarfsmanna hér á landi. Síðasta viðhorfskönnun til þessa viðkvæma málaflokks er þó orðin 10 ára gömul. Þá taldi um fimmtungur lækna og hjúkrunarfræðinga réttlætanlegt undir vissum kringumstæðum að aðstoða sjúklinga við að deyja fremur en að lifa. Á meðal almennings var hlutfallið mun hærra í könnun fyrir fimm árum. Þrír af hverjum fjórum voru því fylgjandi að fara að dæmi nokkurra nágrannaþjóða okkar sem veita dauðvona sjúklingum dánaraðstoð. Eitt þeirra landa sem vitnað er til í skýrslu heilbrigðisráðherra er Sviss. Jón Björgvinsson segir frá.

Það var Bryndís Haraldsdóttir, þingmaður Sjálfstæðisflokksins, ásamt níu öðrum þingmönnum sem bað um skýrslu um dánaraðstoð. Heilbrigðisráðherra hefur lagt hana fram á Alþingi. Þar er dánaraðstoð skipt í 4 flokka eða hugtök: líknarmeðferð, óbein dánaraðstoð, læknisaðstoð við sjálfsvíg og loks beina dánaraðstoð. Farið er yfir hvernig dánaraðstoð er háttað í löndum þar sem hún er leyfð. Og ráðuneytið leggst ekki gegn því að gerð verði viðhorfskönnun meðal heilbrigðisfólks eins spurt var um en vill líka að slík könnun verði gerð meðal almennings. Bryndís Haraldsdóttir segir skýrsluna vera mikilvægt innlegg í umræðuna um þessi mál. Mál sem hún segir að þurfi talsverða þolinmæði og umræðan þurfi að þroskast. Arnar Páll Hauksson talar við Bryndísi Haraldsdóttur.

Nauðganir og annað kynferðislegt ofbeldi er daglegt brauð í gallabuxnaverksmiðjum í Lesotho í Suður-Afríku. Kröfur um úrbætur urðu háværar eftir að landlæg misnotkun komst í hámæli en COVID-19 heimsfaraldurinn hefur lamað réttindabaráttu kvenna í Lesotho. Pálmi Jónasson segir frá.

Spáð er snjókomu á hálendinu á norðan og austanverðu landinu á morgun. Færð gæti spillst og hætt er við að fé fenni í kaf.

Angela Merkel Þýskalandskanslari,var harðorð þegar hún krafði rússnesk stjórnvöld skýringa á banatilræði við stjórnarandstæðinginn Alexei Navalny, sem hafi verið byrlað taugaeitrið novichok.

Ótti og óöryggi eru eðlileg viðbrögð eftir að í ljós kom að 30 konur fengu ranga niðurstöðu úr leghálskrabbameinsskoðun. Þetta segir formaður Krafts, stuðningsfélags ungs fólks með krabbamein.

Flestir Íslendingar eru ánægðir með sóttvarnaraðgerðir á landamærunum og meirihluti landsmanna var sáttur við að aðgerðir voru hertar 19. ágúst.

Með hlutdeildarlánum til tekjulágra fyrstu kaupenda á bæði að greiða leið þeirra inn á fasteignamarkaðinn og ýta undir byggingu hagkvæmra íbúða, segir aðstoðarforstjóri Húsnæðis- og mannvirkjastofnunar. Anna Kristín Jónsdóttir talar við ÖnnuGuðmundu Ingvarsdóttur.

Kísilverið PCC á Bakka við Húsavík hóf rekstur í apríl 2018. 1. júlí var 80 starfsmönnum versins sagt upp störfum og framleiðslunni hætt tímabundið eða smám saman dregið úr henni. Verð á kísilmáli hafði fallið nokkuð í einhvern tíma en COVID -19 gerði útslagið. Um 150 störfuðu hjá PCC þau rúmu tvö ár sem verksmiðjan starfaði. Uppsagnarfrestur starfsmanna er mislangur. Um síðustu mánaðamót voru enn 103 á launaskrá og búist er við að 40 til 50 verði á launum þó að framleiðslunni hafi verið hætt. Arnar Páll Hauksson talaði við Aðalstein Baldurson um stöðuna hjá fyrirtækinu.

Á Covid-19 tímum glíma ýmsar stórborgir við kleinuhringsfyrirbærið: dauðar miðborgir en ný umsvif í öðrum hverfum. Í Bretlandi hefur ríkisstjórnin hvatt fólk til að fara aftur í vinnuna, líkt og það væri þegnskylda að bjarga miðborgum. Aðrir telja þetta enn eitt dæmi um að veirufaraldurinn ýtir undir þróun, sem var þegar hafin. Sigrún Davíðsdóttir sagði frá.

Flugfélagið Ernir ætlar að hætta áætlunarflugi til Vestmannaeyja. Íris Róbertsdóttir, bæjarstjóri segir það grafalvarlegt.

Ríkið á að bæta rúmlega milljarði á ári í stofnanasamninga til að bæta kjör hjúkrunarfræðinga. Þetta er úrskurður Gerðardóms. Guðbjörg Pálsdóttir ,formaður Félags íslenskra hjúkrunarfræðinga segir að nú taki við viðræður um hvernig fjármunirnir nýtist sem best.

Allmargir námsmenn voru handteknir í Minsk í dag þegar þeir mótmæltu kosningaúrslitum í Hvíta-Rússlandi í síðasta mánuði og kröfðust afsagnar Lúkasjenkós forseta. Bogi Ágústsson sagði frá.

Skipulag í Vogabyggð hefur gert hagstæðustu leiðina við gerð Sundabrautar ómögulega segir Eyþór Laxdal Arnalds oddviti sjálfstæðismanna í borgarstjórn. Dagur B. Eggertsson borgarstjóri segir að nú sé verið að bera saman tvo kosti, lágbrú og göng, og málið sé í traustum farvegi. Sundabraut var efni óundirbúnar fyrirspurnar á borgarstjórnarfundi í dag þegar þær voru leyfðar fyrsta sinni.

Íslenskir fjallaleiðsögumenn er eitt þeirra fyrirtækja sem hefur þurft að segja upp öllum starfsmönnum sínum eftir að kórónufaraldurinn tók að geisa. Nú í ágúst er velta fyrirtækisins innan við 10% af veltunni á sama tíma í fyrra. Valgerður Árnadóttir talaði við Arnar Bjarnason forstjóra Íslenskra fjallaleiðsögumanna

-----

Katrín Jakobsdóttir, forsætisráðherra segir mikilvægt í efnahagslægð að bregðast við bæði til skemmri og lengri tíma, Rannsóknasjóður, tækniþróunarsjóður og innviðasjóður verða efldir í sérstöku þiggja ára átaksverkefni. Framlög á næsta ári verða aukin um 50%.

Kórónu-óþol er ekki sjúkdómur heldur merki um þreytu í samfélögunum vegna tilrauna yfirvalda til að takmarka útbreiðslu kórónu-veirunnar. Óánægja fólks kemur oftar og oftar fram - en er oft á tíðum ekki bundin við skipuleg mótmæli. Fólk finnur upp á allskonar vitleysu þegar allt er bannað. Gísli Kristjánsson hefur dæmi um þetta frá Noregi.

Í dag var starfsemi Landspítalans færð af hættustigi, sem hún hefur verið á frá því í vor vegna kórónuveirufaraldursins, niður á óvissustig. Dagleg stjórnun færist í hefðbundið form og takmarkanir á heimsóknum eru rýmkaðar svo nokkuð sé nefnt. Anna Sigrún Baldursdóttir, aðstoðarmaður forstjóra spítalans, telur þó að starfsemi hans færist líklega ekki alveg í sama horf og var fyrir farsótt, ýmislegt af því sem tekið hafi verið upp vegna hennar skili árangri í baráttu við annað en kórónuveiru.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar. Ingibjörg Sara Guðmundsdóttir.

Samdráttur í landsframleiðslu í vor er dæmalaus. Gylfi Zoëga, hagfræðiprófessor telur ástandið þó skárra en það gæti verið og miklu skipti að einkaneysla innanlands haldi áfram að örva hagkerfið. María Sigrún Hilmarsdóttir ræddi við hann og tók líka fólk tali í miðbænum um horfur í vetur.

Öllum starfsmönnum Herjólfs hefur verið sagt upp; horfur eru á að halli af rekstri ferjunnar verði 400 milljónir króna í ár segir Guðjón Ellert Jónsson, forstjóri Herjólfs ohf.

Þórólfur Guðnason sóttvarnalæknir sér fyrir sér að slakað verði á sóttvarnareglum næst þegar þær verða uppfærðar og býst við að senda ráðherra slíka tillögu á næstu dögum. Birgir Þór Harðarson sagði frá.

Samstarfsfólk rússneska stjórnarandstæðingsins Alexei Navalnys ætlar ekki að leggja árar í bát þó leiðtogi þeirra liggi þungt haldinn á spítala. Héraðskosningar verða í Rússlandi 13. september og þar ætla þau að hvetja fólk til að kjósa eftir ákveðnu kerfi líkt og fyrir kosningar til borgarþings Moskvu í fyrra, segir Lyubov Sobol, lögfræðingur sem starfar hjá stofnun Navalnys. Dagný Hulda Erlendsdóttir sagði frá.

Íbúar á Fljótsdalshéraði hafa stofnað aðgerðahóp til að setja upp varúðarskilti og bjarghringi við Eyvindará þar sem fólk sem stekkur í ána og hefur írekað lent í vandræðum. Rúnar Snær Reynisson ræðir við Sigrúnu Jónu Hauksdóttur stofnanda hópsins.

Danir hyggjast fækka uppsögnum með því að stytta vinnutíma starfsfólks. Það fái atvinnuleysisbætur sem nemi lækkuðu starfshlutfalli. Nikolai Wammen, fjármálaráðherra, sagði að danskt efnahagslíf væri á margan hátt veikara en nokkru sinni frá lokum síðari heimsstyrjaldar.

Bogi Ágústsson tók saman.

----------

Einkaneysla dregst saman, vinnustundum fækkar, og samdráttur landsframleiðslu var sá mesti á öðrum ársfjórðungi sem mælst hefur frá því farið var að mæla hann hér segir Hagstofan. Þessi samdráttur er rúmlega níu prósent og er sprottinn af áhrifum heimsfaraldurs COVID-19 og aðgerðum sem gripið hefur verið til til að sporna gegn útbreiðslu farsóttarinnar. Anna Kristín Jónsdóttir ræddi við Karínu Ólafsfdóttur hagfræðing og lektor við Háskólann í Reykjavík.

Um 8000 manns hefur á síðustu sex mánuðum verið sagt upp í yfir 110 hópuppsögum. Vinnumálastofnun hefur aldrei tekið við svo mörgum tilkynningum segir Karl Sigurðsson sérfræðingur hjá stofnuninni.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar: Ingibjörg Sara Guðmundsdóttir.

133 starfsmönnum Isavia var sagt upp í dag og tólf til viðbótar boðið að lækka starfshlutfall sitt. Störfum hjá Isavia hefur fækkað um 40 prósent frá því Covid-19 faraldurinn hófst.

Icelandair er kerfislega mikilvægt fyrirtæki og verulegir samfélagslegir hagsmunir í húfi, sagði fjármálaráðherra í umræðu á Alþingi um ríkisábyrgð fyrir Icelandair. Stjórnarandstæðingar veltu fyrir sér hvaða fordæmi væri sett.

Forseti Frakklands segir að ríki heims verði að taka höndum saman til hjálpar stjórnvöldum í Líbanon eftir sprenginguna fyrr í mánuðinum. Hætta er á borgarastyrjöld í landinu verði ekkert að gert.

Kosið verður í fjórar heimastjórnir og sveitarstjórn í nýju sveitarfélagi á Austurlandi 19. september.

Úrslitakeppni NBA-deildarinnar í körfubolta komst í uppnám þegar leikmenn lögðu niður störf í vikunni. Þeir sögðu að of lengi hefðu svartir Bandaríkjamenn búið við misrétti og lögregluofbeldi.

Þó að skólastarf í grunnskólum sé rétt að hefjast hefur faraldurinn strax sett svip sinn á það. Skólasetningu í þremur skólum var frestað og á annað hundrað starfsmanna eru í sóttkví. Þá verða göngur og réttir með óhefðbundnu sniði í ár.

Aðeins hluti þeirra mörg hundruð starfa sem nú eru laus til umsóknar koma inn á borð Vinnumálastofnunar sem kallar eftir meira samráði við atvinnurekendur. Flest störfin eru í félags- og heilbrigðisþjónustu.

Aldrei hefur verið lagt hald á jafn mikið af kókaíni hér á landi og árið 2019. Þetta sýnir afbrotatölfræði frá Ríkislögreglustjóra. Heimilisofbeldismálum fjölgaði mikið í fyrstu bylgju faraldursins.

Búast má við að afborganir óverðtryggðra lána hækki talsvert þegar hagkerfið tekur aftur við sér og vextir hækka. Húsnæðis- og mannvirkjastofnun segir að bönkum og lánastofnunum beri að upplýsa lántakendur um hugsanlega hækkun.

Nokkuð hörð gagnrýni kom fram á Alþingi af hálfu stjórnarandstöðunnar þegar aðgerðir stjórnvalda vegna kórónuveirufaraldursins voru ræddar upphaf þingfundar í dag. Tilefnið var munnleg skýrsla sem Katrín Jakobsdóttir, forsætisráðherra, flutti um stöðu COVID mála. Hún fór yfir þróunina og þær aðgerðir sem stjórnvöld hafa gripið til til að sporna við útbreiðslu veirunnar. Arnar Páll Hauksson tók saman.

Um 11 milljarðar er upphæðin sem sænsk yfirvöld telja að hafi verið svikið út úr eftirlaunasjóðum á vegum fyrirtækisins Falcon Funds. Þetta er annað stóra sakamálið á skömmum tíma í Svíþjóð, þar sem umsjónarmenn eftirlaunasjóða eru grunaðir um að hafa fé af fólki. Málin þykja sýna hve lítið eftirlit er með því hvernig farið er með eftirlaunasparnað sænsks launafólks. Kári Gylfason segir frá.

Kristján Bragason, framkvæmdastjóri samtaka launafólks í matvæla-, ferðaþjónustu og landbúnaði í Evrópu, segir að um fjórar milljónir farandverkamanna í landbúnaði búi við skelfilegar aðstæður og upplifi launaþjófnað. COVID-19 hefur beint athygli stjórnvalda víða í Evrópu að stöðu þessa fólks. Arnar Páll Hauksson talar við Kristján Bragason.

Forstjóri Icelandair segir að allt þurfi að ganga saman, lánalína stjórnvalda og hlutafjárútboðið til að tryggja framtíð fyrirtækisins. Félagið stefni að því að ganga ekki á rúmlega 15 milljarða lánalínu frá stjórnvöldum.

Ferðatakmarkanir, sem ríkisstjórnin setti á í síðustu viku, setja markaðsátak Íslandsstofu í óvissu. Þegar er búið að ráðstafa þrjú hundruð milljónum í verkefnið.

Afurðaverð til bænda hefur ekki verið kynnt af sláturleyfishöfum. Mikil óvissa ríkir um afkomu bænda vegna þessa. Erfiðlega hefur gengið að manna sláturtíð vegna ferðatakmarkana

Handspritt í litlum glerflöskum sem selt er í verslunum hér á landi hefur vakið hörð viðbrögð þar sem flöskurnar þykja höfða til fólks sem glímir við áfengisvanda. Yfirlæknir á Vogi segir fólk, sem hefur drukkið spritt eftir að faraldurinn skall á, leita þangað í auknum mæli.

Samninganefndir Sjúkraliðafélags Íslands og Samtaka fyrirtækja í velferðarþjónustu funduðu hjá ríkissáttasemjara í morgun, en samningar sjúkraliða á elli- og hjúkrunarheimilum hafa verið lausir síðan í mars í fyrra. Sjúkraliðar eru langþreyttir á samningsleysinu og íhuga nú aðgerðir.

Alþingi kemur saman á morgun. Þetta verður stutt þinghald sem mun standa yfir í um það bil viku. Það á eftir að koma í ljós því stefnt er að því að afgreiða fjölmörg mál. Ríkisábyrgð til handa Icelandair, hlutdeildarlán, og ýmis önnur mál sem tengjasr COVID, að hlutabótaleiðin verði framlengd og tímabil tekjutengdra atvinnuleysisbóta verði lengt í 6 mánuði. Arnar Páll Hauksson talaði Þorgerði Katrínu Gunnarsdóttur, formann Viðreisnar og Willum Þór Þórsson, formann fjárlaganefndar.

Þrátt fyrir orð Boris Johnsons forsætisráðherra Breta í júní um að hespa nú af Brexit-samningunum við Evrópusambandið telur Michel Barnier aðalsamningamaður ESB að í síðustu samningatörn hafi heldur miðað aftur á bak en áfram. Fyrir mánuði taldi Barnier samninga ólíklega og eins nú. Það hefur ekkert heyrst nýlega hvernig staðan horfi við forsætisráðherra Breta né öðrum ráðherrum. Sigrún Davíðsdóttir sagði frá.