Víðsjá

Í Listasafni Árnesinga í Hveragerði var opnuð stór sýning um liðna helgi, þar sem fjórir listamenn sýna í fjórum sölum hússins, þau Ingunn Fjóla Ingþórsdóttir, Magnús Helgason, Þórdís Helga Zoega og Lóa Hjálmtýsdóttir. Sýningar þessa fjögurra listamanna eru ólíkar, en eiga það þó sameiginlegt að fjalla á einhvern hátt um yfirborðið, sem er ekki alltaf það sem það sýnist. Sýningarnar eiga það líka sameiginlegt að vera litríkar og fullar af leikgleði. Við ræðum við listamenninga og Erin Honeycutt sýningarstjóra í þætti dagsins.

Við fjöllum líka um bandaríska tónskáldið George Crumb sem var eitt þekktasta tónskáld Bandaríkjanna á síðari hluta 20. aldar. Crumb var frumkvöðull í því að stækka notkunarmöguleika hefðbundinna hljóðfæra og leit svo á að að lokum myndi öll tónlist veraldar renna saman í einn straum. George Crumb lést í hárri elli í gær, við segjum frá honum í þætti dagsins.

Gréta Sigríður Einarsdóttir fjallar um Bærinn brennur, eftir Þórunni Jörlu Valdimarsdóttur og Eva Halldóra Guðmundsdóttir fjallar um leiksýninguna Ein komst undan, sem frumsýnd var í Borgarleikhúsinu um liðna helgi.

Umsjón: Guðni Tómasson og Halla Harðardóttir

Eins langt og augað eygir kallast umfangsmikil yfirlitssýning á verkum Birgis Andréssonar sem tekur yfir nær alla Kjarvalstaði. Birgir var leiðandi afl í myndlistarsenu Reykjavíkur í áratugi og skapar stóran sess í listasögu Íslands, en hann lést langt fyrir aldur fram, árið 2007. Birgir hélt fjölda sýninga hérlendis og erlendis á litríkum ferli sínum og var valinn til að taka þátt í Feneyjatvíæringnum árið 1995 fyrir hönd Íslands. Í Víðsjá dagsins verður rætt við aðstandendur yfirlitssýningarinnar; sýningarstjórann Robert Hobbs, hönnuðinn Ásmund Hrafn Sturluson, Aldísi Snorradóttur verkefnastjóra sýninga hjá Listasafni Reykjavíkur og Börk Arnarsson eiganda i8 gallerí. Þar að auki verða viðtöl við Birgi sjálfan sótt í safn Ríkisútvarpsins.

Umsjón: Guðni Tómasson og Halla Harðardóttir.

Á föstudag frumsýnir Inga Maren Rúnarsdóttir í samstarfi við Íslenska dansflokkinn verkið Hvíla sprungur í Borgarleikhúsinu. Í verkinu dansa fjórir dansarar í sviðsmynd sem unnin er af Júlíönnu Láru Steingrímsdóttur upp úr stærðarinnar ljósmyndum eftir RAX. Höfundurinn lýsir verkinu sem mjög persónulegu en hún semur það í samstarfi við dansarana á eigin lífsreynslu. Við heyrum af verkinu og vinnuaðferðum höfundar hér undir lok þáttar.

Við förum líka í bíltúr með Kristínu Gunnlaugsdóttur myndlistarkonu. Hún sýnir neon-abstrakt málverk í myrkvuðu Y-galeríi í Hamraborg í Kópavogi og sú sýning er reyndar líka spegluð niður í glugga í húsi við Hverfisgötu í Reykjavík.

Og Gauti Kristmannsson segir sína skoðun á ljóðabók sem kom út í desember, Á asklimum ernir sitja, eftir Matthías Johannessen.

Umsjón: Guðni Tómasson og Halla Harðardóttir

Við höldum í Marshall húsið vestur á Granda en þar hafa nokkrar breytingar orðið. Við heimsækjum sýningarsal i8 og ræðum við Börk Arnarson eiganda i8, en í þessu sýningarrými er nú komin upp sýning á verkum pólsku listakonunnar Aliciu Kwade, sem i8 á orðið langt og gott samstarf við.

Dalrún Kaldakvísl sagnfræðingur heldur áfram að fjalla um konur og náttúruvernd. Í dag segir Dalrún okkur frá frelsi kvenna á heiðum og öræfum fyrr á tíð, út frá svipmyndum úr lífi tveggja kvenna sem bjuggu þar stóran hluta ævi sinnar.

Í dag opnar sýningin SUND í Hönnunarsafni Íslands. Það má með sanni segja að sundlaugarmenning okkar sé einstök og að henni koma mörg svið hönnunar. Arkitektúr, grafísk hönnun, vöruhönnun, fatahönnun og upplifunarhönnun eru brot af þeirri menningu sem skapar sundið en laugarnar eru ekki síst ein stór samfélagshönnun. Á bak við sýninguna standa Brynhildur Pálsdóttir hönnuður og Valdimar Tr. Hafstein prófessor í þjóðfræði en við uppsetningu sýningarinnar er stuðst við rannsóknir hóps þjóðfræðinga við HÍ sem varpa skýru og skemmtilegu ljósi á sundmenningu okkar.

Umsjón: Guðni Tómasson og Halla Harðardóttir

Víðsjá lítur inn í D-sal Listasafns Reykjavíkur þar sem Ásgerður Birna Björnsdóttir opnaði nýverið sýninguna Snertitaug. Ásgerður Birna býr og starfar í HOllandi en hefur sterka tengingu við íslensku myndlistarsenuna, hefur tekið þátt í samsýningum og rekstri á sýningarrýmum, en þetta er hennar fyrsta einkasýning hér á landi. Á sýningunni er Ásgerður Birna að velta fyrir sér sambandi náttúru og tækni og notar til þess meðal annars sólarrafhlöður, kartöflur, valhnetur og rafmagnssnúrur.

Eva Halldóra Guðmundsdóttir, nýr leikhúsrýnir Viðsjár, fjallar um Það sem er eftir Peter Asmussen í Tjarnarbíói, einleik í flutningi Maríu Ellingsen.

Og við heyrum af málverki sem á sér ansi merkilega sögu, Blá drengnum, eftir breska málarann Thomas Gainsborough. Málverkið er nú komið heim til Bretlands í stutt stopp eftir hundrað ár í Kaliforníu þar sem blái drengurinn býr, en hann varð að merkilegu tákni í réttindabaráttu samkynhneigðra.

En við byrjum þáttinn í dag á að láta hugann reika á heitari slóðir, og inn í hvíta villu sem hefur að geyma forvitnilegt safn málverka af börnum.

Umsjón: Guðni Tómasson og Halla Harðardóttir

Í Víðsjá dagsins verður meðal annars rætt við listamennina Harald Jónsson og Ástu Fanneyju Sigurðardóttur um ?Langa helgi? sem er heiti á samsýningu myndlistarmanna sem framundan er á Hótel Hafnarfjalli við Borgarnes. Víðsjá fær jafnframt sendingu frá spæjarastofu Hversdagssafnsins sem starfrækt er á Ísafirði en þaðan berst hlustendum lítil rannsókn á áhrifum skuggans á manneskjuna. Og Ólöf Gerður Sigfúsdóttir fjallar í sjónmenningar-rýni sinni um sýningahald í Listasafninu á Akureyri þessa dagana. Og myndlistarsýning inn í tölvuleik kemur við sögu.

Rætt við Brynju Cortez Andrésdóttur Sælureit agans eftir svissneska rithöfundinn Fleur Jeaggy.

Hlustendur heyra ræður verðlaunahafa á íslensku bókmenntaverðlaunum sem afhent voru á Bessastöðum í gærkvöld.

Hlustendur heyra jafnfram brot úr þætti þætti Guðbergs Bergssonar um Málfríði Einarsdóttur sem hét "Í þessu herbergi hefur búið doktor" og var sendur út árið 1989 en nú er skáldsaga Málfríðar, Samanstaður í tilverunni, kvöldsaga sem hlustendur geta notið á síðkvöldum á Rás 1.

Umsjón: Guðni Tómasson

Í Víðsjá dagsins verður m.a. haldið í Þjóðminjasafn Íslands við Suðurgötu þar sem Marinó Thorlacius sýnir ljósmyndir sínar á sýningu sem hann kallar Straumnes. Snorri Rafn Hallsson, pistlahöfundur í Vín heldur áfram að fjalla um vinnu. Í dag býður Snorri Rafn hlustendum á sýningu í leikhúsi framleiðninnar, sýningu sem við tökum öll þátt í með einum eða öðrum hætti. Og að gefnu tilefni verður í þætti dagsins fjallað um verk rússneska listmálarans Vasilys Vereshchagin.

Umsjón: Guðni Tómasson

Í Víðsjá dagsins verður haldið í heimsókn í Listasafn Íslands en sýningin Sviðsett augnablik var opnuð þar um síðustu helgi. Sýningin hefur að geyma verk úr safneign safnsins þar sem ljósmyndin er notuð við listsköpun og er hluti Ljósmyndahátíðar Íslands sem nú stendur yfir. Víðsjá ræðir við sýningarstjórann Vigdísi Rún Jónsdóttur um sýninguna. Í þættinum verður jafnframt hugað að Valgerði Jónsdóttur biskupsfrú en sýning um lífshlaup hennar er nú uppi í Þjóðarbókhlöðu vegna þess að í fyrra voru 250 ár eru liðin frá fæðingu þessarar merku konu. Og í Víðsjá hljómar líka pistill frá Birni Jóni Sigurðssyni, leikhúsmanni, sem hann kallar innviðir hugans.

Umsjón: Guðni Tómasson.

Víðsjá heimsækir Hafnarborg í dag og ræðir við Hallgerði Hallgrímsdóttur sem þar er að setja upp ljósmyndasýningu sem tekst á við ljósmyndamiðilinn sjálfan og tæknilegar og fagurfræðilegar hliðar hans. Sýninguna kallar Hallgerður Fáeinar vangaveltur um ljósmyndun ? III. Hluti

Væntanlegt barnarými á jarðhæð Hörpu gefur börnum tækifæri til að upplifa tónlist á margvíslegan hátt. Kyrrð og mýkt í bland við leyndardóma og uppgötvanir einkenna rýmið. Skynjun mannseyrans á hljóðum og tónar náttúrunnar er meðal þess sem gestir fá að kynnast í þessu notalega rými. Hönnunarteymið Þykjó stendur að verkefninu og leyfði Víðsjá að taka stöðuna á ferlinu. Einn starfsmanna Hörpu, Melkorka Ólafsdóttir, og Sigríður Sunna Reynisdóttir, verða fyrir svörum.

Og Víðsjá hittir líka Gjörningaklúbbinn, en hann skipa myndlistarkonurnar Jóní Jónsdóttir og Eirún Sigurðardóttir. Við hittum þær stöllur í versluninni Norr á Hverfisgötu, en þar sýna þær feminísk verk á sýningu sem heitir Seigla.

Umsjón: Guðni Tómasson