Kultur

Vläicht hutt der et an äre Soziale Medie gesinn, dass Museksfans weltwäit den amerikanesche Streaming Service Spotify verloossen. Et gëtt vu politeschen an ethesche Grënn geschwat. D‘Claire Barthelemy bericht vu London.

Ënnert de sëlleche politeschen Instrumenter setzt d'Europäesch Unioun Wirtschaftssanktiounen an, zum Beispill géint Russland als Reaktioun op d'Invasioun vun der Ukrain. Uviséiert ginn och Eenzelpersounen. Wärend laang Individuen aus Drëttstaaten ënner Strof gestallt gi sinn, betrëfft dat zënter kuerzem awer och EU-Bierger.

Firwat dës Entwécklung problematesch ass, erkläert de lénken éisträichesche Publizist Hannes Hofbauer a sengem Buch "Aller Rechte beraubt. Mit aussergerichtlichen EU-Sanktionen zum autoritären Staat" (Promedia Verlag).

Op der Leipziger Buchmesse huet de Michel Delage mam Hannes Hofbauer geschwat.

Den Iwwerbléck vun der aktueller Filmprogrammatioun mam Michel Delage.

Dem Nadav Lapid säi Film "Yes" ass ee formell experimentellt Wierk, dat sech mat der Identitéit vum Kënschtler an Israel nom 7. Oktober befaasst. Um LuxFilmFest huet de Film seng Lëtzebuergesch Premiere gefeiert. De Jeff Schinker konnt mam Realisateur schwätzen – a gouf ënnert anerem gewuer, wéi et méiglech war, dass esou ee kritescht Wierk vum israeelesche Film Fund konnt ënnerstëtzt ginn – a wéi d’Regierung op d’Sortie vum Film an Israel Ufank dës Joers reagéiert huet.

"Peuple de verre" vun der kanadescher Schrëftstellerin Catherine Leroux ass eng als Science-Fiction getarnten Erzielung iwwert eng Logement-Kris, déi als Metapher fir déi ëmmer méi grouss Schéier tëscht aarm a räich déngt. De Jeff Schinker huet de pechschwaarze Roman gelies

Muer ass Fréijoersufank! An...hutt dir di grouss Fréijoersbotz schonn an Ugrëff geholl? Respektiv di al Bieseme prett gemaach, well déi jo anscheinend besser Kieren? D’Performancekënschtlerin a Bünebildnerin Clio Van Aerde beschäftegt sech zanter Laangem mam Sujet “Botz”, méi genee mat den onsiichtbare Säiten a funktionelle Geste vun net valoriséierte Jobben. Hiren Danzpartner bei der gesellschaftskritescher Performance “work it” ass e Biesem. Den owend kënnt dir di aktuell Versioun an der Escher Kufa materliewen: d’Clio Van Aerde war do elo ee Mount a Kënschtlerinneresidenz an d’Kerstin Thalau war bis laanscht.

Zënter e Mëttwoch ass d'Leipziger Buchmesse op. No Frankfurt ass et déi zweetgréisste Bicherfoire an Däitschland, an eng vun de wichtegsten an Europa. Kee Gaaschtland dëst Joer zu Leipzig, mee eng ganz Regioun, nämlech d'Donau-Géigend, déi als Fokus-Thema ervir gehuewe gëtt. De Michel Delage ass fir eis op der Plaz.

Sechs Episoden, kee risege Budget, keng grouss Nimm an trotzdeem schwätzt déi ganz Welt vun engem Dag op deen aneren iwwer "Heated Rivalry". D'Serie erzielt d'Geschicht vun zwee Äishockey-Spiller an hirer geheimer Relatioun. Et geet ëm Rivalitéit, Intimitéit, strukturell Homophobie am Spëtzesport a schlussendlech och ëm Acceptanz.