Lestin

Við hefjum þáttinn á að rýna í BAFTA verðlaunin sem veitt voru um helgina. Ótvíræður sigurvegari hátíðarinnar, All Quiet on the Western Front átti litlu fylgi að fagna á heimaslóðunum í Þýskalandi en sópaði að sér verðlaunum í London.

Guðrún Svavarsdóttir, doktorsnemi við Hagfræðideild Háskóla Íslands flytur okkur nú fyrsta pistil af tveimur um hvernig hagfræðin sér hamingjuna.

Stone Maidens eftir Lloyd Devereux Richards trónir nú á toppi metstölulista Amazon. Þetta er 11 ára gömul bók sem rauk upp í sölu eftir að dóttir Richards, setti myndband um skrif pabba síns á TikTok. Stella Soffía Jóhannesdóttir verkefnastjóri útgáfu hjá Storytel og framkvæmdastjóri Bókmenntahátíðar í Reykjavík sem kíkir við hjá okkur og ræðir þetta athyglisverða svæði þar sem samfélagsmiðlar mæta bókmenntum.

Minnstu mátti muna að einn þekktasti samkvæmisdansari okkar Íslendinga, Þorkell Jónsson hefði verið á svæðinu þegar ellefu voru skotin til bana í dansstúdíói þar sem Þorkell kennir samkvæmisdans. Þórður Ingi Jónsson útsendari Lestarinnar í Los Angeles hitti Þorkel og ræddi við hann um þennan örlagaríka dag.

Gervigreindin er víðar en mann grunar og hún er farin að framleiða fyrir okkur hluti. María Óskarsdóttir og Bragi Valdimar Skúlason koma í heimsókn til að ræða stöðuna, nýjustu hreyfingar, framtíðina og hvernig fara skuli með þetta.

Platan Cosmic Cedar með hljómsveitinni The Ghost Choir er bara rétt ókomin í búðir en við fáum að heyra aðeins um pælingarnar á bak við plötuna og samstarf þessara ólíku tónlistarmanna. Hannes Helgason hljómborðsleikari sem segir okkur frá spunatónlist, frídjassi og áhrifum frá fornum menningarheimum.

Kolbeinn Rastrick flytur pistil um kvikmyndina Decision to Leave í leikstjórn Park Chan-wook sem er hvað þekktastur fyrir Hefndarþríleikinn og kvikmyndina Oldboy.

Við kíkjum líka á bókina The Chaos Machine eftir Max Fisher og fáum Gauk Úlfarsson til okkar til að ræða djúpstæð áhrif samfélagsmiðla á heiminn.

Rihanna tróð upp í hálfleik á Ofurskálinni um helgina, það er úrslitaleikurinn í ameríska fótboltanum og einn stærsti sjónvarpsviðburður vestanhafs á hverju ári. Til að ræða þetta mikla sjónarspil fengum við sviðslistagagnrýnanda Víðsjár yfir til okkar, hana Nínu Hjálmarsdóttir.

Eyrún Lóa Eiríksdóttir segir Suður-kóresku sjónvarpsbylgjunni sem teygir anga sína alla leið hingað í gegnum Netflix og fjallar um þættina Crash Course in Romance sem eru um margt merkilegir.

Að lokum er ekki annað hægt en að velta ástinni fyrir sér á valentínusardegi, hvaða form hún tekur og hvort hún sé kannski svolítið ill í eðli sínu.

Í dag er alþjóðlegur dagur útvarpsins og af því tilefni leiðum við hugann að frægum útvarpsmanni, útvarpsmanni sem fæstir kannski vita að hafi unnið í útvarpinu, gefa því allavega ekki mikinn gaum. Sá sem um ræðir er þýski heimspekingurinn og menningarfræðingurinn Walter Benjamin.

Við hugum líka að óperunni, aldrei þessu vant. Þó ekki óperum í stórum sal með flúruðum svölum og demantsskreyttum ljósakrónum heldur í dimmum kjallara Þjóðleikhússins. Don Pasquale, gamanópera eftir ítalska tónskáldið Gaetano Donizetti er sýnd af sviðslistarhópnum Óði í Þjóðleikhúskjallaranum um þessar mundir.

Þau Sólveig Sigurðardóttir, Áslákur Ingvarsson og Þórhallur Auður Helgason úr hópnum komu til okkar og ræddu verkið og pönk og óformlegheit óperunnar.

Patrekur Björgvinsson var með pistla hér í Lestinni á síðasta ári þar sem hann velti fyrir sér fyrirbærum í alþýðumenningu Íslendinga. Í ljósi þess að það er mánudagur og veðrið er eins og ætlum við að rifja upp pistil Patreks um listina að kvarta.

Eftirvæntingin var mikil þegar LeBron James og félagar í Los angeles Lakers mættu Oklahoma City Thunder í NBA deildinni í gær. Þó var eftirvæntingin hvað mest vegna þess að líklega myndi LeBron James, langstærsta stjarna deildarinnar, skrá sig í sögubækurnar. Með tveggja stiga körfu í lok þriðja leikhluta skaut hann sér fram úr stigameti Kareem Abdul Jabbar. James hefur nú skorað 38,390 stig í venjulegum deildarleikjum. Leikurinn var stöðvaður, salurinn ærðist og hver einasti sími í húsinu á lofti. Fjölskylda LeBron fór inn á völlinn í fögnuði og fyrrum methafinn stóð upp og klappaði. Við ræðum við Hörð Unnsteinsson körfuboltaþjálfara um þetta augnablik og merkingu þess, tölfræðiblæti í íþróttum vestanhafs og pródúseruð söguleg augnablik.

Drag sem listform verður sífellt meira áberandi í dægurmenningunni, ekki síst fyrir tilstilli raunveruleikaþáttanna RuPaul?s Drag Race. 15. þáttaröð stendur nú yfir, vinsældirnar fara síður en svo dvínandi en það er munur á því sem áhorfendum birtist á skjánum og því sem fram fer á dragsýningum um allan heim. Íslenska dragfjölskyldan House of Heart heldur mánaðarlega sýningu á skemmtistaðnum Kíkí og sú næsta fer fram núna á Laugardaginn, við tókum stöðuna á þeim Glóeyju Þóru Eyjólfsdóttur, eða Chardonnay Bublée og Magnúsi Degi Gottskálkssyni, eða Úllu la Delish.

Seyðfirðingar fagna komu sólarinnar með hátíðinni List í ljósi sem fram fer dagana 10. og 11. febrúar. Þetta hefur verið árlegur viðburður frá árinu 2016 og tilefnið er eins og nafnið gefur til kynna endurkoma langþráðs sólarljóss inn í fjörðinn. Fjöldi gesta víða að sýnir listaverk, innsetningar og gjörninga um allan bæ þar sem ljósið er í lykilhlutverki. Lestin hringdi austur til Seyðisfjarðar í Sesselju Hlín Jónasardóttur og fékk að vita aðeins meira um hátíðina í ár.

Konunglegi Ballettinn í Birmingham vinnur nú að ballett byggðum á lögum þungarokkssveitarinnar Black Sabbath. Nýr listrænn stjórnandi Ballettsins leggur upp með að vinna með menninguna á svæðinu og hefur áður sett upp City of a Thousand Trades, sem fjallar um innflytjenda- og iðnarsögu borgarinnar.

Hugarflug, ráðstefna Listaháskóla Íslands fer fram á föstudag 10. febrúar en opnunarhátíð er á fimmtudag. Yfirskrift ráðstefnunnar eða hátíðarinnar í ár er ?Margfeldi framtíða??. Í einum þessara fyrirlestra fjallar hópurinn Artists in Iceland Visa Action Group (AIVAG) um beitingu reglugerða varðandi vegabréfsáritanir og dvalarleyfi og áhrif þess á listræna starfsemi, menningarstofnanir og stöðu listamanna af erlendum uppruna á Íslandi. Bryndís Björnsdóttir og Megan Auður í AIVAG halda fyrirlesturinn en einnig verða einnig hvor með sína vinnustofu. Við heimsækjum Megan Auði á kaffistofu Höggmyndafélagsins.

Við lítum svo við í Gallerí Þulu á Hjartatorgi, þar stendur yfir sýning myndlistarmannsins Þorvalds Jónssonar, Hringiða. Þetta er skemmtileg og svolítið skrípó sýning þar sem fylgst er með sjö fígúrum, ævintýrum þeirra og lífshlaupi.

Við kíkjum á Grammy-verðlaunahátíðina sem fram fór um helgina og rifjum upp viðtal við plötusnúðinn Natalie Gunnarsdóttur um house tónlist og Renaissance, nýjustu plötu Beyoncé. Beyoncé hefur nú hlotið flest Grammy-verðlaun allra listamanna.

Hallgrímur Árnason myndlistarmaður sem búsettur er í Vín opnar sína fyrstu einkasýningu um helgina þar sem hann sýnir abstrakt verk á óhefðbundinn hátt þar sem bakhlið málverkanna leikur jafnstórt hlutverk og framhliðin. Við sláum á þráðinn til Vinar til að forvitnast um sýninguna, sem hann kallar fehlerhaft [k?tl?ð].

Að lokum leit Vigdís Hafliðadóttir við í Lestinni, hún er söngkona hljómsveitarinnar FLOTT sem sendi frá sér lagið Hún ógnar mér á dögunum. Þura Stína Kristleifsdóttir, Reykjavíkurdóttir og leikstjóri tónlistarmyndbandsins við lagið var á línunni frá Mílan.

Við pælum í Pamela: A Love Story, heimildarmynd um Pamelu Anderson sem kom út á Netflix á dögunum sem nokkurs konar svar við þáttunum Pam & Tommy sem komu út í fyrra í óþökk Pamelu.

Fyrir nokkrum árum hófst doktorsrannsókn hér á landi þar sem markmiðið var að rannsaka málnotkun Íslendinga á samfélagsmiðlum. Í desember í fyrra fór fram doktorsvörn Vanessu Isenmann við Íslensku- og menningardeild Háskóla Íslands. Doktorsritgerð hennar í íslenskri málfræði fjallar um notkun íslenskunnar í óformlegum samskiptum á Facebook.

Og Brynja Hjálmsdóttir flytur okkur pistil um einkennisbúninga og merkingu þeirra.

Vetrarhátíð opnar í dag og stendur fram á laugardag, 150 viðburðir eru í boði fyrir fólk að kostnaðarlausu þar sem mikill fjöldi listamanna sýnir list sína. Einn viðburðurinn heitir Stríðið er raunverulegt / The struggle is real. Þar sýnir Curver Thoroddsen kvikmyndaverk í Höggmyndagarðinum við Nýlendugötu sem hann vann í samstarfi við rússneska kvikmyndagerðamenn. Ísskápurinn eru miðpunktur verksins og Curver sjálfur en hann er ekki í matarleit heldur bograr hann inn í skápinn vopnaður tusku og hreinsiefni. Verkið var gert í Moskvu skömmu fyrir Úkraínustríðið í kjölfar ritskoðunar á öðru verki listamannsins. Curver mætir um borð í Lestina í dag og segir betur frá.

Ásdís Sól Ágústsdóttir hefur verið að horfa á raunveruleikasjónvarp um fólk í leit að ástinni og í pistli dagsins fjallar hún um það hvernig ástin birtist í slíkum þáttum, sem nóg er af á streymisveitum þessi misserin.

Eftir 21 ár af æsingaráðgjöf um allt á milli himins og jarðar; megrun, vandræðaunglinga, missi, vímuefnanotkun, framhjáhald, og svo framvegis, hefur hinn vinalegi en strangi suðurríkjasálfræðingur Phil McGraw ákveðið að hætta með hina geysivinsælu þætti Dr. Phil. Við ræðum arfleifð þáttanna og sálgæslu í sjónvarpi við Salvöru Gullbrá Þórarinsdóttur og Ragnheiði Thorsteinsson.