Spegillinn 15. febrúar 2022

Umsjónarmaður: Bjarni Rúnarsson

Tæknimaður Gísli Kjaran Kristjánsson

Engar líkur eru á að ákærur verði gefnar út á hendur fjórum blaðamönnum sem hafa réttarstöðu sakbornings vegna umfjöllunar sinnar um Skæruliðadeild Samherja. Þetta segir hæstaréttarlögmaður.

Ungur drengur slapp nær ómeiddur þegar hann féll niður sprungu á Þingvöllum í dag. Það var ekki síst fyrir snarræði björgunarsveitarmanns sem var í nágrenninu.

Varnarmálaráðuneyti Úkraínu varð fyrir tölvuárás í dag. Neðri deild rússneska þingsins biðlar til Rússlandsforseta um að viðurkenna sjálfstæði tveggja héraða í Úkraínu - aðgerð sem Atlandshafsbandalagið varar við.

Tveir tékkneskir karlmenn sem björgunarsveitir leituðu að á Vatnajökli, eru fundnir heilir á húfi.

Lengri umfjöllun:

Enn og aftur er misnotkun á lyfjum í íþróttum í brennidepli eftir að að lyf á bannlista greindist hjá ungum rússneskum keppanda á Ólympíuleikunum. Það sér ekki fyrir endann á því máli en það skiptir öllu að hægt sé að treysta því að keppni sé heiðarleg segir framkvæmdastjóri Lyfjaeftirlits Íslands. Hann segir ekki auðvelt að segja hve útbreidd misnotkun lyfja er hér og telur þörf á að bæta í eftirlitið. Anna Kristín Jónsdóttir ræðir við Birgi Sverrisson framkvæmdastjóra Lyfjaeftirlits Íslands.

Fjórir blaðamenn voru í gær boðaðir í yfirheyrslu í næstu viku hjá rannsóknarlögreglumanni frá lögreglunni á Norðurlandi eystra. Það eru Þórður Snær Júlíusson, ritstjóri Kjarnans, Aðalsteinn Kjartansson, blaðamaður á Stundinni, Arnar Þór Ingólfsson, blaðamaður á Kjarnanum og Þóra Arnórsdóttir, ritstjóri Kveiks. Þau fjölluðu um skæruliðadeildina svokölluðu sem starfaði á vegum Samherja og reyndi að klekkja á blaðamönnum sem fjölluðu um fyrirtækið. Blaðamennirnir hafa réttarstöðu sakbornings fyrir meint brot gegn friðhelgi einkalífs. Bjarni Rúnarsson ræddi við Halldóru Þorsteinsdóttur, sérfræðing í fjölmiðlarétti og héraðsdómara.

Spegillinn 14. febrúar 2022

Umsjónarmaður: Bjarni Rúnarsson

Tæknimaður: Mark Eldred

Þungfært hefur verið á vegum um suðvestanvert landið í dag. Helstu leiðir frá borginni verða lokaðar þangað til í fyrramálið, að undanskilinni Reykjanesbraut.

Ráðamenn í Evrópu funda þessa dagana stíft með leiðtogum Rússlands og Bandaríkjanna auk stjórnvalda í Úkraínu. Fréttaritari RÚV í Úkraínu segir landsmönnum þykja skjóta skökku við að hótanir vesturvelda um viðskiptaþvinganir gegn Rússum bitni í augnablikinu verst á Úkraínumönnum sjálfum. Fjallað verður um bakgrunn Úkraínudeilunnar og um sögu samskipta Rússa og Úkraínumanna.

Tíu ára deila Samherja og Seðlabankans fyrir dómstólum nálgast nú endapunkt. Tekist var á í skaðabótamáli fyrirtækisins gegn Seðlabankanum í Landsrétti í dag.

Ekki þykir ástæða til að almennir lögregluþjónar beri vopn við störf sín. Þetta segir doktor í afbrotafræði. Formaður Landssambands lögreglumanna segir lögreglumenn veigra sér við því að ganga vaktir í miðborg Reykjavíkur vegna aukinnar hörku og vopnum í umferð.

Mjög hefur verið fækkað í smitrakningarteymi og til skoðunar er að leggja niður smitrakningarappið. Sóttvarnalæknir minnir á að enn sé grímuskylda í verslunum ef fólk geti ekki haldið metra fjarlægð.

Lengri umfjöllun:

Seinustu fimm daga hafa tvær skotárásir átt sér stað í Reykjavík, fyrst aðfaranótt fimmtudags í Grafarholti og svo í miðborginni um helgina. Frá því í ársbyrjun 2021 hafa sex skotárásir átt sér stað hér á landi. Spegillinn ræddi í dag við Margréti Valdimarsdóttur, doktor í afbrotafræði og lektor í lögreglufræði við Háskólann á Akureyri. Bjarni Rúnarsson ræddi við hana.

Spennan er enn mikil við landamæri Rússlands og Úkraínu. Deilur ríkjanna eiga sér nokkuð langa og merkilega sögu. Bogi Ágústsson fjallar um sögu deilna Rússa og Úkraínumanna í síðari hluta Spegilsins.

Spegillinn 11.febrúar 2022

Umsjónarmaður: Bjarni Rúnarsson

Tæknimaður: Mark Eldred.

Ríkisstjórnin ræddi fullt afnám samkomutakmarkana á fundi sínum í morgun, en niðurstaðan var að bíða með það í tvær vikur, að sögn fjármálaráðherra. Hann segist eftir tveggja ára faraldur ekki gera stórmál úr síðustu tveimur vikunum.

Ekki er verjandi að leggja mannskap í hættu til að kafa eftir flugvél á botn ísilagðs Þingvallavatns. Þetta segir yfirmaður séraðgerðasveitar Landhelgisgæslunnar.

Bandaríkjaforseti vill að fjármunir seðlabankans í Afganistan, sem eru geymdir í Bandaríkjunum, fari til fórnarlamba hryðjuverkaárásanna ellefta september og í mannúðaraðstoð í Afganistan. Tilskipun þessa efnis verður undirrituð í dag.

Árið 2018 fóru um 45 milljarðar króna í greiðslumiðlun hér á landi. Betur færi á því að koma á fót innlendu greiðslukerfi að mati formanns Neytendasamtakanna. Það myndi spara neytendum stórfé.

Lengri umfjöllun:

Í fréttum okkar í gær var rætt við Gylfa Zoega hagfræðiprófessor um kosti þess að koma á fót innlendu greiðslukerfi, það er kerfið sem við notum flest hver til að greiða fyrir vörur og þjónustu. Benti hann á að viðskiptabankarnir hér á landi græddu milljarða á þjónustu og greiðslugjöldum. Hér á landi ríki fákeppni á bankamarkaði og þjónustu og greiðslugjöld séu bæði flókin, falin og alltof há miðað við aðrar þjóðir sem við berum okkur saman við. Þetta kunna að vera litlir fjármunir hjá hverjum og einum, en safnast þegar saman kemur. Neytendur geri sér ekki alltaf grein fyrir umfangi þessara fjármuna. Í gær var tilkynnt um rúmlega 80 milljarða samanlagðan hagnað stóru viðskiptabankanna þriggja. Til skoðunar er hjá Seðlabanka Íslands að taka upp og útfæra innlent greiðslukerfi. Bjarni Rúnarsson ræddi við Breka Karlsson, formann Neytendasamtakanna.

Meðalævilengd karla á Íslandi var 81 ár í hitteðfyrra og meðalævilengd kvenna 84,3 ár. Lífslíkur Íslendinga eru með þeim mestu í Evrópu og hafa tölurnar hækkað umtalsvert á síðustu áratugum. Á síðustu þrjátíu árum hafa karlar bætt við sig rúmlega sex árum og konur rúmlega fjórum. Lengri ævi þýðir auðvitað líka lengri tími sem fólk tekur lífeyri og meiri útgjöld fyrir lífeyrissjóði. Undnafarið hefur verið rætt um hækka lífeyristökualdur eða að lækka lífeyrinn. Stefán Ólafsson, prófessor og sérfræðingur hjá Eflingu fjallar um þetta í Kjarafréttum hennar og þar er spurt hvort lengri ævi menntafólks eigi að skerða lífeyri verkafólks - því einföld meðaltöl segja sjaldnast alla söguna. Ævi karla með grunnskólapróf er að jafnaði um 5 árum skemmri en karla með h

Umsjón: Anna Kristín Jónsdóttir. Tæknimaður: Mark Eldred

Tveir karlmenn á þrítugsaldri eru í haldi lögreglu eftir skotárás í Grafarholti í nótt. Karl og kona særðust í árásinni. Ólöf Rún Skúladóttir ræddi við Margeir Sveinsson, aðstoðaryfirlögregluþjón á rannsóknarsviði Lögreglunnar á höfuðborgarsvæðinu.

Hluthafar stóru viðskiptabankanna gætu fengið samanlagt nærri fimmtíu milljarða króna í arð samkvæmt ársuppgjörum þeirra. Íslandsbanki birti ársuppgjör sitt í dag, síðastur bankanna þriggja.

Allt að þriggja sólarhringa bið getur verið eftir niðurstöðum úr PCR-sýnatöku vegna mikils álags. Tæplega 5 prósent Akureyringa eru nú með covid. Anna Þorbjörg Jónasdóttir ræddi við Inga Stellu Pétursdóttiu yfirmann rannsóknardeildar Sjúkrahússins á Akureyri og Sigríði Dagnýju Þrastardóttur verkefnastjóra Covid á Akureyri

Borgaryfirvöld í París hafa sett bann á að svokölluð frelsislest vörubílstjóra mæti til borgarinnar til að loka götum í mótmælaskyni gegn sóttvarnaraðgerðum. Mótmælin eru rakin til svipaðra aðgerða bílstjóra í Kanada. Hallgrímur Indriðason sagði frá.

---------------

Rannsókn á skotárás sem gerð var í Grafarholti í nótt miðar vel. Margeir Sveinsson aðstoðaryfirlögregluþjónn hjá rannsóknardeild Lögreglunnar á höfuðborgarsvæðinu segir að ofuráhersla hafi verið lögð á að finna árásarmennina fljótt. Karl og kona særðust í árásinni. Fleiri voru á vettvangi en ekki er talið að árásin hafi beinst að öðrum en þeim sem urðu fyrir skotum. Ólöf Rún Skúladóttir ræddi við hann.

Lágir stýrivextir hefðu ekki gengið til langs tíma litið og hækkun stýrivaxta hefur góð áhrif á sparnað fólks segir Gylfi Zoega prófessor í hagfræði. Hann segir ekki rétt að verðbólgan sé innflutt. Bjarni Rúnarsson ræddi við hann.

Spegillinn 9. febrúar 2022

Umsjónarmaður: Bjarni Rúnarsson

Tæknimaður: Mark Eldred.

Fjármálaráðherra segir að taka verði miklar launahækkanir með í umræðuna um verðbólguna og hvernig hún þrengi að kjörum heimilanna sem hafi ekki verið betri en nú. Hann segir vextina núna sambærilega þeim sem voru fyrir faraldurinn.

Stýrivaxtahækkunin kemur mest niður á þeim sem keyptu nýlega sína fyrstu fasteign. ASÍ hefur kallað eftir því að öðrum stjórntækjum en stýrivöxtum verði beitt til að hemja fasteignamarkaðinn.

Fjölmenn mótmæli hafa verið í Minneapolis eftir að lögreglan skaut tuttugu og tveggja ára svartan karlmann til bana í heimahúsi í borginni. Lögreglan nýtti þar heimild til að fara inn í íbúð án þess að banka.

Ekki gengur að taka hjálpartæki af fólki þegar það fer á hjúkrunarheimili segir deildarstjóri hjá Sjúkratryggingum. Úrbætur séu framundan varðandi létt lungnatæki og fleiri hjálpartæki.

Á hundrað árum hefur stundum gustað um Hæstarétt þó að lengst af hafi ríkt um hann friður. Fjallað verður um sögu réttarins í Speglinum

Lengri umfjöllun:

Seðlabankinn hækkaði stýrivexti í morgun um 0,75 prósentustig. Þeir eru nú orðnir 2,75 prósent. Vextirnir eru hækkaðir í skugga vaxandi verðbólgu. Ýmsir hafa hvatt Seðlabankann til að hækka ekki stýrivexti, svo sem forseti Alþýðusambands Íslands sem sendi peningastefnunefnd bankans bréf þess efnis í gær. Seðlabankinn spáir fimm prósenta verðbólgu á þessu ári, sem er tvöfalt verðbólgumarkmið bankans. Hann gerir ráð fyrir enn meiri verðbólgu á fyrsta ársfjórðungi, 5,8 prósentum. 5,7 prósenta verðbólgan sem mældist í síðasta mánuði er sú mesta frá því í apríl 2012.

Bjarni Rúnarsson ræddi stýrivaxtahækkunina við þau Önnu Hrefnu Ingimundardóttur, forstöðumann efnahagssviðs Samtaka atvinnulífsins og Róbert Faresveit, sviðsstjóra stefnumótunar og greininga og hagfræðingur hjá Alþýðusambandi Íslands.

Hæstiréttur varð hundrað ára í fyrra og var aldarafmæli hans meðal annars merkt með útgáfu sögu réttarins sem Arnþór Gunnarsson sagnfræðingur skrifar. Á hundrað árum hefur á stundum gustað um Hæstarétt þó að lengst af hafi ríkt um hann friður. Arnþór sér nokkur líkindi með átökum sem tengjast skipan dómara bæði á þriðja og fjórða áratug síðustu aldar, skömmu eftir stofnun hans, og svo deilum um dómaraskipan um og upp úr aldamótunum síðustu. Á báðum tímabilum hafi stjórnmálamenn sótt svo hart að réttinum að halda megi því fram að vegið hafi verið að sjálfstæði dómsvaldsins. Anna Kristín Jónsdóttir ræddi við Arnþór Gunnarsson.

Spegillinn 8. febrúar 2022

Umsjónarmaður: Bjarni Rúnarsson

Tæknimaður: Markús Hjaltason.

Átta íbúðarhús voru rýmd á Patreksfirði í dag vegna snjóflóðahættu. Varðskipið Freyja er á leiðinni vestur og verður til taks.

Forseti Frakklands vonast til að málamiðlun finnist með Rússum um lausn á Úkraínudeilunni. Stefnt er að því að leiðtogar Rússa, Frakka og Þjóðverja fundi á næstunni um stöðuna.

Menningarmálaráðherra boðar að Ríkisútvarpið verði tekið af auglýsingamarkaði. Forsætisráðherra segir þá aðgerð ekki mega skerða stöðu RÚV.

Formaður Flokks fólksins skorar á atvinnuveganefnd Alþingis að taka frumvarp hennar um bann við blóðmerahaldi til umfjöllunar. Fjöldi umsagna hefur borist um frumvarpið.

Um 1.200 manns hafa fengið sanngirnisbætur vegna illrar meðferðar á vistheimilum á seinustu öld. Hátt í fjórir milljarðar hafa verið greiddir í bætur. Peningar græða þó ekki þau sár sem fólk hlaut að mati umsjónarmanns sanngirnisbóta.

Lengri umfjöllun

Í Speglinum í gær var rætt við Ólaf K. Nielsen formann Fuglaverndar, en hann hefur ásamt fjömörgum öðrum gagnrýnt áform Reykjavíkurborgar um landfyllingu í Grófavík í Skerjafirði. Landfyllingin er fylgifiskur fyrirhugaðrar 1300 íbúða byggðar vestan við suðurenda Reykjavíkurflugvallar. Landfyllingu verður á ríflega 700 metra löngum kafla, sem næði 100 metra út í sjó. Í frummatsskýrslu sem verkfræðistofan Efla gerði fyrir Reykjavíkurborg kemur fram að framkvæmdin hefði talsverð neikvæð áhrif á fuglalíf og verndarsvæði og verulega neikvæð áhrif á gróður, strand- og sjávarlífríki. Pawel Bartoszek er formaður Skipulags- og samgönguráðs Reykjavíkurborgar. Kristján Sigurjónsson ræddi við hann.

Frá því að Breiðavíkurmálið kom upp fyrir 15 árum hafa hátt í fjórir milljarðar verið greiddir í sanngirnisbætur til þeirra sem bjuggu við slæman kost og meðferð á vistheimilum á vegum ríkisins og sveitarfélaga. Um 1.200 manns hafa fengið bætur. Peningar duga þó ekki til að græða sár þeirra sem máttu þola illa meðferð í æsku. Í gær var rætt við Bárð R. Jónsson, sem er einn Breiðavíkurdrengjanna sem stigu fram og sögðu sögu sína fyrir 15 árum. Frá þeim tíma hafa fjöldamörg mál komið fram þar sem upp komst um slæma meðferð á börnum og fullorðnum á seinustu öld. Yfirleitt dvaldi fólk á þessum heimilum af illri nauðsyn og var komið þar fyrir vegna vandamála sinna, stórra og smárra.

Bjarni Rúnarsson ræddi við Halldór Þormar Halldórsson, umsjónarmann sanngirnisbóta. Hann annaðist bótagreiðslur í Breiðavíkurmálinu og einnig í fleiri sambærilegum málum.

Spegillinn 7.febrúar 2022

Umsjón: Kristján Sigurjónsson

Tæknimaður: Magnús Þorsteinn Magnússon

Vetrarfærð er um land allt eftir óveður næturinnar og morgunsins. Spáð er leiðindaveðri næsta sólarhringinn. Rafmagnsleysi var víða á Suðurlandi í dag,

Fjármálaráðherra segir að stilla verði stjórntækin vel svo vaxandi verðbólga verði skammtímavandamál en fylgi þjóðinni ekki inní lengri framtíð.

Icelandair sagði í dag upp lánalínu hjá Íslandsbanka og Landsbanka sem gaf fyrirtækinu færi á að taka allt að 120 milljón dollara lán þar sem ríkið ábyrgðist 90%.

Undirbúningur við að ná upp líkum mannanna fjögurra sem fórust í flugslysinu í Þingvallavatni er langt kominn.

Forseti Rússlands fagnar viðleitni Frakka til að leysa Úkraínudeiluna með friðsömum hætti. Þjóðarleiðtogar hafa hist víða um heim í dag til að ræða stöðuna í landinu.

Lengri umfjöllun:

Áform borgaryfirvalda um landfyllingu í Grófavík í Skerjafirði, í öðrum áfanga nýrrar byggðar þar, hafa fallið í grýttan jarðveg hjá mörgum sem sent hafa inn umsagnir í skipulagsferli málsins. Til stendur að byggja í svokallaðri Gróf, svæði á milli suðurenda Reykjavíkurflugvallar og eystri enda núverandi byggðar í Skerjafirði, allt að 1300 íbúðir. Í frummatsskýrslu sem verkfræðistofan Efla gerði fyrir Reykjavíkurborg kemur fram að framkvæmdin hefði talsverð neikvæð áhrif á fuglalíf og verndarsvæði og verulega neikvæð áhrif á gróður, strand- og sjávarlífríki. Til mótvægis þessu er ætlunin að móta strandlengju landfyllingarinnar þannig að hún líki eftir náttúrlegri strönd til að auka líkur á að þar myndist leirur á ný. Ólafur K. Níelssen, formaður Fuglaverndar og Jóhann Óli Hilmarsson, fyrrverandi formaður félagsins gagnrýna þessar hugmyndir harðlega í grein sem þeir skrifuðu í Kjarnann um helgina. Kristján Sigurjónsson ræðir nánar við Ólaf um gagnrýni þeirra félaga.

Nú eru 15 ár liðin frá að upp komst um illa meðferð á drengjum í Breiðavík á síðari hluta seinustu aldar. Drengirnir urðu fyrir andlegu, líkamlegu og kynferðislegu ofbeldi, bæði frá eldri drengjum sem dvöldu þar og starfsmönnum heimilisins. Í Breiðavík voru um 130 drengir sendir í vist fyrir slæma hegðun og árið 2007 stigu nokkrir þeirra fram og sögðu frá meðferðinni sem þeir máttu sæta mörgum árum fyrr. Þeirra á meðal var Bárður R. Jónsson sem sagði sögu sögu sína í viðtali við Margréti Marteinsdóttur í Kastljósi árið 2007. Bjarni Rúnarsson ræðir að nýju við Bárð um hvernig tekið hefur verið á þessum málum síðan.

Spegillinn 4. febrúar 2022

Umsjón: Bjarni Rúnarsson og Bogi Ágústsson

Tæknimaður: Magnús Þorsteinn Magnússon

Enn hefur ekkert spurst til flugvélar sem saknað hefur verið frá því um hádegi í gær. Fjöldi fólks kemur að leitinni, frá Landhelgisgæslu, lögreglu og björgunarsveitum.

Einangrun verður stytt úr sjö dögum í fimm, frá og með mánudegi. Heilbrigðisráðherra er bjartsýnn á að slakað verði töluvert á sóttvarnaraðgerðum í næstu viku.

Hluti sýna sem tekin eru í skimunum fyrir leghálskrabbameini verða áfram send til Danmerkur til greiningar. Landspítali hóf greiningar í byrjun mánaðarins og gerir þær allar frá næstu áramótum.

Danska stjórnin hefur markað nýja fjölmiðlastefnu og rætt verður um hana við við Elfu Ýr Gylfadóttur, framkvæmdastjóra Fjölmiðlanefndar, og Sigríði Dögg Auðunsdóttur, formann Blaðamannafélags Íslands.

Rúmlega helmingur ungmenna á framhaldsskólaaldri hefur verið beðinn um að senda af sér nektarmyndir. Stærstum hluta ungmenna sem fá slíkar beiðnir finnst það ekki mikið tiltökumál. Yfirleitt koma óskir um nektarmyndir af ungmennum frá ókunnugum.

Lengri umfjöllun:

Ane Halsboe-Jørgensen, menningarmálaráðherra, sagði í gær að það væri löng hefð í Danmörku fyrir öflugum fjölmiðlum sem gegndu þýðingarmiklu lýðræðishlutverki. Þeir veittu valdhöfum aðhald og gerðu borgurunum kleift að taka þátt í lýðræðislegri umræðu.Bogi Ágústsson ræddi við Elfu Ýr Gylfadóttur, framkvæmdastjóra Fjölmiðlanefndar, og Sigríði Dögg Auðunsdóttur, formann Blaðamannafélags Íslands.

Rúmlega helmingur ungmenna á framhaldsskólaaldri hefur verið beðinn um að senda af sér nektarmyndir og 40 prósent barna í 8.-10. bekk. Algengast er að slíkar beiðnir komi frá ókunnugum einstaklingum á netinu. Líklegra er að stúlkur fái beiðnir um slíkar myndsendingar en drengir. Tæplega 7 af hverjum 10 stelpum sem hafa fengið beiðni um nektarmynd sögðu hana hafa komið frá ókunnugum á netinu, samanborið við 3 af hverjum 10 strákanna. Þetta er meðal þess sem kemur fram í nýrri könnun sem Menntavísindastofnun gerði fyrir Fjölmiðlanefnd. Bjarni Rúnarsson ræddi við Skúla Braga Geirdal, verkefnastjóra Fjölmiðlanefndar.

Spegillinn 3. febrúar 2022

Umsjónarmaður: Bjarni Rúnarsson

Tæknimaður: Magnús Þorsteinn Magnússon

Umfangsmikil leit hefur staðið í allan dag á Suðurlandi að flugvél sem ekkert hefur spurst til frá því um hádegisbil. Tvær þyrlur Landhelgisgæslunnar, flugvél frá danska hernum og rúmlega 300 manns á jörðu niðri taka þátt í leitinni. Leitinni er beint að svæðinu sunnan við Þingvallavatn.

Stjórnmál á Norður-Írlandi eru í upplausn. Eftir afsögn fyrsta ráðherra er stjórn landshlutans lömuð.

Fjöldi starfsmanna Eflingar greindi frá einelti og kynbundinni áreitni af hálfu stjórnenda í vinnustaðagreiningu. Fyrrverandi stjórnendur Eflingar segja ásaknirnar með öllu ósannar.

Þóra Kristín Ásgeirsdóttir hefur dregið framboð sitt til formanns SÁÁ og setu í framkvæmdastjórn til baka.

Útgerðir loðnuskipa hafa gert hlé á veiðum, en nýjustu mælingar Hafrannsóknastofnunar gætu leitt til verulegrar lækkunar á útgefnum loðnukvóta.

Lengri umfjöllun

Ýmislegt bendir til þess að útbreiðsla kórónuveirunnar sé mun meiri hér á landi en áður var talið. Fyrstu niðurstöður rannsóknar Íslenskrar erfðagreiningar og sóttvarnalæknis benda til að um tuttugu prósent landsmanna, yngri en 50 ára, hafi sýkst af kórónuveirunni. Þetta var staðan um áramótin. Þetta eru rúmlega helmingi fleiri en hafa greinst með kórónuveiruna á PCR-prófi og er opinber smittala. Mótefni var mælt hjá tæplega 1.900 manns um allt land á aldrinum 20-90 ára. Mótefni mældist frekar hjá yngra fólki en eldra. Með sömu útreikningum, og að því gefnu að um 1.500 smitist á hverjum degi, má ætla að um 80% landsmanna verði komin með gott ónæmi gegn COVID-19 síðari hluta marsmánaðar. Arnar Björnsson fréttamaður ræddi í dag við Kára Stefánsson, forstjóra Íslenskrar erfðagreiningar.

Óvissa er enn á ný um framtíð Brexit-samnings Breta og Evrópusambandsins vegna deilna um framkvæmd ákvæða um Norður-Írland. Óvæntar yfirlýsingar ráðherra sambandssinna í stjórninni í Belfast í gærkvöld ollu uppnámi og síðdegis sagði Paul Given, fyrsti ráðherra Norður-Írlands af sér. Bogi Ágústsson fjallaði um málið.

Spegillinn 2. febrúar 2022

Umsjónarmaður: Bjarni Rúnarsson

Tæknimaður Magnús Þorsteinn Magnússon

Heilbrigðisráðherra hefur ákveðið í samráði við sóttvarnalækni að afnema eins metra regluna á sitjandi viðburðum eins og í leikhúsum og á tónleikum

Maður sem sakaður er um að hafa banað Daníel Eiríkssyni af gáleysi við Vindakór í Kópavogi í fyrra, hélt fram sakleysi sínu í Héraðsdómi Reykjaness í dag. Þetta hafi verið slys. Hann segir andlátið hafa verið slys.

Miklu fleiri skiptu um raforkusala í janúar en í nokkrum öðrum mánuði í fyrra. Skiptin koma í kjölfar umfjöllunar um að N1 hafi selt þrautavararafmagn mun dýrara en auglýst var.

Yfirlögregluþjónn hjá lögreglunni á höfuðborgarsvæðinu segir að vinna hafi verið lögð í að þjálfa starfsmenn til að taka skýrslur af þolendum kynferðisbrota og þekkingar í þeim efnum hafi verið leitað víða. Embættið sé ágætlega í stakk búið til rannsókna þessara mála, en fjölga megi starfsmönnum og bæta tækjabúnað.

Lengri umfjöllun:

Grímur Grímsson yfirlögregluþjónn hjá lögreglunni á höfuðborgarsvæðinu telur embættið ágætlega í stakk búið til að rannsaka kynferðisbrotamál þó fjölga megi þar fólki sem og tækjum og búnaði. Hann gerir sér vonir um að úr því verði bætt. Þá hafi mikil þjálfun farið fram í skýrslutöku yfir þolendum. Haukur Holm ræddi við Grím.

Boris Johnson forsætisráðherra Bretlands er kominn aftur heim til Lundúna af fundi sínum með Volodymyr Zelensky forsætisráðherra Úkraínu um Úkraínudeiluna. Johnson fékk ekki sérlega blíðar viðtökur við heimkomuna. Í dag var enn á ný herjað á hann í fyrirspurnatíma í þinginu vegna veisluhalda í Downingstræti 10. Partygate-málið, sem svo er kallað, heldur áfram að gera forsætisráðherranum lífið leitt. Bjarni Rúnarsson fjallar um fyrirspurnatímann.

Gleraugu eru góð fyrir þá sem sjá illa. En eru þau líka smitvörn? Í Noregi er nú hafin tilraun með þátttöku almennings til að skera úr um hvort veiran alræmda, sem veldur öllu kófinu, forðist gleraugu. Gísli Kristjánsson fjallar um málið