Ríkisstjórnarflokkarnir næðu ekki meirihluta á þingi yrði gengið til kosninga nú, samkvæmt nýjum Þjóðarpúlsi Gallups.

Skylda er að vera með ökuljós kveikt bæði að aftan og fram, rafvespur eru skráningarskyldar, heimilt er að banna akstur vegna mengunar og neita má fíklum um ökuskírteini, samkvæmt nýjum umferðarlögum.

Einungis um helmingur þeirra fyrirtækja og stofnana sem áttu að vera komin með jafnlaunavottun um áramótin hefur fengið slíka vottun.

Margir strengdu áramótaheit um áramótin, sumir þau sömu og í fyrra.

Austurríki á að verða forysturíki í umhverfismálum í Evrópu, samkvæmt sáttmála sem ný ríkisstjórn landsins kynnti í dag.

Það gæti stefnt í almennar kosningar árlega næstu þrjú ár. Ef sitjandi forseti fær mótframboð verða forsetakosningar í júní, svo Alþingiskosningar á næsta ári og sveitarstjórnarkosningar 2022.

Embætti ríkislögreglustjóra telur hátt hlutfall innflytjenda í ákveðnum hverfum auka hættuna á því að hér verði til viðkvæm svæði eða gettó þar sem glæpagengi vaði uppi. Þetta má ráða af nýrri skýrslu embættisins um hugsanlegar áskoranir sem lögregla gæti staðið frammi fyrir í náinni framtíð.

Spegillinn 30.desember 2019

Umsjón: Kristján Sigurjónsson

Tæknimaður: Magnús Þorsteinn Magnússon

13 erlendir ferðamenn lentu í umferðarslysi í Biskupstungum, á þjóðveginum milli Gullfoss og Geysis um fjögurleytið í dag. Þrír voru fluttir með þyrlu á bráðamóttöku Landspítalans. Tveir bílar rákust á í mikilli hálku.

Landsréttur úrskurðar að öllum líkindum ekki í gæsluvarðhaldskröfu yfir Kristjáni Gunnari valdimarssyni fyrr en eftir áramót.

Átta mánaða barn greindist með mislinga í vikunni eftir að hafa komið frá Asíu. Sóttvarnarlæknir segir óvenjumörg mislingasmit hafa greinst í ár.

Verslunin Super1 hefur, í samráði við matvælaeftirlit Heilbrigðiseftirlits Reykjavíkur, innkallað þrjár vörur af Rema1000 hnetum þar sem aflatoxin b1 mældist yfir hámarksgildum.

Neytendur eiga ekki lagalegan rétt á því að skila ógölluðum vörum sem þeir hafa keypt í búð eða fengið að gjöf. Verslunum er því í sjálfsvald sett hvort og þá með hvaða hætti þær taka við vöru.

Árið 2019 var hið hlýjasta í Rússlandi frá því að mælingar hófust fyrir í hátt í 130 árum.

Sænsku náttúruverndarsamtökin Perfect World Foundation völdu Gretu Thunberg í dag náttúruverndarsinna ársins.

Slökkvilið höfuðborgarsvæðisins hvetur fólk til að umgangast skotelda af varúð um áramótin. Mikilvægt sé að fullorðinir komi þar að, allsgáðir, og tryggt sé að skoteldarnir standi á traustum grunni, ekki nærri húsum eða bílum.

Lengri umfjöllun:

Nú er langt liðið á næst síðasta dag ársins og eins og tilheyrir áramótum þá er við hæfi að líta yfir næstum liðið ár og huga að framtíðinni. Í síðasta Spegil ársins er mætt ungt fólk, sem spannar þó 13 ára aldursbil, frá 17 ára til þrítugs í bein útsendingu. Þau eru í aldursröð:

Gunnhildur Fríða Hallgrímsdóttir nýstúdent frá Tækniskólanum, fyrrverandi formaður Sambands íslenskra framhaldsskólanema og umhverfissinni

Leó Snær Emilsson formaður Súdentafélags Háskólans í Reykjavík og nemandi viðskiptafræði og lögrfræði.

Birta Austmann Bjarnadóttir stjórnmálafræðingur og lögfræðingur hjá Þjóðskrá.

Rætt um loftslagsmál, stjórnmál og stjórnmálamenningu, framtíðarsýn ungs fólks o.fl.

Að minnsta kosti þrjár konur tengjast málum lögmanns sem var handtekinn á jólanótt vegna gruns um kynferðisbrot og frelsissviptingu. Réttargæslumaður einnar þeirra segir lögmanninn hafa fengið sérmeðferð og vill að störf lögreglu á vettvangi verði rannsökuð.

Aldrei hafa fleiri þurft að dvelja á bráðamóttöku Landspítalans um jól eða allt að þrjátíu manns. Yfirlæknir bráðalækninga segir vandræði skapast við að reyna að koma sjúklingum fyrir.

Óttast er að gróðureldar sem hafa geisað í Ástralíu síðan í október breiðist enn frekar út í hitabylgju sem spáð er næstu daga.

Veðurstofan spáir suðvestan hvassviðri eða stormi austan til á landinu. Færð fer versnandi víða um land.

Fjörutíu og sex þúsund manns lögðu leið sína í Ríkið á Þorláksmessu, fleiri en nokkru sinni.

Við rifjum upp það sem gerðist í stjórmálum og ferðaþjónustu á þessum áratug. Stjórnmálaprófessor segir að hann hafi einkennst af miklu vantrausti. Hótelrekandi segir Airbnb hafa breytt öllu. Arnar Páll Hauksson ræðir við Eirík Bergmann. Arnhildur Hálfdánardóttir ræðir við Kristófer Oliversson og Soffíu Kristínu Þórðardóttur.

Treysta þarf varnir bankanna gegn peningaþvætti, segir Unnur Gunnarsdóttir, forstjóri Fjármálaeftirlitsins. Brotalamir í vörnunum séu þó ekki mjög alvarlegar. Tryggvi Aðalsteinsson ræðir við hana.

Ekkert bendir til þess að kveikt hafi verið í húsi sem brann til kaldra kola í Grímsnesi í gærkvöldi af ásetningi segir Elís Kjartansson lögreglufulltrúi á Suðurlandi Umráðamaður hússins var handtekinn á staðnum í gær en sleppt í dag. Jóhann Bjarni Kolbeinsson ræddi við Elís.

Vetrarælupest og öndunarfærasýkingar hrella margan þessa dagana; miklu fleiri leita til heilsugæslunnar um þetta leyti en á sumrin segir Óskar Reykdalsson, forstjóri Heilsugæslu höfuðborgarsvæðisins. Kristín Sigurðardóttir ræddi við Óskar. Ásrún Brynja Ingvarsdóttir tók saman.

Tæplega 100 fjölskyldur á Norðurlandi hafa þegið matar- og fjárhagsaðstoð fyrir jólin frá facebookhópnum Matargjöfum Akureyrar og nágrennis. Óðinn Svan Óðinsson ræddi við Sigrúnu Ósk Jakobsdóttur og Sigrúnu Steinarsdóttur sem halda úti hópnum.

Boeing flugvélasmiðjurnar bandarísku tilkynntu í dag að Dennis Muilenburg forstjóri hefði látið af störfum. David Calhoun, stjórnarformaður fyrirtækisins, verður eftirmaður hans á forstjórastóli.

Á Þorláksmessu taka ýmsir frá stund til að fara í Friðargöngu.Eygló Jónsdóttir er einn skipuleggjenda göngunnar í Reykjavík sem samstarfshópur friðarhreyfinga stendur að og hún hefur mætt þar áratugum saman og ætlar að ganga aftur að ári.

Umsjón: Anna Kristín Jónsdóttir

Tæknimaður: Ragnar Gunnarsson

Stjórn útsendingar: Björg Guðlaugsdóttir

Héraðsdómur Reykjavíkur gerir alvarlegar athugasemdir við vinnubrögð starfsmanna barnaverndar í máli lítils drengs.

Heilbrigðisráðherra kynnti í dag aðgerðir sem lækka kostnað sjúklinga. Þremur komma fimm milljörðum króna verður varið í lækkanir á næstu fjórum árum.

Fjögurra bíla árekstur varð á Kjalarnesi á fimmta tímanum í dag. Tafir urðu á umferð.

Að minnsta kosti einn lést í skotárás á höfuðstöðvar leyniþjónustu Rússlands í Moskvu í dag.

Breska þingið kom í dag saman til fyrsta fundar eftir kosningarnar í síðustu viku.

Byggðakvóta sem er eyrnamerktur er Flateyri hefur verið úthlutað fyrirtækjum, sem ekki eru með starfsemi í plássinu.

Ferðaveður er víða vont, gular viðvaranir í gildi og Strætó hefur þurft að fella niður ferðir.

Lengri fréttapistlar:

Formaður Sameykis segir að ef ekkert gangi í kjaraviðræðum fljótlega eftir áramót muni félagsmenn hefja undirbúning aðgerða sem gæti endað með verkföllum. Viðræður við opinbera starfsmenn hafa staðið yfir í 9 mánuði og ljóst að þær munu dragast fram á næsta ár. Arnar Páll Hauksson ræðir við Árna Stefán Jónson, Önnu Maríu Frímannsdóttur og Þórunni Sveinbjarnardóttur.

Fárviðrið sem gekk yfir landið í síðustu viku afhjúpaði veikleika í innviðum en líka hversu berskjölduð við erum gagnvart náttúruöflunum. Síðustu daga hefur svo verið talað um fordæmalaust rafmagnsleysi, fordæmalausan hrossadauða - en var veðrið sjálft fordæmalaust og má að einhverju leyti rekja það til loftslagsbreytinga? Arnhildur Hálfdánardóttir ræðir við Elínu Björk Jónasdóttur, veðurfræðing.

Fyrir fjörutíu árum rændu þjófar fimm afar verðmætum listaverkum úr safni í Austur-Þýskalandi. Nú er loks búið að endurheimta verkin, þökk sé borgarstjóranum á staðnum. Margt er þó enn á huldu um þennan stærsta og dularfyllsta listaverkaþjófnað í sögu Austur-Þýskalands. Pálmi Jónasson.

Umsjón: Pálmi Jónasson

Markmið lögmannsstofunnar Wikborg Rein, er að Samherji komi út úr rannsókn á meintum mútum og peningaþvætti sem sterkara og sjálfbærara fyrirtæki. Þetta segir fulltrúi lögmannsstofunnar við fréttastofu. Samherji hefur ráðið Wikborg Rein til að gera innri rannsókn á starfsemi félagsins.

Fulltrúadeild Bandaríkjaþings greiðir í kvöld atkvæði um hvort ákæra eigi Donald Trump, forseta Bandaríkjanna, fyrir embættisglöp.

Eldurinn sem braust út við olíubrigðastöðina í Örfirisey er áminning um að mörg fyrirtæki á höfuðborgarsvæðinu geyma eða nota hættuleg efni; til dæmis bensín, klór, etanól eða ammóníak. Slökkviliðsstjórinn á höfuðborgarsvæðinu segir að yfirsýn yfir flutning slíkra efna mætti vera betri.

Konur í atvinnulífinu kalla eftir kynjakvóta í stjórnunarstöðum fyrirtækja, því lítið þokast í jafnréttisátt. Einungis 13% framkvæmdastjóra eða forstjóra stærri fyrirtækja eru konur.

Baráttan um hver tekur við af Jeremy Corbyn sem leiðtogi breska Verkamannaflokksins er hafin. Emily Thornberry, talsmaður í utanríkismálum, gaf kost á sér í dag.

Rafmagnsleysi og fjarskiptavandræði gera fólki lífið leitt á Norðurlandi. Viðgerðir standa enn á línum og tengivirkjum. Margir reiða sig á varaafl á meðan.

Alls hafa um ellefu þúsund íbúar á um 7600 heimilum glímt við rafmagnsleysi. Þetta sagði forsætisráðherra á Alþingi í dag. Rafmagnsleysið sé það langvinnasta og umfangsmesta sem orðið hafi.

Senegalski sjóherinn færði aðfaranótt mánudags verksmiðjutogarann Navigator til hafnar í höfuðborginni Dakar vegna gruns um ólöglegar veiðar. Skipið er gert út af útgerðarfélaginu Úthafsskipum í Hafnarfirði.

Hátt í 80 hross drápust í óveðrinu í Húnavatnssýslum. Óttast er um afdrif meira en 100 hrossa til viðbótar.

Kyrrsetning Boeing 737 MAX flugvélanna dregst á langinn. Icelandair gerir nú ráð fyrir að þær fari í loftið í maí á næsta ári.

Erlendir ríkisborgarar hér á landi eru nú orðnir nærri 50 þúsund samkvæmt tölum frá Þjóðskrá.

Forstöðumaður hjá Póst og fjarskiptastofnun segir að ef ákvörðun verður tekin um að almennu fjarskiptakerfin eigi að virka sem öryggisfjarskiptakerfi fyrir landsmenn þá þurfi fjármagn til að byggja þau upp. Engin sérstök lög eru til um öryggisfjarskiptakerfin. Arnar Páll Hauksson talar við Þorleif Jónasson hjá Póst og fjarskiptastofnun.

Kosningabaráttunni er lokið, nú kemur að því að efna slagorðin. Boris Johnson forsætisráðherra Breta vill róttækar aðgerðir en allt óljóst um nákvæmlega hvað hann ætlar að gera. Kannski táknrænt að pundið styrktist þegar styrkur meirihluti Íhaldsflokksins lá fyrir en hefur svo veikst aftur að sama skapi, því Brexit-vegferðin gæti enn endað í samningslausri útgöngu. Óvissan um sýn og stefnu forsætisráðherra, bæði um Brexit og annað, svífur yfir vötnunum. Sigrún Davíðsdóttir segir frá.

Guðmundur Ingi Guðbrandsson, umhverfisráðherra, segir óásættanlegt að ríki heims geti ekki komist að niðurstöðu í jafn mikilvægum málum og loftslagsmálum. Hann er fylgjandi því að fyrirkomulagi viðræðna á loftslagsráðstefnum Sameinuðu þjóðanna verði breytt þannig að meirihluti ríkja geti tekið ákvarðanir, einstök ríki geti þá ekki staðið í vegi fyrir öðrum. Arnhildur Hálfdánardóttir ræðir við Guðmund Inga.

Umsjón: Pálmi Jónasson

Alþýðusamband Íslands vill láta kanna hvort opinberar stofnanir misnoti björgunarsveitir til að vinna ýmis verk í sjálfboðavinnu, sem stofnanirnar ættu sjálfar að sinna í almannaþágu.

Enn eru talsverðar rafmagnstruflanir víða á landinu. Hjá Landsneti vinna nú milli 70 og 80 manns að viðgerð á fjórum línum sem skemmdust illa.

Stærstu tryggingafélögin hafa skráð á annað hundrað tjón eftir óveðrið í síðustu viku.

Varðskipið Þór þarf að sjá Dalvíkingum og nærsveitungum fyrir rafmagni fram til næsta miðvikudags.

Guðmundur Guðmundsson landsliðsþjálfari karla í handbolta tilkynnti í dag 19 manna hóp fyrir Evrópumótið í handbolta í janúar.

Framkvæmdastjóri Landverndar segir að orkufyrirtækin séu að skella skuldinni á einhverja aðra en þá sem eigi hana.. byrgðin sé hjá fyrirtækjunum sem séu í ríkiseign. Hins vegar megi vel skoða breytingar á leyfisveitingakerfinu vegna lagningar raflína. Arnar Páll fjallar um málið í Spegilinum.

Ibiza-skandallinn varð til þess að Heinz-Christian Strache varð að segja af sér sem varakanslari Austurríkis og sem leiðtogi Frelsisflokksins. Nú er hann sakaður um að hafa tekið við töskum fullum af peningum frá Austur Evrópu fyrir pólitíska greiða. Myndir sýna reiðinnar býsn af hundrað evru seðlabúntum. Pálmi Jónasson segir frá.

Sextán eru látin og tveggja er saknað eftir eldgosið á Hvítueyju undan ströndum Nýja Sjálands í síðustu viku. Eldosið hjófst fyrirvaralaust á mánudag fyrir viku. 47 ferðamenn voru á eynni þegar gosið hófst. Yfir 20 liggja þungt haldnir á sjúkrahúsi. Þó eldstöðin á Hvítueyju sé ólík Heklu hér heima, þá eiga þær það sameiginlegt að fyrirvarinn sem vísindamenn hafa til að segja fyrir um gos er mjög stuttur. Spegillinn ræddi við Kristínu Jónsdóttur hópstjóra náttúruvárvöktunar á Veðurstofu íslands um gosið á Hvítueyju og hvað beri að varast í Heklugosum hér heima. Kristján Sigurjónsson sagði frá.

Miklar viðgerðir hafa verið í dag á raforkukerfi landsins. Rafmagnslausum stöðum er farið að fækka en þó eru 360 heimili eða fyrirtæki enn án rafmagns.

Fimm ráðherrar heimsóttu Norðurland í dag og skoðuðu afleiðingar óveðursins. Forsætisráðherra segir allt annað að sjá aðstæður með eigin augum.

Forstjóri Landsvirkjunar segir að vandamál í raforkukerfinu tengist á engan hátt fjármögnun. Vandamálið sé að samfélagið og stjórnvöld séu ekki sammála um að það þurfi að styrkja raforkukerfið.

Kosningasigur Íhaldsflokksins kom jafnvel bjartsýnustu flokksmönnum á óvart. Á næstunni mun þó reyna á loforðin, ekki síst þau um að hespa Brexit af.

Heimastjórnin í Skotlandi ætlar í næstu viku að byrja að undirbúa atkvæðagreiðslu um sjálfstæði landsins. Skoski þjóðarflokkurinn fékk 48 þingsæti í kosningunum í gær og bætti við sig þrettán.

Forstjóri Landsvirkjunar segir að vandamál í raforkukerfinu tengist á engan hátt fjármögnun. Vandamálið sé að samfélagið og stjórnvöld séu ekki sammála um að það þurfi að styrkja raforkukerfið. Einfalda þurfi leyfiskerfið sem sé allt of þungt. Það gangi ekki að það sé hægt að stöðva verkefni endalaust. Landsnet, sem stofnað var fyrir 15 árum, sé fyrst núna að komast í sitt fyrsta uppbyggingarverkefni. Arnar Páll Hauksson talaði við Hörð Arnarson.

Skýrar línur - það er útkoman úr bresku þingkosningunum í gær. Íhaldsflokkurinn fær kláran meirihluta, tæplega 44 prósent atkvæða, Verkamannaflokkurinn 32 prósent. Slæm útreið Verkamannaflokksins þýðir að nú fer orka þess flokks á næstunni í leiðtogakjör, ekki í landsmálin og stjórnarandstöðu. Sigrún Davíðsdóttir þú hefur fylgst með kosningunum en heyrum fyrst lokaorð Borisar Johnsons í morgun þegar hann ávarpaði stuðningsmenn sína. Anna Kristín Jónsdóttir talaði við Sigrúnu.

Lokadagur tuttugustu og fimmtu Loftslagsráðstefnu Sameinuðu þjóðanna í Madríd er runninn upp en viðræðum er hvergi nærri lokið. Helga Barðadóttir, formaður samninganefndar Íslands gagnvart Loftslagssamningnum og starfsmaður umhverfisráðuneytisins, segir að þrátt fyrir að enn sé deilt um það sama og í Katowice í fyrra hafi náðst ákveðinn árangur í Madríd. Það liggi betur fyrir um hvaða atriði ríki séu ósammála. Arnhildur Hálfdánardóttir talaði við Helgu Barðadóttur.

Á þriðja hundrað björgunarsveitarmenn hafa komið að leitinni að piltinum sem féll í Núpá, í Sölvadal í gærkvöldi.

Þjóðaröryggisráð situr nú á fundi þar sem rætt er um hamfarir liðinna daga og hvernig bregðast skuli við afleiðingunum.

Samgöngu- og sveitarstjórnarráðherra telur að til greina komi að arður af orkufyrirtækjunum sem nú fer í ríkissjóð verði notaður til að byggja upp og treysta raforkukerfið.

Kýr í Svarfaðardal verða mjólkaðar í kvöld. Varaaflsstöðvar eru komnar á flest ef ekki öll kúabú en enn sér ekki fyrir endann á rafmagnsleysinu. Bændur muna ekki eftir öðru eins veðri.

Bretar ganga til þingkosninga í dag, í annað skiptið á tveimur árum. Kannanir benda til sigurs Íhaldsflokksins.

Forstjóri Hafrannsóknastofnunar hafnar því að uppsagnir í nóvember hafi verið ólögmætar og siðlausar, líkt og fyrrum mannauðsstjóri stofnunarinnar heldur fram í greinargerð.

Sigurður Ingi Jóhannsson, ráðherra byggðamála, vill að skoða verði hvort arður af orkufyrirtækjunum verði notaður til að byggja upp og bæta dreifikerfi raforku. Hann er ekki sáttur við að einstaklingar sem beri fyrir sjónmengun geti staðið fyrir lagningu raflína þegar líf og öryggi samborgara þeirra sé í húfi. Arnar Páll Hauksson.

Kýr í Svarfaðardal verða mjólkaðar í kvöld. Varaaflsstöðvar eru komnar á flest ef ekki öll kúabú en enn sér ekki fyrir endann á rafmagnsleysinu. Bændur muna ekki eftir öðru eins veðri. Arnhildur Haldónardóttir.