Lestin

Certified Lover Boy nefnist sjötta breiðskífa rapparans Drake sem kom út nú á föstudag. Drake er kanadamaður af gyðingaættum og hóf ferilinn sem barnastjarna í sjónvarpi en hefur tekist að verða vinsælasti rapptónlistarmaður samtímans. Við spjöllum um Drake, nýju plötuna og ríginn við Kanye West við Bergþór Másson, skoðanabróður og rappspekúlant.

Í ágúst voru 20 ár síðan þá upprennandi óskastjarna RnB tónlistarinnar, Aaliyah, fórst ásamt átta öðrum í flugslysi á Bahama eyjum, aðeins 22 ára gömul. Síðustu vikur hefur dánarbú hennar gefið út eldri tónlist á streymisveitum og tilkynnt um nýja plötu með óútgefinni tónlist, meðal annars í von um að hrifsa minningu hennar úr fangi harmleiksins. En á sama tíma eiga sér stað réttarhöld sem rífa upp önnur, eldri sár.

Við minnumst söngkonunnar Aaliyuh í Lestinni í dag.

Gamlar perlur kvikmyndasögunnar og stórmerkilegt menningarefni leynist oft á netinu þó fólk hafi talið það týnt og tröllum gefið. Þórður Ingi Jónsson skyggnist um á háalofti netheima í leit að fjársjóðum.

Við kynnum okkur hvað er að gerast í íranskri samtímamenningu. Kjartan Orri Þórsson segir okkur frá írönskum sjónvarpsþáttum, bókum og tónlist

Við rýnum í nýja raunveruleikaþætti þar sem hótelerfinginn Paris Hilton sýnir matreiðsluhæfileika sína, Júlía Margrét er búin að horfa á Cooking with Paris

Og við fáum sorgarfréttir úr tónleikalífinu, Iceland Airwaves hefur verið frestað (AFTUR!). Við spjöllum við Ísleif Þórhallsson, framkvæmdastjóra Senu Live.

Við förum í skoðanaferð um vinnustofu fata-og textílhönnuðarinns Drífu Líftóru. Hún sýnir okkur græjurnar sínar og fatalínuna sem hún sérsaumar eftir pöntunum í mynstri sem hún þrykkir sjálf, en þar sækir hún innblástur í eigin myrkfælni og, af einhverjum ástæðum, kvikmyndina Hellraiser.

Við förum til Tékklands, á kvikmyndahátíðina Karlovy Vary þar sem Ásgeir H Ingólfsson sá íslensku kvikmyndina Dýrið og nýjustu mynd ísraelska leikstjórans Nadav Lapid, hnéskeljar Ahed.

Magnús Thorlacius eyddi sumrinu í að rannsaka sjálfsmynd Kópavogs. Hann skoðaði atburði í sögu bæjarfélagsins og kennileiti þess út frá óvæntum sjónarhornum og ætlar að setja niðurstöður sínar í samhengi fyrir okkur í pistlaröð á næstu vikum. Magnús byrjar á að velta sér upp úr skítalæknum.

Og nýir sjónvarpsþættir um pönksveitina Sex Pistols bera á góma.

Það er alltaf stórviðburður í poppheiminum þegar ný plata kemur frá rapparanum Kanye West, enda er hann einhver skærasta og útreiknanlegasta stjarnan í dægurtónlist samtímans. Tvö ár eru frá síðustu plötu hans Jesus is King, en Kanye hefur ekki setið auðum höndum því á sunnudag kom út 27 laga platan Donda. Davíð Roach Gunnarsson sökkvir sér ofan í Dondu.

Við pælum í mannaskít og klósettmenningu í Lestinni í dag. Ferðumst frá fyrstu salernum Mesópótamíu og yfir í gömlu almenningsklósettin í Bankastræti Núll þar sem Hannes Agnarson Johnson sýndi um helgina ljósmyndir sem hann hefur tekið af hundruðum klósetta undanfarinn áratug.

Og við veltum fyrir okkur 40 ára gömlu ljóði sem á af einhverjum ástæðum óþægilega vel við enn í dag.

Lestin snýr aftur úr sumarfríi og veður beint í boltann. Þáttur dagsins er tileinkaður fótbolta, þeirri fögru íþrótt, en þó alls ekki íþróttinni sjálfri heldur því sem gengur á hjá fólkinu allt í kringum hana, menningu og ómenningu íslensku fótboltahreyfingarinnar.

Tómas Þór Þórðarson, ritstjóri Enska boltans í Sjónvarpi Símans, Sævar Pétursson framkvæmdastjóri Knattspyrnufélags Akureyrar, KA, og stjórnarmeðlimur í Íslenskum toppfótbolta, ÍTF, og Halla Gunnarsdóttir, framkvæmdastjóri ASÍ sem bauð sig fram til formanns KSÍ árið 2007 setjast með okkur í hljóðstofu og kryfja stöðuna sem upp er komin í efstu röðum Knattspyrnusambands Íslands.

Þetta er seinasti þáttur Lestarinnar fyrir sumarfrí og, við erum svolítið þreytt. Ekki á ykkur, elsku hlustendur, bara á því að sitja við skrifborðið og á öllu þessu erfiða sem er í fréttum og við reynum að fjalla um og okkur finnst við eiga að fjalla um og trúum því ekki að við þurfum ennþá að fjalla um... svo í dag tölum við við Nönnu Hlín Halldórsdóttur, doktor í heimspeki og nýbakaða móður sem rannsakar þreytu, bæði í vinnunni og einkalífinu, sem nýbökuð móðir.

Mikil hátíðarhöld hafa farið fram í alþýðulýðveldinu Kína í dag, því er fagnað að fyrir nákvæmlega öld var kommúnistaflokkur landsins stofnaður í Sjanghæ. Á hundrað árum hefur fámennur hópur róttæklinga orðið að einhverjum valdamesta afli á jörðinni. Við kynnum okkur kínverska kommúnistaflokkinn og heyrum um viðhorf kínverja til hans.

Ingólfur Eiríksson flytur okkur sitt sjötta bréf til Birnu. Meðal þess sem ber á góma eru starfsumsóknir, samkennd og evrópumeistaramót í fótbolta - en eins og álfan sat Ingólfur í losti ásamt föður sínum fyrir framan sjónvarpið þegar danski knattspyrnumaðurinn Christian Eriksen hneig niður.

Við hringjum til Nairobi í Kenýa og ræðum við rapparann Lexa Picasso sem er þar búsettur um þessar mundir. Lexi bjó lengi í Atlanta höfuðborg rappsins í Bandaríkjunum og vakti mikla athygli þegar hann flaug í einkaþyrlu inn á sviðið í íslensku rappi árið 2016. Við ræðum við Lexa um lífið í afríku, um föðurhlutverkið og nýja plötu sem hann er að leggja lokahönd á, þar sem hann rappar í fyrsta skipti á hinu ástkæra ylhýra.

Frie mænd nefnist útskritftarverkefni leikstjórans Óskars Kristins Vignissonar úr danska kvikmyndaskólanum. Þessi hálftíma grínmynd um tvo lánlausa starfsmenn í fiskvinnslu í danmörku hefur verið valin til sýninga á kvikmyndahátíðinni í Cannes, en þetta er í fyrsta skipti í 18 ár sem nemandi úr skólanum fær inni á hátíðinni með útskriftarverkefni sitt. Við ræðum við Óskar í Lestinni í dag um Cannes, um danska kvikmyndaskólann og kúnstina að gera kómedíur.

Og við köfum ofan í eina af yfirstandandi sýningum safnasafnsins: sýningu tengda manni sem var ?biskup? yfir sjálfum sér, sýningu sem inniheldur bæði frímerkja mósaík og HM 95 trefil, sýningu sem fylgir dularfull ráðgáta sem safnstjórinn leitar svara við.

Góðan daginn faggi er einleikur þar sem fertugur söngleikjahommi, Bjarni Snæbjörnsson leikari, leitar skýringa á skyndilegu taugaáfalli sem hann fékk upp úr þurru einn blíðviðrisdag. Og já, verkið er að sjálfsögðu söngleikur.

Ég er ekki hamingjusöm, sagði Britney Spears við dómarann í Los Angeles sem hefur sjálfræðismál hennar á sínum snærum. Skyldi engann undra. Á síðustu misserum hafa aðstæður hennar sem líkja má við vinnuþrælkun, smám saman orðið almenningi ljósar, en í vitnisburði Spears kom einnig fram að hún hafi verið svipt frjósemi sinni með hormónalykkjunni, nauðug viljug.

Við heyrum svo í Hildi Maral sem fer fyrir plötuútgáfunni Mercury KX, sem er undirfyrirtæki Decca. Útgáfan fer óhefðbundna leið við útgáfu á nýrri plötu skoska tónlistarmannsins Erlands Coopers en eina eintak plötunnar verður grafið í jörð á Orkneyjum og látin óhreifð næstu þrjú árin, ef enginn hefur rambað á hana fyrr verður hún gefin út nákvæmlega eins og jörðin skilar henni af sér.

En við ætlum að byrja á sannri sögu úr samtímanum. Jónas Reynir Gunnarsson, rithöfundur, flytur fyrir okkur færslu sem hann birti á samfélagsmiðlinum twitter í gær.

Tónskáldið og kvikmyndagerðarmaðurinn Jóhann Jóhannsson lést langt fyrir aldur fram árið 2018. Indí, diskó, rafrænar hljóðtilraunir og kvikmyndatónlist, allt þetta og meira tók hann þessi fjölhæfi listamður sér fyrir hendur á meira en þriggja áratugalöndum tónlistarferli. The creative space of Jóhann Jóhannsson er umfangsmikið verkefni þar sem sköpunaraðferðum og listferli Jóhanns verða gerð skil í heimildarmynd, veglegu bókverki og gagnasafni. Orri Jónsson kemur og segir frá verkefninu og ástæðum þess að farið var af stað.

Við rennum úr höfuðborginni norður á bóginn, inn á Safnasafnið á Svalbarðsströnd þar sem við fáum leiðsögn um nokkrar af sýningum ársins og ræðum við safnstjórann Níels Hafstein um íslenska alþýðulist.

Og Melkorka Gunborg Briansdóttir segir okkur sérkennilega sögu bresku tvíburanna Fridu og Gretu Chaplin sem lifðu algjörlega samhæfðu lífi, klæddu sig eins og töluðu samtímis.

Við lítum við hjá einu sjónvarpsstöð landsins með höfuðstöðvar utan höfuðborgarsvæðisins. N fjórir skilgreinir sig sem landsbyggðamiðil og dagskráin ber þess svo sannarlega merki en digurbarkaleg borgarbörn ættu að fara varlega í að kalla N fjóra ?lítin? fjölmiðil.

Við ræðum við tónskáldið og gítarleikarann Hafdísi Bjarnadóttur um nýtt verkefni hennar og Passepartout Dúósins.En þau vinna nú að tónlist sem á að höfða til sauðkindarinnar ekki síður en mannfólksins.

Og við tökum forskot á sæluna og rýnum í nýja plötu Skratta, plötuna Hellraiser IV sem kemur út á næstunni. Davíð Roach Gunnarsson sekkur sér í djöfullegan tónheim sveitarinnar.