Donald Trump, forseti Bandaríkjanna, þvertekur fyrir að orð sem hann lét falla á fjöldafundi stuðningsmanna sinna í Washington í síðustu viku hafi orðið til að kynda undir árásina á þinghúsið.

Heimastjórn Seyðisfjarðar vill að rannsakað verði hvers vegna hús voru ekki rýmd í bænum fyrr en aurskriður voru farnar að falla á byggðina.

Samkvæmt nýrri reglugerð þurfa börn sem fædd eru eftir 2005 að fara í sóttkví við komuna til landsins.

Fyrirhugaðar breytingar á kvöldfréttum stöðvar tvö eru skref aftur á bak í íslenskri fjölmiðlun að mati formanns Blaðamannafélags Íslands. Það sé Ríkisútvarpinu mikilvægt að geta speglað sig í öðrum miðlum. Hann kallar eftir því að fjármögnun fjölmiðla verði endurskoðuð.

Öllum samfélagsmiðlum hefur verið lokað í Úganda í aðdraganda forsetakosninga á fimmtudag. Lífverðir helsta mótframbjóðanda sitjandi forseta hafa verið handteknir.

Samkvæmt stjórnarskrá Íslands gæti forseti sem leystur hefur verið frá embætti áður en kjörtímabilinu lýkur boðið sig fram aftur seinna. Þetta segir aðjúnkt við lagadeild Háskólans í Reykjavík. Ef Bandaríkjaforseti verður ákærður þýðir það hins vegar að hann getur ekki aftur boðið sig fram sem forseti. Arnar Páll Hauksson ræðir við Elínu Ósk Helgadóttur um hvaða lög og reglur gilda hér um að leysa ráðamenn frá störfum.

Donald Trump Bandaríkjaforseti sagði við fréttamenn í dag, þegar hann hélt áleiðis að mexíkósku landamærunum til að virða fyrir sér vegginn sem hann lét reisa, að hann vildi ekki sjá neitt ofbeldi í fyrirhuguðum mótmælum stuðningsmanna sinna næstu daga. Hann fordæmdi jafnframt þingmenn demókrata sem hyggjast leggja fram ákæru á hendur honum á bandaríska þinginu á morgun. Ákæran væri framhald á mestu nornaveiðum í stjórnmálasögu Bandaríkjanna. Kristján Sigurjónsson. sagði frá.

Spegillinn 11.janúar 2021

Umsjón: Kristján Sigurjónsson

Tæknimaður: Magnús Þorsteinn Magnússon

Demókratar á Bandaríkjaþingi hyggjast þrýsta á Mike Pence varaforseta að svipta Donald Trump völdum. Ella verður hann ákærður til embættismissis.

Tuttuguogsex manns kusu fjórtán daga sóttkví við komuna til landsins á rúmlega þremur vikum frá 10. desember. Sóttvarnalæknir segir nokkra þeirra ekki hafa virt reglur um sóttkví.

Forstjóri Icelandair segir að forsendur hlutafjárútboðs félagsins í fyrra haldi. Félagið stefnir á að ná á þessu ári þriðjungi af flugferðum félagsins árið 2019

Allt efni Stöðvar 2 verður selt í áskrift frá og með 18. janúar, þar með taldar sjónvarpsfréttir. Framkvæmdastjóri fjölmiðla Stöðvar 2 segist vilja halda úti metnaðarfullri fréttaþjónustu en það sé ekki hægt með auglýsingatekjum einum saman.

Þingfundir hefjast brátt að nýju á Alþingi eftir jólafrí, en þingnefndir hefja störf á morgun.

Starfsmenn veitingastaðarins Hrauns í Ólafsvík eiga inni tæpar tvær milljónir króna í laun. Lífeyrissjóður þeirra hefur farið fram á gjaldþrot félagsins, en fyrra rekstrarfélag sama staðar fór líka í þrot. Formaður Verkalýðsfélags Snæfellinga gagnrýnir að engin refsing sé við slíku.

Skagafjarðarveitur biðla til íbúa í Skagafirði að fara sparlega með heita vatnið næstu daga. Mikill kuldi hefur verið í sveitinni síðustu daga og búist er við áframhaldandi frosti fram á miðvikudag.

Lengri umfjöllun:

Ríkissjóðir vestrænna þjóða dæla fjármagni út í laskað hagkerfi í Covid-19 faraldrinum. Slík hagfræði hefur löngum verið kennd við John Maynard Keynes, en kenningar hans hafa um áratugaskeið verið uppspetta deilna um hlutverk ríkisins í atvinnulífinu. Ari Skúlason hagfræðingur hjá Landabankanum bendir á í Hagsjá bankans, sem kom út í dag, að ríkissjórnir á vesturlöndum eru samstíga í að beita hagstjórnarkenningum Keynes í faraldrinum, jafnt hægri sem vinstri stjórnir. Það eru erfiðir tímar í rekstri ríkissjóðs Íslands - útlit er fyrir samtals 600 milljarða króna halla á árunum 2020 og 2021. Kristján Sigurjónsson talar við Ara.

Í Noregi er vitað um 2300 svæði þar sem kvikleir er í jörðu. Enn á eftir að rannsaka fleiri staði. Fá 2015-2019 var varið um fimm milljörðum krona í aðgerðir til að koma í veg fyrir að kvikleirskriður færu af stað. Með þessum aðgerðum var öryggi tæplega 900 íbúðarhúsa tryggt og um 300 annara bygginga. Um 110 þúsund manns í Noregi búa á svæðum þar sem kvikleir er í jörðu. Það hefur ekki enn verið útskýrt hvað það var sem kom kvikleirskriðunni af stað í Ask í Gjerdrum í Noregi sem fél

Umsjón: Anna Kristín Jónsdóttir. Tæknimaður: Magnús Þorsteinn Magnússon

Tveggja vikna skyldusóttkví í farsóttarhúsi vilji fólk ekki í skimun þegar það kemur til landsins er neyðarúræði, sem sóttvarnalæknir vill grípa til svo faraldurinn blossi ekki upp að nýju.

Forseti fulltrúadeildar Bandaríkjaþings hefur rætt við æðstu yfirmenn Bandaríkjahers um leiðir til að takmarka möguleika Donalds Trump, Bandaríkjaforseta, til að fyrirskipa beitingu kjarnorkuvopna. Forseti deildarinnar kveðst reiðubúin að hefja kæruferli á hendur forsetanum.

Lyfjastofnun Evrópu hefur samþykkt að skilgreina sex skammta af bóluefni Pfizer og BioNTech í hverju glasi í stað fimm áður. Búnaðurinn sem til er hér á landi dugar þó aðeins til að ná fimm skömmtum úr glasinu.

Skimunaraldur fyrir krabbameinum í brjóstum hefur hækkað og lengra líður á milli leghálsskimana eftir að opinberar stofnanir tóku við þeim af Krabbameinsfélaginu. Formaður skimunarráðs segir þjónustuna þó ekki skerta.

Varað er við fárviðri á austanverðu landinu á morgun, stormi, roki, jafnvel ofsaveðri og stórhríð norðaustantil.

----

Donald Trump, forseti Bandaríkjanna hefur látið fara mikið fyrir sér á samfélagsmiðlum í gegnum tíðina og sérstaklega á Twitter. Í vikunni var honum úthýst þaðan í tólf tíma eftir óeirðirnar í Washington og þrír póstum sem stjórnendur miðilsins töldu fela í sér hvatningu til ofbeldis eytt. Þá hefur aðgangi hans að Facebook og fleiri miðlum verið lokað fram yfir forsetaskipti. Sitt sýnist hverjum um það hverjir ákveða og mörk tjáningarfrelsis og hvar þau liggja. Anna Kristín Jónsdóttir ræðir við Elvu Ýr Gylfadóttur, framkvæmdastjóra Fjölmiðlanefndar.

Ekki ferðast að óþörfu. Ekki fara í verslunarleiðangra. Og ekki hitta fleiri en nauðsynlegt er - helst bara þá sem þú býrð með.Þannig hljómuðu ráðleggingar sænskra yfirvalda fyrir jólin. Og Svíar eru þekktir fyrir að fara eftir reglum og fyrirmælum. Eða hvað? Kári Gylfason segir frá.

Í byrjun desember var Bretland fyrsta Evrópulandið til að taka upp bólusetningu gegn Covid-19 veirunni. Enn sem komið er gengur þó hægt að koma bóluefni í gagnið. Bretland er nú verst stadda Evrópulandið í Covid-efnum og í dag lýsti borgarstjóri höfuðborgarinnar yfir neyðarástandi á sjúkrahúsum borgarinnar. Sigrún Davíðsdóttir segir frá.

Leiðtogi Demókrata í öldungadeild Bandaríkjaþings vill að Donald Trump, forseta Bandaríkjanna, verði vikið úr embætti. Margir stuðningsmenn forsetans hafa snúið við honum baki vegna atburða gærdagsins þegar stuðningsmenn hans réðust á þinghús Bandaríkjanna.

Félag íslenskra atvinnuflugmanna sakar flugfélagið Bláfugl um brot á kjarasamningum vegna uppsagna 11 flugmanna félagsins. Í stað þeirra eigi að ráða nýja flugmenn í gegnum starfsmannaleigur á lélegri kjörum. Félagið segir að um alvarleg undirboð sé að ræða.

Ný rannsókn Íslenskrar erfðagreiningar leiðir í ljós að erfðamengi eineggja tvíbura eru svipuð en ekki eins, eins og gengið hefur verið út frá hingað til.

Sviðslistasjóður hefur veitt 30 atvinnusviðslistahópum 132 milljónir króna til verkefna leikárið 2021.

Múgurinn sem réðst inn í þinghúsið í Bandaríkjunum í gær er ekki dæmigerður fyrir stuðningsfólk Rebúblikanaflokksins, heldur lítill hópur öfgasinnaðra Trump fylgjenda. Þetta segir Halla Hrund Logadóttir stjórnmálafræðingur og sviðsstjóri Miðstöðvar norðurslóða við Harvard háskóla í Boston í Bandaríkjunum. Kristján Sigurjónsson talaði við hana.

Það er ljóst að Bandaríkjamönnum er brugðið og reyndar allri heimsbyggðin eftir það sem gerðist við og í þinghúsinu í Washington í gær. Stuðningsmenn réðust inn í þinghúsið til að koma í veg fyrir eða að mótmæla að þingið staðfesti kjör Joe Binden og kjör tveggja öldungaþingmanna Demókrata. Hvaða afleiðingar mun þetta og hver verða viðbrögðin.

Arnar Páll Hauksson talaði við Sigríði Rut Júlíusdóttur lögmann og Jón Óskar Sólnes hagfræðing sem býr í Washingtonborg.

Spegillinn 6. janúar 2021

Umsjón: Kristján Sigurjónsson

Tæknimaður: Jón Þór Helgason

Líkur eru á að Demókratar hafi unnið bæði öldungardeildarsætin á Bandaríkjaþingi sem kosið var um í Georgiu í gær og að Repúblikanar hafi misst meirihluta sinn í deildinni. Þúsundir stuðningsmanna Trumps eru á útifundi fyrir utan Hvíta húsið. Sameiginlegur fundur þingdeildanna fer nú yfir atkvæði kjörmanna í forsetakosningunum.

Bannað verður að endurbyggja hús á tíu lóðum á Seyðisfirði, sem urðu fyrir skriðuföllum í desember, fyrr en byggðin hefur verið varin fyrir ofanflóðum. Sveitarstjórn Múlaþings samþykkti tillögu þess efnis í dag.

Forgangsröð vegna bólusetningar við COVID-19 hefur verið breytt. Nú verður lögð áhersla á að bólusetja fólk sem er sjötíu ára og eldra með þeim bóluefnum sem Íslendingar fá á næstunni.

Nær allir íbúar hjúkrunarheimila landsins voru bólusettir við Covid-19 í lok desember, yfir 3.200 manns.

Karlmaður var í dag dæmdur í fimm ára fangelsi í Héraðsdómi Reykjaness fyrir að nauðga fjórum konum. Dómnum hefur þegar verið áfrýjað.

Mygla hefur greinst í leikskólanum Leikholti í Skeiða og Gnúpverjahreppi. Flytja þarf 35 börn úr leikskólanum.

Ísland mætir Portúgal í Evrópumóti karla í handbolta á útivelli klukkan hálf átta í kvöld.

Lengri umfjöllun:

Líkur eru á að Demókrakatar hafi unnið bæði öldungardeildarsæti Georgíu í kosningum þar í gær og þar með jafnað stöðuna í öldungadeildinni. Sé þetta raunin þá eru Demókratar með 50 þingmenn eins og Repúblikanar. Varaforsetinn Camilla Harris er hins vegar oddamaðurinn í deildinni og demókratar því í raun komnir í meirihluta í öldungadeildinni og þar með í báðum deildum bandaríska þingsins. Kristján Sigurjónsson ræðir við Eirík Bergmann Einarsson stjórnmaálfræðiprófessor um pólitíska gerjun í Bandaríkjunum.

Talsvert færri komast að í íslenskunám fyrir útlendinga en áhugi er á. Í Fjölbraut í Breiðholti er nú boðið upp á sérstaka íslenskubraut fyrir útlendinga í fyrsta sinn. Tækniskólinn hefur í nokkur ár verið með íslenskukennslu fyrir útlendinga. Þar er langur biðlisti.

Arnar Páll Hauksson talar Brynju Stefánsdóttir sviðsstjóra bóknáms í FB

Núna þegar byrjað er að bólusetja víða um lönd gegn Covid-19 og von til að það gangi þokkalega hratt, er ástæða til að spá aðeins í hvernig þessi nýja framtíð að baki faraldrinum muni þá líta út. Annars vegar eru það pólitísku línurnar, hins vegar hvað hvert og eitt okkar er að hugleiða um eigið líf.Sigrún Davíðsdóttir segir frá.

Aldrei hafa fleiri misst vinnu í hópuppsögnum en í fyrra. Vilborg Oddsdóttir, félagsráðgjafi hjá Hjálparstarfi kirkjunnar segir að sífellt fleiri glími nú við fátækt sökum langtímaatvinnuleysis. Höskuldur Kári Schram ræddi við hana.

Um 80 aldraðir bíða nú á Landspítala eftir að komast á hjúkrunarheimili og fyrr í dag biðu hátt í 30 manns á bráðamóttöku eftir að komast á hinar ýmsu deildir spítalans - sumir á göngunum. Jón Magnús Kristjánsson yfirlæknir segir þetta óviðunandi á tímum heimsfaraldurs.

Sex ára barn stórslasaðist þegar það féll úr leiktæki á skólalóð í Kópavogi í nóvember. Leiktækið uppfyllir allar öryggiskröfur. Hrönn Óskarsdóttir móðir barnsins undrast að slys geti orðið í tæki sem uppfyllir kröfur.

Yfir sextíu þúsund COVID-smit hafa verið greind í Bretlandi síðasta sólarhringinn og hafa þau aldrei verið fleiri. Nýtt afbrigði veirunnar, sem talið er sérlega smitandi, hefur dreifst um allt landið. Dagný Hulda Erlendsdóttir sagði frá. Brot úr ávarpi Borisar Johnsons síðdegis.

Vonast er til að Lyfjastofnun Evrópu afgreiði markaðsleyfi fyrir bóluefni frá Moderna á morgun. Svandís Svavarsdóttir, heilbrigðisráðherra segir að tryggt sé í samningunum að afhending efnisins hefjist eigi síðar en 15 dögum eftir samþykkt markaðsleyfis. Bergljót Baldursdóttir tók saman.

------------

Heilsugæsla höfuðborgarsvæðisins fór að öllu leyti eftir leiðbeiningum og fyrirmælum Lyfjastofnunar og Landlæknis við blöndun og meðhöndlun bóluefnisins Comirnatys eins og segir í tilkynningu frá henni í dag. Ekki sé ráðlagt að safna milli glasa en náist heill skammtur úr lyfjaglasi sé notkun hans leyfð, enn fremur að umræðan eigi ekki að snúast um færni heldur hvort farið sé að leiðbeiningum. Anna Kristín Jónsdóttir ræðir við Sigríði Dóru Magnúsdóttur, framkvæmdastjóra lækninga hjá Heilsugæslu höfuðborgarsvæðisns.

Færri sóttu um að stunda nám á atvinnuleysisbótum en búist var við. Meirihluti umsækjenda eru erlendir atvinnuleitendur. Arnar Páll Hauksson ræðir við Ásmund Einar Daðason, félagsmálaráðherra og Hrafnhildi Tómasdóttur sviðsstjóra hjá VInnumálastofnun.

Yfirvöld í Noregi hafa gefið upp alla von um að finna fólk á lífi eftir jarðfallið í bænum Ask í Gjerdrum. Björgunarmenn leita samt áfram með hundum. Gísli Kristjánsson.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar fréttahluta: Björg Guðlaugsdóttir

Lyfjastofnun hefur fengið þrjár tilkynningar um andlát fólks sem var bólusett við Covid-19 í síðustu viku . Rúna Hvannberg Hauksdóttir, forstjóri Lyfjastofnunar segir ekkert benda til þess að þar sé orsakasamhengi en þetta verði skoðað. Anna Lilja Þórisdóttir talaði við hana.

Vel er hægt að samræma guðs lög og sóttvarnareglur segir Jakob Rolland kanslari biskupsdæmis kaþólsku kirkjunnar á Íslandi. Hann segir að hugsanlega verði gerðar breytingar á messuhaldi kirkjunnar á virkum dögum vegna fjöldatakmarkana, en messum um helgar hefur verið aflýst.

Fimm skip halda í dag til loðnumælinga norður af landinu. Birkir Bárðarson leiðangursstjóri segir ákveðnar væntingar og margt hafi bent til þess að meira sé af veiðanlegri loðnu en síðasta ár. Ágúst Ólafsson talaði við hann.

Rögnvaldur Ólafsson, aðstoðaryfirlögregluþjónn Almannavarnadeildar ríkislögreglustjóra segist hafa orðið vitni að brotum á fjöldatakmörkunum í sundlaugum og dapurlegt sé að gera starfsfólki að þurfa að ganga á milli og skamma fólk.

Fjölmargir íbúar í Reykjavík tóku ekki til eftir sig eftir áramótin og flugeldarusl lá á víð og dreif um borgarlandið. Hjalti Jóhannes Guðmundsson, skrifstofustjóri reksturs og umhirðu Reykjavíkurborgar, segir ljóst að margir þurfi að taka sig á í þessum efnum. Jóhann Bjarni Kolbeinsson ræddi við hann.

--------------

Nýr kafli er að hefjast í baráttunni við kóronuveirufaraldurinn. Þórólfur Guðnason sóttvarnalæknir sagði á fyrsta almannavarnafundi ársins í morgun að sín von væri að þetta yrði lokakaflinn og að hægt verði að slaka á sóttvarnaráðstöfunum í næstu viku. Samantekt af máli Þórólfs á fundinum og Ölmu Möller, landlæknis. Anna Kristín Jónsdóttir tók saman.

Í Skotlandi verður í gildi allsherjar lokun frá miðnætti og það eykur þrýsting á bresku stjórnina að grípa til róttækra ráða. Sigrún Davíðsdóttir segir frá. Heyrist í Boris Johnson, Matt Hancock og Keir Starmer.

Hjálparstarf kirkjunnar hefur um árabil unnið með sjálfsþurftarbændum á miklu þurrkasvæði í Sómalí-fylki í Eþíópíu. Samvinnuþróunarverkefni þar fékk nýlega styrk til fjögurra ára frá utanríkisráðuneytinu. Fénu á að verja í að grafa brunna og regnþrær til að bæta aðgengi að vatni og auk þess er lögð áhersla á að tryggja réttindi kvenna og stúlkna. Anna Kristín Jónsdóttir ræddi við Bjarna Gíslason, framkvæmdastjóra Hjálparstarfsins.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar fréttahluta: Björg Guðlaugsdóttir

Komiði sæl og velkomin að Speglinum, Arnhildur Hálfdánardóttir er umsjónarmaður

Fimmtán er enn saknað eftir skriðuföll í bænum Ask í Gjerdrum í Noregi. Forsætisráðherra Noregs segir hræðilega sárt til þess að vita að enn séu svo margir ófundnir.

Það gæti þurft að rýma aftur þau svæði á Seyðisfirði sem rýmingu hefur verið aflétt á.

Stjórnvöld gerðu í dag samning við lyfjafyrirtækið Moderna um kaup á bóluefni fyrir 64 þúsund manns. Fyrirtækið áætlar að hefja dreifingu á fyrstu mánuðum nýs árs.

Umhverfisáhrif af virkjun Svartár í Bárðardal í Þingeyjarsveit verða verulega neikvæð, segir í áliti Skipulagsstofnunar

Forseti ASÍ segir að það verði mikil barátta á næsta ári. Alþingiskosningar muni að einhverju leyti snúast um stöðu almennings og launafólks og hvernig brugðist verði við halla ríkissjóðs. Hún segir að við verðum að þola að skulda kreppuna í einhvern tíma.

Gjaldþrot í ferðaþjónustunni hafa verið færri en búist var við, en Bjarnheiður Hallsdóttir, formaður Samtaka ferðaþjónustunnar, segir að yfir vofi snjóhengja

Jarðskjálfti að stærðinni 6,4 sem reið yfir í miðhluta Króatíu í dag varð að minnsta kosti fimm að bana.

Fleiri COVID-19 sjúklingar eru á sjúkrahúsum á Englandi en þegar fyrsta bylgja faraldursins var í hámarki í apríl. Nýjar ráðstafanir til að hefta útbreiðslu veirunnar verða kynntar á morgun.

Sóttvarnalæknir segir að ekki sé á þessu stigi ástæða til að herða sóttvarnaaðgerðir gagnvart þeim sem koma til Íslands frá Bretlandi.

Starfsmenn Veðurstofunnar eru nú að meta aðstæður í hlíðum Seyðisfjarðar og hvort tilefni er til að ákveða frekari afléttingu rýmingar í bænum.

Kórónuveirufaraldurinn virðist lítil áhrif hafa haft á jólagleði landsmanna og tilhlökkun þeirra. Svipaður fjöldi hlakkaði til jólanna í ár og undanfarin ár.

Ég held að árið 2021 verði ár fjölskyldunnar, þetta segir Anna Birna Jensdóttir, hjúkrunarforstjóri á hjúkrunarheimilinu Sóltúni. Íbúar heimilisins verða bólusettir á morgun, og það stendur til að flagga og baka köku. Anna Birna segir að árið 2020 hafi verið lærdómsríkt og ólíkt öllum öðrum sem hún hefur upplifað á löngum ferli, sumt í starfinu eigi í ljósi reynslunnar frá veirutímanum eftir að breytast til frambúðar. Hún leyfir sér að vona að hægt verði að lyfta hömlum af hjúkrunarheimilum strax í febrúar. Arnhildur Hálfdánardóttir talaði við Önnu Birnu Jensdóttur. Einning heyrist í Þorleifi Haukssyni sem fékk fyrstu bólusetninguna.

Þjóðleikhússtjóri stefnir að því að nýtt íslenskt verk verði frumsýnt í janúar ef sóttvarnareglur leyfa það. Hann segir að tíminn hafi verið nýttur vel í leikhúsinu til þess að verða sannarlega tilbúin að taka á móti leikhúsgestum á ný. Arnar Páll Hauksson talar við Magnús Geir Þórðarson.

,,Fagnið nýja árinu ein heima“ - þetta er áramótaboðskapur breskra yfirvalda til landsmanna. Megnið af landinu sætir nú hörðum samkomubönnum. Met nýrra tilfella í gær, 41 þúsund tilfelli, var slegið í dag þegar ný tilfelli fóru yfir 53 þúsund. Nú telja ýmsir vísindamenn að ekkert dugi annað en hart bann fyrir allt landið, enn eitt hástigið, sem bætist ofan á fyrri bönn, þó enn sé stefnt á að halda skólunum opnum. Sigrún Davíðsdóttir segir frá.

Spegillinn 28. desember 2020

Umsjón: Kristján Sigurjónsson

Tæknimaður: Mark Eldred

80 þúsund skammtar af bóluefni frá Pfizer og BioNTech koma til viðbótar þeim 170 þúsund skömmtum sem íslensk stjórnvöld hafa þegar samið um. Skrifað verður undir samning þess efnis á morgun.

Íbúar 42 húsa á Seyðisfirði fengu að snúa aftur heim í dag eftir að rýmingu var aflétt að hluta. Hreinsunarstarf hefst á morgun og þá verður staða varðandi rýmingu annarra húsa endurskoðuð.

Alþingi kemur ekki saman fyrir lok árs eins og stjórnarandstaðan hefur krafist.

Mun fleiri hafa dáið af völdum COVID-19 í Rússlandi en áður hafði verið greint frá, þar af tæplega 26 þúsund í síðasta mánuði.

Almenn komugjöld í heilsugæslu lækka um 29 prósent um áramót. Börn, öryrkjar og aldraðir greiða ekkert fyrir komuna

Lengri umfjöllun:

Flugvél með tíu þúsund skömmtum af bóluefni Pfizer og BioNtech lenti á Keflavíkurflugvelli í morgun. Tíu þúsund lítil mæliglös af -80 gráða köldu efni sem sumir kalla kraftaverk og verður á næstu dögum sprautað í upphandleggi fólks sem tilheyrir forgangshópum, íbúa hjúkrunarheimila og framlínufólks heilbrigðiskerfinu. Bóluefnið á sér aðeins nokkurra mánaða sögu, síðastliðið vor var það hvergi til, nema þá kannski í kollum vísindamanna, vísindamanna eins og Kathrin U Janssen sem stýrir bóluefnasviði lyfjarisans Pfizer, sem er með höfuðstöðvar í New York. Janssen hefur áður komið að þróun bóluefna við lungnabólgu og HPV-veirunni. í samtali við bandaríska fréttaskýringaþáttinnn 60 mínútur rifjaði hún upp hvernig henni leið þegar neyðarástand ríkti í New York-borg í vor. Arnhildur Hálfdánardóttir tekur saman og ræðir við Magnús Gottfreðsson smitsjúkdómalækni um bóluefnið

Atvinnuleysið er mesta áhyggjuefnið í eftirmálum Covid faraldursins segir Katrín Ólafsdóttir hagfræðingur og lektor við Háskólann í Reykjavík. Margir óvissuþættir hafa áhrif á hversu hratt efnahagurinn tekur við sér á næsta ári í kjölfar bólusetningar. Kristjan Sigurjónsson ræðir við Katrínu um efnhaginn á árinu 2020 og hverning horfurnar eru á næstu mánuðum.

Í tíu mínútna ávarpi á aðfangadag þegar Boris Johnson forsætisráðherra Breta kynnti fríverslunarsamning Breta við Evrópusambandið hnykkti hann á að með útgöngu úr Evrópusambandinu hefðu Bretar nú aftur stjórn á eigin fiskveiðum. Raddir úr sjávarútvegi segja þó annað - staða greinarinnar verði mögulega verri eftir Brexit eins og Sigrún Davíðsdóttir heyrði þegar hún ræddi í dag við Barry Deas framkvæmdastjóra breska sjómannasambandsins.