Karl Gauti Hjaltason og Ólafur Ísleifsson, þingmenn Flokks fólksins, hafa verið reknir úr flokknum. Gunnar Bragi Sveinsson og Bergþór Ólason þingmenn Miðflokksins eru á leið í leyfi.

Vinnustaðasálfræðingur segir að illt umtal og umræður eins og þingmannanna sex á barnum Klaustri séu áfall fyrir vinnustaðinn Alþingi og geti haft slæm og hamlandi áhrif á störf þingsins.

Forstjóri Wow Air segir að fjárfesting félagsins Indigo Partners í flugfélaginu sé umtalsverð. Hann vill þó ekki greina frá upphæðum, innihaldi samningaviðræðna eða hversu stóran hlut félagið eignast í Wow Air.

Samgönguráðherra segir að ríkisstjórnin sé upplýst um framvindu mála á flugmarkaði. Fjármálaráðherra segir að óvissan sé slæm og vonast eftir niðurstöðu sem fyrst

Bandaríkjaforseti var sigri hrósandi þegar nýr viðskiptasamningur Norður-Ameríkuríkja var undirritaður í dag. Hann segir samninginn vera fyrirmynd viðskiptasamninga framtíðarinnar.

Tveir af þingmönnunum sex sem voru á barnum Klaustri, þeir Gunnar Bragi Sveinsson og Bergþór Ólason þingmenn Miðflokksins, eru á leiðinni í leyfi vegna Klaustursupptökunnar. Ólafur Ísleifsson og Karl Gauti Hjaltason hafa verið reknir úr Flokki fólksins en sitja áfram á þingi, óháð brottrekstrinum.

Þórkatla Aðalsteinsdóttir, sálfræðingur segir að illt umtal eins og heyra má í Klaustursupptökunum sé áfall fyrir allan vinnustaðinn Alþingi. Búast megi við að það hafi slæm og hamlandi áhrif á störf þess. Bergljót Baldursdóttir talar við Þórkötlu Aðalsteinsdóttur.

Ekki er óalgengt í Svíþjóð að stjórnmálamenn segi af sér eða hrekist úr stjórnmálum vegna grófrar, pólitískrar spillingar eða óvarlegrar framgöngu á Facebook. Kári Gylfason segir frá.

Nýr forseti og ný ríkisstjórn í Mexíkó standa frammi fyrir snúnum vanda sem sífellt vindur upp á sig. Forsetinn, vinstrimaðurinn Andrés Manuel López, og ríkisstjórn hans taka við völdum á laugardag, 1. desember. Kristján Sigurjónsson segir frá.

Rösklega 200 starfsmönnum var í dag sagt upp hjá Airport Associates, APA, á Keflavíkurflugvelli, stærsta þjónustufyrirtækis WOW air.

Óskað hefur verið eftir því að forsætisnefnd Alþingis fjalli um ummæli sex þingmanna í liðinni viku á bar í Reykjavík. Þingkona segir að henni sé illt í hjartanu vegna þessara ummæla og önnur segir þau ömurleg og niðurlægjandi.

Anna Kolbrún Árnadóttir, þingmaður Miðflokksins, segist vera að skoða stöðu sína á Alþingi. Hún eigi sér engar málsbætur. Hún var ein sexmenninganna á barnum.

Fjallvegir á norðanverðu landinu eru enn lokaðir og víða er vonskuveður. Öllu innanlandsflugi var aflýst í dag.

Sérfræðingur í markaðsetningu á netinu segir að Facebook geymi gífurlegar miklar upplýsingar um notendur samfélagsmiðla og viti jafnvel meira um fólk en það sjálft

Almenningi er misboðið og þingheimur nötrar eftir að umræður sex þingmanna sem sátu að sumbli á bar voru teknar upp án þeirra vitundar og birtar. Þar voru þau Sigmundur Davíð Gunnlaugsson, Anna Kolbrún Árnadóttir og Bergþór Ólason þingmenn Miðflokksins, og Ólafur Ísleifsson og Karl Gauti Hjaltason úr Flokki fólksins. Það eru ummæli þessara þingmanna eða orðfæri sem hefur farið fyrir brjóstið á mörgum. Ummælin þykja skammarleg og lýsa megnri kvenfyrirlitningu. Það er óhætt að fullyrða að þessir þingmenn hrauni yfir samstarfsmenn sína á þingi, einkum konur. Arnar Páll Hauksson segir frá og talar við Evu Heiði Önnudóttir stjórnmálafræðing.

Þór Matthíasson, þróunarstjóri hjá markaðs- og tæknifyrirtækinu Svartagaldri notar sjálfur ekki Facebook. Hann segir að því meira sem fólk birti á Facebook því meira viti fyrirtækið um það. Hann telur að persónuupplýsingar af samfélagsmiðlum verði líklega notaðar í kosningum framvegis. Bergljót Baldursdóttir talar við Þór Matthíasson.

Spegillinn 28.11.2018

Umsjónarmaður: Bergljót Baldursdóttir

Magnús Carlsen vann þrjár fyrstu þrjár skákirnar í bráðabananum um heimsmeistaratitilinn í skák. Hann heldur því heimsmeistaratitlinum og ríkir mikil kátína meðal Norðmanna.

Illviðri gengur nú yfir landið og er búist við að vindur fari yfir fimmtíu metra á sekúndu í verstu hviðunum. Þegar er farið að hvessa á norðvesturhluta landsins og á Suðausturlandi og má búast við að haldi áfram að hvessa í kvöld og nótt. Rætt við Hrafn Guðmundsson, veðurfræðing á vakt á Veðurstofu Íslands.

Landsbjörg hefur sett í gang mesta viðbúnað sinn vegna ferðafólks. Nokkur þúsund erlendir ferðamenn eru staddir á landinu. Kristín Sigurðardóttir ræðir við Jónas Guðmundsson hjá Landsbjörgu

Ný óverðtryggð íbúðalán hafa ekki verið hærri á einum mánuði það sem af er ári. Þau jukust um meira en tvo og hálfan milljarð milli september og október. Matthías Tryggvi Haraldsson sagði frá

Lengri umfjöllun:

Áætlað er að 50 kílómetra borgarlína í Stafangri í Noregi kosti yfir 200 milljarða íslenskra króna. Upphafleg áætlun hljóðaði upp á 58 milljarða. Arnar Páll Hauksson tók saman

Norsku neytendasamtökin hafa kært Google til Persónuverndar Noregs fyrir að safna upplýsingum um fólk ólöglega. Persónuverndarstofnanir í Evrópu hafa vaxandi áhyggjur af upplýsingasöfnun samfélagsmiðla . Bergljót Baldursdóttir talaði við Helgu Þórisdóttur forstjóra Persónuverndar

Spegillinn 27. Nóv 2018

Umsjón: Kristján Sigurjónsson

Tæknimaður: Jón Þór Helgason

Afkoma flugfélagsins Wow Air er mun verri á yfirstandandi ársfjórðungi en búist var við þegar fyrirtækið stóð fyrir skuldabréfaútboði í haust. Fækkað verður í flota félagsins um fjórar Airbus-vélar.

Bankaráð Seðlabankans fundaði í dag með forstjóra Samherja sem segist enn vera þeirrar skoðunar að Már Guðmundsson seðlabankastjóri eigi að láta af embætti.

Eðlilegt er að afkomutengja veiðigjöld og hafa álagningu eins nálægt í tíma og hægt er, segir forsætisráðherra. Snarpar umræður hafa staðið yfir á Alþingi í dag um frumvarp sjávarútvegsráðherra um veiðigjöld.

Tilraunir til að takast á við loftslagsbreytingar á alþjóðavísu eru langt frá því að skila viðunandi árangri, að mati Sameinuðu þjóðanna. Í næstu viku hefst loftslagsráðstefna í Póllandi.

Fyrirtækið sem rak tónlistarhátíðina Secret Solstice skuldar fjölda manns laun og stendur afar illa fjárhagslega. Nýtt fyrirtæki hefur tekið við rekstri hátíðarinnar, sem stendur til að halda í fimmta sinn.

Lengri umfjallanir:

Ökumenn í áfalli og þeir sem þeir hafa ekið á í myrkrinu koma á bráðamóttöku. Bráðahjúkrunarfræðingar skora á framleiðendur útivistarfatnaðar að setja endurskin á allan útivistarfatnað. Helga Rósa Másdóttir, formaður fagdeildar bráðahjúkrunarfræðinga segir að hver einasti bráðahjúkrunarfræðingur hafi tekið á móti bæði ökumönnum í áfalli og þeim sem þeir hafa ekið á í myrkrinu. Bráðahjúkrunarfræðingar skora á framleiðendur útivistarfatnaðar á Íslandi að setja endurskin á allar útivistarflíkur. Bergljót Baldursdóttir talar við Helgu Rósu

Horfur eru á því að samtök sem berjast gegn veggjöldum í Noregi bjóði fram á fjölmörgum stöðum í sveitarstjórnarkosningunum á næsta ári. Áætlað er að á þessu ári verði innheimt veggjöld fyrir röska 200 milljarða íslenskra króna. Formaður samtakanna segir að ef vel gangi á næsta ári komi til greina að bjóða fram í þingkosningum. Arnar Páll Hauksson segir frá.

Heimsmeistaraeinvígi Magúsar Carlsen og Fabiano Caruana stendur nú yfir í Lundúnum. Allar skákirnar 12 enduðu með jafntefli og er staðan því jöfn 6-6. Á morgun verður úrslitadagur, en þá verður teflt til þrautar í hrað- og atskákum. Björn Þorfinnson skákmeistari og fyrrverandi forseti Skáksambands Íslands hefur fylgst vel með og ræðir við Kristján Sigurjónsson um einvígið.

Spegillinn 26. Nóv 2018

Umsjón: Kristján Sigurjónsson

Úkraínska þingið fjallar nú um beiðni forseta landsins um að setja herlög, eftir að Rússar hertóku þrjú úkraínsk skip og sjóliða í gær. Vestrænar þjóðir hafa mótmælt framferði Rússa.

Icelandair telur ólíklegt að hægt verði að uppfylla alla fyrirvara í kaupsamningi um WOW fyrir hlutahafafund sem hefur verið boðaður á föstudag. Hlutabréf í Icelandair Group féllu um tæp sex prósent í dag út af óvissunni.

Öryggisrofar voru óvirkir eða búið að fjarlægja hlífar á flökunarvélum í tveimur fiskvinnslum í Hafnarfirði og Sandgerði í þessum mánuði.

Vinnueftirlitið þurfti tvisvar að banna vinnu í vinnslunum.

Beiðni Pírata um að senda mál Ásmundar Friðrikssonar til sjálfstæðrar siðanefndar var hafnað á fundi forsætisnefndar í morgun.

Lengri umfjallanir:

Ekki er minnst á hjúkrunarheimili í drögum að heilbrigðisstefnu og skorið er niður til þeirra í fjárlögum þrátt fyrir að í stjórnarsáttmála sé talað um að gera eigi átak í að fjölga þeim. Þetta segir Pétur Magnússon formaður Samtaka fyrirtækja í velferðarþjónustu. Bergljót Baldursdóttir ræðir við hann.

Bretar hafa náð samningum við ESB um úrgöngu og framtíðarfyrirkomulag en við blasir Brexit-vandi heima og heiman. Breska stjórnin og Evrópusambandið hafa staðfest úrgöngusamning og yfirlýsingu um framtíðarsamband en við blasir þó tvíþættur vandi: að fá staðfestingu breska þingsins á þessum áfanga. Síðan, að semja í smáatriðum um framtíðarsambandið í lagalega bindandi samningi. Hið fyrra virðist ómögulegt, hið seinna gæti orðið mun tímafrekara en þetta rúmlega eitt og hálfa ár sem verður til stefnu. Sigrún Davíðsdóttir segir frá.

Fyrsta sjálfstæða sýning Náttúruminjasafns Íslands, Vatnið í náttúru Íslands, verður opnuð í Perlunni í Reykjavík á laugardaginn kemur,1.desember, á 100 ára fullveldisafmæli Íslands. Náttúruminjasafnið varð til árið 2007 þegar lög um safnið voru samþykkt, en á sér í raun mun lengri sögu sem rekja má allt aftur til ársins 1889 þegar Hið íslenska náttúrufræðifélag var stofnað. Illa hefur hins vegar gengið að koma upp Náttúruminjasafni og sýningu í eigu þjóðarinnar sem sómi er af, líkt og flestar nágrannaþjóðir leggja metnað sinn í að starfrækja. Vatnið í náttúru Íslands í Perlunni er einn fyrsti vísirinn að slíkri sýningu. Fyrir eru í Perlunni náttúrusýningar fyrirtækisins Perlu Norðursins og tengist Vatnasýningin þeim. Kristján Sigurjónsson talar við Þórunni Sigríði Þorgrímsdóttur hönnuð og sýningarstjóra Vatnsins í náttúru Íslands.

Umsjón: Kristján Sigurjónsson

Tæknimaður: Jón Þór H

Spegillinn 23. nóvember 2018.

Umsjónarmaður Bergljót Baldursdóttir

Maðurinn, sem situr í gæsluvarðhaldi, grunaður um að hafa valdið eldsvoða í húsi á Selfossi í lok október með þeim afleiðingum að tveir létust, sagði lögreglu á vettvangi að hann væri morðingi. Þá kom fram í málflutningi lögreglu fyrir dómi að maðurinn hafi áður farið óvarlega með eld inni í húsinu.

Landsréttur staðfesti í dag 19 ára fangelsisdóm Héraðsdóms Reykjaness yfir Thomasi Möller Olsen fyrir morðið á Birnu Brjánsdóttur en gagnrýnir hvernig staðið var að yfirheyrslum yfir Thomasi eftir fyrstu skýrslutökuna.

Ísland getur haft mjög mikil áhrif á alþjóðavettvangi, segir fastafulltrúi Íslands gagnvart Nató. Hernaðarógn dagsins í dag er allt önnur en þegar við fyrst öðluðumst fullveldi, segir forsætisráðherra. Málþing um fullveldi og þjóðaröryggi var haldið í dag.

Biskup hefur ákveðið að sóknarprestur Grensáskirkju sem gerðist sekur um siðferðisbrot gagnvart tveimur konum, verði áfram í leyfi. Áfrýjunarnefnd staðfesti í dag niðurstöðu úrskurðarnefndar um brot prestsins.

Neytendur um allan heim hafa í dag freistað gæfunnar í jólagjafainnkaupum á svarta föstudeginum. Verslunarstjórar eru sammála um að viðskiptin hafi færst meira á netið.

Lengra efni:

Stuðningur við flokka sem kenndir hafa verið við lýðhyggju eða popúlisma hefur stigmagnast í Evrópu síðustu áratugi. Fylgi þeirra hefur þrefaldast frá því skömmu fyrir aldamót. Greinendur hafa lagst yfir úrslit þingkosninga síðustu tveggja áratuga í þrjátíu og einu ríki í álfunni fyrir breska miðilinn Guardian og þar eru leiddir saman stjórnmálafræðingar og blaðamenn víða að. Anna Kristín Jónsdóttir ræðir við Guðmund Hálfdánarson, prófessor í sagnfræði.

Donald Trump ítrekar stuðning sinn við krónprinsinn af Sádi-Arabíu í tengslum við morðið á blaðamanninum Jamal Khashoggi. Sádi-Arabía sé mikilvægur bandamaður Bandaríkjanna. Á þakkagjörðarhátíðinni vill hann fyrst og fremst þakka sjálfum sér fyrir allt sem hann hefur gert fyrir land og þjóð. Pálmi Jónasson tók pistilinn saman

Katarina Karantonis norskur sérfræðingur telur mikilvægt að unnið sé þvert á stofnanir þegar kemur að því að aðstoða konur vegna nauðungarhjónabanda og heiðursofbeldis. Þessi vandamála hafa í aukum mæli skotið upp kollinum hér á landi. Arnar Páll Hauksson talar við Katarina Karantonis sérfræðing í norsku teymi sem einkum fæst við mál sem tengjast nauðungarhjónaböndum, heiðursofbeldi og umskurði kvenna. Einnig heyrist í Eddu Ólafsdóttur, félagsráðgjafa á Velferðarsviði Reykjavíkurborgar og Ástu Kristínu Benediktsdó

Foreldrar við Arnarbakka í Breiðholti eru óttaslegnir vegna sprautufíkla og ofbeldismanna sem hafast við í gömlum verslunarkjarna í hverfinu. Fólki hefur verið hótað líkamsmeiðingum og sprautunálar fundist í bakgörðum.

Samkomulag um útgöngu Breta úr Evrópusambandinu er innan seilingar, segir Theresa May, forsætisráðherra Bretlands. Svo virðist sem samningur um Brexit verði staðfestur á leiðtogafundi Evrópusambandsins á sunnudag.

Margt er til fyrirmyndar innan Orkuveitunnar, en einnig brotalamir sem taka verður á. Þetta er álit borgarstjóra og fulltrúa minnihlutans í borgarráði. Skýrsla innri endurskoðunar Reykjavíkur um málefni Orkuveitunnar var kynnt í dag.

Stefnt er að því að bjóða út rekstur nýs sjúkrahótels þvert á óskir Landspítalans. Framkvæmdum við hótelið er enn ekki lokið.

Viðræður standa enn milli þriggja ráðuneyta um rekstur og viðhald Húsavíkurhöfðaganga.

Bandaríkjaforsetarnir Barak Obama og Donald Trump hafa báðir endurvakið umræðu um hlutverk Bandaríkjanna sem átti sér stað með miklum krafti í kjölfar fyrri heimstyrjaldarinnar segir Sveinn M. Jóhannesson, sagnfræðingur og nýdoktor við rannsóknastofnunina í sagnfræði við háskólann í London. Eftir fyrri heimstyrjöldina eru Bandaríkin orðin öflugasta ríki veraldar. Bergljót Baldursdóttir talar við Svein M. Jóhannesson

Martin Vickers er þingmaður Íhaldsflokksins. Kjördæmi hans er Cleethorpes, rétt við Grimsby. Hann styður úrgöngu Breta úr ESB, ekki síst vegna fiskveiða. Hann er líka á því að það verði auðvelt fyrir Breta og Íslendinga að semja um sjávarútvegsmál því íslenskur fiskur skipti fiskvinnsluna í Grimsby og nágrenni miklu. Sigrún Daviðsdóttir.

Robert Mueller er lögfræðingur, repúblikani og fyrrverandi forstjóri FBI til 12 ára. Í maí 2017 skipaði dómsmálaráðuneytið hann í embætti saksóknara til að fara fyrir nefnd sem rannsakar möguleg afskipti Rússa af forsetakosningunum árið 2016. En um hvað snýst rannsóknin? Ólöf Ragnarsdóttur segir frá.

Um áttatíu mál komu inn á borð nefndar um eftirlit með störfum lögreglu fyrsta árið sem hún starfaði. Annað eins hefur borist nefndinni það sem af er þessu ári. Flest málin höfðu með handtöku lögreglunnar að gera.

Dæmi eru um bæði nauðungarhjónabönd og heiðurstengt ofbeldi á Íslandi. Kona, sem gift var til Íslands, óskaði eftir vernd vegna ofbeldis og einangrunar. Eiginmaður hennar og fjölskylda hans hér á landi óskuðu þess að hún myndi deyja.

Viðræður um vopnahlé og friðarsamkomulag í Jemen verða haldnar snemma í næsta mánuði í Svíþjóð.

Formaður Samtaka sveitarfélaga á höfuðborgarsvæðinu vill skoða hvort hægt sé að fjármagna Borgarlínu og aðrar vegaframkvæmdir að hluta með veggjöldum.

Theresa May, forsætisráðherra Bretlands situr nú á fundi með forseta framkvæmdastjórnar Evrópusambandsins til að reyna að ljúka samningi um Brexit. Fjórir dagar eru þar til leiðtogar ESB hittast til að leggja blessun sína yfir samninginn.

Ung kona með lítið barn leitaði verndar hér vegna þess að hún var beitt ofbeldi. Hún var gift til Íslands og bjó í algerri einangrun. Hún var í mikilli hættu vegna þess að eiginmaður hennar og fjölskylda hans sátu um hana og óskuðu þess að hún myndi deyja. Þetta kom fram á ráðstefnu í dag.

Arnar Páll Hauksson talar við Katarina Karantonis. Eddu 'Olafsdóttur og Ástu Kristínu Benediktsdóttur.

Hátt í hundrað og sjötíu mál hafa komið inn á borð nefndar um eftirlit með störfum lögreglu frá því hún tók til starfa 2017. Flest málin fyrsta starfsárið höfðu með handtöku lögreglu að gera. Trausti Fannar Valsson, lögfræðingur og formaður nefndarinnar segir að um 10 mál hafi komið til nefndarinnar í hverjum mánuði. Berglind Baldursdóttir segir frá og talar við Trausta Fannar Valsson.

Leo Varadkar, forsætisráðherra Íra, segir að ekki komi til greina að breyta samkomulaginu, sem náðist í síðustu viku, um útgöngu Breta úr Evrópusambandinu. Fjöldi breskra þingmanna hefur lýst yfir megnri óánægju með samkomulagið. Bogi Ágústsson segir frá.

Áætlaður kostnaður við úrbætur á kísilveri United Silicon er nú rúmum milljarði hærri en áður var talið. Ástæðan er meðal annars sú að íbúum í grenndinni þóttu hráefnisgeymslur svo ljótar. Stígur Helgason ræðir við Þórð Ólaf Þórðarson, stjórnarformaður Stakkbergs.

Fyrrverandi framkvæmdastjóri Orku náttúrunnar ætlar ekki að höfða meiðyrðamál vegna ásakana um kynferðislega áreitni. Jóhann Bjarni Kolbeinsson ræðir við Bjarna Má Júlíusson.

Það er mat innri endurskoðunar Reykjavíkurborgar að Orkuveitan hafi orðið fyrir opinberri smánun á samfélagsmiðlum. Valgerður Anna Jóhannsdóttir, aðjúnkt við Háskóla Íslands segir eðlilegt að mál fyrirtækisins hafi átt erindi við almenning og veltir því upp hvort hægt sé að tala um opinbera smánun fyrirtækis. Arnhildur Hálfdánardóttir segir frá og ræðir við Valgerði Önnu.

Skólastjóri stærsta sérskóla fyrir nemendur með fatlanir og þroskahamlanir á Íslandi á erfitt með að fá sérkennara til starfa. Endurnýjun sérkennara er nánast engin. Birgir Þór Harðarson segir frá og ræðir við Sædísi Harðardóttur, formann Félags íslenskra sérkennara og Árna Einarsson, skólastjóra Klettaskóla.

Erik Solheim, forstjóri Umhverfisstofnunar Sameinuðu þjóðanna, sagði af sér í dag vegna mikillar óánægju innan Sameinuðu þjóðanna með ferðalög hans.

Á alþjóðadegi barna brá Alex Lúðvík Kristinsson fimmtán ára liðsmaður Krakkafrétta sér í Laugarnesskóla og spjallaði við börn þar um barnasáttmála Sameinuðu þjóðanna og réttindi barna.

-----

Ásakanir um óheilbrigða vinnustaðamenningu urðu til þess að innri endurskoðun borgarinnar var fengin til að gera útttekt á Orkuveitu Reykjavíkur og dótturfélögum. Uppsagnir tveggja starfsmanna sem styr hefur staðið um voru þar taldar réttmætar. Gyða Margrét Pétursdóttir er dósent í kynjafræði við Háskóla Íslands, Anna Kristín Jónsdóttir ræðir við Gyðu Margréti um Orkuveitumálið og Metoo-hreyfinguna.

Húsið sem hýsa átti Lækningaminjasafnið á Seltjarnarnesi liggur undir skemmdum. Átta ár eru síðan það var gert fokhelt en Seltjarnarnesbær hætti við að nota það fyrir lækningaminjar. Arkitektarnir sem hönnuðu það segja sárt að sjá húsið drabbast niður. Bergljót Baldursdóttir gekk um húsið með arkitektunum Ásdísi Helgu Ágústsdóttur og Sólveigu Berg.

Ef árangur næst ekki í kjaraviðræðum VR og Starfsgreinasambandsins á næstu vikum er líklegt að deilunni verði vísað til sáttasemjara og byrjað að undirbúa aðgerðir. Arnar Páll Hauksson segir frá stöðunni.

Umsjón: Anna Kristín Jónsdóttir

Tæknimaður: Magnús Þorsteinn Magnússon

Stjórn útsendingar: Gunnlaug Birta Þorgr

Uppsagnir tveggja stjórnenda hjá Orku Náttúrunnar, bæði Áslaugar Thelmu Einarsdóttur og Bjarna Más Júlíussonar, voru réttmætar að mati innri endurskoðunar Reykjavíkurborgar. Rætt við Helgu Jónsdóttur, starfandi framkvæmdastjóra Orkuveitunnar.

Samvinnu hefur skort milli barnaverndar og heilbrigðiskerfisins, segir Ásmundur Einar Daðason félagsmálaráðherra. Gripið hefur verið til aðgerða svo að börn með fíknivanda þurfi ekki framar að gista í fangaklefa vegna úrræðaleysis. Jón Þór Kristjánsson rædd við Ásmund Einar.

Fjölga á leikskólaplássum í Reykjavík um 700 til 750 á næstu fimm árum og byggja fimm nýja leikskóla, byggja við fimm skóla þar sem aðsókn er mikil, stækka skóla tímabundið með færanlegum stofum og opna ungbarnadeildir við 32 leikskóla.

Stjórnarformanni bílaframleiðandans Nissan var vikið úr starfi í dag vegna gruns um alvarleg brot í starfi um langt skeið. Hann er sagður hafa nýtt fjármuni fyrirtækisins í eigin þágu og komið háum fjárhæðum undan skatti. Bjarni Pétur Jónsson segir frá.

Skemmdarvargar gengu berserksgang í Kjarnaskógi um helgina, spændu upp grasflatir og brutu rúður á almenningssalernum. Ingólfur Jóhannsson, framkvæmdastjóri Skógæktarfélags Eyfirðinga segir nauðsynlegt að auka eftirlit í skóginum. Ágúst Ólafsson ræddi við Ingólf.

Matvælastofnun hefur kært sölu og markaðssetningu á heimaslátruðu lambakjöti á bændamarkaði Matís til lögreglu. Forstjóri Matís telur engin lög hafa verið brotin. Sunna Valgerðardóttir segir frá.

----

Á leiðtogafundi Evrópusambandsins á sunnudaginn verður rætt um úrgöngusamning ESB við Breta og hann að öllum líkindum samþykktur. Næsta viku skiptir sköpum um málið segir Theresa May forsætisráðherra Bretlands. Sigrún Davíðsdóttur hefur fylgst með þeim málum.

Ákvörðun um að leggja fleiri sæstrengi verður áfram í höndum Norðmanna þó að þriðji orkupakkinn taki þar gildi. Stór hluti umhverfissamtaka í Noregi styður þriðja orkupakkann en verkalýðshreyfingin er á móti. Reynt var að skýra það á hlutlausan hátt á vefnum Faktisk.no. í 11 liðum. Arnar Páll Hauksson segir frá.

Fyrsti raf- línuveiðibáturinn sem sérstaklega er hannaður fyrir rekstur er á teikniborðinu hjá íslenskri verkfræðistofu. Gert er ráð fyrir að hann verði kominn í notkun eftir þrjú ár. Bergljót Baldursdóttir ræddi við Bjarna Hjartarson, verkefnisstjóra hjá verkfræðistofunni Navis.

Umsjón: Anna Kristín Jónsdóttir

Tæknimaður: Magnús Þorsteinn Magnússon

Stjórn útsendingar: Gunnlaug Birta Þorgrímsdóttir