Rússar hafa að sögn falast eftir stuðningi og vopnum frá Kínverjum vegna innrásarinnar í Úkraínu. Er líklegt að við því verði orðið? Kínverjar hafa hvorki stutt né fordæmt innrásina opinberlega og sama á við aðra risaþjóð í austri Indverja. Afstaða Kínverja til Tævans kann nokkru að ráða um fordæmingarleysið. Anna Kristín Jónsdóttir ræðir við Guðbjörgu Ríkey Thoroddsen Hauksdóttir.

Og við höfum ekki alveg sagt skilið við kórónuveirufaraldurinn. Andlát eldra fólks eru nokkuð tíð. Bjarni Rúnarsson ræðir við Kristjönu Ásbjörnsdóttur, lektor í faraldsfræði við Miðstöð í lýðheilsuvísindum við Háskóla Íslands lektor í faraldsfræði í seinni hluta þáttarins.

Helstu atriði frétta:

Um þrjátíu þúsund íbúum úkraínsku borgarinnar Mariupol tókst að komast út úr borginni í dag. Enn er unnið að því að koma fólki úr rústum leikhúss í borginni sem Rússar sprengdu í gær.

Tæplega þrjú hundruð manns með tengsl við Úkraínu hafa sótt um alþjóðlega vernd hér á landi frá því innrásin hófst

Aukning andláta vegna covid undanfarna daga og vikur má fyrst og fremst rekja til mikillar samfélagslegrar útbreiðslu. Þetta segir lektor í faraldsfræði.

Lyfjastofnun hefur veitt Lyfjafræðingum tímabundna heimild til þess að selja covid-smituðum Parkódín verkjalyf án lyfseðils. Stofnunin ítrekar þó að veikir fari ekki sjálfir í Apótek, heldur veiti öðrum umboð til að nálgast lyfið.

Guðmundur Guðmundsson verður áfram þjálfari íslenska karlalandsliðsins í handbolta næstu tvö ár.

Breska ríkisútvarpið hefur borgað fyrrum aðstoðarmanni Díönu prinsessu vegna vinnubragða fréttamanns sem tók viðtal við Díönu árið 1995.

Umsjónarmaður: Bjarni Rúnarsson

Tæknimaður: Mark Eldred

Stjórn fréttaútsendingar: Ingibjörg Sara Guðmundsdóttir.

Átökin í Úkraínu gætu haft áhrif á stöðu Rússlands á alþjóðasviði stjórnmála og breytt valdahlutföllum þar. Fjöldi fólks er á flótta frá Úkraínu og börn eru í sérstaklega viðkvæmri stöðu. Réttindi þeirra eru lögð til hliðar og rödd þeirra er veik. Rússum var í gær vikið úr Evrópuráðinu þar sem til að mynda Mannréttindadómstóllinn er hýstur. Rússar hafa tekið takmarkað mark á dómum hans og mikill meirihluti mála sem þangað rata snúa að Rússum og stjórnvöldum þar. Í dag var haldið málþing í Háskóla Íslands um stríð, mannréttindi og lýðræði: Hvaða máli skiptir alþjóðasamvinna? Bjarni Rúnarsson ræddi við framsögumenn Kára Hólmar Ragnarsson, Önnu Lúðvíksdóttur ogBirnu Þórarinsdóttur.

Æ oftar sést í norskum fjölmiðlum gagnrýni á stjórnvöld fyrir að fylgja lítt eftir refsiaðgerðum gegn Rússum vegna stríðsins í Úkraínu. Þetta á til dæmi við um fiskveiðisamvinnu Rússa og Norðmanna í Barentshafi og þjónustu við rússneska togara. Þar verður allt óbreytt. Fleiri dæmi eru tiltæk. Gísli Kristjánsson fer yfir stöðuna.

Helstu atriði frétta:

Óttast er um afdrif hundruða íbúa borgarinnar Mariupol eftir að Rússlandsher varpaði sprengjum á leikhús í borginni. Þar hefur fjöldi fólks leitað skjóls undanfarna daga. Fulltrúi Úkraínumanna í friðarviðræðum við Rússa segir fréttir af mögulegu friðarsamkomulagi ótímabærar.

Aðildarríki Evrópuráðsins samþykktu samhljóða í gær að Rússum yrði vísað úr ráðinu. Þórhildur Sunna Ævarsdóttir, þingmaður sem starfað hefur í ráðinu, segir ákvörðunina sorglega.

Seðlabankinn áréttar mikilvægi þess að hugað sé að netöryggi landsins og að tryggja rekstraröryggi fjarskipta- og fjármálainnviða.

Það leggst vel í íbúa Reykhólahrepps að sameinast Strandabyggð. Fjárhagsvandamál Strandamanna koma ekki í veg fyrir bjartsýni íbúa Reykhólahrepps.

Enn og aftur verður leiðindaveður á morgun. Gul viðvörun verður á landinu öllu frá morgni til kvölds.

Umsjónarmaður: Bjarni Rúnarsson

Tæknimaður: Magnús Þorsteinn Magnússon.

Stjórn útsendingu frétta: Ingibjörg Sara Guðmundsdóttir.

Talið er að rússaher haldi um fjögur hundruð manns í gíslingu á einum stærsta spítalanum í Mariupol. Um 2.400 borgarbúar hafa fallið frá innrás Rússlandshers. Birta Björnsdóttir sagði frá.

Jens Stoltenberg, framkvæmdastjóri Atlandshafsbandalagsins, sagðist í ávarpi í dag óttast að stjórnvöld í Rússlandi myndu grípa til efnavopna í stríðinu í Úkraínu.

Orkuiðnaðurinn er óseðjandi og gæti virkjað hvern einasta dropa án þess að þykja nóg sagði þingmaður Pírata í umræðu um orkuskipti. Umhverfisráðherra sagði aðeins þess virði að ráðast í frekari orkuöflun ef hún yrði nýtt til orkuskipta innanlands. Brynjólfur Þór Guðmundsson tók saman. Heyrist í Evu Dögg Davíðsdóttur (V), Guðlaugi Þór Þórðarsyni (D), Þórunni Sveinbjarnardóttur (S), Andrési Inga Jónssyni (P) og Ágústu Ágústsdóttur (M).

Willum Þór Þórsson, heilbrigðisráðherra hefur ákveðið að taka frumvarp um réttindi sjúklinga aftur inn í ráðuneytið. Hann segist vera að bregðast við ákalli Alþingis um aukið samráð við notendur heilbrigðisþjónustunnar.

Héðinn Unnsteinsson, formaður Geðhjálpar, segir of litlu fjármagni varið í geðheilbrigðismál. 81 prósent framhaldsskólanema hafi í könnun árið 2014 metið andlega heilsu sína mjög góða eða góða. Hlutfallið hafi hrapað niður í 57 prósent árið 2021. Urður Örlygsdóttir tók saman.

Söngkonan Dolly Parton hefur afþakkað tilnefningu í frægðarhöll rokksins; rokkstimpillinn eigi betur við aðra að hennar mati. Birta Björnsdóttir tók saman.

---------

Kafa þarf dýpra til að finna ástæður mikils brottfalls nemenda af erlendum uppruna úr framhaldsskólum hér á landi. Þetta segir Nichole Leigh Mosty forstöðumaður Fjölmenningarseturs. Bjarni Rúnarsson talaði við hana.

Verðbólga mælist nú 6,2%, hún er meiri en verið hefur um áratugaskeið og því spáð að hún verði mikil út árið hið minnsta. Verðbólgan hefur meðal annars verið drifin áfram af hækkunum á húsnæði hér innanlands en líka af hækkunum á hrávöru úti í heimi og flutningskostnaði. Nú síðast rauk svo olíuverð upp vegna stríðsins í Úkraínu þó að það hafi hjaðnað nokkuð aftur. Anna Kristín Jónsdóttir ræddi við Katrínu Ólafsdóttur lektor við viðskiptafræðideild Háskólans í Reykjavík.

Umsjón: Anna Kristín Jónsdóttir. Tæknimaður: Jón Þór Helgason. Stjórn útsendingar frétta: Valgerður Þorsteinsdóttir.

Spegillinn 14. Mars 2022

Umsjón: Kristján Sigurjónsson

Tæknimaður: Mark Eldred

Byrjað er að flytja íbúa Mariupol í Úkraínu út úr borginni eftir um tveggja vikna herkví. Friðarviðræðum Rússa og Úkraínumanna lauk seinnipartinn án niðurstöðu en annar fundur hefur verið boðaður á morgun.

Embætti landlæknis er með andlát ungs barns á Norðurlandi sem smitað var af Covid til rannsóknar.

Vonskuveður hefur gengið yfir landið í dag - Sunnan og suðaustan rok með úrhellis rigningu á suður og vesturlandi. Fjallvegir eru víða lokaðir og björgunarsveitir verið kallaðar út vegna fok og vatnstjóns.

Framkvæmdastjóri lækninga á Sjúkrahúsinu á Akureyri segir að eldra fólk smitistt í meira mæli en áður af Covid.

Þórdís Kolbrún Reykfjörð Gylfadóttir utanríkisráðherra kynnti í morgun ríkisstjórn og utanríkismálanefnd tillögu sína um að opna sendiráð Íslands í Varsjá, höfuðborg Póllands.

Lengri umfjöllun:

Hátt í þrjár milljónir Úkrínumanna hafa nú flúið land eftir að rússneski herinn réðist inn í Úkraínu 24. febrúar. Fjöldinn á eftir að aukast enn meir á næstu dögum og vikum ef ekki verður breyting á hernaði Rússa gegn landi og þjóð. Langflestar Evrópuþjóðir hafa heitið því að taka höndum saman og koma flóttafólkinu til hjálpar til lengri og skemmri tíma. Búist er við að nokkur þúsund manns komi til Íslands og vinna komin á fullt við að taka á móti flóttafólkinu. Úkraínumenn bætast nú við þá flóttamenn og hælisleitendur sem komið hafa hingað frá öðrum löndum. Unnur Sverrisdóttir forstjóri Vinnumálastofnunar segir formsatriði fyrir það fólk sem flúið hefur stríðið í Úkraínu að fá atvinnuleyfi hér á landi. Næga vinnu sé að hafa og atvinnuleysi minnki jafnt og þétt á næstu mánuðum. Óljóst sé hins vegar hversu stór hlúti af því fólki sem flýr stríðið í Úkraínu sæki um atvinnu hér á landi. Flestir ala eflaust þá von í brjósti að geta snúið til baka eins fljótt og auðið er. Vissar reglur gilda um atvinnuleyfi fyrir flóttafólk og hælisleitendur. Kristján Sigurjónsson talar við Unni.

Margir loka eyrum þegar lífeyrismál ber á góma. En þau skipta okkur máli, og það er undir hverju og einu okkar komið að huga að þeim. Því fyrr, því betra. Margir sigla í gegnum starfsferil sinn á lygnum sjó án þess að huga sérstaklega að lífeyrisréttindum sínum og þeim möguleikum sem standa til boða þegar hyllir undir starfslok. Bjarni Rúnarsson ræddi þessi mál við Björn Berg Gunnarsson deildarstjóra greiningar og fræðslu hjá Íslandsbanka.

Hart var tekist á um efnavopn í Úkraínu á fundi öryggisráðs Sameinuðu þjóðanna í dag. Tvær og hálf milljón hefur flúið Úkraínu eftir að innrás Rússa hófst. Gert er ráð fyrir að allt að fjögur þúsund flóttamenn komi hingað til lands. Bjarni Pétur Jónsson tók saman og heyrist í Joe Biden Bandaríkjaforseta, Jóni Gunnarssyni dómsmálaráðherra og Bjarna Benediktssyni fjármálaráðherra.

Staðan í uppistöðulónum Landsvirkjunar er lægri en spáð var í byrjun árs og vatnsbúskapur með versta móti. Skerðingar á afhendingu orku verða fram á vor. Hafdís Helga Helgadóttir talaði við Hörð Arnarson forstjóra Landsvirkjunar.

Landsréttur staðfesti í dag dóm Héraðsdóms Reykjavíkur í máli Þorsteins Más Baldvinssonar þar sem Seðlabanka Íslands var gert að greiða honum tæpar 2,7 milljónir í skaða- og miskabætur vegna Samherjamálsins svokallaða. Freyr Gígja Gunnarsson sagði frá.

Willum Þór Þórsson, heilbrigðisráðherra telur að landsmenn verði að þrauka faraldurinn, ekki standi til að herða sóttvarnir. Hólmfríður Dagný Friðjónsdóttir tók saman.

Vegurinn um Vattarnesskriður, milli Reyðarfjarðar og Fáskrúðsfjarðar, er ófær vegna skriðufalla. Skriður féllu á veginn í morgun en töluvert hefur rignt fyrir austan. Ólöf Ýr Erlendsdóttir tók saman.

Verkefnið Römpum upp Ísland hófst formlega í dag, setja á upp eitt þúsund hjólastólarampa um allt land til að bæta aðgengi. Guðni Th. Jóhannesson, forseti Íslands, var ekki viðstaddur kynningu verkefnisins í Hveragerði eins og til stóð vegna covid-smita á Bessastöðum, en sendi kveðju þaðan.

-------------

Samhliða bardögum í Úkraínu geisar áróðursstríð. Fjölmiðlum hefur verið lokað í Rússlandi og varðar fangelsisvist að segja það sem stjórnvöld þar segja falsfréttir af Úkraínu. mótar afstöðu rússnesks almennings, meirihluti hans styður Pútín. Anna Kristín Jónsdóttir ræddi við Elfu Ýr Gylfadóttur, framkvæmdastjóra Fjölmiðlanefndar.

Ávaxtaneysla hefur minnkað, en neysla á sykruðum gosdrykkjum hefur dregist saman. Í gær voru kynntar niðurstöður úr landskönnun á mataræði landsmanna. Þar eru bæði góðar og slæmar fréttir. Þjóðin þarf að borða mun meira af grænmeti og ávöxtum svo að vel sé. Bjarni Rúnarsson ræddi við Hólmfríði Þorgeirsdóttur, Jóhönnu Eyrúnu Torfadóttur og Bryndísi Evu Birgisdóttur.

Umsjón: Anna Kristín Jónsdóttir. Tæknimaður: Mark Eldred. Stjórn útsendingar frétta: Ingibjörg Sara Guðmundsdóttir.

Stríðið í Úkraínu hefur valdið verulegri hækkun á olíu og gasi.Norðmenn hafa áhyggjur. Óvæntir peningar velta inn í sjóði landsmanna, og enginn veit hvað á að gera við þá. . Tekjur ríkissjóðs af orkusölu gætu sexfaldast. Gísli Kristjánsson reifar hér hvað er til ráða.

Íslenskir menn eru skráðir á síður sem á Norðurlöndum eru taldar sykurhúða grimman og ljótan heim vændis, og geta tælt ungt fólk, jafnvel börn inn í hann. Tilgangurinn sagður að koma á tengslum milli eldri og gjafmildra manna, sykurpabba við ungt fólk. Í speglinum í gær var fjallað um hve erfitt hefur reynst víða í nágrannalöndunum að láta eigendur síðnanna sæta ábyrgð. Hver er staðan hér og brjóta síðurnar í bága við íslensk lög? María Rún Bjarnadóttir verkefnisstjóri stafræns ofbeldis hjá Ríkislögreglustjóra segir ekki einfalt að svara því afdráttarlaust hvort þetta sé vændi. Anna Kristín Jónsdóttir ræðir við Maríu.

Fóstur í móðurkviði eru sérlega viðkvæm fyrir hormónaraskandi efnum sem finnast allt í kringum okkur. Rannsóknir í Danmörku sýna að launeistu aukast mjög, þar sem eistun ganga ekki alveg niður í punginn. Jafnframt virðist vera færast í vöxt að þvagrásin sé ekki alveg rétt mynduð og eistnakrabbamein í ungum mönnum eykst. Fjallað var um hormónaraskandi efni í Kveik á dögunum. Bjarni Rúnarsson ræddi þessi mál við Ragnheiði Bachman ljósmóður á Þróunarmiðstöð íslenskrar heilsugæslu sem starfar einnig við mæðravernd.

Helstu atriði frétta:

Matur, vatn og lyf eru nánast á þrotum í hafnarborginni Mariupol. Alþjóða Rauði krossinn segir dæmi um að fólk ráðist á hvert annað til að útvega sér mat.

Stríðsátökin í Úkraínu valda hækkun á olíuverði. Það eykur hag Norska olíusjóðsins. Tekjur ríkissjóðs af orkusölu gætu sexfaldast.

Það er orðið mjög erfitt að halda Landspítalanum gangandi í samræmi við þarfir sjúklinga, segir yfirlæknir bráðamóttöku Landspítalans.

Vel gengur að hreinsa meira en níu þúsund lítra af díselolíu sem láku úr olíutanki Orkubús Vestfjarða út í tjörnina og höfnina á Suðureyri fyrir helgi. Teymisstjóri mengunarvarna hjá Umhverfisstofnun segir nokkurra daga og jafnvel vikna vinnu framundan.

Það hefur mistekist að ná sátt um orkumálin að mati háskóla-, iðnaðar- og nýsköpunarráðherra. Auka þurfi orku og nýta hana betur til að orkuskipti geti orðið.

Umsjónarmaður: Bjarni Rúnarsson.

Tæknimaður: Mark Eldred.

Stjórn útsendingar frétta: Valgerður Þorsteinsdóttir.

Rússar vörpuðu í dag sprengjum á barnaspítala í Mariupol. Yfirvöld segja borgina undir stöðugum árásum og að verið sé að reyna að jafna borgina við jörðu. Hallgrímur Indriðason sagði frá.

Útlendingastofnun er skylt að afhenda Alþingi upplýsingar vegna umsókna um ríkisborgararétt innan viku, samkvæmt minnisblaði lagaskrifstofu Alþingis. Veiting ríkisborgararéttar með lögum hefur tafist vegna þess að stofnunin hefur ekki skilað umsögnum til þingsins með sama hætti og áður. Brynjólfur Þór Guðmundsson tók saman af Alþingi. Heyrist í Jódísi Skúladóttur (V), Bryndísi Haraldsdóttur (D), Guðbrandi Einarssyni (C) og Arndísi Önnu Kristínardóttur Gunnarsdóttur (P).

Heilbrigðisráðherra hvetur fólk til þess að gæta vel að sóttvörnum í ljósi mikillar útbreiðslu kórónuveirunnar og álags á heilbrigðiskerfið. Sigríður Dóra Magnúsdóttir, f

framkvæmdastjóri lækninga hjá Heilsugæslu höfuðborgarsvæðisins telur að engu myndi skila að taka á ný upp sóttvarnaaðgerðir og takmarkanir. Kristín Sigurðardóttir talaði við hana.

Mette Frederiksen, forsætisráðherra Danmerkur tekur þátt athöfn á Grænlandi í næstu viku, þar sem dönsk stjórnvöld biðjast afsökunar á samfélagstilraun Dana á grænlenskum börnum. Urður Örlygsdóttir sagði frá.

Leikskóli hefur ekki verið starfræktur á Kópaskeri í vetur vegna þess að ekki tókst að ráða starfsmann. Sveitarfélagið hvetur foreldra engu að síður til að skrá börn sín í leikskólann fyrir næsta vetur. Anna Þorbjörg Jónasdóttir talaði við Jón Höskuldsson, fræðslufulttrúa í Norðurþingi.

---------

Guðmundur Ingi Guðbrandsson, félagsmálaráðherra segir mikilvægt að huga að fleiri þáttum en húsnæði við móttöku flóttamanna, Valgeir Örn Ragnarsson ræddi við hann. . Metfjöldi flóttamanna kom til landsins í gær frá Úkraínu. Talsverð óvissa er um hver endanlegur fjöldi verður. Bjarni Rúnarsson. ræddi við Regínu Ásvaldsdóttur sviðsstjóri velferðarsviðs Reykjavíkurborg um viðbúnað borgarinnar.

Félagsþjónusta, lögregla og starfsmenn skóla í Svíþjóð vara við svokölluðum sykurpabba-vefsíðum, sem fjöldi ungmenna hefur skráð sig á undanfarin ár. Kári Gylfason segir frá.

Umsjón: Anna Kristín Jónsdóttir: Tæknimaður: Mark Eldred. Stjórn útsendingar frétta: Valgerður Þorsteinsdóttir.

Ólíklegt er að Rússar nái að hertaka Kænugarð og steypa ríkisstjórn Úkraínu af stóli, að mati bandarísku leyniþjónustunnar. Bandaríkjamenn hafa lagt bann við innflutningi á olíu frá Rússlandi.

Búist er við allt að fimmtán hundruð flóttamönnum frá Úkraínu hingað til lands á næstu vikum. Rúmlega tvær milljónir hafa flúið Úkraínu frá því innrás Rússa hófst. Ríkislögreglustjóri lýsti í dag yfir hættustigi sökum álags á landamærunum við móttöku flóttafólks frá Úkraínu.

Hér innanlands hækkar bensínverð en hlutabréfaverð lækkar vegna óvissu vegna stríðsins og hækkandi eldsneytisverðs víða um heim.

Um tíundi hver Íslendingur er með covid. Sjötíu og fimm eru á spítala með sjúkdóminn og hafa ekki verið fleiri frá því í nóvember 2020.

Lengri umfjöllun

Það er rétt hægt að ímynda sér hvaða hug almennir borgarar í Úkraínu bera til Vladimirs Putin Rússlandsforseta eftir að hann sendi her sinn inn í Úkríanu þann 24. febrúar. Hatur og reiði Úkraínumanna beinist þó ekki eingöngu að Pútin, hernum og stjórnvöldum í Rússlandi. Þeir beina spjótum sínum einnig að hinum almenna Rússa. Rússneska þjóðin sé meðvirk og beri ábyrgð.

Innrás Rússa í Úkraínu hefur nú staðið í hátt í 2 vikur. Átökin harðna dag frá degi. Flóttamannastraumurinn verður sífellt meiri úr landinu, þar eru börn og konur í miklum meirihluta. Bjarni Rúnarsson ræddi við Þórdís Kolbrún Reykfjörð Gylfadóttir utanríkisráðherra um stöðu mála í Úkraínu, varnarmál Íslands og efnahagsleg áhrif stríðsins hér á landi.

Umsjónarmaður: Bjarni Rúnarsson

Tæknimaður: Jón Þór Helgason

Stjórn útsendingar frétta: Ingibjörg Sara Guðmundsdóttir.

Spegillinn 7.mars 2022

Umsjón: Kristján Sigurjónsson

Tæknimaður: Magnús Þorsteinn Magnússon

Vesturlönd skoða nú að hætta að kaupa rússneska olíu og gas. Forsætisráðherra Bretlands segir þörf á að gera það í skrefum með samstilltu átaki en Þýskalandskanslari telur það ómögulegt.

Ekki er þörf á herliði með fasta setu hér á landi miðað við núverandi stöðu heimsmála segir sérfræðingur í varnarmálum.

Heilbrigðisráðherra segir virðingarvert hjá Krabbameinsfélaginu að bjóða nærri hálfs milljarðs króna styrk til uppbyggingar göngudeildar á Landspítala. Boðið verði þó að skoða í samhengi við aðra þætti uppbyggingar spítalans.

Tólf sjúklingar liggja nú á Sjúkrahúsinu á Akureyri með Covid 19 og hafa aldrei verið fleiri.

Enn fækkar þeim sem skráðir eru í íslensku þjóðkirkjuna. Tæp átta prósent landsmanna kjósa að standa utan trú- og lífsskoðunarfélaga.

Félags- og vinnumálaráðherra hefur skipað sérstakt aðgerðateymi sem ætlað er að skipuleggja móttöku flóttafólks frá Úkraínu. Gylfi Þór Þorsteinsson fer fyrir hópnum. Hann segir enn óljóst hversu margir eigi eftir að leita hingað til lands.

Hlutabréfaverð allra fyrirtækja í Kauphöllinni nema eins lækkaði í dag. Mest lækkaði gengi í Icelandair um tæp níu prósent.

Hæstiréttur Bandaríkjanna hafnaði í dag að taka fyrir mál Bills Cosby. Leikarinn var leystur úr haldi í fyrra eftir að áfrýjunardómstóll ógilti fangelsisdóm yfir honum.

Alþjóðahandknattleikssambandið hefur bannað öllum rússneskum liðum og dómurum að taka þátt í viðburðum á vegum sambandsins.

Fjöruverðlaunin voru afhent í dag.

Lengri umfjöllun:

Yfir milljón Úkraínumanna eru nú landflótta og óttast er að jafnvel nokkrar milljónir í viðbót flýji land á næstu vikum. Tólf dagar eru nú liðnir síðan rússnesk stjórnvöld sendu her sinn inn í landið. Í Speglinum er rætt við Albert Jónsson fyrrverandi sendiherra og sérfræðing í varnarmálum um ástand mála í Úkraínu. Hann veltir líka fyrir sér hvort stríðsátökin í Úkrínau breyti hernaðrlegri stöðu Íslands.Kristján Sigurjónsson talar við hann.

Efnasúpan allt í kringum okkur er fjölbreyttari og hefur meiri áhrif á okkur en við gerum okkur endilega grein fyrir. Í Speglinum höldum við áfram umfjöllun Kveiks um hormónaraskandi efni og ræðum um opinbert eftirlit með efnainnflutningi. Bjarni Rúnarsson talar við Ísak Sigurjón Bragason, teymisstjóra efnamála hjá Umhverfisstofnun.