RTL - Carte Blanche

RTL - Carte Blanche

By RTL Radio LëtzebuergNews
Download on the App Store

RTL - Carte Blanche episodes

  • Carte Blanche, Robert Dennewald, 27/09/2017



    Mir wëllen zu Lëtzebuerg d’Schaaffen vun jonken Entreprisen, den sougenannten Start-up Gesellschaften, förderen.

    Dat ass gutt ewell dat erlaabt eis nei Aarbechtsplazen ze schafen, ons Economie ze diversifizeieren, an eng Kontributioun zum Erhalen vun onsem Wuelstand ze leeschten.

    D’Effort’en vun eenzelnen Akteuren fir Inkubateuren ze installeieren, wou die jonk Entreprisen sech entwéckelen kennen ass gutt. D’Initiative vun der Chambre de Commerce fir en groussen Inkubateur op der Gare anzeriichten ass exzellent an passt honnertprozenteg an hir Missioun.

    Ons Politiker hunn d’Wichtegkeet  vun der Förderung vum Entrepreneuriat zu Lëtzebuerg erkannt. Si hunn och erkannt dat en Engagement an dësem Beräich am Hibléck op d’Wahlen am Oktober fir d’Gemengen, an fir d’Chamber d’nächst Joer, hinnen gutt zu Gesiicht steet.

    Et feelt net un gudden Projet’en vun jonken Entreprisen. Et wärt och net un Infrastrukturen feelen fir se opzehuelen. Och wann vill vun hinnen leider keen Erfolleg ginn, well nëmmen die Bescht duerchkommen, mussen mer all zesummen alles drun setzen fir hinnen ze hëllefen.

    Do wou et den jonken Entreprisen feelt sin an der Regel d’finanziell Mëttel. Am Gegensaatz zum Ausland hun mir hun kaum öffentlech oder privaat-öffentlech Strukturen fir den Start-up’en eng finanziell Ennerstetzung unzebidden. Wann ons Politiker sech also seriös zu dem Thema bekennen wëllen, dann besteet hei drengenden Handlungsbedarf.

    Et sin Privaatinvestisseuren dei hei zu Lëtzebuerg den Start-up’en an der Regel ennert d’Ärm gräifen. Dat ass ganz positiv, ewell die Leit dei zum Deel grouss finanziell Risiken angin, kloer heimatt „im stillen Kämmerlein“ en groussen Beitrag zur wirtschaftlecher Entwécklung vun onsem Land leeschten. Wann d’Regierung steierlech Rahmenbedingungen schaafen geif, dei den Risiko fir des Privatleit, wann et schief geet, geif begrenzen, oder d’Steierlaascht an den Fäll vun engem Erfolleg geif reduzeieren, hätt daat kaum Auswierkungen op d’Steierrecetten vun onsem Staat. Et geif awer bei den Privatleit eng formidabel Well vun finanzellen Mëttel ausleisen, die den Start-up’en an domat onser Economie zugutt kommen géifen.

    Wann mir eeschthaft Lëtzebuerg zur Start-up Natioun maachen wëllen, dann leit elo den Ball bei der Politik. D’Ziwilgesellschaft huet schonn hiren Beitrag geleescht.


    3 min
  • Carte blanche économique mat PWC, 27/09/2017
    FRO : Lescht Woch war hei u Lëtzebuerg déi alljäerlech Konferenz vun der ALFI...

    Op eiser Finanzplaz gi mëttlerweil iwwert 4000 Fongen verwalt mat en Couren vu bal 4 000 Milliarden Euro. Domadder ass Lëtzebuerg déi 2. gréisste Fongeplatz hannert den USA an den Lëtzebuerger Fong eng Mark déi op der ganzer Welt bekannt ass. An dem Kontext organiséiert Lëtzebuerger Fongenassociatioun ALFI all Joer am Hierscht eng grouss Konferenz wou Professioneller aus dem Sektor vun iwwerall hier zesumme komme fir iwwert Defi’en a Méiglechkeeten ze schwätzen déi et an der Fongenindustrie den Ament ginn. Dëst ass en immens wichtegen Evenement fir eis Finanzplaz.
     
    FRO : Wei gesitt Dir Zukunft vun der Fongeplaz?

    Do ginn et eng Rei Aspekter ob déi ech wéilt kuerz agoen. Ech hun rezent eng Statistik gesinn déi seet dass an Europa nëmmen 8% vun der Populatioun en Fong hun. An den USA sinn dat der dräi mol esou vill. Do gëtt et deemno nach vill Potenzial fir Wuesstem.
    Déi digital Transformatioun ass och an der Fongenindustrie ukomm. Virun 10 Joer ass een an de Guichet vu senger Bank gaange vir en Fong ze kafen. Haut ginn et mei a mei digital Plattforme wou der dat kennt maachen. Dat mécht ganz nei Perspektiven ob wei der äre Fong kennt verkafen. Déi digital Revolutioun verännert och Produktioun ronderëm de Fong deifgräifend. Alles dat si Changementer déi sech kënne positiv ob Lëtzebuerg auswierken.
    En Punkt wou mer mussen oppassen ass am Kontext vun der Propositioun vun der Europäescher Kommissioun lescht Woch. Sie schléit vir Fongen déi iwwert Grenz ewech verkaf ginn, also praktesch all Lëtzebuerger Fong, ënnert Opsicht vun der europäescher ESMA ze stellen an net lokal, bei der CSSF, ze loossen. Bis elo war eng vun de grousse Virdeeler vun eiser Finanzplaz d’Reaktivitéit an de Pragmatismus vun der CSSF.

    2 min
  • Carte Blanche, Ben Fayot, 25/09/2017


    De Kommissiounspräsident Jean-Claude Juncker huet a senger Ried beschriwen, wéi et mat der Europäescher Unioun weidergoe soll.  
    Eigentlech neischt revolutionär Neies, mais eng gudd Synthes vu villen Idien, déi de meeschte Politiker an alle Länner geleefeg sin.
    D’EU soll lues a lues weiderentwéckelt gin. Domat soll dat europäescht Bündnis nom Brexit géint den Nationalismus an europaskeptesche Populismus consolidéiert gin.
    Dat ass meeschtens gudd opgeholl gin. Jidfereen huet verstaan, dass nët alles vun haut op mur erreecht ka gin, mais dass et drëm geht, eng Richtung ze weisen.
    Et war eng wichteg Ried, well se visionär awer och realistesch war, déi  doniewend d’Gleichgewicht zwëschen Deitschland a Frankreich, zwëschen Merkel a Macron gesicht huet.
    Et gouf Mësstéin zu där Ried.
    Een esou e Mësstoun koum vum Lëtzeburger Staatsminister.
    En huet mech besonnesch gestéiert, eben well e vum Staatsminister koum.
    Nët well e sech durch seng  Expertise ausgezeechent hätt oder  fondéiert Argumenter virbruecht hätt,  mais well e komplett niewend dem Dill loug, souwuel an der Form wéi am Inhalt.
    Et ass unzehuelen, dass de letzeburger Staatsminister déi Ried nët geliest hat éier en de Mond opgemaacht huet.
    Wat mech enttäuscht, ass déi Iwerhiewlechkeet, mat där den Hr Bettel  sich iwer déi Ried ausgeloss huet.
    Iwer d‘ Eurozone schwetzt e wéi vun enger Witzveranstaltung. Déi institutionell Vereinfachungen si fir hien absurd ouni dass en sech och nëmmen een Ament mam Fong vun der Saach ausenanersetzt.
    Ech froen mech, wat den Hr Bettel beim Hr Macron geléiert huet, mat dem e jo anscheinend esou gudd soll sin. Dass vill Idien vum J.C. Juncker Waasser op d’Mille vum Hr Macron sin, huet den Hr Bettel wuel nët verstan.
    T’kënnt een sech elo driwer ewechtréischten a soen, och e Staatsminister kann nët an alles gudd sin. Hien ass keen Europaminister, deen dat aus dem ff kenne misst.
    Mais da vergësst een, dass den Hr Bettel am Europäesche Rot sëtzt.
    Dat ass dee Gremium, an dem nëmmen d’Staats- a Regierungscheffen sëtzen. Do geht den Hr Bettel eleng. Do kann een sech zwar vrun de Microe vun der ganzer Welt pavanéieren. Mais do gin virun allem déi wichtegst Weichestellungen fir d’EU, also och fir Lëtzeburg, geholl. Do gi Konflikter zwëschen de Memberlänner geléist. An an dem Krees muss ee mat Argumenter a klore Positiounen seng Partner iwerzeegen.
    Et rassuréiert mech nët, wéi iwerflächlech de Lëtzeburger Staatsminister, déi wichtegst politesch Personalitéit am Land, sech zu wesentleche Froen vun der EU ausdréckt.  
    Ech hoffen dofir, dass onse Staatsminister all Kéier, éier hien an den Europäesche Rot geht, Nohellefstonnen an Europafroen hëlt, an dann nach zwee- an dreimol nodenkt éier en de Mond do opmecht.

    3 min
  • Carte Blanche - Francis Schartz, 22/09/2017


    "Wie Visiounen huet, soll bei den Dokter goën " soot mol ee fréieren deitsche Kanzler.
    Mais spéitstens seit dem éischte Rapport vum Club of Rom, deen d’Grenzen vun eisem Wuestum duergeleucht huet, a spéider de Brundtland Rapport vun der UNO fir eng nohaltech Entwécklung, hun  Zukunftsvisiounen och  an der Realpolitik hir Plaaz fonnt.
    Et ginn Szenarien entwécklet, wéi d’Welt, respektiv eist Land am Joer 2030 kënnten ausgesinn oder zum Beispill wéi eng Follechen de Klimawandel am Joer 2050 kënnt matsech brengen.
    Doropshin, gi Strategien entwéckelt, Objektiver festgehal Aktiounspläng définéiert a Konventiounen ausgeschaft an ënnerschriwwen.
    Als rezent Beispiller sief de Klimaaccord vu Pareis genannt, wou och Lëtzebuerg sech engagéiert huet fir sei Beitrag ze leeschten fir d’Erderwärmung ënner 2 Grad zehalen;
    oder d’Agenda 2030  vun der UNO dat eise Premier am September 2015 ënnerschriwen huet an domat eist Land engagéiert huet fir matzehëllefen, déi 17 Ziiler vun enger nohaltejer Entwécklung bis d’Joer 2030 ze erreeechen.
    Dobei kommen de « Semestre européen », de « Programme National de développement rural », de « Plan National de développement durable » an nach vill aner Pläng a Konventiounen, un déi eist Land sech engagéiert huet sech ze halen.
    Eng nei Visioun fir Lëtzebuerg mam Numm „Drëtt  Industriell Revolutioun“  ass op Initiativ vum Wirtschaftsminister, der Chambre de Commerce an der asbl IMS entstand, ënnert der Fiederféierung vum Professer Jermy Rifkin a mat  der Matarbecht vu ville Biirger.
     
    Vill Zukunftsvisiounen also, vill Ziiler, vill Engegementer, vill zukunftsorientéiert Initiativen a quasi alle Gebidder vun der Politik, leien um Dësch.

    Mais kënnen si all op een Nenner bruecht ginn oder sinn se vleicht zum Deel kontradiktoresch?
    Kann sech heiraus eng Gesamtvisioun fir d' Entwécklung vun eisem Land rausschielen?
    Ech denken, datt dëst eng wichtech Aufgab vun de politesche Parteien ass, déi sech net därfen ob « gestion des affaires courantes » beschränken, mais konkret Konzepter fir eng nohaltesch Entwécklung vun Lëtzebuerg mussen erschaffen;
    - vun engem Lëtzebuerg an deem mer verantwortungsvoll mat eiser Emwelt an eise Ressourcen ëmginn;
    - vun engem Lëtzebuerg an deem et sech weider gudd liewe léisst, och fir déi Generatiounen déi no eis kommen;
    -  a vun engem Lëtzebuerg  dat sein Deel derzou beidreet, dat och d’Liewensbedingen an anere Länner sech verbesseren.

    Ech si gespannt ob mer an de Programmen vun de Parteien fir déi nächst Wahlen, respektiv am nächsten Regierungsprogramm sou eng koherent Gesamtvisioun werten rëmfannen.
    Natirlech treffen des Iwwerleeungen och fir d’Gemengen zou.
    Wann dir also den 8. Oktober ärt Kreiz macht, dann iwwerleet, wéi eng Kandidaten oder Parteien ee koherent Konzept fir eng Nohaltech Entwécklung proposéieren.

    3 min
  • Carte Blanche, Marc Schiltz, 20/09/2017
    Sinn Männer die besser Fuerscher a Wëssenschaftler? Wann een e Bléck op déi europäesch Statistiken werft, dann kéint een dat bal mengen. Ëmmerhin sinn nëmmen 24% vun den ugestallten Fuerscher hei zu Lëtzebuerg Fraen. Deemno wier den Indicateur „Mann sinn“ mei wichteg fir eng wëssenschaftlech Carrière ze maachen, wie, soe mer, Talent, Virwëtz, Passioun, Integritéit oder intellektuell Capacitéiten. Wéi soss wier dëse miserabelen Prozentsaz ze erklären? Well et besteet jo keen Zweiwel, dat déi vu mir elo grad opgezielten Attributer ganz gläichméisseg tëscht de Geschlechter opgedeelt sinn.
    Mat 24% Fuerscherinnen léit Lëtzebuerg leider e gutt Stéck ënnert dem europäeschen Duerchschnëtt. Mir landen souguer nach mei weit am Keller wann mer bei den zwou Kategorien Universitéitsprofesseren an Fuerscher am Industriesecteur kucken. Aus der PISA Studie vun 2012 kennt eraus, dat Lëtzebuerg zu deene Länner gehéiert, wou d’Dispariteit tëscht de Geschlechter schon an der Schoul an de Beräicher vun der Mathematik an den Naturwëssenschaften am héchsten ass an ganz Europa. Dat et des Disparitéiten an aneren Länner net gëtt déit drop hin, dat d’Ënnerscheeder an de schouleschen Performancen näischt mat ugebuerenen Fäegkeeten ze dinn hunn. Also keng Fro vu den Geschlechter ass!
    Wat kënne mer also maachen, fir d’Zuel vun de Meedercher a Fraen bei Beruffer an den Sciencen, Technologien, Ingenieurat an Mathematik ze hiewen?  Bei engem Colloque, deen am Fréijoer vun der Staat Lëtzebuerg zesummen mam Fonds National de la Recherche an der Fondation Jeunes Scientifiques Luxembourg organiséiert gouf, hunn eng 100 Participanten sech genau zu dëser Fro Gedanken gemaach. A konkret Conclusiounen formuléiert!
    Éischtens brauchen mir e kulturellen Changement an der lëtzebuergescher Gesellschaft. Elteren, Enseignanten, Patron’en an Politiker – mir all mussen ons allgemeng Astellung géigeniwwer der Roll vun den Geschlechter änneren an eng ganz Reih vu Stereotyppen ewechgeheien. Dëst betrefft natierlech net nëmmen d’Wëssenschaft. Mir mussen gemeinsam dru schaffen, fir allen een inklusiven an fairen Aarbeschtenvironnement unzebidden. Fir d’Fuerschung speziell wichteg ass et de Wëssenschaftler mat Kanner mei Flexibilitéit an Ënnerstëtzung ze ginn. E Fuerscher huet vill professionell Contraintë. Zum Beispill Reesen, fir international Zesummenaarbecht an Projet’en ze entwéckelen an op Fachkonferenzen ze schwätzen. D’Carrière an der Wëssenschaft as oft eng Successioun vun CDD’en an verschiddenen Länner; net einfach dat mat Famill an Privatliewen ënner een Hutt ze kreën.
    Zweetens mussen mir gemeinsam un enger Wëssensgesellschaft schaffen, an der Meedercher a Fraen sech an de Wëssenschaften natierlech wuel fillen. Dozou gehéiert engersäits eng fréi Fuerderung vun den Sciencen bei den Kanner. Schon virun der Spillschoul, doheem an an den Maison Relais, wou se kënnen fuerschend entdecken.
    An anerersäits brauchen die jonk Meedercher och Virbiller – an net just männlecher – déi se inspiréieren an motivéieren. Wann mer haut no berühmten Wëssenschaftler froen, dann falen ons direkt vill Männer an; als Frae kënnen mer meeschtens nëmmen d’Marie Curie nennen. Dobäi ass d’Lescht vun Fraen déi an der Wëssenschaft hiren Mann gestallt hunn, méi laang wie een géif mengen. Huele mer nëmmen d’Beispill vum Maria Telkes, déi d’Solarheizung erfonnt huet an dat éischt komplett duerch Sonnenenergie gehetzten Haus entworf huet.
    Sou flagrant Disparitéiten an Ongläichheeten wei ech se ugangs erwäänt hunn, sinn am 21. Joerhonnert net ze vertrieden. Mir mussen ons weider fir d’Egalitéit vun de Geschlechter generell an och an de Wëssenschaften an Fuerschung engagéieren, well mer soss op eng ganz Reih vun talentéierten, passionéierten an engagéierten Persounen sënnlos verzichten.



    4 min
  • Carte Blanche, Laura Zuccoli, 18/09/2017

    Ewéi ass dat nëmme meigelech? Firwat gi Jonk Leit die bei eis opgewuess sinn esou radikal ?  A wat kann een dogéint maachen?
    Gesetzer stëmmen, d’Constitutioun änneren, wou eis Grondrechter beschnidde ginn am Numm vun der Gefor, vun der Protektioun vun den Awunner aus eisem Land, kann net d’ Äntwert sinn !
    Secher ass den Zentrum géint Deradikalisatioun  respect.lu - dee virum Summer gegrënnt gouf - eng wichteg Hellefstellung fir Ursaachen a Radikalisatiouns- Tendenzen ze bekämpfen.
    Mee wier Politik net mei wierksam wa an eise Schoulen systematesch vun de geliefte Realitéite vun de Leit die bei eis wunnen, vun hire Kulturen, vun hire Reliounen geschwat géif gin. Wellecht sinn eis Identitéiten, eis d’Ënnerscheeder mee virun allem eis Gemeinsamkeeten? Vill vun eise jonken Net Lëtzebuerger wësse wéineg iwwert d’Geschicht vum Land vun hiren Elteren.
    Des Themen missten Fächeriwergreifend behandelt ginn. Dofir brauche mer Mëttele a mir däerfen eis net mat Alibi Projeën begnügen. D’Universitéit kéint do an Zesummenaarbecht mat den Acteuren um Terrain vill bäidroen.
    Mee anstatt sech Gedanken iwwer esou eng Politik ze maachen, debattéiere mer iwwert e Vermummungs Gesetz. Mir verstäerken esou Mësstrauen, stigmatiséieren d’Awunner vun enger Relioun, fëllen de politeschen Débat mat marginalen Erscheinungen.
    Wou ass d’ Ennerstëtzung un Jonken dei schoulesch méi e schweieren Wee hun? Wa Jonker mat 25 Joer motivéiert sin nach en Ofschloss ze machen, kreien sie kee Kannergeld, an sie kennen net mei gratis mam öffentlechen Transport fueren - och net emol fir de Wee an t'Schoul oder op t' Léierplaaz. Studenten awer hun de fraien Transport bis 30 Joer!
    Dei Jonk, die an Owescoure probeieren schoulesch weider ze kommen, gi kaum encouragéiert a kreie keng Unerkennung: kee Kannergeld, keng Meiglechkeet fir e Subside vum CePAS de Centre psycho-social et d'accompagnement scolaires freieren CPOS-  keng Ennerstetzung fir den Transport, obschon se oft a finanziell komplizéierte Situatiounen liewen... meeschtens packen des Jonk et dann net.
    Eis Ministèren widerspriechen sech do: op enger Seit wëlle mer onbedengt dat Jonker mat engem Diplom ofschléissen, anersaits ennerstetzen se die Jonk net die et schwéier hun mat der Schoul matzehalen.
    Frust a Roserei kennt dann op. Dëst kann e fruchtbare Buedem fir radikal Ideen ginn.
    Esou laang ewei Lëtzebuerg ekonomesch gutt do steet, kann een dovunner ausgoen dat Jonker iergendwéi hir Platz wäerte fannen. Mee wat geschitt wann dat net mei esou ass, an de Staat manner Suen ze verdeelen huet ?




    3 min
  • Carte Blanche: Alain Wagner, 15/09/2017
    A sengem Roman « Das Glasperlenspiel » entwërft den däitschen Auteur Hermann Hesse eng ganz eegenaarteg Welt. D’Geschicht spillt a Kastalien, enger fiktiver Regioun, déi vun engem Netz vun Eliteschoulen a klouschterähnlechen Institutiounen duerchzunn ass. An dëser sougenannter pädagogescher Provënz widmen d’Studenten an hir Professeren sech ausschliisslech reng kontemplativen Aktivitéiten. Si meditéieren, musizéieren, befaassen sech mat mathemateschen Abstraktiounen, tausche philosophesch Gedanken aus – a si ganz wäit ewech vun der politescher a gesellschaftlecher Aktualitéit.    
        Ob Kastalien als eng Utopie oder eng Dystopie ze betruechten ass, dat ass natierlech déi entscheedend Fro. Aus moderner Siicht schéngt d’Saach kloer ze sinn : dem Hesse säi Roman illustréiert e Bildungsverständnis, mat deem mir haut net méi vill ufänke kënnen – eng Visioun vu Bildung als engem verstëbsten Elfenbeintuerm, an deem ee sech virun de reelle Problemer ka verstoppen a wou d’Lerninhalter e renge Selbstzweck bleiwen. Dës kritesch Interpretatioun gëtt vum Schluss vum Roman deelweis bestätegt : trotz engem brillante perséinleche Parcours decidéiert den Haaptpersonnage, dësem zäitlosen an dofir weltfriemen Universum de Réck ze kéieren a sech den Erausfuerderunge vun der Realitéit ze stellen.
        An awer ass de Sënn vun der Geschicht extrem zweedeiteg. Am Ufank vum Roman gëtt déi vergeeschtegt Welt vu Kastalien nämlech och als eng noutwendeg Reaktioun op eng allgemeng Verflaachung vum Bildungsbegrëff duergestallt. An deem Kontext beschreift den Hesse eng Gesellschaft, déi eiser net ganz onähnlech ass – eng Gesellschaft, déi et verléiert huet, de Saache wierklech op de Fong ze goen, a wou Bildung mat iwwerflächlechem Gebraddels verwiesselt gëtt, an dat laang viru Facebook an Twitter. Dëser Entwäertung vum Wëssen a vun der Sprooch soll an de kastalesche Schoulen eng nei geeschteg Exigenz entgéintgesat ginn.     
           Dem Hesse säi Kastalien ass also weder eng Utopie nach eng Dystopie, mee éischter eng Metapher fir déi Fräiheet an déi Eegestännegkeet, ouni déi Bildung a Kultur sech net entfale kënnen. Sécher muss d’Schoul den ekonomeschen a gesellschaftleche Realitéite Rechnung droen. An awer däerf si sech net an eng reng utilitär Schabloun presse loossen. Eis Schüler si keng sougenannt Humanressourcen, mee jonk Mënschen, déi nach op der Sich no sech selwer sinn. Dofir ass et wichteg, si mat enger méiglechst breeder Palette vu Wëssensgebidder vertraut ze maachen, fir datt jidderee sech dat eraussiche kann, wat hie perséinlech beräichert a weiderbréngt. A wann et wouer ass, datt d’Schoul en Déngschtleeschtungsbetrib ass, da soll se an éischter Linn dem ganze Mënsch déngen. Grad an onsécheren Zäiten, déi vun Onverstand, Fanatismus an Iwwerflächlechkeet gepräägt sinn, ass esou eng ganzheetlech humanistesch Bildung alles anescht wéi e Luxus!

    4 min
  • Carte Blanche, Anne Goeres, 13/09/2017
    Zäit schenken
    Merci Denise, Nicole, Brisch, Romain a Guy. Merci  Liliane, Monique, Edmée a Pier. E riseg grousse Merci un Iech an all Är Kollege fir déi Stonnen, déi Deeg an déi Wochen déi dir schenkt.
    Jo effektiv, Sie gehéieren zu deene Leit, déi Stonne schenken. Einfach esou. Ouni eppes Amplaz z’erwaarden. Ouni ze zécken. Ouni ze knouteren oder ze soueren.
    Well knouteren a souere kenne mer all immens gutt: d’Iessen wat net schmaacht, den Noper dee seng Heck net schneit, den iwwerhieflechen Aarbechtskolleg, d’Wieder wat nie esou ass wei mer et gären hätten oder esou guer de Politiker, deen d’Wurscht einfach net gutt genuch brode kann.
    Wéi wier et da wann all déi negativ Energie do géing benotzt gi fir eppes Guddes ze maachen ? Fir do ze hëllefen, wou Nout um Mann oder un der Fra ass?  Fir an de Genoss ze kommen Zäit ze schenken?
    Zäit schenken ? Elo si mer erëm beim Thema. Mee wat heescht dat iwwerhaapt „Zäit schenken“ ? Abee ‘t ass ganz einfach: et geet drëms sech d’Fräiheet ze huelen, d’Loscht ze hunn an d’Freed z’erkenne fir sech anzesetzen an eppes hier ze ginn. A sief et nëmmen e puer Stonnen am Joer...
    Am Allgemenge kann een och vun Engagement, Benevolat oder Solidaritéit schwätzen. Dat sinn eigentlech 3 ganz verschidde Wieder an dach passen se wei d’Fauscht op d’Aa beieneen.
    Sech solidaresch engagéieren a Benevole ginn heescht awer net nëmmen eppes ginn, mee och vill kréien. Immens vill. Déi geschenkten Zäit ass eng wäertvoll Zäit an een deen dat erkennt, deen huet och d’Méiglechkeet de Retour dovunner z’erliewen : sozialen Austausch, eegen Zefriddenheet, positive Feedback akasséieren.
    Also ouni op d’Silvesternuecht an hier gutt Virsätz ze waarden, kéinte mer et dach einfach emol probéieren :
    •    net méi esou vill iwwert d’Iessen ze knouteren, mee vläit ze hëllefen d’Zopp un déi manner bemëttelt auszedeelen,
    •    net méi esou laang iwwert den Noper hierzefalen, mee am Duerf eng Hand mat unzepaken
    •    sech net méi um Aarbechtskolleg stéiere loossen, mee seng eege professionell Kompetenze munchmol anere fir näischt zu Verfügung ze stellen,
    •    net andauernd wéinst dem Wieder ze soueren, mee sech eventuell fir d‘Ëmwelt anzesetzen
    •    a wat de Politiker an déi richteg gebrode Wurscht betrefft, do géing ech elo mol behaapten, do ka jo jiddereen sech Zäit huelen och eng Hand mat upake fir Léisungen auszeschaffen.
    Merci Denise, Nicole, Brisch, Romain a Guy. Merci  Liliane, Monique, Edmée a Pier. E riseg grousse Merci un Iech an all Är Kollege fir déi Stonnen, déi Deeg an déi Wochen déi dir schenkt.


    3 min
  • Carte Blanche, Laurent Loschetter, 11/09/2017

    Wéi déi franséisch Journalistin Marie Colmant et viru kuerzem thematiséiert huet, sinn et ronn 30 Joer hier, dass dat Wuert Fatwa an eise Medien ukomm ass, en Wuert waat quasi nett bekannt wor an eise Medien an vun engem Daag op den Aaneren eng grous Bedeitung kruut.
    Wéi koum et dozou?
     
    1988 huet den indesche Schrëftsteller Salman Rushdi säi véiert Buch erausginn, mam Titel „Les Versets Sataniques“. An deem Roman geet et drëms, dass de Satan, an net den Allah, zäitweis duerch dem Mohammed säi Mond geschwat hätt ... bref et wor en "touchy" Thema.
     
    Nodeems d’Buch scho 4 Méint dobausse wor an et relativ séier an Indien verbuede gouf, huet de groussen Ayatollah Khomeini aus dem Iran eng offiziell "Fatwa" géint de Salman Rusdhi ausgesprach  ... en offizielle Befeel un all Moslem, weltwäit, hien doutzemaachen, dobäi koum eng initial Primm vun 50 Dausend Dollar, déi sech haut op bal 4 Milliounen Dollar chiffréiert.
     
    An op eemol sinn déi Biller opgetaucht, déi kee méi geduecht hätt, ze gesinn: Et si Bicher verbrannt ginn, iwwerall op der Welt si Bicher verbrannt ginn ... Zeene wéi aus dem Film Fahrenheit 451. Riseg Kéip vu Bicher a Flamen a komplett mouch reliéis Figuren, déi der Welt erklären, dass Bicher geféierlech sinn an zerstéiert musse ginn fir d’Lait vum Wahnsinn ze schützen.
     
    A wéi eise geniale Representant am Europaparlament géif soen, esou Biller hate mer zënter der Nazi-Zäit net méi gesinn. Woubäi hie fir eng Kéier keng Dommheet gesot hätt, et je pèse mes mots.
     
    Direkt vun 1933 un hunn di Hären Hitler a Goebbels nämlech déi sougenannten Autodaféen agesat, wou Onmasse vu Bicher feierlech an ënner grousser Inzenéierung ëffentlech verbrannt goufen .. et goung ochschons dei Zait drëms, déi „richteg“ däitsch Bierger virun der jiddescher Influenz ze schützen.
     
    Déi selwecht Biller ronn 50 Joer duerno nach eng Kéier ze gesinn, wor einfach en enorme Schock. D’Mënschheet hat geduecht, domadder ofgeschloss ze hunn, d’Kultur, wouvunner hei d'Bicher als Symbol gebraucht ginn un de Pranger ze stellen an als Gefor fir d'Mënschheet ze bezeechnen.
    Bei der Konkurrenz-Fraktioun vun den Ultra-Katholiken sinn se och aktif ginn an e Kino zu Paräis a Brand gestach während enger Representatioun vum Martin Scorsese sengem „La dernière tentation du Christ“
    Schonn nees Kultur, déi brennt.
     
    Mir sinn elo 2017 a kéinten denken, dass dat alles Passé ass, de Rushdi lieft matt enger neier identiteit an ënner Police-Protektioun an England, den Iran ass ganz lues ënnerwee Richtung Demokratie: Alles OK kéint ee soen.
     
    Ma ech mengen net ... dem Rushdi seng Fatwa wor eng Zort Start-Schoss fir eng permanent Attack vun Extremisten op alles, wat Kultur ka representéieren.
     
    D’Attacken no de Mohammed-Karikaturen an Dänemark 2005, d’Attack op Charlie Hebdo 2015, d'Zerstéierung vu Palmyra duerch den IS, d’Attack op de Bataclan zu Paräis, a ganz rezent den Attentat um Ariana-Grande-Concert zu Manchester. All déi Evenementer si souzesoen Ierfstécker vun dëser Fatwa.
     
    Et ass also net vu Muttwëll, wéi e Rappel vun engem Vaccin, sech all 10 Joer un déi Fatwa ze erënneren ... an et soll een natierlech och ophalen, bizzaroïd Nazi-Vergläicher op Facebook ze publizéieren, mä dat hu jo déi meescht verstanen ... och wann nach net all.

    3 min
  • Carte blanche économique mat PWC, 19/07/2017
    Elo as et 1 Joer hier, dass d’Englänner fir een Austrieden aus der Europäescher Unioun an engem Referendum ofgestëmmt hun. Kann een des Auswierkungen elo schon zu Lëtzebuerg spieren?

    Wei ech am Mäerz op dëser Platz stoung hun ech a menger carte blanche iwwert déi méiglech Risiken op d‘Economie vun eisem Land geschwat – awer och iwwert méiglech Chancen. Zu dem Zäitpunkt hate just zwou englesch Banken decidéiert, hier Aktivitéiten zu Lëtzebuerg auszebauen. Zanter deem as vill geschitt, an et sinn net manner wei 20 englesch Firmen déi decidéiert hun hier Aktivitéiten deelweis op Lëtzebuerg ze verleeën oder weider auszebauen. Allgemeng as awer eng staark Konkurrenz vun deenen aneren europäesche Staaten ze spieren.

    Wourop as d‘Attraktivitéit vu Lëtzebuerg dann zeréck ze feieren?

    Lëtzebuerg as eng international Finanzplaz – an Europa d’Nummer 2 hannert London. Seng Attraktivitéit ass duerch déi sozial an ekonomesch Stabilitéit – déi beispillsweis duerch den Triple A Rating ënnermauert gëtt – awer och duerch seng Flexibilitéit gezeechent. Bei der Flexibilitéit as virun allem wichteg, dat et ee politeschen Appetit gëtt, fir nei Wirtschaftsaktivitéiten ze developpéieren.
    Ons Villsproochegkeet as och en Avantage. Niewent deenen offizielle Sprooche Lëtzebuergesch, Däitsch a Franséisch as Englesch eng wichteg Sproch am professionellen Ëmfeld. Dat zielt fir sou munch englesch Firma fir op Lëtzebuerg ze komme – a kéint eventuell géint e Land wie Frankräich schwätzen, déi jo an der Lescht och verstäerkt versichen englesch Firmen - haaptsächlech iwwert Steieravantagen - unzelackelen.
    E weidere Punkt as déi kontinuéierlech Diversifikatioun vum Finanzsecteur. Hei as d’Fintech ze nennen, awer och déi „Gréng“ Finanzen, wou rezent nei Labele gegrënnt gi sinn. Niewent de Banken, sinn d’Branche wei Assurancen an Investmentfongen och héich entwéckelt, wat d’Finanzplaz Lëtzebuerg als Ganzt attraktiv mécht.
    2 min

About RTL - Carte Blanche

From the publisher's feed

Meenungen aus der Zivilgesellschaft iwwert d'Aktualitéit

More shows like RTL - Carte Blanche

Déckkäpp by RTL Radio Lëtzebuerg

Déckkäpp

0 Listeners

Journal (Radio) by RTL Radio Lëtzebuerg

Journal (Radio)

1 Listeners

Automag by RTL Radio Lëtzebuerg

Automag

0 Listeners

Tanguy Pastureau maltraite l'info by France Inter

Tanguy Pastureau maltraite l'info

19 Listeners

RTL - Presseclub by RTL Radio Lëtzebuerg

RTL - Presseclub

0 Listeners

RTL - Carte Blanche by RTL Radio Lëtzebuerg

RTL - Carte Blanche

0 Listeners

L'œil de Philippe Caverivière by RTL

L'œil de Philippe Caverivière

55 Listeners

RTL - HitStory by RTL Radio Lëtzebuerg

RTL - HitStory

0 Listeners

Kloertext fir ze lauschteren by RTL Télé Lëtzebuerg

Kloertext fir ze lauschteren

0 Listeners

Podpurri - mir schwätze Kultur! by RTL Radio Lëtzebuerg

Podpurri - mir schwätze Kultur!

0 Listeners

RTL - Flunkernews by RTL.lu

RTL - Flunkernews

0 Listeners

RTL - Econews by RTL Radio Lëtzebuerg

RTL - Econews

0 Listeners

RTL - Sproochmates by RTL Radio Lëtzebuerg

RTL - Sproochmates

0 Listeners

RTL - Lecture vun heiheem by RTL Radio Lëtzebuerg

RTL - Lecture vun heiheem

0 Listeners

RTL - IGEL - Inclusioun ganz einfach liewen by RTL Radio Lëtzebuerg

RTL - IGEL - Inclusioun ganz einfach liewen

0 Listeners

Wocheréckbléck by RTL Radio Lëtzebuerg

Wocheréckbléck

0 Listeners

RTL - Nogehaakt by RTL Radio Lëtzebuerg

RTL - Nogehaakt

0 Listeners

L'oeil d'Alex Vizorek by RTL

L'oeil d'Alex Vizorek

13 Listeners

Ausgeschwat by RTL Tëlee Lëtzebuerg

Ausgeschwat

0 Listeners

Fro den Affekot by RTL Radio Lëtzebuerg

Fro den Affekot

0 Listeners

Nospillzäit by RTL Radio Lëtzebuerg

Nospillzäit

0 Listeners

RTL inteam by RTL Radio Lëtzebuerg

RTL inteam

0 Listeners