Verkfall Eflingar hefst í fjórum sveitarfélögum á morgun, samkvæmt upplýsingum framkvæmdastjóra Eflingar. Loka þarf þremur leikskólum og fjórum grunnskólum. Þá verður röskun á þessari starfsemi í þeim sveitarfélögum sem verkfall tekur til, í Kópavogi, Seltjarnarnesi, Mosfellsbæ og Ölfusi. Árangurslaus sáttafundur var haldinn í dag.

Tæplega sjötíu prósent fleiri kvartanir hafa borist til Neytendasamtakanna nú en á sama tíma í fyrra. Formaður samtakanna segir að svo virðist sem ráðist sé að rétti neytenda úr öllum áttum.

Þórólfur Guðnason sóttvarnalæknir segir tveggja metra regluna gilda að minnsta kosti til áramóta með nokkrum undantekningum

Stefnt er að því að opna sundlaugar fyrir almenning, með ákveðnum takmörkunum, þann 18. maí.

Trampólín eru víðast hvar uppseld og garðhúsgögn hafa aldrei selst jafn vel. Rekstrarstjóri Húsasmiðjunnar segir að sala á sumarvörum síðustu vikur sé sú langmesta sem hann man eftir.

Flugfélagið Norwegian mun næsta árið eða fram að páskum reka aðeins 7 flugvélar og fjöldi starfsmanna verður 200. Arnar Páll Hauksson talar við Gísla Kristjánsson um endurskipulagningu flugfélagsins.

Vegfarendur í miðbæ Reykjavíkur drukku kaffi á kaffihúsum eða snæddu á veitingastöðum. Tónlist barst frá opnum verslunum. Starfsmenn borgarinnar hirtu sorp. Hárskerar tóku á móti kúnnum eftir langt hlé, söfn borgarinnar opnuðu dyr sínar á ný og víða voru iðnaðarmenn að störfum. Arnhildur Hálfdánardóttir fór í miðbæinn sem var að vaka til lífsins eftir að slakað var á ýmsum COVID kröfum. Hún ræddi við Hrafnhildi Egilsdóttur, Guðbrand Benediktsson, Önnu Kristínu Magnúsdóttur og Murat Özkan veitingamann.

Ágreiningur er á milli samninganefndar ríkisins og Félags íslenskra náttúrufræðinga um hvort nýgerður kjarasamningur hafi verið samþykktur eða felldur. Samninganefndin lítur svo á að samningurinn hafa verið felldur. Ekki er ólíklegt að málið fari fyrir félagsdóm. Arnar Páll Hauksson talar við Maríönnu Helgadóttur.

Vinnumálastofnun hefur borist 51 tilkynning um hópuppsagnir sem ná til 4210 starfsmanna. Nær allar tengjast fyrirtækjum í ferðaþjónustu.

Fjármálaráðherra segir að ríkisstjórnin ætli að koma Icelandair til hjálpar, til dæmis með ríkisábyrgð fyrir lánalínu að uppfylltum skilyrðum um hlutafjáraukningu félagsins.

Þrjátíu milljónir hafa misst vinnuna í Bandaríkjunum síðasta hálfan annan mánuð. Botninum er enn ekki náð að mati efnahagssérfræðinga.

Grásleppuveiðar verða stöðvaðar frá og með sunnudeginum þriðja maí og öll leyfi til grásleppuveiða felld úr gildi.

Dorrit Moussaieff hefur náð sér að fullu eftir að hafa veikst af COVID-19. Hún greindist hér á landi, en veit ekki hvar hún smitaðist. Hún lofar íslenskt heilbrigðiskerfi og þakkar því batann.

Mánaðamótin verða þau svörtustu í sögunni, þúsundir hafa fengið uppsagnabréf, stór hluti þjóðarinnar er í skertu starfshlutfalli. Óvíst er hvenær og hversu skarpt ferðaþjónustan tekur við sér á ný. Fólk íhugar stöðu sína, veit ekki alveg hvað tekur við næstu mánuði. Mörg dæmi eru um að pör missi vinnuna. Vinnusálfræðingur varar þau sem nú hafa misst vinnuna við því að sitja aðgerðalaus eftir að geirinn taki við sér - oft verði mikil og spennandi gerjun á krossgötum. Arnhildur Hálfdánardóttir segir frá og talar við Eygló Ólöfu Birgisdóttur, Kolbrúnu Sigurðadóttur, Eyþór Eðvarðsson.

Á Íslandi, líkt og í mörgum öðrum löndum eru ríkisstjórnir að styrkja fyrirtæki til að sporna gegn atvinnuleysi og öðrum efnahagsáhrifum veirufaraldursins. Um leið heyrast þau sjónarmið að ekki ætti að styrkja fyrirtæki, sem markvisst hafa komið sér undan skattgreiðslum eða ekki sinnt öðrum samfélagslegum sjónarmiðum. Sigrún Davíðsdóttir segir frá.

Forstjóri Vinnumálastofnunar segir að dagurinn í dag sé svartasti dagur hópuppsagna hjá stofnuninni. Alls hafa borist tilkynningar frá 15 fyrirtækjum um uppsagnir sjö til átta hundruð starfsmanna.

Forstjóri Landspítalans hefur miklar áhyggjur af kjaraviðræðum eftir að hjúkrunarfræðingar felldu nýgerðan kjarasamning

Heilbrigðisyfirvöld í Bretlandi eru byrjuð að telja fjölda látinna á elliheimilum af völdum COVID-19 með þeim sem hafa dáið á sjúkrahúsum. Fjöldinn jókst því um meira en fjögur þúsund á síðasta sólarhring.

Forstjóri Samkeppniseftirlitsins segir að til greina komi að grípa til ráðstafana ef fyrirtæki byrja að okra í verði og þjónustu. Birgjum verði jafnvel gert að gefa upp hámarks- eða leiðbeinandi verð. Arnar Páll Hauksson talar við Pál Gunnar Pálsson.

Tæpar þrjár vikur eru síðan síðast spurðist til Kim Jongs un, æðsta leiðtoga Norður-Kóreu. Hann lét ekki einu sinni sjá sig í grafhýsi ættarinnar á sólarhátíðinni sem haldin er þann fimmtánda apríl ár hvert til að heiðra minningu Kim Il Sung, afa hans og forvera í embætti. Að núverandi leiðtogi hunsi þennan merkisdag er talið jafnast á við guðlast. Arnhildur Hálfdánardóttir segir frá.

Icelandair sagði í dag upp um 2000 starfsmönnum. Sorgardagur, segir Guðlaug Líney Jóhannsdóttir, formaður Flugfreyjufélags Íslands. Jóhann Hlíðar Harðarson ræddi við hana og Boga Nils Bogason, forstjóra Icelandair sem vonar að margir þeirra sem sagt var upp í dag snúi aftur til starfa hjá félaginu

Uppsagnirnar eru stærsta hópuppsögn sögunnar hér, segir Unnur Sverrisdóttir forstjóri Vinnumálastofnunar.

Alþjóðleg hjálparsamtök vara við því að allt að einn milljarður jarðarbúa eigi eftir að smitast af kórónuveirunni, verði fátækustu ríkjunum ekki komið til hjálpar. Ásgeir Tómasson sagði frá.

Þrír greindust með kórónuveiruna hér síðasta sólarhringinn, en enginn er á gjörgæslu vegna COVID-19. Það var Ölmu Möller landlækni, gleðiefni á daglegum upplýsingafundi.

Viðbótaraðgerðirnar sem stjórnvöld kynntu í morgun fóru fram úr væntingum Haralds Teitssonar framkvæmdastjóra hópferðafyrirtækisins, Teits Jónassonar. Arnhildur Hálfdánardóttir talaði við hann.

Leiðtogar Samfylkingar og Pírata telja að setja verði þau skilyrði að fyrirtæki sem grípi til úrræða ríkisins nýti ekki skattaskjól. Þingmaður Miðflokksins segir meiru skipta að aðgerðirnar gangi hratt fyrir sig. Dagný Hulda Erlendsdóttir talaði við Loga Einarsson, Halldóru Mogensen og Bergþór Ólason.

-----

Hlutabótaleiðin gildir út sumarið, ríkið tekur þátt í launagreiðslum á uppsagnarfresti, og fjárhagsleg endurskipulagning fyrirtækja verður einfölduð með aðgerðunum sem ríkisstjórnin kynntí í morgun. Rætt um aðgerðirnar við Drífu Snædal, forseta ASÍ, Bjarnheiði Hallsdóttur, formann Samtaka ferðaþjónustunnar, Halldór Benjamín Þorbergsson, framkvæmdastjóra SA og Jón Bjarka Bentsson, aðalhagfræðing Íslandsbanka.

Frá Noregi bárust í morgun fréttir um að eitt undarlegasta mannrán síðari tíma væri upplýst - eða svo gott sem. Anne Elísabet Hagen hvarf fyrir hálfu öðru ári og mannræningjar sagðir krefjast lausnargjalds. Núna er eiginmaður hennar, einn ríkasti maður Noregs, grunaður um að hafa sett allt á svið og blekkt lögreglu mánuðum saman. Gísli Kristjánsson segir frá.

Umsjón: Anna Kristín Jónsdóttir og Arnhildur Hálfdánardóttir. Tæknimaður: Ragnar Gunnarsson og stjórn útsendingar í höndum Bjargar Guðlaugsdóttur.

Félagar í Eflingu sem starfa hjá fimm sveitarfélögum á suðvesturhorninu samþykktu í dag verkfall með miklum meirihluta. Verkfallið er boðað á hádegi á þriðjudag í næstu viku og hefur meðal annars áhrif á starf í grunnskólum og hjúkrunarheimilum.

Ekkert kórónuveirusmit greindist hérlendis í gær og síðustu fjóra daga hefur ekki greinst smit á Vesfjörðum.

Einungis nítján ríki í Bandaríkjunum eru í stakk búin til að skima fyrir kórónuveirunni með fullnægjandi hætti.

Samningafundi Flugfreyjufélagsins og Icelandair lauk síðdegis án árangurs.

Meirihlutinn í Hafnarfirði vill selja 15 prósenta hlut bæjarins í HS Veitum til að bregðast við fyrirsjáanlegum halla vegna Covid 19. Rósa Guðbjartsdóttir, bæjarstjóri í Hafnarfirði, segir að salan velti á því hvort viðunandi verð fáist fyrir hlutinn. Adda María Jóhannsdóttir, bæjarfulltrúi Samfylkingar leggst gegn sölu. Magnús Geir Eyjólfsson ræddi við þær.

Ríkisstjórnin hefur fallið frá áformum sínum um stofnun hálendisþjóðgarðs og þjóðgarðastofnunar og endurskoðun rammaáætlunar á þessu þingi, og einnig hefur verið hætt við breytingu á lögum um tengda aðila í sjávarútvegi. Þetta er meðal fimmtíu mála sem tekin hafa verið af þingmálaskrá ríkisstjórnarinnar vegna kórónuveirufaraldursins

----

Rætt við Skarphéðin Berg Steinarsson, ferðamálastjóra um nýtt markaðsátak innanlands og ferðahorfurnar í sumar. Anna Kristín Jónsdóttir ræddi við hann.

Breska stjórnin hefur hrakist undan framvindu veirufaraldursins. Nú er forsætisráðherra mættur til leiks eftir sína eigin glímu við COVID-19. Sigrún Davíðsdóttir sagði frá.

Nærri fjórðungi færri skordýr eru nú í heiminum en fyrir 30 árum. Mannanna verk, stórborgir, vegir, raflýsing, skordýraeitur og landbúnaður þar sem náttúrulegum búsvæðum er breytt í ræktað land hafa orðið til þess að stofnar skordýra hafa minnkað verulega. Þetta er niðurstaða viðamikillar nýrrar rannsóknar sem tímaritið Science greinir frá. Kristján Sigurjónsson, ræðir við Gísla Má Gíslason, prófessor í líffræði við Háskóla Íslands.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar: Björg Guðlaugsdóttir.

Sóttvarnalæknir segir koma til greina að flýta tilslökunum á næstu vikum og mánuðum haldi áfram að greinast hér ekkert að fá smit daglega. Þó breytist ekkert fyrir 4. maí.

Framkvæmdastjóri Samtaka atvinnulífsins segir mörg fyrirtæki velta því nú fyrir sér hve lengi þau geta greitt laun. Ef komi til gjaldþrotaskipta í stórum stíl séum við sem samfélag á vondum stað.

Framboð á sterkum fíkniefnum hefur ekkert dregist saman hérlendis þrátt fyrir að flug hafi nánast lagst af, segir lögregla. Skýringin liggja í uppsöfnuðum birgðum og framleiðslu hér á landi.

Norðmenn ætla að stórauka skimun fyrir kórónuveirunni frá og með næstu mánaðamótum. Ef allt gengur samkvæmt áætlun verða hundrað þúsund sýni tekin í hverri viku.

Frá því að gripið var til ráðstafana í Svíðþjóð vegna COVID-19 hefur áfengissala þar aukist um tíu prósent.

Fjármálaráðherra vonast til þess að hægt verði að upplýsa í næstu viku hvort og hvernig úrræðinu um hlutabætur verður háttað og framhaldið. Gildistími þess rennur út í lok maí. Framkvæmdastjóri Samtaka atvinnulífsins segir mikilvægt að fá svar fyrir þessi mánaðamót. Ljóst sé að viðbragð fyrirtækja ráðist mjög af því hver niðurstaðan verður. Tveir lögmenn telja að lagaákvæði um að hægt sé að taka starfsmenn af launaskrá tímabundið vegna hráefnisskorts geti nýst ferðaþjónustufyrirtækjum. Hráefnisskorturinn væri þá skortur á ferðamönnum. Arnar Páll Hauksson segir frá. Rætt við Bjarna Benediktsson, Halldór Benjamín Þorbergsson og Almar Þór Möller.

Það er giskað á að um 2,7 milljarðar manna búi með einhverjum hætti við samkomuhöft vegna COVID-19 farsóttarinnar. Ríkisstjórnir grípa til aðgerða, ekki síst til að taka á atvinnuleysi sem eykst hraðar en nokkru sinni hefur sést. Lönd eins og Ísland, sem eiga mikið undir ferðaþjónustu, eru háð framvindunni í öðrum löndum. Sigrún Davíðsdóttir segir frá.

Eftir að hert var á samkomubanni þann 24. mars skellti Góði hirðirinn í lás, ekki af ótta við að veiran bærist þar inn með notuðum húsgögnum heldur vegna þess að það var of erfitt að virða fjöldatakmarkanir. Sorpa lokaði einnig fyrir mótttöku nytjahluta á endurvinnslustöðvum. Arnhildur Hálfdánardóttir segir frá og talar við Guðmund Tryggva Ólafsson.

Icelandair Group ætlar að grípa til yfirgripsmikilla uppsagna í aprílmánuði. Starfsemi verður haldið í lágmarki á næstunni.

Fulltrúar fyrirtækja í ferðaþjónustu segjast hafa átt von á víðtækari aðgerðum af hálfu stjórnvalda. Fulltrúar stjórnarandstöðu segja aðgerðapakkann ein stór vonbrigði.

Heimsóknir á dvalar- og hjúkrunarheimili verða leyfðar á ný frá fjórða maí. Tveggja metra reglan gildir í þessum heimsóknum.

Á Ítalíu eru dauðsföll af völdum COVID-19 orðin 25 þúsund. Yfirmaður Alþjóðaheilbrigðisstofnunarinnar segir langt í að séð verði fyrir endann á farsóttinni.

Bóndi í Fljótum man vart eftir erfiðari vetri. Heyskapur kann að tefjast um meira en mánuð vegna snjóþyngsla.

Íslendingar eru ekki bara menn, þeir bera líka erfðaefni Neanderdalsmanna. Þetta sýnir ný rannsókn.

Stór hluti sjúkraflutningamanna sem starfa í framlínunni vegna COVID-19 á ekki rétt á álagsgreiðslum til heilbrigðisstarfsmanna vegna þess að þeir starfa hjá sveitarfélögunum.

Sóttvarnagallarnir eru óþægilegir og erfitt að vera í þeim til lengdar en það að geta ekki brosað til sjúklinga reynir jafnvel meira á. Spegillinn safnaði hugleiðingum frá heilbrigðisstarfsfólki.

Spegillinn 21.apríl 2020

Umsjón: Arnar Páll Hauksson og Kristján Sigurjónsson

Tæknimaður: Mark Eldred

Átta til tíu þúsund lítil og meðalstór fyrirtæki geta fengið allt að 6 milljóna króna lán á lágum vöxtum, lítil fyrirtæki, sem gert var að loka í sóttvarnaraðgerðum, fá að allt tveggja komma fjögurra milljóna króna styrk og hugað verður að geðheilbrigði, tómstundum og íþróttum barna og verndun viðkvæmra hópa í aðgerðum ríkisstjórnarinnar sem kynntar voru í dag. Um 60 milljarðar króna fara í aðgerðirnar.

Heilbrigðisstarfsmenn sem starfa í framlínunni vegna COVID-19 fá sérstaka umbun. Hún gæti í heild numið einum milljarði og náð til á þriðja þúsund starfsmanna.

Efling hefur ákveðið að boða til atkvæðagreiðslu um verkfall sem á að hefjast 5. maí. Það næði meðal annars til félagsmann sem starfa hjá sveitarfélögunum Kópavogi, Mosfellsbæ og Seltjarnarnesi.

Kórónuveirutilfellum fjölgar svo hratt í Mexíkó að viðbúnaðarstig hefur verið hækkað. Forseti landsins er sakaður um að hafa brugðist seint og illa við farsóttinni.

Lögreglan hefur til rannsóknar þrjú meint brot á samkomubanni. Þetta kom fram í máli Víðis Reynissonar, yfirlögregluþjóns, á upplýsingafundi almannavarna í dag.

Lengri umfjöllun:

Leitað eftir viðbrögðum vegna aðgerðapakka ríkisstjórnarinnar sem kynntur var í dag. Í beinni útsendingu var rætt við Jóhannes Þór Skúlason. famkvæmdastjóra Samtaka Ferðaþjónustunnnar, Drífu Snædal forseta Alþýðusambands Íslands, Halldór Benjamín Þorbergsson, framkvæmdastjóri Samtaka atvinnulífsins og Katrínu Ólafsdóttir hagfræðingur og lektor við Háskólann í Reykjavík.