Níu af hverjum tíu landsmönnum segjast ætla að kjósa Guðna Th. Jóhannesson í forsetakosningunum í lok mánaðarins samkvæmt þjóðarpúlsi Gallups.

Á fjórða þúsund eru samankomin á samstöðufundi á Austurvelli vegna ástandsins í Bandaríkjunum. Samstöðufundir voru einnig haldnir á Akureyri og Ísafirði í dag.

Smitsjúkdómalæknir vill að íhugað verði að sleppa því að skima ferðamenn við komuna til landsins. Skimunin geti verið falskt öryggi.

Vísbendingar eru um að þeim sem lenda í greiðsluvandræðum muni fjölga mjög þegar líður á sumarið.

Árás lögreglunnar á fjölmiðlafólk undanfarna daga er mikið áfall, ekki síst vegna þess að Bandaríkin eru opinberlega stærsta lýðræðisríki heims. Þetta segir framkvæmdastjóri Alþjóðabandalags blaðamanna.

Guðmundur Hálfdánarson, sagnfræðiprófessor við Háskóla Íslands segir að á vissan hátt sé tekist á um stöðu forsetans í kosningabaráttunni vegna komandi forsetakosninga. Guðmundur segir þetta eftir viðtal Spegilsins við Guðmund Franklín Jónsson sem býður sig fram gegn Guðna Th. Jóhannessyni forseta. Hann segir að Guðni hafi fært embættið aftur á þann stað sem það var áður en Ólafur Ragnar Grímsson beitti málskotsréttinum í fyrsta sinn. Arnar Páll Hauksson talar við Guðmund Hálfdánarson.

Yfirlæknir á ónæmisfræðideild Landspítalans útilokar ekki að gríðarleg notkun sótthreinsispritts geti valdið varanlegum skaða á ónæmiskerfinu. Handþvottur sé besta vörnin gegn smitsjúkdómum en margir hafi hallað sér full mikið að sprittinu í heimsfaraldrinum. Veirur kunna að verða ónæmar fyrir spritti, en þegar er farið að bera á ónæmi gagnvart öðrum sótthreinsiefnum. Arnhildur Hálfdánardóttir talaði við Björn Rúnar Lúðvíksson.

Breska stjórnin var sein að setja á samkomubann vegna COVID-19 veirunnar. Eftir misvísandi upplýsingar hika breskir foreldrar við að senda krakkana í skólann. Samt flykkist fólk á strendur og útisvæði í góða veðrinu, og hagstofustjóri Breta telur ríkisstjórnina beita tölfræðiblekkingum. Sigrún Davíðsdóttir segir frá.

Umsjón: Pálmi Jónasson

Útgöngubann verður í New York-borg frá átta að kvöldi til fimm að morgni næstu sex sólarhringa. Óeirðaseggir virtu að vettugi útgöngubannið síðustu nótt.

Donald Trump er erkitýpa af þjóðernispopúlískum stjórnmálamanni sem virðir ekki endilega leikreglur lýðræðisins, segir Eiríkur Bergmann stjórnmálafræðiprófessor.

Heilbrigðisráðherra hefur samþykkt tillögu sóttvarnalæknis um að skimun á farþegum vegna COVID-19 við komuna til landsins hefjist 15. júní. Sóttvarnalæknir telur að síðar í sumar verði hægt að skima um fjögur þúsund sýni á sólarhring.

Ekkert nýtt COVID-19 smit greindist í gær.

Niðurstöður úr rjúpnatalningum sýna að rjúpu hefur fækkað á Norðurlandi en fjölgað í öðrum landshlutum

Arnar Páll Hauksson talar við forsetaframbjóðandann Guðmund Franklín í Speglinum

Pálmi Jónasson talar við Eirík Bergmann í Speglinum um ástandið í USA

Enginn hefur greinst með kórónuveiruna hér á landi í 17 daga.

Forseti ASÍ segir að ef frumvarp ríkisstjórnarinnar um laun á uppsagnarfresti verði samþykkt í óbreyttri mynd geti það leitt til mestu kjaraskerðingar síðari tíma.

Íslendingar, Norðmenn og Þjóðverjar sem hyggjast fara til Danmerkur eftir 15. júní verða að sýna fram á að þeir ætli að dvelja að minnsta kosti sex nætur fyrir utan Kaupmannahöfn.

Frá því að kórónuveiran stakk sér niður hér á landi fyrir þremur mánuðum hafa yfir 100 fyrirtæki tilkynnt hópuppsagnir sem ná til tæplega 7 þúsund starfsmanna.

Mun fleiri hafa dáið af völdum COVID-19 í Moskvu en áður var gefið upp. Útgöngubanni í borginni verður aflétt eftir helgi.

Það eru engin merki um að heimsfaraldurinn og samfélagslegar breytingar vegna hans hafi haft neikvæð áhrif á líðan landsmanna, þvert á móti. Sviðsstjóri á lýðheilsusviði Landlæknisembættisins, spyr sig hvort krísur geti hjálpað okkur að finna lykilinn að andlegri vellíðan, til frambúðar. Arnhildur Hálfdánardóttir talar við Dóru Guðrúnu Guðmundsdóttur.

Limlesting á kynfærum kvenna hefur verið bönnuð árum saman í Kenya en þessari blóðugu hefð er enn viðhaldið í dreifðari byggðum landsins. Samtök sem berjast gegn umskurði kvenna boða breyttar hefðir við vígsluathafnir stúlkna og baráttan skilar árangri. Tvö hundruð milljónir kvenna í heiminum hafa verið limlestar á kynfærum og á ári hverju bætast við þrjár milljónir ungra stúlkna. Pálmi Jónasson segir frá.

Hlutabótaleiðin var margfalt dýrari en lagt var upp með að mati Ríkisendurskoðanda. Hann gagnrýnir í nýrri skýrslu að ekki hafi verið eftirlit með þeim fyrirtækjum sem settu starfsfólk á hlutabætur.

Heilbrigðisráðherra segir ummæli Kára Stefánssonar um sína persónu ekki skipta máli í því verkefni sem verið sé að fást við. Hún segir framlag Íslenskrar erfðagreiningar vera ómetanlegt.

Frysti- og fiskvinnsluhús Hríseyjar Seafood eru rústir einar eftir bruna í nótt. Enn er ekkert vitað um upptök eldsins.

Veitinga- og kaffihús verða opnuð í Frakklandi í næstu viku. Frönsk stjórnvöld styðja að ferðatakmörkunum innan Evrópusambandsríkja verði aflétt um miðjan næsta mánuð.

Brotthvarf úr framhaldsskólum minnkaði eftir að stjórnvöld styttu námstíma til stúdentsprófs. Þetta kemur fram í nýrri skýrslu menntamálaráðherra.

Þó að markmið frumvarps um skipan sendiherra sé að fækka þeim, gæti þeim fjölgað samkvæmt ákvæðum í frumvarpinu. Samtök gegn spillingu vara við því að frumvarpið verði afgreitt með hraði.

Breska stjórnin berst nú við að koma efnahagslífinu í gang en glímir við áhrifin af óskýrum skilaboðum og ráðgjafanum sem braut ferðabann.

Mál Sigurjóns Árnasonar og Elínar Sigfúsdóttur verður tekið til meðferðar aftur í Hæstarétti.

Yfirlæknir sýkla- og veirufræðideildar Landspítalans segir brýnt að fá öflug og sjálfvirk tæki til að greina sýni. Deildin geti greint fimmhundruð sýni á dag í takmarkaðan tíma og því spurning hvort fá eigi fleiri til að greina sýni á meðan ástand deildarinnar sé svona.

Öllum flugumferðarstjórum í flugstjórnarmiðstöð hjá Isavia, var sagt upp í dag. Þeir verða ráðnir aftur í lágmark 75 prósent starfshlutfall.

Landeigendur hafa fengið sig fullsadda af sóðaskap næturgesta í Hrunalaug, nærri Flúðum.

Lögreglan á Suðurlandi hefur lokið skýrslutöku yfir manni sem hringdi í neyðarlínuna í nótt og tilkynnti að hann hefði séð mann falla í Ölfusá. Maðurinn sem hann sagðist hafa séð falla í ána var hann sjálfur.

Gripið hefur verið til ýmissa ráða til þess að tryggja áframhaldandi fengsæld í Hítará eftir að stór skriða breytti farvegi hennar fyrir tveimur árum.

Umhverfisstofnun er nú að taka saman hversu mikið dró úr loftmengun í samkomubanninu.

Spegillinn 26. maí 2020

Umsjón: Kristján Sigurjónsson

Tæknimaður: Magnús Þorsteinn Magnússon

Forstjóri Landspítalans segir að bregðast verði harkalega við ef COVID-smit koma upp eftir að landamæri hafa verið opnuð. Samkvæmt skýrslu verkefnisstjórnar um sýnatöku vegna COVID á landamærum er lítil afkastageta sýkla- og veirufræðideildar Landspítalans veikleiki í sóttvörnum og almannavörnum landsins.

Þingfundir verða sennilega haldnir fram á haust með hléum í júlí og ágúst. Fjárlög verða ekki tilbúin fyrr en í október.

Stjórnvöld hvetja Íslendinga búsetta erlendis að kjósa snemma í forsetakosningunum. Vegna Covid-faraldursins er póstur lengur að berast á milli landa en venjulega.

Jarðskjálftavirkni á Reykjanesskaga hefur minnkað umtalsvert undanfarnar vikur. Veðurstofan fylgist þó vel með því virkin er meiri en í venjulegu ástandi.

Traust og staða pólitískra ráðgjafa, öllu heldur eins ráðgjafa, er stórmál í Bretlandi.

Lengri umfjöllun:

Verkefnisstjórn um sýnatöku fyrir COVID-19 á landamærum hefur skilað sinni skýrslu. Meginniðurstaðan er að það er hægt að taka sýni af komufarþegum og fá niðurstöðu innan fimm klukkutíma. En það eru ýmsir annmarkar og óvissuþættir - kannski einkum þeir að afkastageta sýkla- og veirufræðideildar Landspítala (SVEID), er ekki nema 500 sýni á dag, en í forsendum verkefnisstjórnarinnar þegar hún hóf vinnuna var gert fyrir 1000 sýnum. Kristján Sigurjónsson ræðir við Svandísi Svavarsdóttur heilbrigðisráðherra í beinni útsendingu um skýrsluna og stöðu Landspítalans.

Ferðabann hefur víða verið liður í viðureigninni við COVID-19 veiruna. Í Bretlandi er rætt hvort bannið hafi í raun náð til allra eða aðeins sumra og það snertir einnig traust á stjórnmálamönnum. Sigrún Davíðsdóttir segir frá.

Spegillinn 25.maí 2020

Umsjón: Kristján Sigurjónsson

Tæknimaður: Magnús Þorsteinn Magnússon

Síðasti upplýsingafundur Almannavarna að sinni var haldinn í dag. Ekkert COVID-19 smit hefur greinst síðasta sólarhring, en sex smit hafa greinst í þessum mánuði.

Stjórnvöld í Þýskalandi hyggjast framlengja ýmsar varúðarráðstafanir gegn kórónuveirunni fram í júlí. Stjórnendur tveggja sambandsríkja telja nóg komið.

Sveitarfélög í Evrópu velta nú fyrir sér hvernig bregðast eigi við mögulegu bakslagi í loftslagsmálum vegna COVID-19 faraldursins. Þetta segir forstöðumaður Brussel-skrifstofu Sambands íslenskra sveitarfélaga.

Um klukkan hálf sex höfðu 130 kosið utan kjörfundar vegna komandi forsetakosninga. Opnað var fyrir atkvæðagreiðslu hjá sýslumönnum í morgun en kosningarnar fara fram 28. júní. Tveir eru í framboði, Guðni Th. Jóhannesson forseti og Guðmundur Franklín Jónsson.

Stuðningur við ríkisstjórnina mælist 47,5% í nýrri könnun MMR og hefur minnkað um 7 prósentustig frá síðustu könnun þegar hann var rúmlega 54%.

Hátt í fimm þúsund einyrkjar í sjálfstæðri atvinnustarfsemi, meðal annars hárgreiðslufólk og tannlæknar, sóttu um bætur til Vinnumálastofnunar. Þær nema 1700 milljónum króna, en greiðslur hafa dregist vegna álags.

Umsóknum um framhaldsnám í Háskólanum í Reykjavík fjölgaði um 33 prósent á milli ára. Alls hafa borist 1.423 umsóknir um meistaranám í ár en í fyrra voru þær 1.073.

Lengri umfjöllun:

Það hvernig stjórnvöld hafa tekist á við COVID-faraldurinn hefur verið eins og kennslustund í stefnumótun. Þetta segir Kristján Vigfússon, aðjúnkt við viðskiptadeild HR, sem hefur sérhæft sig í stefnumótun. Stjórnvöldum hafi tekist að forðast gjótur sem önnur ríki hafi fallið ofan í. Hann segir að það hafi verið rétt ákvörðun að hafa sérfræðingana í forgrunni en að nú þegar úrlausnarefnin eru orðin pólitískari og álitamálin fleiri reyni á að viðhalda gagnsæi. Fólk verði að átta sig á því hvort vísindi eða pólitík liggi að baki ákvörðunum stjórnvalda hverju sinni. Arnhildur Hálfdánardóttir ræðir við Kristján.

Alma Möller var gestur Spegilsins í beinni útsendingu. Tímamót urðu í dag í ráðstöfunum gegn COVID-19 faraldrinum og ýmsum höftum aflétt. Síðasti upplýsingafundur Almannavarna var haldinn í dag. Kristján Sigurjónsson ræðir við Ölmu hvernig til hefur tekist hingað til.

Hluthafar Icelandair samþykktu einróma í dag, að fara í hlutafjárútboð. Stefnt er að því að útboðið fari fram dagana 29. júní til 2. júlí.

Flugfreyjur hafa boðið Icelandair svokallaðan fleytisamning til að hjálpa flugfélaginu yfir erfiðasta hjallann í kreppunni. Ekki komi til greina að skerða laun og réttindi til frambúðar.

Kjarasamningur flugmanna hjá Icelandair var samþykktur í dag með yfirgnæfandi meirihluta. Yfir 96% samþykktu samninginn.

Suður-Ameríka er orðin miðpunktur kórónuveirufaraldursins að mati Alþjóðaheilbrigðisstofnunarinnar.

Haukur Holm talar við Boga Nils Bogason forstjóra Icelandair eftir hluthafafundi félagsins í dag.

Sigurlína Rúllugardína Nýlendína Krúsimunda Efraímsdóttir Langsokkur, fagnar um þessar mundir 75 ára afmæli. Bókmenntafræðingur segir Línu Langsokk skrifa námskrár skóla í dag. Arnhildur Hálfdánardóttir talar við Brynhildi Þórarinsdóttur um Línu.

Drykkjuskapur og kórónuveirufaraldurinn hafa lagt efnahag eyríkisins Saó Tóme og Prinsípe í rúst. Börnin drekka meira brennivín en mjólk, að því er segir í nýrri rannsókn en konan sem gerði rannsóknina er hötuð fyrir vikið. Eyjaskeggjar telja að rannsóknin skaði ímynd eyjarinnar sem ferðamannaparadísar. Pálmi Jónasson segir frá.

Samningafundi Icelandair og Flugfreyjufélags Íslands hjá Ríkissáttasemjara var slitið á þriðja tímanum í dag. Flugfreyjur höfnuðu tilboði Icelandair, sem forstjóri félagsins segir að hafi verið lokatilboð.

Eitt COVID-19 smit greindist hér á landi síðasta sólarhring, hið fyrsta síðan 12. maí. Fjórir eru nú í einangrun, en enginn á sjúkrahúsi.

Grikkir opna landamæri sín fyrir erlendum ferðamönnum í næsta mánuði.

Áhyggjur af því að fólk smitist af kórónuveirunni hér á landi hafa aldrei verið minni síðan faraldurinn hófst, samkvæmt þjóðarpúlsi Gallups.

Lög um neyslurými voru samþykkt á Alþingi í dag, sveitarfélög geta nú sett á fót örugg rými fyrir fólk sem sprautar sig með vímuefnum. Ekki er þó víst að sveitarfélögin kæri sig um að nýta tækifærið.

Rúmlega þriðjungur þingmanna segist hafa orðið fyrir einelti og kynbundinni áreitni á starfstíma sínum á Alþingi. Steingrímur J. Sigfússon, forseti Alþingis segir niðurstöður könnunar sem gerð var á starfsumhverfi þingmanna og starfsmanna sláandi. Freyr Gígja Gunnarsson ræddi við hann.

Utanríkisráðherra Ítalíu segir ekkert því til fyrirstöðu að erlendir ferðamenn verji sumarfríinu á ítölskum ströndum eða fjallaþorpum og njóti matargerðarlistar heimamanna. Ásgeir Tómasson sagði frá.

Fundi í kjaradeilu flugfreyja og Icelandair sem átti að hefjast klukkan 17 var frestað að beiðni annarar samninganefndarinnar segir Aðalsteinn Leifsson, ríkissáttasemjari sem segist ræða við deilendur síðar í kvöld og ákveða hvort og hvenær boðað verður til nýs fundar.

Frumvarp sem felur í sér stofnun nýs dómstóls, endurupptökudóms, var samþykkt á Alþingi síðdegis. Hann kemur í stað endurupptökunefndar og sker úr um hvort heimilað er að taka dómsmál upp á ný. Áslaug Arna Sigurbjörnsdóttir dómsmálaráðherra fagnar lögunum. Helga Vala Helgadóttir Samfylkingu og Þórhildur Sunna Ævarsdóttir Pírötum telja lögin réttarbót en sakna þess að ekki sé í þeim ákvæði um gjafsókn.

Ísafjarðarbær vill að ríkið greiði 40 milljóna kostnað vegna snjóflóðanna sem féllu í byrjun árs, Birgir Gunnarsson, bæjarstjóri Ísafjarðarbæjar segir að stærsti hluti kostnaðarins sé vegna hreinsunar. Anna Lilja Þórisdóttir ræddi við hann.

Hverfisráð Oddeyrar leggst gegn áformum um byggingar á Gránufélagsreit á Oddeyri á Akureyri, þrátt fyrir að hámarkshæð húsa hafi verið lækkuð úr ellefu hæðum í átta. Núgildandi skipulag, sem leyfir allt að fjögurra hæða hús, sé vænlegri kostur. Bjarni Rúnarsson ræddi við Berglindi Ósk Óðinsdóttur, formann ráðsins.

Þuríður Harpa Sigurðardóttir, formaður Öryrkjabandalagsins segir að öryrkjar hafi gleymst við gerð kjarasamninga. Hún telur æskilegt að örorkubætur hækki í 400 þúsund krónur á mánuði. Arnar Páll Hauksson tók saman og ræddi við Þuríði, Drífu Snædal ASÍ, Sonju Ýr Þorbergsdóttur BSRB, Þórunni Sveinbjarnardóttur BHM og Ragnar Þór Pétursson KÍ.

Eftir því sem gróðursæld vex á Íslandi eykst hætta á gróðureldum. Járngerður Grétarsdóttir plöntuvistfræðingur segir að það eigi eftir að taka landið sem brann í nótt langan tíma að jafna sig. Veðurstofan hefur lengi viljað auka vöktun á gróðureldum en það hefur strandað á fjármagni. Arnhildur Hálfdánardóttir tók saman.

Brexit er ekki búið og nú er það smitað af COVID-19 veirunni. Sigrún Davíðsdóttir sagði frá.