Aðeins tæpt hálft prósent 10 ára barna og yngri sem skimuð hafa verið fyrir kórónuveirunni reyndist smitað. Landlæknir segir heimsóknarbann á hjúkrunarheimili og sjúkrahús erfitt úrræði, en verið sé að fórna minni hagsmunum fyrir meiri.

Búast má við miklu annríki hjá Vinnumálastofnun næstu daga. Hægt verður að senda umsóknir um bætur vegna skerts starfshlutfalls á allra næstu dögum.

Framkvæmdastjóri Sambands evrópskra verkalýðsfélaga segir að hótel- og veitingageirinn sé horfinn. Til að koma honum aftur af stað sé ljóst að þörf sé á verulegum ríkisstyrkjum á næstu árum.

Heilbrigðisráðherra sett í dag reglugerð um takmarkanir á afhendingu lyfja. Ráðherra segir mikilvægt að fólk hamstri ekki lyf.

Hreinsistöð fráveitu við Klettagarða í Reykjavík er óstarfhæf og fer óhreinsað skólp nú í sjó. Ástæðan er að miklu af blautklútum og sótthreinsiklútum hefur verið fleygt í salerni.

Sundlaugar Reykjavíkurborgar verða lokaðar frá og með morgundeginum.

Sáttafundur Eflingar og sveitarfélaganna hefur verið boðaður í fyrramálið.

Kristján Bragason, framkvæmdastjóri Evrópusamtaka verkalýðsfélaga starfsmanna í matvælaframleiðslu , landbúnaði og á hótelum og veitingahúsum, segir að áætla megi að af þeim 12 milljónum sem starfa í hótel- og veitingageiranum hafi 10 til 11 milljónir misst vinnuna vegna COVID-19.

Atvinnugreinin sé hreinlega horfin og ekki verið hægt að koma henni aftur í gang nema með verulegum ríkisstyrkjum á næstu árum. Arnar Páll Hauksson talaði við Kristján Bragason.

Loftmengun yfir stórborgum hefur snarminnkað, dregið hefur úr alþjóðaflugi og umferðarteppur heyra víða sögunni til, í bili að minnsta kosti. Hvernig spila loftslagsvá og heimsfaraldur nýrrar kórónaveiru, saman? Leiðir heimsfaraldurinn til bakslags í baráttunni við loftslagsbreytingar eða er hann stökkpallur til þess að breyta hagkerfinu og venjum fólks? Ýttu loftslagsbreytingar jafnvel undir það að veiran sem veldur COVID-19 tók stökkið yfir í menn? Arnhildur Hálfdánardóttir sagði frá.

Miklar efasemdir eru í Noregi um að flugfélagið Norwegian lifi ferðabann vegna krórónuveirunnar af. Skuldir eru miklar og bæði ríki og fjárfestar hika við að koma félaginu til bjargar. Hins vegar bendir margt til að víðtækar lokanir hafi dregið úr smiti vegna veirunnar í Noregi. Gísli Kristjánsson sagði frá.

Yfir fjögur hundruð kórónuveirusmit hafa verið greind hérlendis. Til greina kemur að herða aðgerðir, til dæmis með því að takmarka enn frekar hversu margir mega koma saman. Alma Ómarsdóttir sagði frá, Alma Möller, landlæknir og Víðir Reynisson, yfirlögregluþjónn hjá Ríkislögreglustjóra af fundi í dag.

Alþingi samþykkti í dag frumvarp sem heimilar rétt til greiðslu atvinnuleysisbóta samhliða minnkuðu starfshlutfalli. til að bregðast við stórauknu atvinnuleysi vegna útbreiðslu COVID-19 veirunnar. Aðilar vinnumarkaðarins segja aðgerðirnar bráðnauðsynlegar. Magnús Geir Eyjólfsson ræddi við Hannes G. Sigurðsson, aðstoðarframkvæmdastjóra Samtaka atvinnulífsins og Drífu Snædal, forseti Alþýðusambands Íslands.

Tugþúsundir Ítala hafa verið sektaðar fyrir að brjóta útgöngubann stjórnvalda. Til greina kemur að hernum verði falið að halda fólki heima. Ásgeir Tómason sagði frá.

Það leggjast allir á eitt og láta skólastarfið ganga, segir Ársæll Guðmundsson skólameistari Borgarholtsskóla. Öll kennsla fer nú fram í gegnum netið. Valgeir Örn Ragnarsson ræddi við Ársæl

Öllu flugi Air Iceland connect til og frá Reykjavíkurflugvelli hefur verið aflýst vegna veðurs. Gular viðvarnir eru í gildi sunnan og vestan til á landinu og vetrarfærð er í öllum landshlutum. Sólveig Klara Ragnarsdóttir sagði frá.

-----

Frumvarpi um atvinnuleysisbætur til fólks sem missir hluta af vinnu felst meðal annars að laun að 400 þúsund krónum eru að fullu tryggð þó að vinna minnki, þak á samanlagðar bætur og laun er 700 þúsund krónur. Ákvæðin gilda út maí og verða endurmetin þegar líður á gildistímann. Unnur Sverrisdóttir forstjóri Vinnumálastofnunar segir skipta höfuðmáli að ráðningarsamband vinnuveitenda og starfsmanna haldist. Reynslan af svipuðum aðgerðum eftir hrun hafi verið góð. Anna Kristín Jónsdóttir ræðir við Unni.

Landspítalinn vinnur að því að panta fleiri öndunarvélar hingað til lands. Spítalinn fékk í dag fimmtán vélar að gjöf frá velunnurum í Bandaríkjunum. Framkvæmdastjóri þjónustusviðs segir unnið að því að treysta birgðahald á óvissutímum. Arnhildur Hálfdánardóttir ræddi við Jón Hilmar Friðriksson, framkvæmdastjóra þjónustusviðs Landspítalans.

Í litlum sveitarfélögum geta örfá kórónuveirusmit sett stórt strik í reikninginn. Í Húnaþingi vestra er fimmtungur íbúa í sóttkví og það sama á við um fjölmarga í Vestmannaeyjum og í Hveragerði. Aldís Hafsteinsdóttir, formaður sambands sveitarfélaga og bæjarstjóri í Hveragerði, segir að enn hafi engin sveitarfélög lamast og viðbragðsaðilar á hverjum stað grípi inn í gerist þess þörf. A

Vísbendingar eru um að COVID-19 faraldurinn sé að færast í aukana hér á landi, segir Þórólfur Guðnason, sóttvarnalæknir. Alls eru 330 staðfest tilfelli hér á landi, sem er fjölgun um 80 frá því í gær. Á veirufræðideild Landspítalans hafa verið staðfest 73 smit, eða um 15 prósent af innsendum sýnum. Sú prósentutala hefur hækkað. Hún var 10 prósent í gær.

Þjóðir heims verða að taka höndum saman til að koma í veg fyrir COVID-19 sjúkdómurinn berist til fátækustu ríkja heims. Ella er hætta á að hann verði milljónum manna að bana, segir framkvæmdastjóri Sameinuðu þjóðanna. Fleiri hafa látist af völdum veirunnar á Ítalíu en á meginlandi Kína.

Ekki sér fyrir endann á verkfalli Eflingar í fimm sveitarfélögum. Sex skólar eru enn lokaðir. Klögumálin ganga á víxl, og deilendur virðast ekki reiðubúnir að slaka á kröfum sínum.

Þrítugur karlmaður, sem handtekinn var í nótt, grunaður um aðild að eldsvoðanum á skemmtistaðnum Pablo Discobar í miðborg Reykjavík, er sá hinn sami og olli stórhættu í síðustu viku, þegar hann stal steypubíl í miðborginni og ók honum meðal annars á móti umferð.

Prófessor í sagnfræði segir ekki miklar líkur að forseti Íslands fái mótframboð. Þær séu líklega enn minni vegna ástandsins sem nú ríkir. Kjörtímabili forsetans lýkur í lok júní. Arnar Páll Hauksson talar við Guðmund Hálfdánarson.

Lagaprófessor segir að ekki sé hægt að útiloka, ef til forsetakosninga kemur, að þeim verði frestað vegna COVID-ástandsins. Þó að ákvæði séu um tímasetningu forsetakosninga í stjórnarskrá er mögulegt að fresta þeim á grundvelli óskráðra neyðarréttarsjónarmiða. Arnar Páll Hauksson talar við Björgu Thorarensen.

COVID-19 tilfellum fjölgar nú hratt í Bretlandi, staðfest smit nú rúmlega 2600, 103 látnir. Breska stjórnin hefur verið gagnrýnd fyrir að hafa verið alltof værukær. Nú lofar stjórnin miklum efnahagsaðgerðum en gagnrýnin í þinginu í dag kom ekki frá stjórnarandstöðunni heldur þingmönnum stjórnarflokksins, Íhaldsflokksins. Sigrún Davíðsdóttir segir frá.

Það að hlutfallslega mörg sýni eru tekin hér á landi til að skima fyrir COVID-19 gæti útskýrt talsverða fjölgun skráðra smita á Íslandi. 250 manns hafa nú greinst með veiruna.

Fimm af sjö hótelum Centerhótela verður lokað næstu daga. Framkvæmdastjórinn segist binda vonir við aðgerðir stjórnvalda.

Evrópusambandið sakar Rússa um að dreifa falsfréttum um COVID-19 faraldurinn til að grafa undan trausti á heilbrigðisyfirvöldum á Vesturlöndum.

Þó að gengi krónunnar hafi lækkað um 10% frá áramótum er ekki búist við að verðbólga aukist mikið. Þetta segir seðlabankastjóri.

Það er engin vestanganga sjáanleg, segir leiðangursstjóri í loðnuleit sem nú stendur yfir. En auknar vísbendingar séu um hrygningu loðnunnar úti fyrir Norðurlandi.

Daði Freyr segist vonsvikinn yfir því að Söngvakeppni evrópskra sjónvarpsstöðva hafi verið aflýst.

Aðalhagfræðingur Seðlabankans segir ljóst að það verður mikið áfall í efnahagsmálum hér á landi. Aðgerðir Seðlabankans sem kynntar voru í dag miði að því að milda þetta áfall. Hann segir að miðað við þróunina í Kína megi búast við að hér verði stórt högg á þjóðarbúið á fyrri hluta ársins. Arnar Páll Hauksson talar við Þórarinn G. Pétursson.

Sagan kennir okkur að það er auðvelt að loka landamærum en það getur verið þrautin þyngri að opna þau aftur síðar. Þetta segir stjórnmálafræðiprófessor. COVID-19 sé hnattræn vá sem krefst hnattrænnar samvinnu en viðbrögð margra ríkja litist af þjóðerniskennd. Létt þjóðernisstef komi líka fram í ræðum stjórnmálamanna sem stundum reyni að þjappa fólki saman með því að upphefja meint þjóðareinkenni. Arnhildur Hálfdánardóttir tala við Eirík Bergmann.

Ólíklegt er talið að ástralskur ferðamaður, sem lést á Heilbrigðisstofnun Norðurlands á Húsavík í gær, hafi dáið úr COVID-19 sjúkdómnum, þó að komið hafi í ljós að bæði hann og kona hans voru smituð af veirunni. Þetta sagði Þórólfur Guðnason, sóttvarnalæknir á upplýsingafundi Almannavarna. Alma Ómarsdóttir segir frá.

Loftbrú verður næstu daga frá Kanaríeyjum til Íslands. Þar er útgöngubann og verið að loka hótelum. Á þriðja þúsund Íslendingar, hið minnsta, eru á eyjunum. Dagný Hulda Erlendsdóttir ræddi við Þráin Vigfússon framkvæmdastjóra VITA.

Utanríkisráðherra lýsti vonbrigðum sínum vegna ferðabanns yfirvalda í Bandaríkjunum á símafundi með utanríkisráðherra Bandaríkjanna í dag. Jóhann Bjarni Kolbeinsson sagði frá.

Prestar rétttrúnaðarkirkjunnar í Tbilisi, höfuðborg Georgíu hafa gengið til liðs við heilbrigðisyfirvöld í baráttu við veiruna og stökktu vígðu vatni á allt sem fyrir þeim varð. Jóhann Hlíðar Harðarson segir frá.

----

Í síðustu viku og í dag mótmæltu íslensk stjórnvöld aðgerðum bandarískra stjórnvalda sem settu þá komu bann á ferðamenn frá Schengen ríkjum. Í gær var greint frá tilmælum framkvæmdastjórnar Evrópusambandsins um að loka ytri landamærum Schengensvæðisins og þeim tilmælum var líka mótmælt af íslenskum stjórnvöldum. Danir og Norðmenn hafa nánast lokað landmærum sínum og það hafa fleiri Evrópuþjóðir gert. Anna Kristín Jónsdóttir ræðir um landamæralokanir við Sigríði Á. Andersen, Sjálfstæðisflokki, sem er formaður utanríkismálanefndar Alþingis og Loga Einarsson formann Samfylkingarinnar sem líka situr í utanríkismálanefnd.

Misskilnings hefur gætt bæði á Íslandi og í Bretlandi um hvort stjórnvöld vilji að meginþorri fólks sýkist af COVID-19. Erfitt er að segja til um hvort það sé gott fyrir samfélagið að ungt og hraust fólk veikist. Arnhildur Hálfdánardóttir tók saman. Heyrist í Boris Johnson, forsætisráðherra Breta og Patrick Wallance, vísindaráðgjafa bresku stjórnarinnar og Þórólfi Guðnasyni sóttvarnarlækni.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar: Björg Guðlaugsdóttir.

Bogi Nils Bogason, forstjóri Icelandair segist sannfærður um að félagið geti staðið af sér það áfall sem útbreiðsla COVID-19 veirunnar hefur í för með sér. Flugfélög um allan heim hafa boðað fordæmalausan samdrátt í flugi. Miklar lækkanir urðu í kauphöllum í dag. Magnús Geir Eyjólfsson ræddi við Boga.

12 ný kórónaveirusmit hafa greinst á Íslandi í dag. Meira en tvö þúsund eru í sóttkví og þrír á sjúkrahúsi, þar af tveir á gjörgæslu. Alma Ómarsdóttir sagði frá og heyrist í Þórólfi Guðnasyni, sóttvarnalækni af upplýsingafundi Almannavarna.

Hættustig er í gildi vegna snjóflóðahættu á Patreksfirði og Flateyri og þar hafa nokkur íbúðarhús verið rýmd. Óvissustig er í gildi á Vestfjörðum, þar hefur mikið snjóað og í nótt bætir enn í. Appelsínugul viðvörun er í gildi fram á kvöld á morgun vegna norðaustan stórhríðar. Elsa María Guðlaugs Drífudóttir segir frá

Ursula von der Leyen, forseti framkvæmdastjórnar Evrópusambandsins, Ursula von der Leyen, leggur til bann við ónauðsynlegum ferðum inn á Schengensvæðið í þrjátíu daga. Stefnan er að bannið nái einnig til ríkja sem eiga aðild að Schengen en ekki ESB, eins og Íslands. Dagný Hulda Erlendsdóttir tók saman.

Yfirvöld í Týról hunsuðu viðvaranir frá Íslandi um að COVID-19 veiran væri þar á sveimi. Hefðu yfirvöld brugðist við af meiri festu hefði verið hægt að hægja á útbreiðslu veirunnar enn frekar í Evrópu.

-----

Áhrifa COVID-19 faraldursins í atvinnulífinu gæti víða, óveðursblikur á lofti víða um heim. Drífa Snædal, forseti Alþýðusambandsins hefur vakið athygli á því að aðstæður fólks til að takast á við sóttkví og einangrun eru misjafnar og þá þurfi að gæta þess að kostnaður við heimavinnu lendi ekki á launþegum. Anna Kristín Jónsdóttir ræddi við Drífu.

Fastlega má búast við einhverjum kjaraviðræðum verði frestað vegna COVID-19. Fækkað hefur verið í samninganefndum og fjarfundabúnaður er notaður á sumum fundum. Arnar Páll Hauksson sagði frá.

Jónína Einarsdóttir leikstjóri á Stakkaborg, segir að börnin eigi eftir að verða breytinga vör í fyrramálið. Þeim er skipt upp í hópa og bara helmingurinn í skólanum í einu og tíminn styttur. , vináttubangsarnir hafa til dæmis verið settir í geymslu og stór hluti leikfanga fjarlægður. Arnhildur Hálfdánardóttir talar við Jónínu.

Umsjón: Anna Kristín Jónsdóttir. Tæknimaður: Ragnar Gunnarsson. Stjórn útsendingar: Björg Guðlaugsdóttir.

134 hafa nú verið greind með COVID-19 veiruna hér á landi. Rúmlega ellefu hundruð eru í sóttkví og um 1230 sýni hafa verið rannsökuð.

Skólastjórnendur leik- og grunnskóla og forsvarsmenn sveitarfélaga nýta helgina og mánudaginn til að skipuleggja kennslu næstu vikna. Enn er á huldu hvernig kennslan verður útfærð.

Atvinnurekendur fá 21 þúsund krónur á dag fyrir hvern launamann sem er í sóttkví og getur ekki sinnt störfum sínum þaðan, samkvæmt frumvarpi félagsmálaráðherra sem hefur verið samþykkt í ríkisstjórn.

Arnar Páll Hauksson talaði við Drífu Snædal.

Netverslun á matvörum og heimsending hefur fjórfaldast síðustu daga samanborið við sama tíma í fyrra. Kristján Sigurjónsson talai við Breka Karlsson og Guðmund Magnason.

Rauða viðvörunin var góð æfing, þetta segir forstjóri Advania. Starfsmenn fyrirtækisins eiga auðvelt með að vinna að heiman en fyrirtækið hefur nú í nógu að snúast við að hjálpa öðrum fyrirtækjum að setja upp heimatengingar fyrir starfsfólk. Arnhildur Hálfdánardóttir sagði frá og talaði við Ægi Má Þórisson.

Karlmaður á sjötugsaldri og kona um sextugt eru á sjúkrahúsi vegna COVID-19 smits. Hvorugt er á gjörgæslu.

Stjórnvöld í Noregi og í Danmörku hafa látið loka öllum skólum næsta hálfa mánuðinn. Norsku konungshjónin eru í sóttkví.

Fjármálaráðherra sagði á Alþingi í dag að þó að skellurinn vegna veirunnar verði tímabundið ástand geti enginn sagt hvað sá tími verði langur.

Bóndi í Svarfaðardal sem fær ekki að hafa bleikjueldi heima hjá sér án rekstrarleyfis ætlar að kæra sjávarútvegs- og landbúnaðarráðherra.

Veðurstofan varar við suðaustan hríðarveðri á Suðurlandi í kvöld og fram undir miðnætti, með talsverðri snjókomu.

Efasemdir um kosti hnattvæðingarinnar og hvort hún hafi hugsanlega gengið of langt hafa fengið byr undir báða vængi með útbreiðslu COVID-19 veirunnar.

***

Í síðari hluta Spegilsins var rætt við Má Kristjánsson, smitsjúkdómalækni og Bjarnheiði Hallsdóttur, formann Samtaka ferðaþjónustunnar um heimsfaraldurinn.

Þá fjallaði Sigrún Davíðsdóttir um þá sem hafa efasemdir um kosti hnattvæðingarinnar og hafa fengið byr undir báða vængi með útbreiðslu veirunnar.

Alþjóðaheilbrigðisstofnunin segir að útbreiðsla kórónaveirunnar sé orðin að heimsfaraldri.

Einn liggur veikur á sjúkrahúsi hérlendis vegna COVID-19 veirusmits. Hann er sá þriðji sem lagður er inn á sjúkrahús eftir smit en sá fyrsti sem er fluttur á spítala beinlínis vegna veikinda af völdum veirunnar.

Ein hópuppsögn hefur borist Vinnumálastofnun vegna útbreiðslu veirunnar.

Gul viðvörun vegna hríðar er í gildi á landinu norðan- og austanverðu en vegna vinds suðaustan til. Vetrarfærð er í öllum landshlutum.

Ekki náðust samningar í kjaradeilu Eflingar og sveitarfélaganna í dag. Verkfall félagsmanna Eflingar í nokkrum sveitarfélögum, aðallega á höfuðborgarsvæðinu, heldur því áfram.

Bandaríski kvikmyndaframleiðandinn Harvey Weinstein var í dag dæmdur í 23 ára fangelsi fyrir nauðgun og annað kynferðisofbeldi.

Seðlabankastjóri segir að það jákvæða við þrengingarnar sem nú steðja að vegna COVID-19 sé að þær verði tímabundnar. Bankinn ákvað í morgun að lækka stýrivexti og bindisskyldu bankanna til að bregðast við ástandinu. Á fundi Seðlabankans í morgun kom fram að efnahagsspá bankans sem kynnt var í febrúar er úrelt. En

getur Ásgeir Jónssson seðlabankastjóri svarað því hverjar efnahagshorfurnar eru. Er ástandið núna mjög sérstakt í efnahagslegu tilliti. Arnar Páll Hauksson talar við Ásgeir Jónsson og Henný Hinz.

Vaxtalækkun Englandsbanka í morgun gaf tóninn fyrir fjárlög til að bregðast við veirufaraldrinum, sem Rishi Sunak fjármálaráðherra Breta lagði fram í dag. Stóra spurningin var hversu mikið fjármálaráðherra myndi fjarlægjast áratugs niðurskurðarstefnu Íhaldsflokksins. Sigrún Davíðsdóttir segir frá.