Framkvæmdastjóri Samtaka ferðaþjónustunnar segir að tjón fyrritækja af völdum verkfalla, sem boðuð hafa verið, geti hlaupið á hundruðum milljóna á dag. Hann segir að aðgerðirnar séu árás á ferðaþjónustuna og allt samfélagið.

Verkfallsaðgerðir VR og Eflingar ná til 2.350 félagsmanna, sem greiða atkvæði um sex verkföll á tugum vinnustaða. Einnig verða greidd atkvæði um fjölmargar aðgerðir sem Efling boðar að auki.

Það felst í því mikil eyðilegging, þegar verk eftir myndlistarmenn eru fölsuð. Þetta segir formaður Sambands íslenskra myndlistarmanna.

Sjávarútvegsráðherra brýtur lög ef hann úthlutar ekki makrílkvóta eftir reglugerð, en ef hann fer að lögum gæti hann skapað ríkinu skaðabótaskyldu.

Forseti Alþingis segir það mikil vonbrigði að harkalegt bakslag hafi komið í traust til Alþingis

VR og Efling boða sex staðbundin verkföll sem munu bitna á 40 hótelum og öllum hópbifreiðafyrirtækjum á félagsssvæði félaganna tveggja. Efling boðar frekari aðgerðir sem mun standa frá 18. mars til 30. apríl. Áætlun félaganna þýðir að einhvers konar aðgerðir verða alla daga frá 18. mars fram að 1. maí en þá á að hefjast útímabundin vinnustöðvun. Arnar Páll Hauksson segir frá og talar við Jóhannes Þór Skúlason, framkvæmdastjóra Samtaka ferðaþjónustunnar.

Ungt fólk hefur áhyggjur af loftslags- og umhverfismálum og vill að gripið verði til ráðstafana sem duga til framtíðar. Um hinn vestræna heim hefur myndast hreyfing ungs fólks, skólafólks sem vill aðgerðir strax. Segja má að málflutningur hinnar 16 ára Gretu Thunberg frá Svíþjóð á Loftslagsráðstefnunni í Katowice í Póllandi í desember eigi stóran þátt í þessari bylgju. Dágóður hópur skólakrakka á öllum aldri safnaðist saman í annað sinn á Austurvelli í Reykjavík í dag og skoraði á íslensk stjórnvöld að taka til hendinni. Spegillinn settist niður með þeim Gunnhildi Fríðu Hallgrímsdóttur framhaldsskólanema, Sigurði Thorlacius frá ungum umhverfissinnum og Elsu Maríu Guðlaugs Drífudóttur háskólanema og ræddi við þau um framtíðarsýn ungs fólks.

Það eru hliðstæðar aðstæður á fasteignamarkaðnum víða um heim, alltof mikið framboð af lúxusíbúðum í stórborgum. Það græðir enginn á hálftómum draugaturnum, sama hvort er í miðborg London eða Reykjavíkur. Sigrún Dvíðsdóttir segir frá.

Umsjón Arnar Páll Hauksson.

Tæknimaður Davíð Berndsen.

Fjármálaráðuneytið telur að stjórnir Landsbankans og Íslandsbanka eigi tafarlaust að endurskoða launaákvarðanir sínar.

Óttast er að fjöldi nýlegra falsana á málverkum eftir Stórval sé kominn í umferð. Komið var í veg fyrir uppboð á tveimur slíkum verkum á mánudag. Uppboðshaldari segir að svona mál geti eyðilagt orðspor listamanna.

Ríkissaksóknari í Ísrael hyggst ákæra forsætisráðherra landsins fyrir mútur, fjársvik og umboðssvik. Mál á hendur honum hafa verið til rannsóknar síðastliðin þrjú ár. Einn og hálfur mánuður er til þingkosninga í Ísrael.

Lengri fréttapistlar:

Þegar foreldrar sjá niðurstöður mælinga, raunveruleikann sem blasir við börnum þeirra í framtíðinni, þá átta þeir sig. Þetta segir talmeinafræðingur sem unnið hefur með börnum í leikskóla í Breiðholti. Börnin stóðu áður illa þegar kom að læsi og málskilningi. Nú, virðist það vera að breytast. Arnhildur Hálfdánardóttir ræðir við börn, starfsfólk og stjórnendur í Leikskólanum Ösp.

Á Íslandi hafa verið drukknar yfir 346 milljónir lítra af bjór frá því að sala á honum var leyfð. Á morgun eru 30 ár frá því að bjórbannið var afnumið. Arnar Páll Hauksson segir frá.

Samherji er ekki að undirbúa skaðabótamál gegn Seðlabankanum, segir forstjóri fyrirtækisins. Greinargerð bankaráðs sýni þó að menn hafi verið hafðir fyrir rangri sök og hann vill að stjórnendum Seðlabankans verði vikið frá störfum.

Hann er svikari, rasisti og svindlari sem vildi ekki verða forseti. Þetta sagði Michael Cohen, fyrrum lögmaður Donalds Trump, um forsetann á Bandaríkjaþingi í dag.

Formaður Eflingar segir að það sé túlkunaratriði hvort fimmtungur félagsmanna þurfi að kjósa til að atkvæðagreiðslan um verkfallið 8. mars sé lögleg.

Sjávarútvegsráðherra hefur skipað starfshóp sem á að bregðast við svartri skýrslu Ríkisendurskoðunar um Fiskistofu.

Lögreglan í Noregi hefur fundið ummerki um að Önnu-Elísabetu Hagen hafi verið rænt af heimili sínu í október.

George Pell var kreddufastur og harðsnúinn baráttumaður kaþólsku kirkjunnar sem barðist hatrammlega gegn samkynhneigð, fóstureyðingum, skilnaði, getnaðarvörnum og fyrir skírlífi presta. Sjálfur hefur hann nú verið sakfelldur fyrir kynferðisbrot gegn tveimur altarisdrengjum á tíunda áratugnum og gæti átt yfir höfði sér allt að 50 ára fangelsi. Pell er fjármálastjóri Páfagarðs og sem slíkur þriðji maður í virðingarröð kaþólsku kirkjunnar. Pálmi Jónasson segir frá.

Lög um rafrettur taka gildi á föstudaginn. Kaupmenn eru ósáttir við greiðslur til Neytendastofu og þann aðlögunartíma sem þeim var gefinn. Í gær var óskað eftir að hann yrði framlengdur um hálft ár. Arnar Páll Hauksson segir frá og talar við Svövu Gerði Ingimundardóttur og Hauk Inga Jónsson .

Heimamenn í litlu samfélagi í Suður-Afríku höfðu betur gegn risastóru áströlsku námufyrirtæki fyrir helgi. Hæstiréttur landsins úrskurðaði á fimmtudag að ekki megi ráðstafa landi til námuvinnslu án samráðs við heimamenn. Pálmi Jónasson sagði frá.

Spegillinn 26.02.2019

Umsjón: Pálmi Jónasson

Um hundrað manns hafa leitað í dag við Ölfusá að karlmanni sem talið er að hafi ekið í ána um tíuleytið í gærkvöld.

Ofsaveðrið er að mestu gengið niður. Gul viðvörun er í gildi á Suðausturlandi, Austurlandi og Austfjörðum.

Breskir þingmenn gætu fengið tækifæri til að greiða atkvæði um stuttan frest á útgöngu Bretlands úr Evrópusambandinu. Þetta sagði Theresa May, forsætisráðherra Bretlands, í dag.

Brottrekstur Heiðveigar Maríu Einarsdóttur úr Sjómannafélagi Íslands var óheimill og félagið þarf að greiða eina og hálfa milljón króna í sekt í ríkissjóð. Þetta er niðurstaða Félagsdóms.

Bankaráð Seðlabanka Íslands telur að Seðlabankanum hafi ekki tekist að sýna fram á nauðsyn þess að leggja stjórnvaldssekt á Samherja.

Lengri umfjallanir:

Í dag tilkynnti Theresa May forsætisráðherra hver yrðu næstu skref stjórnarinnar í útgöngu Breta úr ESB: atkvæðagreiðsla í mars um útgöngusamning úr ESB en líka möguleiki á frestun útgöngu. Pálmi Jónasson talar við Sigrúnu Davíðsdóttur um málið.

Arnhildur Hálfdánardóttir fjallar um fjölmenningu og fjölmenningardaginn. Ræðir við Sögu Stephensen, verkefnastjóri og ráðgjafi vegna fjölmenningarlegs leikskólastarfs, hjá Reykjavíkurborg.

VR og Efling stefna að sex staðbundnum verkföllum á næstunni sem gætu staðið fram yfir miðjan apríl en þá tæki við ótímabundið verkfall. Hvert verkfall stæði yfir í tvo til fjóra daga. Samanlagt er um að ræða 18 verkfallsdaga.

Spáð er ofsaveðri á austurhelmingi landsins í nótt og á morgun. Varað er við aurskriðum og það verður ekkert ferðaveður á þessum slóðum.

Evrópusambandið vísar því algerlega á bug að beita hervaldi til þess að koma forseta Venesúela frá völdum eins og leiðtogi stjórnarandstöðunnar hefur biðlað til þeirra um. Bandaríkin virðast nokkuð einangruð í þeirri afstöðu að hernaðaríhlutun komi til greina.

Almenna leigufélagið ætlar að draga til baka fyrirhugaðar hækkanir á leigu sem áttu að koma til framkvæmda á næstu þremur mánuðum.

Bann við því að auglýsa ruslfæði nærri almenningssamgöngum í Lundúnum tók gildi í dag.

Staðaní kjaramálum. Arnar Páll Hauksson talar við Ragnar Ingólfsson, formann VR.

Hvað borðaði afi þegar hann var lítill? Var hann oft svangur eða gat hann étið á sig gat? Það er aldrei að vita nema forvitin barnabörn spyrji afa einhvern tímann að þessu. Vitneskja um lífshætti eldri kynslóða auðgar líf þeirra yngri en færri átta sig á því að það hvað afi borðaði gæti haft neikvæð áhrif á líf og heilsu barnabarnanna, nánar tekið afastrákanna hans. Þetta sýna tvær sænskar rannsóknir, sú fyrri var birt árið 2002 og vakti mikla athygli. Arnahildur Hálfdánardóttir.

Umsjón: Arnhildur Hálfdánardóttir

Tæknimaður: Magnús Þorsteinn Magnússon

Fjármálaráðherra, segir kjaradeiluna komna í hnút og ljóst að þær tillögur sem stjórnvöld hafi lagt fram skipti í raun engu máli.

Fyrirhugaðar verkfallsaðgerðir munu beinast að allt að 25 hótelum og stærstu rútufyrirtækjunum. Endanleg aðgerðaráætlun verður kynnt og gerð opinber eftir helgi. Um 7 milljarðar eru í verkfallssjóðum verkalýðsfélaganna sem slitu í gær viðræðum við atvinnurekendur.

Formaður VR, segir að niðurstaðan af fundi hans með stjórnendum Almenna leigufélagsins sé að hittast aftur á mánudaginn. Fundur þeirra síðdegis í dag vegna hækkunar á leiguverði hafi verið góður og upplýsandi.

Forseti Venesúela, hefur lokað landamærum að nágrannaríkjum og ætlar að ekki að hleypa neyðaraðstoð til landsins. Baráttan um hylli almennings stendur nú sem hæst og bæði forsetinn og leiðtogi stjórnarandstöðunnar hafa blásið til stórtónleika við landamærin í kvöld.

Formaður Veiðifélags Mývants segist halda bjartsýnn til veiða að þessu sinni, en vetrarveiðin í vatninu hefst eftir viku. Skiptar skoðanir eru um hvort leyfa eigi aukna veiði í Mývatni.

Kostnaðurinn við að viðhalda mengunarvarnabúnaði í dísilbílum er óheyrilega mikill og ætti að vera niðurgreiddur af ríkinu. Þetta er mat manns sem hefur aðstoðað bíleigendur við að aftengja sótagnasíur í bifreiðum sínum. Félag íslenskra bíleigenda heldur því fram að fyrirtæki hans stundi ólöglega starfsemi í skjóli takmarkaðs eftirlits.

Lengri umfjallanir:

Kostnaðurinn við að viðhalda mengunarvarnabúnaði í dísilbílum er óheyrilega mikill, ósanngjarn og ætti að vera niðurgreiddur af ríkinu. Þetta er mat Gísla Rúnars Kristinssonar, eiganda Bílaforritunar ehf, fyrirtækis sem hefur aðstoðað fjölmarga dísilbíleigendur við að aftengja sótagnasíur og annan mengunarvarnabúnað í bifreiðum sínum. Félag íslenskra bíleigenda heldur því fram að fyrirtæki Gísla og önnur svipuð stundi ólöglega starfsemi í skjóli takmarkaðs eftirlits. Forsvarsmenn fyrirtækjanna vísa því á bug, þau aftengi nefnilega bara mengunarvarnarbúnað bílanna aðrir sjái um að fjarlægja hann. Arnhildur Hálfdánardóttir tók saman.

Um 7 milljarðar króna eru í verkfallssjóðum félaganna sem slitu í gær viðræðum við atvinnurekendur og hafa ákveðið að efna til staðbundinna verkfalla. Verkfallsaðgerðir munu beinast að allt að 25 hótelum á höfuðborgarsvæðinu og stærstu rútufyrirtækjunum. Endanleg aðgerðaráætlun verður kynnt eftir helgina. Arnar Páll Hauksson sagði frá.

Undirbúningur er hafinn að boðun staðbundinna verkfalla eftir að Efling, VR og Verkalýðsfélög Akraness og Grindarvíkur slitu samningaviðræðum við Samtök atvinnulífsins. Aðgerðaáætlun um fyrirhuguð verkföll verður kynnt í verkalýðsfélögunum á morgun. Formaður VR segir að tilboð atvinnurekenda feli í sér kjararýrnun og það sé svívirða að leggja slíkt tilboð fram.

Atvinnurekendur lögðu ekki fram nýtt tilboð á sáttafundinum í dag. Formaður Samtaka atvinnulífsins segir að tilboðið sem samtökin lögðu fram markist af því heildarsvigrúmi sem sé til skiptanna á íslenskum vinnumarkaði.

Starfsgreinasambandið ákvað í dag að vísa kjaradeilunni við SA til Ríkissáttasemjara.

Borgarritari segir að undanfarna mánuði hafa fáeinir borgarfulltrúar ítrekað vænt starfsfólk Reykjavíkurborgar um óheiðarleika.

Efnt verður til átaks til að efla heilsu fólks á vinnustöðum. Landlæknir, Vinnueftirlitið og Virk - starfsendurhæfing skrifuðu undir samkomulag þess efnis í dag.

Nú er ljóst að undirbúningur að boðun verkfalla er hafinn eftir að verkalýðsfélögin Efling, VR og verkalýðsfélögin á Akranesi og í Grindavík slitu samningaviðræðum við Samtök atvinnulífsins í dag. Stjórnir og samninganefndir félaganna koma saman á morgun þar sem ákveðið verður hvernig staðið verður að verkfallsboðun. Stefnt er að staðbundnum verkföllum. Aðgerðaráætlun er tilbúin sem lögð verður fyrir félagsfundi á morgun. Atvinnurekendur lögðu ekki fram nýtt tilboð á sáttafundinum í dag. Halldór Benjamín Þorbergsson, framkvæmdastjóri SA, segir að tilboðið sem samtökin lögðu fram miðist við heildarsvigrúmið á íslenskum vinnumarkaði. Arnar Páll segir frá og talar við Halldór Benjamín Þorbergsson og Ragnar Þór Ingólfsson.

Vinnumarkaðsfræðingur segir að staðan á vinnumarkaði sé snúin og flókin. Mörg ár sé síðan staðan hafi verið svo flókin í kjarasamningum á almenna vinnumarkaðinum. Kristín Sigurðardóttir talar við Gylfa Dalmann.

Það eru erfiðir tímar í flugrekstri, tvö félög nýlega gjaldþrota og fleiri talin standa tæpt, til dæmis Wow og Norwegian. Gamalgrónu flugfélögin hafa átt erfitt með að laga sig að breyttum ferðaháttum og nýju flugfélögunum tekst að bjóða ódýr fargjöld en eru oft illa fjármögnuð og geta því illa brugðist við kostnaðarhækkunum eða færri farþegum. Og enn er þess beðið að flugfélagið Wow ljúki samningum við Indigo Partners. Sigrún Davíðsdóttir segir frá.

Umsjón Arnar Páll Hauksson.

Tæknimaður Mark Eldred.

Starfsgreinasambandið og SA funduðu í dag og er annar fundur boðaður á morgun.

Varaformaður Viðreisnar segir að mistök ríkisstjórnarinnar í útspili hennar í gær séu mistök í væntingastjórnun, það sé aldrei hlutverk ríkisstjórnar að leiða kjaraviðræður. Formaður Flokks fólksins segir að nú eigi ekki bara að skattleggja fátækt heldur líka sára fátækt.

Óánægja er meðal þingmanna Vinstri grænna með þá ákvörðun sjávarútvegsráðherra, að leyfa hvalveiðar. Rósa Björk Brynjólfsdóttir hefur formlega farið fram á að sjávarútvegsráðherra mæti á fund umhverfis- og samgöngunefndar Alþingis til að ræða ákvörðunina.

Umhverfisstofnun hefur kynnt áform um að friðlýsa Dranga á Ströndum sem óbyggð víðerni. Áformin eru kynnt í samstarfi við landeigendur og sveitarfélagið Árneshrepp.

Lengri fréttapistlar:

Verkalýðsfélögin sem hóta að slíta viðræðum við Samtök atvinnulífsins eru með tilbúna aðgerðaáætlun ef til verkfalla kemur. Gert er ráð fyrir staðbundnum verkföllum og að þeir sem fara í verkfall haldi fullum launum. Arnar Páll Hauksson ræðir við Ragnar Þór Ingólfsson og Halldór Benjamín Þorbergsson.

Það þarf þorp til að ala upp barn, en það þarf tvö þorp til að ala upp tvítyngt barn. Þetta segir brúarsmiður hjá Miðju máls og læsis og filippseyskur móðurmálskennari. Tæplega fimmtungur barna í leikskólum Reykjavíkur talar tvö eða fleiri tungumál. Brúarsmiðir veita kennurum og foreldrum þessara barna ráðgjöf. Arnhildur Hálfdánardóttir ræðir við Önnu Mariu Milosz, móður tvítyngds barns og Kriselle Lou Suson Jónsdóttur og Magdalenu Elísabetu Andrésdóttur, brúarsmiði hjá Miðju máls og læsis.

Íþróttaþvætti er nýtt hugtak yfir það þegar vafasamir karakterar vilja baða sig í ljóma íþrótta og hvítþvo laskað orðspor. Pálmi Jónasson.

Umsjón: Kristján Sigurjónsson

Tæknimaður: Davíð Berndsen

Skattbyrði lágtekjufólks lækkar um tvö prósentustig og barnabætur hækka samkvæmt tillögum sem fjármálaráðherra kynnti í dag.

Alþýðusambandið hafnar skattatillögum ríkisstjórnarinnar. Þær valdi vonbrigðum og nægi ekki til að liðka fyrir kjarasamningum. Flest bendir til þess að undirbúningur verkfalla hefjist á næstu dögum.

Katrín Jakobsdóttir forsætisráðherra sagði á Alþingi í dag að hún hefði viljað að vinna við heildarendurskoðun stjórnarskrárinnar hefði gengið hraðar.

Ný skýrsla Amnesty International um málefni intersex fólks hér á landi er gagnrýnin á stjórnvöld og heilbrigðiskerfið. Fólk mæti hindrunum í leit að fullnægjandi heilbrigðisþjónustu og það stofni líkamlegri og andlegri heilsu í hættu.

Talið er að allt að tólf skíðamenn hafi lent í snjóflóði sem féll í Sviss í dag.

Íslenskur maður sem reyndist smitaður af mislingum leitaði á heilsugæsluna í Neskaupstað í síðustu viku vegna veikinda. Maðurinn var sendur með sjúkraflugi til Reykjavíkur, til að tryggja að hann fengi viðeigandi meðferð, en einnig til að tryggja öryggi annarra. Hann var settur í einangrun á Landspítalanum og er nú á batavegi.

Spænska ríkisstjórnin hefur veitt fjölskyldu Franciscos Francos, fyrrverandi einræðisherra Spánar, tveggja vikna frest til þess að ákveða hvar hann skuli hvíla eftir að jarðneskar hans verða fjarlægðar úr minningargrafreit um þá hermenn sem létust í spænska borgarastríðinu.

Spáð er leiðindaveðri víða um land í nótt og í fyrramálið.

Lengri umfjallanir:

Eftir fund ríkisstjórnarinnar í dag bendir flest til þess að undirbúningur verkfalla hefjist á næstu dögum. Formenn verkalýðsfélaga innan Alþýðusambandins telja tillögur ríkisstjórnarinnar í skattamálum vonbrigði og að þær verði ekki til þess að liðka fyrir lausn kjarasamninga. Vilhjálmur Birgisson, formaður Verkalýðsfélags Akraness og 1. forseti ASÍ, gekk af fundi ríkisstjórnarinnar í dag vegna þess að hann er ósáttur við framlag hennar í skattamálum.

Eftir að Samtök atvinnulífsins höfnuðu gagntilboði Eflingar, VR og Verkalýðsfélaganna á Akranesi og í Grindavík voru bundnar vonir við útspil ríkisstjórnarinnar til að liðka fyrir samningum. Gagntilboðið hljóðaði upp á að mánaðarlaun hækkuðu um 37.500 krónur á mánuði árlega í þrjú ár og að á síðasta samningsárinu yrðu lágmarklaun eða tekjutryggingin komin í 400 þúsund krónur. Vilhjálmur segir að staðan í kjaraviðræðum hafi verið alvarleg en nú séu hún grafalvarleg. Sólveig Anna Jónsdóttir, formaður Eflingar, segir að hún hafi ekki gert sé miklar

Umsjón: Kristján Sigurjónsson

Tæknimaður: Davíð Berndsen

Fjögurra milljóna króna mánaðarlaun eru ekki hófleg og ekki í neinum veruleika sem við þekkjum. Þetta sagði Katrín Jakobsdóttir forsætisráðherra um laun bankastjóra á Alþingi í dag.

Kúabændur kusu með yfirgnæfandi meirihluta að viðhalda kvótakerfinu í stað þess að gefa mjólkuframleiðslu frjálsa. Atkvæðagreiðslan, sem er hluti af endurskoðun búvörusamnings, hefur staðið í viku og lauk á hádegi í dag. Aðeins um 10% þeirra sem greiddu atkvæði vilja afnema framleiðslustýringu. Þetta þýðir að breyta þarf hluta búvörusamnings. Arnar Árnason, formaður Landssambands kúabænda, fagnar þessari niðurstöðu.

Fjölskylda Jóns Þrastar Jónssonar sem hvarf í Dyflinni á Írlandi fyrir rúmri viku dreifir myndum af Jóni ytra og biður fólk um að gefa sig fram hafi það orðið vart við ferðir hans. Lögreglan á Írlandi rannsakar málið enn og safnar upplýsingum frá almenningi. Írska lögreglan segir í skriflegu svari við fyrirspurn fréttastofu að rannsóknin á hvarfi Jóns sé enn í gangi.

Lítill hluti mála sem falla undir stafrænt kynferðisofbeldi kemur til kasta lögreglu og ákæruvalds þrátt fyrir fjölda slíkra brota, segir varahéraðssaksóknari. Þau mál sem þangað rati séu einungis toppurinn á ísjakanum.

VR hótar því að taka 4,2 milljarða úr eignastýringu hjá Kviku banka. Ástæðan er sú að Almenna leigufélagið, krefur leigjendur sína um tugþúsundum hærri leigu gegn þeim afarkostum að verða annars hent á götuna. Kvika samdi nýlega um kaup á GAMMA sem stýrir fasteignasjóði sem á Almenna leigufélagið.

Tzipi Livni, fyrrverandi utanríkis- og dómsmálaráðherra Ísraels, tilkynnti óvænt í dag að hún væri hætt í stjórnmálum. Hatuna flokkur hennar verður heldur ekki í framboði í þingkosningum í apríl.

Byggingaiðnaður og landbúnaður bera ábyrgð á nær helmingi allrar losunar gróðurhúsalofttegunda í heiminum. Þetta segir Bill Gates, stofnandi Microsoft-tölvurisans.

Lengri Umfjöllun:

Sjö þingmenn Verkamannaflokksins hafa sagt sig úr flokknum. Ástæðan er óánægja með leiðtogann Jeremy Corbyn og harða vinstristefnu hans, í viðbót við tvískinning hans varðandi útgöngu Breta úr Evrópusambandinu. Klofningsflokkar í Bretlandi hafa hingað til ekki átt langa lífdaga svo ef að líkum lætur gæti þingmönnunum reynst erfitt að láta til sín taka. Sigrún Davíðsdóttir segir frá.

Friðun eða ekki friðun Víkurkirkjugarðs eða Fógetagarðsins, þar liggur efinn. Menntamálaráðherra hefur enn ekki tilkynnt úrskurð sinn, en fjallað verður um málið í Speglinum. Til stóð að Lilja Alfreðsdóttir menntamálaráðherra ú